Na Cava na Matanitu ni Kalou?

1. Na cava na Matanitu ni Kalou?

Na Matanitu ni Kalou e matanitu vakalomalagi. Ena sosomitaka na veimatanitu kece, ena vakayagataka tale ga na Kalou me vakayacora na lomana e lomalagi kei na vuravura. Qori na itukutuku vinaka me baleta na Matanitu ni Kalou. Sa voleka ni vakaceguya na Matanitu ni Kalou na gagadre ni kawatamata me dua na matanitu vinaka. Ena vakaduavatataki ira kece na lewe i vuravura.​—Wilika Taniela 2:44; Maciu 6:9, 10; 24:14.

Na matanitu e dau liutaka e dua na tui. O Jiova sa lesia na Luvena o Jisu Karisito me Tui ni nona Matanitu.​—Wilika Vakatakila 11:15.

Sarava na vidio Na Cava na Matanitu ni Kalou?

2. Na cava e veiganiti kina me Tui o Jisu?

E veiganiti me Tui na Luve ni Kalou baleta ni yalovinaka, e dei tale ga ena ka dodonu. (Joni 1:14) E tu tale ga vua na kaukaua me veivuke ni na liutaka na vuravura o Jisu mai lomalagi. Ni vakaturi oti, a lako i lomalagi qai dabe me wawa ena ligaimatau i Jiova. (Iperiu 10:12, 13) Oti a qai solia vua na Kalou na lewa me veiliutaki.​—Wilika Taniela 7:13, 14.

3. O cei ena veiliutaki vata kei Jisu?

E dua na ilawalawa era vakatokai “na yalosavasava” era na veiliutaki kei Jisu mai lomalagi. (Taniela 7:27) O iratou na yalosavasava eratou digitaki e liu na yapositolo yalodina i Jisu. Me yacova mai nikua, o Jiova se digitaki ira tiko ga na tagane kei na yalewa yalodina mera yalosavasava. Me vakataki Jisu, era vakaturi ena yago vakayalo.​—Wilika Joni 14:1-3; 1 Korinica 15:42-44.

Era le vica na lako i lomalagi? E vakatokai ira o Jisu me “qelenisipi lailai.” (Luke 12:32) Na kedra iwiliwili e 144,000 ra qai liutaka mai na vuravura kei Jisu.​—Wilika Vakatakila 14:1.

4. Na cava a yaco ni tekivu veiliutaki o Jisu?

A tekivu veiliutaki ena 1914 na Matanitu ni Kalou.a Na imatai ni ka e cakava o Jisu ni sa Tui, oya nona kolotaki Setani kei ira na nona timoni i vuravura. A katakata sara ga o Setani, mani tekivu vakatubuca e vuravura taucoko. (Vakatakila 12:7-10, 12) Me tekivu mai na gauna oya, sa qai levu ga na leqa e sotava na kawatamata. Na ivalu, dausiga, matedewa, kei na uneune era wili kece ena “ivakatakilakila” e dusia ni sa vakarau lewa na ka kece e vuravura na Matanitu ni Kalou.​—Wilika Luke 21:7, 10, 11, 31.

5. Na cava sa vakayacora tiko na Matanitu ni Kalou?

Ena cakacaka vakavunau e vuravura raraba, sa vakaduavatataka tiko kina na Matanitu ni Kalou e dua na isoqosoqo levu mai na veimatanitu. E vica vata na milioni na tamata yalomalumalumu era sa vakamalumalumu tiko ina Matanitu ni Kalou e kena Tui o Jisu. Ena taqomaki ira na Matanitu ni Kalou ena gauna ena vakarusa kina na veika ca ni vuravura qo. O ira gona na vinakata me yaga vei ira na veiliutaki ni Matanitu ni Kalou e bibi mera talairawarawa vei Jisu.​—Wilika Vakatakila 7:9, 14, 16, 17.

Ena loma ni 1,000 na yabaki, na Matanitu ni Kalou ena vakayacora na inaki taumada ni Kalou me baleta na kawatamata. Ena parataisi na vuravura taucoko. Oti ena qai solia lesu o Jisu na veiliutaki ni matanitu vei Tamana. (1 Korinica 15:24-26) O kila e dua o via vakamacalataka vua na veika me baleta na Matanitu ni Kalou?​—Wilika Same 37:10, 11, 29.