Na Cava e Rawa ni Laurai ena Neimami Website?

A tukuna o Jisu Karisito vei ratou na nona imuri: “Me serau tale ga na nomuni rarama e matadra na tamata, mera raica na nomuni cakacaka vinaka, mera vakalagilagia kina na Tamamuni mai lomalagi.” (Maciu 5:16) Oya na vuna keimami vakayagataka vinaka kina na iyaya vovou me vaka na Internet. Na neimami website na jw.org, e tu kina na ivakamacala me baleta na ka keimami vakabauta kei na neimami cakacaka. Na cava eso na ka e rawa ni laurai kina?

iSau vakaivolatabu ni taro e dau tarogi vakalevu. O na raica kina na isau ni taro bibi eso e dau tarogi. Kena ivakaraitaki na tikidua Ena Rawa ni Oti na Rarawa? kei na Era na Bula Tale na Mate? e rawa ni o raica ena Internet ena 600 vakacaca na vosa. O na raica tale ga kina na iVolatabu na Vakadewa ni Vuravura Vou ena 130 vakacaca na vosa kei na vica na ivola e dau vakayagataki ena kena vulici na iVolatabu me vaka Na Cava Mada e Kaya na iVolatabu?, vaka kina na itabataba vovou ni Vale ni Vakatawa kei na Yadra! E levu vei ira na ivola qori e rawa ni wiliki se rogoci ena Internet, e rawa tale ga ni download ena dua na porokaramu e vakatokai na MP3, PDF, se EPUB. O rawa ni tabaka tale ga eso na tabana mo solia vei ira na tataleitaki ena nodra vosa ga! E tu kina na vidio ena vica vata na vosa vagalu. E rawa ni download se katoni na wili iVolatabu, na drama vakaivolatabu kei na sere totoka mo rogoca ena nomu gauna galala.

Keimami itukutuku na iVakadinadina i Jiova. E tu tale ga ena Internet eso na itukutuku butakatakata kei na so na vidio leleka me baleta na neimami cakacaka e vuravura raraba, ituvaki keimami sotava na iVakadinadina i Jiova, kei na neimami cakacaka ni vakacoko. O rawa ni raica tale ga kina eso na itukutuku me baleta na vanua ena vakayacori kina na soqo ni veiwasewase kei na valenivolavola ni tabana o rawa ni veitaratara kina.

Qori na sala keimami vakacila tiko kina na rarama ni ka dina ina veivanua yawa kei vuravura. E yaga vakalevu qori vei ira na tamata mai na veivanua, wili kina o Antarctica. E neimami masu ni na “tete . . . vakatotolo na vosa i Jiova” ena vuravura kece, me vakalagilagi kina na Kalou.​—2 Cesalonaika 3:1.

• E yaga vakacava na jw.org ena nodra vukei e levu mera mai kila na ka dina ena iVolatabu?

• Na cava o via raica ena neimami website?