Tokoni ni Noda Cakacaka

SA YACOVA na “veivanua yawa sara kei vuravura” noda vunautaka na itukutuku vinaka na iVakadinadina i Jiova, me salavata kei na parofisai i Jisu me baleta na iotioti ni veisiga. (Caka. 1:8; Maciu 24:14) Eda vakayacora qo nida solia wale noda gauna kei na igu meda vota na veika vakayalo. Eda nuitaki Jiova me vakarautaka na ka meda bula kina nida cakacaka vata kei koya, meda vakaliuca kina na Matanitu ni Kalou. (Maciu 6:25-34; 1 Kor. 3:5-9) Na vuavuaivinaka ni noda cakacaka e dusia na nona veivakadonui kei na nona veivakalougatataki.

TOKONI NI NODA CAKACAKA E VURAVURA RARABA

² Nida vunautaka na itukutuku vinaka da qai veisoliyaka wale na ivola vakaivolatabu, era taroga kina eso: “E vakailavotaki vakacava?” E vinakati na ilavo me vakarautaki qai tabaki na iVolatabu kei na ivola vakaivolatabu. E vinakati tale ga na ilavo me tara qai qaravi kina na Peceli e veiyasa i vuravura, mera tiko kina o ira na qarava na misini ni tabaivola, na cakacaka vakavunau, kei na so tale na sala me vakatetei kina na itukutuku vinaka. Kena ikuri, e vakarautaki eso na veivuke vei ira na ivakatawa ni tabacakacaka, daukaulotu, painia lavotaki, kei ira na dauveiqaravi lavotaki vakatabakidua. E macala vakasigalevu ni kena tokoni na cakacaka vakaitalatala ena noda vanua se vanuatani ena vinakati kina e levu sara na ilavo. Ia e kau mai vei na ilavo qo?

³ Levu era marautaka mera tokona ena cau na noda cakacaka e vuravura raraba. Eda dau tokona ga vakalevu noda cakacaka, eso era vakauta nodra cau ina valenivolavola ni tabana ni iVakadinadina i Jiova ena vanua era tiko kina. Eda vakaraitaka na lomasoli vata ga era vakaraitaka na tamata ni Kalou ena gauna e liu, me tara kina na vale ni sokalou. (Lako 35:20-29; 1 Vei. 29:9) Eso era vola nodra wili ina isoqosoqo. Ia na vo ni cau lalai era solia na mataveitacini, na ivavakoso, kei na tabacakacaka. Ni soqoni vata, sa tokoni kina na cakacaka vakaitalatala.

⁴ Era okata na iVakadinadina i Jiova me ka dokai na nodra vakayagataka nodra ilavo kei na iyau ena cakacaka qo. E dau kauta voli o Jisu kei ratou nona tisaipeli e dua na kato ni ilavo me saumi kina na veika ratou vinakata. (Joni 13:29) Na iVolatabu e tukuna tale ga eso na marama era tokona vakailavo na cakacaka vakaitalatala i Jisu kei ratou na nona tisaipeli. (Mari. 15:40, 41; Luke 8:3) E marautaka na yapositolo o Paula na nodra cau o ira na kauaitaka na vakatetei ni itukutuku vinaka, era via tokona tale ga nona cakacaka vakaitalatala. (Fpai. 4:14-16; 1 Ces. 2:9) Era muria tiko ga na iVakadinadina i Jiova na ivakaraitaki vinaka kece qo nira veiqaravi ena yalogu kei na lomasavu. Ena sala qo era “gunuva wale [kina] na wai ni bula” na yalomalumalumu ena veivanua kece.—Vkta. 22:17.

TOKONI VAKAILAVO NA IVAVAKOSO

⁵ E saumi tale ga ena cau na veika e vinakati ena ivavakoso. E sega ni kau wavoki na veleti ni soli, e sega ni kerei e dua na ikatini, e sega tale ga ni lavaki na ilavo me soli. E vakarautaki ga na kato ni cau ena vanua ni soqoni me rawa ni “cakava na tamata yadua na ka e vakadeitaka e lomana.”—2 Kor. 9:7.

