Tu Vakarau o Timoci me Veivuke

Dua na cauravou e dau tu vakarau me veivuke o Timoci. A sikova e levu na vanua me vukei ira eso tale. Qori e vakainaki kina nona bula. O via rogoca na kena italanoa?—

A susu o Timoci ena siti o Lisitira. Ni se gone, erau sa vakavulici koya na buna o Loi kei Unaisi na tinana ena veika me baleti Jiova. Ni tubucake tiko o Timoci, a vinakata tale ga me vukei ira eso tale mera kilai Jiova.

A se cauravou voli ga o Timoci ena gauna e sureti koya kina o Paula me veitomani ena vanua kece e lai vunau kina. A ciqoma na veisureti o Timoci, a tu vakarau me vukei ira eso tale.

Erau gole o Timoci kei Paula ina siti o Cesalonaika e Masitonia. Dua na vanua yawa me rau taubaletaka, erau na vodo waqa tale ga. Ni rau yaco i Masitonia, rau vukea sara e levu mera kilai Jiova. Ia era cudru eso ra qai via vakamavoataki rau. Qori na vuna erau biubiu kina o Paula kei Timoci me rau lai vunau ena so tale na vanua.

Oti e vica na vula, a kerei Timoci o Paula me lesu i Cesalonaika me lai raica se ra vakacava tiko na mataveitacini. Ena vinakati dina me yaloqaqa o Timoci me lesu ina siti rerevaki ya! A gole ga o Timoci ni nanumi ira na mataveitacini. A marau o Paula ni lesu yani o Timoci qai tukuna nira toso vinaka na mataveitacini e Cesalonaika!

E vica vata na yabaki nodrau cakacaka vata o Paula kei Timoci. A vola ena dua na gauna o Paula ni nuitaki Timoci ga me vukei ira na ivavakoso baleta e lomani Jiova kei ira na mataveitacini.

Vakacava o lomani ira eso tale qai vinakata mo vukei ira mera kilai Jiova?— Ke vaka kina, ena vakainaki nomu bula me vakataki Timoci, o na marautaka tale ga!