Wase e 23

Vuqa Tale na Cakamana mai Kapenaumi

NA SIGA ni Vakacecegu ni sa oti kina nona kacivi iratou na i matai ni lewe va na nona tisaipeli​—ko Pita, Adriu, Jemesa, kei Joni​—⁠eratou curu kece yani ena dua na valenilotu mai Kapenaumi. Sa tekivu veivakatavulici e ke ko Jisu, era sa kurabui na tamata ni vakatavulici ira o koya me vaka e dua sa tu vua na lewa ka sega ni vakataki ira na vunivola.

Ena Siga ni Vakacecegu oqo e tiko voli e kea e dua na tagane ka curumi koya voli na timoni. E sega soti ni dede, sa qoqolou vakadomoilevu: “Ulei, a cava vei kedatou, i Jisu na kai Nasareci? ko sa lako beka mai me rawai keitou? au sa kilai iko, na nona Le Dua Yalosavasava na Kalou.”

Na timoni e curuma na tamata oqo e dua vei ira na agilosi i Setani. Sa qai kaya ko Jisu, ni vunauca na timoni: “Mo galu ga, ka lako tani mai vua.”

Io, sa qai bitabitalaka na tagane oqo na timoni, ka qoqolou ena domona levu. Sa qai lako tani mai vua na tagane ka sega ni vakamavoataki koya. Era kurabui kecega na tamata! “Na ka cava beka oqo?” era veitarogi vakataki ira. “Ka ni sa vakarota vakaturaga ko koya vei ira na yalo velavela, a ra sa talairawarawa vua.” Sa rogovaki na kena i rogorogo ki na veiyasana kecega sa vakavolivolita na vanua o ya.

Eratou sa qai biuta na valenilotu, sa qai lako yani ko Jisu kei iratou na nona tisaipeli ki na vale i Saimoni, se ko Pita. Eke e davo bibi koto ena katakata sivia na tina i wati Pita. ‘Yalovinaka mo ni vukei koya,’ eratou vakamasuta. Sa qai lako yani ko Jisu, sa taura cake na ligana, ka vakaduria cake. Sa takali vakasauri nona tauvimate ka vakarautaka sara na kedratou!

Ia ni sa dromu na siga, sa ra tekivu lako mai na tamata ena vale i Pita ka kauta mai na nodra tauvimate mai na veivanua kecega. E sega ni dede sa ra soqoni vata kecega na lewe ni koro ena mata ni katuba! Sa qai vakabula na nodra tauvimate kecega ko Jisu, se mataqali mate cava ga e tauvi ira. E sereki ira mada ga na curumi timoni. Ni ra lako tani, era sa qolouvaka na timoni ka vakasevi ira o koya: “. . . Sa i kemuni ga na Luve ni Kalou.” Ia e vunauci ira ko Jisu ka sega ni laivi ira me ra vosa ni ra sa kila ni o koya na Karisito. Marika 1:21-34; Luke 4:31-41; Maciu 8:14-17.

▪ Na cava e yaco ena loma ni valenilotu ena Siga ni Vakacecegu ni sa kacivi iratou oti na lewe va nona tisaipeli ko Jisu?

▪ E vei na vanua a lako yani kina ko Jisu ni sa lako tani mai na valenilotu, ia na cakamana cava e qai vakayacora mai kea?

▪ Na cava e qai yaco tale e muri ena yakavibogi ga o ya?