Tokoni Vakailavo ena Veika e Cautaki ena Lomasoli

Na cakacaka kece sa vakamacalataki mai era vakayacora na bole cakacaka, e vakalailaitaki kina na ilavo e vakayagataki. Era vakayacora wale na iVakadinadina i Jiova na nodra vunau kei na nodra soli ivola e veivale. Era sauma ga mai na nodra taga na veika e gadrevi me saumi. Na qase era liutaka na qaravi ni ivavakoso, kei na dauveiqaravi vakaitalatala era tokoni ira, era sega ni saumi ena veika era cakava. Na ka kece e baleti ira era sauma ga mai na nodra taga.

O ira mada ga na lewe ni iLawalawa Dauvakatulewa kei ira kece na cakacaka vakatabakidua ena kena vakarautaki kei na kena tabaki na iVolatabu kei na ivola vakaivolatabu e vakarautaki ga na nodra bure kei na kedra kakana kei na dua na ilavo lailai mera volia kina na iyaya lalai me baleti ira. E dina tale ga oqo vei ira na ivakatawa dauveilakoyaki era veiqaravi vakatabakidua.

E taba na neimami ivola me vukei ira na via kila dina na iVolatabu. Na isau vakailavo ni iyaya ni cakacaka, na tabaki ni ivola, kei na kena vakau yani e saumi ga ena veika era cautaka ena lomasoli na tamata tataleitaki, qai kena ikuri na nodra cau sara ga na iVakadinadina i Jiova, na veika era sainitaka vakaivola me soli ina isoqosoqo kei na so tale na ka.

Ena nodra soqoni kece na iVakadinadina i Jiova, se soqoni lalai se lelevu, ena vakarautaki na kato ni cau vei ira na via cau. E sega ni dau caka na soli. Sega na veika e lavaki se ikatini me saumi. E muri ga na veika sa tukuni tu ena iVolatabu, ni tamata yadua me soli ka mai na ka sa vinakata na yalona.​—2 Korinica 8:12; 9:7.

• E tokoni vakailavo vakacava na nodra cakacaka kece na iVakadinadina i Jiova?