⁶ Na ilavo e cautaki ena saumi kina na qaravi ni Vale ni Soqoni kei na kena vakavinakataki. E rawa ni vakatulewataka na ilawalawa qase me vakau eso na cau ina valenivolavola ni iVakadinadina i Jiova ena nodra vanua me tokona na cakacaka e vuravura raraba. Me qai vakarautaki e dua na kena inakinaki me rawa ni vakadonuya na ivavakoso. Ena sala qo era cau wasoma kina e levu na ivavakoso ena cakacaka e vuravura raraba. So na gauna e dau basika na ituvaki tawanamaki me vakarogoi kina ena ivavakoso ni vinakati na cau. Ia ke da dau kauaitaka na veika me saumi, ena sega ni kacivaki wasoma na cau ena ivavakoso.

MAROROI NI CAU

⁷ Ni oti na soqoni kece, me rau kumuna na ilavo mai na kato ni cau e rua na tacida tagane me rau qai vola na kena levu. (2 Tui 12:9, 10; 2 Kor. 8:20) Ena raica na ilawalawa qase me maroroi vinaka na ilavo qo me yacova ni vakau ina valenivolavola ni tabana se vakayagataki ena veika e vinakati ena ivavakoso. Na tacida e qarava tiko na akaude ena vakarautaka e dua na itukutuku vakailavo e veivula me vakarogoi ena ivavakoso, ena tuvanaka tale ga na kodineita ni ilawalawa qase me dikevi na veika vakailavo ena veiyatolu na vula.

VEIKA VAKAILAVO ME SAUMA NA TABACAKACAKA

⁸ E dau saumi na veika e vakayagataki ena soqo ni tabacakacaka kei na soqo ni veiwasewase ena nodra cau na iVakadinadina i Jiova ena loma ni tabacakacaka oya. E dau vakarautaki na kato ni cau ena vanua ni soqo me cautaki kina na ilavo me baleta na tabacakacaka. Kena ikuri e rawa ni cau na ivavakoso ena so tale na ka e vinakati me saumi vakailavo.

⁹ E kena ivakarau me sauma na soqo ni tabacakacaka yadua na veika e vinakati me cicivaki kina na soqo, na vo ni ilavo me cautaki ena cakacaka e vuravura raraba. Ia ke sega ni veirauti na ilavo e tu ena akaude ni tabacakacaka me saumi vakaoti kina na ka e dodonu me saumi ena soqo, se me tekivu rawa kina na soqo ni tabacakacaka e tarava, me vaka na ilavo me ivakadei ni kena vakayagataki e dua na vanua, e rawa ni dusimaka na ivakatawa ni tabacakacaka me kacivaki na bibi ni cau ena ivavakoso. Mera veivosakitaka qori na ilawalawa qase ni ivavakoso yadua, mera vakadeitaka se vica e rawa ni cautaka na nodra ivavakoso ina akaude ni tabacakacaka. Era na vakarogoya qo ina ivavakoso ena dua na inakinaki.

¹⁰ Ke vinakati me qaravi eso na ka vakailavo ena tabacakacaka, mera bose vata na qase ena tabacakacaka ya ena gauna ni soqo ni tabacakacaka. Mera cakava na qase na inakinaki ni ilavo me cicivaki kina na soqo ni tabacakacaka. Me volai na kena levu, mera vakadonuya tale ga ni bera ni vakayagataki.

¹¹ Ena tuvanaki me dikevi na akaude ni tabacakacaka.

NODRA VUKEI NA DRAVUDRAVUA

¹² Dua na inaki ni kato ni ilavo e dau maroroya o Jisu kei ratou nona tisaipeli, mera vukei kina na dravudravua. (Mari. 14:3-5; Joni 13:29) Qori se nodra itavi tiko ga na lotu vaKarisito ena gauna qo, ni kaya o Jisu: “Era na tiko ga kei kemudou na dravudravua.” (Mari. 14:7) Era qarava vakacava nikua na iVakadinadina i Jiova na itavi qo?

