E Vakailavotaki Vakacava na Neimami Cakacaka Vakaitalatala?

Keimami dau tabaka qai veisoliyaka e veiyabaki e drau vakacaca na milioni na iVolatabu kei na ivola vakaivolatabu. Era tu e veiyasa i vuravura na neimami valenivolavola kei na vale ni tabaivola keimami tara, keimami cakacaka tale ga kina. Era dau sota e drau vakacaca na udolu na ivavakoso ena vale ni soqoni e tara vakamatau qai veiganiti e vakatokai me Kingdom Hall. Ia era vakailavotaki vakacava?

E qaravi qai tokoni sara ga vakatabakidua na neimami cakacaka ena cau. (2 Korinica 9:7) E volai ena 1879 ena ikarua ni itabataba ni mekesini qo: “Keimami vakabauta ni tokona o JIOVA na tabaki ni ‘Zion’s Watchtower,’ [na yaca ni mekesini qo ena gauna oya] koya gona, ena sega ni cikevi se kerei na veitokoni vakailavo.” Keimami se dei tiko ga ena ituvatuva qori.

E dau vakau vakadodonu na cau ina neimami valenivolavola ni tabana se biu ena kato ni cau era tiko ena Kingdom Hall kece. Ia keimami sega ni dau solia na dua na ikatini, se soli, se kerea me saumi na neimami veiqaravi se ivola. E sega ni saumi na neimami vunau, veivakavulici ena ivavakoso, se veivuke ena tara vale ni sokalou. Ni a tukuna o Jisu: “E soli wale vei kemudou, dou solia wale tale ga.” (Maciu 10:8) O ira kece na veiqaravi tiko vakaitalatala ena neimami valenivolavola ni tabana kei na neimami itikotiko liu, okati kina o ratou na lewe ni iLawalawa Dauvakatulewa ni iVakadinadina i Jiova era sega ni dau saumi.

Na ilavo era cautaki e dau vakayagataki tale ga mera vukei kina na vakaleqai ena leqa tubukoso. Era marau na lotu vaKarisito taumada mera dodoliga vei ira na vakaleqai tu. (Roma 15:26) Keimami cakava tale ga qori vei ira na vakaleqai, me keimami tara tale nodra vale kei na vanua ni sokalou, vakarautaki na kedra, isulu kei na veiqaravi vakavuniwai.