O Joni na Dauveipapitaisotaki e Marau Tiko ga ni Veisau na iTuvaki

O DAU vinakata mo qarava e dua na itavi ena ivavakoso ia o sega ni rawata? De dua na itavi e qarava tiko e dua tale. Se, na ilesilesi o dau qarava tu e liu. Ia o sega ni qarava rawa ena vuku ni tautauvimate, sa toso na yabaki, leqa vakailavo, kei na itavi ena vuvale. Se, o sa rairai biuta na itavi o dau qarava tu ena dua na gauna balavu ni yaco na veisau ena isoqosoqo. Se mani cava e vakavuna, de dua o nanuma ni o sega ni solia tiko nomu vinaka ena nomu qaravi Jiova. Nida dau sotava na ituvaki qori, de dua eda na yalolailai ena so na gauna. Na cava ena vukei iko mo kua ni dau yalolailai, cudru se rarawa? O na marau tiko ga vakacava?

Meda dikeva mada se cava eda vulica vei Joni na Dauveipapitaisotaki me rawa nida marau tiko ga kina. E marautaka vakalevu o Joni na itavi dokai e qarava, ia kena irairai ni sega ni namaka na veika e sotava ena nona qaravi Jiova. De dua a sega ni tadra me balavu nona vesu ni vakatauvatani kei na nona cakacaka vakaitalatala. Ia e sega ni rarawa o Joni, e marau tiko ga ena vo ni nona bula. E rawa vakacava? Eda na rawa ni marau tiko ga vakacava ke da sotava na ituvaki e veivakayalolailaitaki?

ILESILESI MARAUTAKI NEI JONI

Ena vulaitubutubu ni 29 G.V., e tekivu qarava o Joni na nona ilesilesi me vakarautaki ira na lewenivanua ena nona basika na Mesaia. E kaya: “Ni veivutuni, sa voleka na Matanitu vakalomalagi.” (Maciu 3:2; Luke 1:12-17) E levu era vakarorogo. Era gole mai vakayawa e dua na ilala levu mera mai rogoca na itukutuku e kacivaka, levu era veivutuni era papitaiso tale ga. E vakadodonutaki ira tale ga na iliuliu ni lotu era yalododonu vakasivia mera veivutuni, ke sega era na lewai. (Maciu 3:5-12) Ena vulaibotabota ni ika29 G.V., e raica o Joni ni dua dina na itavi bibi ena nona cakacaka vakaitalatala me papitaisotaki Jisu. Tekivu mai na gauna qori, e dusimaka e levu o Joni mera muri Jisu na Mesaia yalataki.—Joni 1:32-37.

Ni raica o Jisu na itavi bibi e qarava o Joni, e kaya: “Vei ira kece na sucu mai, e sega ni dua e uasivi Joni na Dauveipapitaisotaki.” (Maciu 11:11) E sega ni vakabekataki ni marautaka dina o Joni na nona vakalougatataki. Levu tale ga vei keda nikua e vakalougatataki keda vakalevu o Jiova me vakataki Joni. Kena ivakaraitaki e dua na tacida tagane o Terry, sa sivia ni 50 na yabaki nodrau veiqaravi tu vakatabakidua kei watina o Sandra. E kaya o Terry: “Levu dina na itavi dokai au qarava. Au a painia, veiqaravi e Peceli, painia lavotaki, ivakatawa ni tabacakacaka, ivakatawa ni tikina, qo au sa painia lavotaki tale.” Dua na ka marautaki meda lesi ena itavi ena isoqosoqo i Jiova, ia eda vulica ena ivakaraitaki i Joni ni vinakati na sasaga meda marautaka tiko ga na noda veiqaravi ni veisau na ituvaki.

MAREQETA NA ITAVI E LESIA O JIOVA

E marautaka tiko ga vakacava o Joni na Dauveipapitaisotaki na nona ilesilesi? E mareqeta vakalevu na itavi dokai e lesi vua. Ni papitaiso oti o Jisu, sa tekivu lailai na iwiliwili ni tisaipeli i Joni, ia e tubu cake na iwiliwili ni tisaipeli i Jisu. Eratou kauai ena tikina qo na nona tisaipeli, ratou mani kaya vua: “Sa veipapitaisotaki tiko [o koya], ra sa tabili tale ga vua na lewenivanua kece.” (Joni 3:26) E kaya o Joni: “E taganevou o koya e taura na yalewavou. Ia na itokani ni taganevou, ni tu e kea qai rogoca na domo i taganevou, ena marau vakalevu. E vaka sara ga qori na levu ni noqu marau.” (Joni 3:29) E sega ni vuvutaki Jisu o Joni, se nanuma ni sega ni bibi na itavi e lesi vua ni vakatauvatani kei na bibi ni itavi e lesi vei Jisu. Ia e marau tiko ga o Joni ni mareqeta na nona itavi me “itokani ni taganevou.”

E levu na ka e vakuai koya kina o Joni ena nona ilesilesi, ia e marau qai lomavakacegu tiko ga ni donu nona rai. Kena ivakaraitaki, e Nasaraiti ena gauna e sucu kina. E tabu gona me gunu waini. (Luke 1:15) E bula rawarawa ga o Joni, e tukuna o Jisu me baleti koya: “E sega ni kana se gunu” o Joni. Ia vakacava o Jisu kei ratou na nona tisaipeli? E sega ni dua na ka e tabu vei ratou me vakataki ira na Nasaraiti. (Maciu 11:18, 19) Kena ikuri, e sega ni bau cakava o Joni e dua na cakamana, ia e kila vinaka tu ni soli vei ratou na tisaipeli i Jisu kei na so tale na nona tisaipeli na kaukaua ni cakamana. (Maciu 10:1; Joni 10:41) Vakacava e vakasamataka vakalevu o Joni na ka eratou rawata na nona tisaipeli kei na ka eratou rawata na tisaipeli i Jisu? Sega, e qarava tiko ga ena yalodina na itavi e lesia vua o Jiova.

