Me Sauma na iVolatabu

Na Cava na Matanitu ni Kalou?

Ena veivosakitaki ena ulutaga qo eso na taro o rairai dau lomatarotarotaka tu, e tiko tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kedra isau.

1. Na cava na Matanitu ni Kalou?

Na Matanitu ni Kalou e dua dina na matanitu e tiko mai lomalagi. Ena sosomitaka na matanitu kece e vuravura qai vakayacora na loma ni Kalou mai lomalagi vaka kina e vuravura. Qori sara ga na veiliutaki vinaka eda vinakata tiko.—Wilika Taniela 2:44; Maciu 6:9, 10.

Na matanitu e dau liutaka e dua na tui. O Jiova sa lesia na Luvena o Jisu me Tui ni nona Matanitu.—Wilika Luke 1:30-33.

2. Na cava e veiganiti kina me Tui o Jisu?

E veiganiti me Tui na Luve ni Kalou ni yalomalumalumu, dei ena ka dina, qai tu vua na kaukaua me veivuke. (Maciu 11:28-30) Ni vakaturi oti, a lako i lomalagi qai wawa toka ena liga matau i Jiova. (Iperiu 10:12, 13) Sa qai solia vua na Kalou na lewa me veiliutaki mai lomalagi.—Wilika Taniela 7:13, 14.

3. O cei tale ena veiliutaki vata kei Jisu?

Na Kalou e digitaki ira e dua na ilawalawa era vakatokai “na yalosavasava” mera veiliutaki kei Jisu mai lomalagi. (Taniela 7:27) O ira na yalosavasava era digitaki duadua e liu na yapositolo yalodina i Jisu. Me yacova mai nikua, o Jiova se digitaki ira tiko ga na tagane kei na yalewa yalodina mera yalosavasava. Me vakataki Jisu, era vakaturi ena yago vakayalo.—Wilika Joni 14:1-3; 1 Korinica 15:42-45.

Era le vica era lako i lomalagi? E vakatokai ira o Jisu me “qelenisipi lailai.” (Luke 12:32) Na kedra iwiliwili e 144,000, ra qai veiliutaki kei Jisu mera lewa mai na vuravura.—Wilika Vakatakila 5:9, 10; 14:1.

4. Tekivu veiliutaki ena gauna cava na Matanitu ni Kalou?

A tekivu veiliutaki vakatui o Jisu ena 1914.a Oti ga oya, a kolotaki Setani mai kei ira na nona timoni i vuravura. (Vakatakila 2:7-10, 12) Me tekivu mai na gauna oya sa qai levu ga na leqa e sotava na kawatamata. Na ivalu, uneune, dausiga, matedewa, kei na ivalavala e beci kina na lawa era wili ena ivakatakilakila e dusia ni sa vakarau cava na veika vakavuravura qo. (2 Timoci 3:1-5) O ira kece era via vakalougatataki ena veiliutaki ni Matanitu ni Kalou mera vulica na sala mera imuri kina i Jisu na Tui.—Wilika Luke 21:7, 10, 11, 31, 34, 35.

5. Na cava ena vakayacora na Matanitu ni Kalou?

Na Matanitu ni Kalou sa vukei ira e vica vata na milioni mai na veimatanitu mera vulica na ivalavala ni Kalou, e rawa qori ena vunau e caka tiko e vuravura raraba. (Maciu 24:14) Ni vakarusa na veika vakavuravura qo na Matanitu ni Kalou, era na taqomaki “e dua na isoqosoqo levu” era lewena na imuri yalodina i Jisu.—Wilika Vakatakila 7:9, 10, 13-17.

Na Matanitu ni Kalou ena vukica tiko na vuravura me parataisi ena loma ni 1,000 na yabaki. Oti, sa na qai solia lesu o Jisu na veiliutaki vei Tamana. (1 Korinica 15:24-26) O bau kila e dua o via vakamacalataka vua na veika me baleta na Matanitu ni Kalou?—Wilika Same 37:10, 11, 29.

Me ikuri ni ivakamacala, raica na wase 8 kei na 9 ni ivola qo, Na Cava Sara Mada e Kaya na iVolatabu?, tabaka na iVakadinadina i Jiova.

[iVakamacala e ra]