¹³ So na gauna era na vinakata na veivuke eso na tacida yalodina ena ivavakoso ena vuku ni kedra ituvaki vaqase, malumalumu, se so na ituvaki era sega ni lewa rawa. Nira kila qori na lewe ni vuvale, wekadra kei na so tale, e rawa ni uqeti ira mera veivuke. Qo e salavata kei na ka e vola na yapositolo o Joni: “Ke dua e tu vua na ka kece ni vuravura qo, qai raica na tacina ni leqa tu ia e bese ni yalololoma vua, ena kaya vakacava ni lomana na Kalou? Ragone, meda kua ni loloma ga e gusu se na vosa, me vakavotukana, me dina na noda loloma.” (1 Joni 3:17, 18; 2 Ces. 3:6-12) Na sokalou dina e okati kina na nodra kauaitaki na yalodina ena ivavakoso era vinakata tu na veivuke.—Jeme. 1:27; 2:14-17.

¹⁴ Ena imatai ni ivola i Paula vei Timoci, e vakamacalataka kina nodra vukei vakayago o ira na dravudravua. O na raica na nona ivakasala ena 1 Timoci 5:3-21. E nodra itavi yadua na lotu vaKarisito mera vukei ira na lewe ni nodra vuvale. O ira na itabaqase se malumalumu e dodonu mera vukei vei ira na luvedra, makubudra, se o ira na wekadra voleka. So na veivuke e dau vakarautaka na matanitu se tabana ni veivuke tale eso. E rawa nira veivosakitaka na wekadra voleka. So na ituvaki ena vinakati mera dodoliga na ivavakoso ena nodra vukei na tacida sa dede nodra veiqaravi ena yalodina. Ke sega ni dua na wekana voleka, e sega tale ga ni vakarautaki e dua na veivuke ni matanitu, e rawa ni vakatura na ilawalawa qase eso na sala ni veivuke. E ka dokai vei ira na lotu vaKarisito mera vota na nodra iyau vei ira na vakaleqai.

¹⁵ Levu na tacida era vinakata noda veivuke ena vuku ni veivakacacani, ivalu, uneune, waluvu, dausiga, kei na so tale na ituvaki dredre. (Maciu 24:7-9) Era na rairai ligalala kece na lewe ni ivavakoso qai sega ni rawa nira veivuke. Ena vakarautaka gona na iLawalawa Dauvakatulewa mera veivuke na mataveitacini mai vanuatani. Qo e tautauvata kei na nodra cau kakana na lotu vaKarisito mai Esia Lailai mera vukei kina na mataveitacini e Jutia ena gauna ni dausiga. (1 Kor. 16:1-4; 2 Kor. 9:1-5) Nida vakatotomuri ira, eda vakaraitaka kina nida lomani ira na tacida, eda tisaipeli dina i Jisu Karisito.—Joni 13:35.

VAKARAUTAKI NA IVOLA

¹⁶ E yaga vakalevu ena vakatetei ni itukutuku vinaka ni Matanitu ni Kalou na iVolatabu kei na ivola vakaivolatabu. Ena lesia na ilawalawa qase e dua na dauveiqaravi ni ivavakoso me qarava na ivola. Era raica vakabibi na nodra itavi na tacida era lesi ena itavi qo. Era na vola vakamatata na levu ni ivola e tiko mera vakayagataka na lewe ni ivavakoso.

¹⁷ Nida lotu vaKarisito yalayala, eda kila ni isolisoli ni Kalou na noda gauna, noda vakasama, kaukaua, taledi, iyau, kei na noda bula, e dodonu gona meda vakayagataka ena nona cakacaka. (Luke 17:10; 1 Kor. 4:7) Nida vakayagataka vinaka noda iyau, eda sa vakaraitaka tiko na levu ni noda lomani Jiova. Eda vinakata meda vakayagataka noda iyau ena sala e dokai kina o Jiova, nida kila ni marautaka o koya na ka eda solia mai vu ni lomada. (Vkai. 3:9; Mari. 14:3-9; Luke 21:1-4; Kolo. 3:23, 24) E kaya o Jisu: “E soli wale vei kemudou, dou solia wale tale ga.” (Maciu 10:8) Eda na marau vakalevu nida soli keda kei na noda iyau vei Jiova.—Caka. 20:35.