Levu Cake o Jisu, Lailai Sobu o Joni

Ni solevutaki oti na Lakosivia ena vulaitubutubu ni 30 G.V., eratou biubiu mai Jerusalemi o Jisu kei na nona tisaipeli. Ia eratou sega ni lesu ina nodratou vale mai Kalili. Eratou lako sara i Jutia, ratou qai papitaisotaki ira e levu e kea. Sa yabaki dua nona cakava tale tiko ga qori o Joni na Dauveipapitaisotaki, era se rairai tiko ga kei koya ena bucabuca ni Uciwai na Joritani eso na nona tisaipeli.

Ia e sega ni veipapitaisotaki o Jisu, eratou vakayacora ga qori na nona tisaipeli ena nona veidusimaki. Ena gauna ni cakacaka vakaitalatala qo i Jisu, erau veivakavulici kei Joni mera veivutunitaka na Jiu nodra beca na veiyalayalati ena Lawa ni Kalou.​—Cakacaka 19:4.

Ia era vuvu na tisaipeli i Joni ra qai kudruvaki Jisu vua: “Rapai, o koya [Jisu] drau a tiko vata . . . sa veipapitaisotaki tiko, ra sa tabili tale ga vua na lewenivanua kece.” (Joni 3:26) E sega ni vuvu o Joni, e marautaka ga na vuavuaivinaka ni cakacaka i Jisu. E vinakata me ratou marau tale ga nona tisaipeli, e tukuna sara vei ratou o Joni: “O kemudou sara ga dou vakadinadinataka noqu kaya, ‘au sega ni Karisito, ia au talai ga meu liu vua.’” Sa qai vakamacalataka vakarawarawa qori ena dua na vosa vakatautauvata: “E taganevou o koya e taura na yalewavou. Ia na itokani ni taganevou, ni tu e kea qai rogoca na domo i taganevou, ena marau vakalevu. E vaka sara ga qori na levu ni noqu marau.”​—Joni 3:28, 29.

Me vaka ga e dua na itokani ni taganevou, a marautaka ena vica na vula yani e liu o Joni me veikilaitaki ratou na nona tisaipeli vei Jisu. Eso qori eratou muri Jisu sara, ni toso na gauna ratou na qai lumuti ena yalo tabu. E vinakata tale ga o Joni mera imuri i Jisu o ira na se muri koya tiko. Na inaki sara ga i Joni me caramaka na sala ena vuku ni cakacaka vakaitalatala i Karisito. E vakamacalataka o Joni: “Ena levu cake tiko ga o koya, au na lailai sobu tiko ga o yau.”​—Joni 3:30.

Dua tale na Joni sa muri Jisu voli mai. Qo na ka e vola me baleta na vanua e lako mai kina o Jisu kei na nona itavi bibi me vakabula na kawatamata: “O koya e lako mai cake e cecere vei ira kece. . . . E lomani Luvena o Tamana, e sa solia na ka kece i ligana. Ena bula tawamudu o koya e vakaraitaka ni vakabauta na Luvena, o koya e talaidredre vua na Luvena ena sega ni vakabulai, ena tiko ga vua na cudru ni Kalou.” (Joni 3:31, 35, 36) E bibi sara ga mera kila na lewenivanua na ka dina qori.

Ni vakaraitaka oti ga o Joni na Dauveipapitaisotaki ni sa na sega ni levu vaka e liu na nona itavi kei na cakacaka, sa vesuki koya o Tui Eroti. O Eroti a tauri Erotiasa, na wati Filipi na tacina vakacabecabe me watina. A vakaraitaka e matanalevu o Joni na nona veibutakoci, mani balati koya i valeniveivesu o Eroti. Ni rogoca o Jisu ni sa vesu o Joni, e biubiu mai Jutia kei ratou na nona tisaipeli ratou qai “gole sara i Kalili.”​—Maciu 4:12; Marika 1:14.