Ke da mareqeta tale ga na itavi e lesia vei keda o Jiova ena gauna qo, eda na marau. E kaya o Terry sa cavuti oti mai: “Au saga meu qarava vinaka na itavi kece e lesi vei au.” Ni vakasamataka lesu nona veiqaravi vakatabakidua, e kaya, “Au sega ni veivutunitaka e dua na ka, ia e levu dina na ka au marautaka.”

Eda na marau vakalevu ke da dau vakasamataka na vuna e ka dokai kina na ilesilesi kece e lesia vei keda o Jiova. E dua dina na ka dokai meda “cakacaka vata kei na Kalou.” (1 Kor. 3:9) Ena rairai vinaka tu ga na iyaya eda mareqeta ke da maroroya vinaka. E va tale ga qori na noda ilesilesi, eda na marautaka tiko ga ke da dau vakasamataka ni ka dokai dina meda cakacaka vata kei Jiova. Eda na sega ni vakatauvatana na ka eda rawata ena noda veiqaravi. Eda na sega tale ga ni nanuma ni bibi ga na itavi e lesia o Jiova vei ira na tacida, ia e sega ni bibi na kena e lesia vei keda.—Kala. 6:4.

KAUAITAKA TIKO GA NA VEIKA VAKAYALO

De dua e sa kila tiko o Joni ni na sega ni balavu sara na nona cakacaka vakaitalatala, ia kena irairai ni sega tale ga ni tadra me veisau vakasauri na kena ituvaki. (Joni 3:30) Ena 30 G.V., ni oti e rauta ni ono na vula nona papitaisotaki Jisu, e biuti koya e valeniveivesu o Tui Eroti. Ia e cakava tiko ga na ka e rawata me vunautaka na ka dodonu. (Mari. 6:17-20) Na cava e marau tiko ga kina o Joni ni veisau na kena ituvaki? Ni kauaitaka tiko ga na veika vakayalo.

Ni tiko e valeniveivesu o Joni, e dau talanoataki vua na toso ni cakacaka vakaitalatala i Jisu. (Maciu 11:2; Luke 7:18) E vakadeitaka o Joni ni o Jisu na Mesaia, ia de dua ena vaqaqa se sala cava ena vakayacora kina o Jisu na ka kece e tukuna na iVolatabu me baleta na Mesaia. Ena taroga beka o Joni: Au kila ni na tui na Mesaia, vakacava sa vakarau veiliutaki? Vakacava ena sereki au mai valeniveivesu? Ni via kila sara ga o Joni na ka ena cakava o Jisu, e tala e rua na nona tisaipeli me rau lai tarogi koya: “O kemuni o koya ena lako mai, se me keimami waraka e dua tale?” (Luke 7:19) Ni rau lesu yani, e vakarorogo matua o Joni ni rau talanoataka tiko na tisaipeli na veivakabulai vakacakamana i Jisu, kei na ka e tukuna mai: “Era sa rai na mataboko, era lako na lokiloki, era vakasavasavataki na vukavuka, era rogo na didivara, era vakaturi na mate, sa tukuni tale ga na itukutuku vinaka vei ira na dravudravua.”—Luke 7:20-22.

Ena vakayaloqaqataki Joni sara ga ni rogoca na italanoa qori. E vakadeitaka ni sa vakayacora tiko o Jisu na parofisai me baleta na Mesaia. Ena sega ni sereki Joni mai valeniveivesu o Jisu, ia e kila vinaka tu o Joni ni sega ni tawayaga na nona cakacaka vakaitalatala. E veisau na kena ituvaki, ia e marau tiko ga.

Me vakataki Joni, ke da kauaitaka tiko ga na veika vakayalo, eda na marau tiko ga, vosovoso tale ga. (Kolo. 1:9-11) Eda na rawata vakacava? Nida wilika e veisiga na iVolatabu da qai vakasamataka vakatitobu, eda na kila kina ni bibi kece na itavi eda qarava vei Jiova. (1 Kor. 15:58) E kaya o Sandra: “Niu wilika e dua na wase ni iVolatabu e veisiga, au toro volekati Jiova. E vukei au meu vakasamataki koya vakalevu, sega ni o yau.” Nida vakawilika tale ga na ripote ni cakacaka ni Matanitu, eda na sega ni vakasamataka vakalevu na keda ituvaki, ia eda na vakasamataki Jiova ga kei na ka sa cakava tiko. E kaya o Sandra: “Na porokaramu ni JW Broadcasting^® e veivula e uqeti keda meda kabita dei na isoqosoqo, eda na marautaka tiko ga na noda ilesilesi.”

E tiko vei Joni na “yalo kei na kaukaua vakataki Ilaija” ena gauna lekaleka e vunau voli kina. Me vakataki Ilaija, e “tamata ga vakataki keda” o Joni. (Luke 1:17; Jeme. 5:17) Ke veisau mada ga na keda ituvaki, eda na marautaka tiko ga na noda ilesilesi ke da vakatotomuria e rua na ka e cakava o Joni. Kena imatai, e mareqeta na nona lesilesi, kei na kena ikarua e kauaitaka tiko ga na ka vakayalo.