“Cakava na ka Kece me Vakalagilagi Kina na Kalou”

NIDA tamata yalayala i Jiova, e noda itavi meda vakaraitaka nona lagilagi ena ka kece eda tukuna kei na ka eda cakava. E cavuta na yapositolo o Paula e dua na ivakavuvuli: “Se oni kana se gunu se cava ga oni cakava, moni cakava na ka kece me vakalagilagi kina na Kalou.” (1 Kor. 10:31) Qo e okati kina noda muria tiko ga na ivakatagedegede savasava i Jiova. (Kolo. 3:10) E dodonu meda vakatotomuria na Kalou nida nona dauveiqaravi.—Efeso 5:1, 2.

² E vola na yapositolo o Pita na tikina bibi qo vei ira na lotu vaKarisito: “Me vaka na gone talairawarawa, ni kua ni muria tiko na gagadre ca a tu vei kemuni e liu ni oni a lecaika, ia me vaka ni Kalou Savasava o koya e kacivi kemuni, me savasava tale ga na nomuni ivalavala kece, ni sa volai: ‘Moni savasava niu savasava o yau.’” (1 Pita 1:14-16) Me vakataki ira na Isireli ena gauna e liu, e dodonu mera savasava tiko ga na lewe kece ni ivavakoso vaKarisito. Kena ibalebale mera kua ni tauviduka, me kua ni takavi ira na duka ni ivalavala ca kei na veika vakavuravura. Nira cakava qo, sa rawa nira qaravi Jiova.—Lako 20:5.

³ E rawa ni savasava e dua ni muria voleka na lawa i Jiova kei na ivakavuvuli e volai tu vakamatata ena iVolatabu. (2 Tim. 3:16) Nida vulica na iVolatabu eda na kilai Jiova kei na nona ivalavala, eda na volekati koya tale ga. Eda raica rawa ni bibi ena noda bula na vakaliuci ni Matanitu ni Kalou kei na vakayacori ni loma i Jiova. (Maciu 6:33; Roma 12:2) E uqeti keda meda tokara na tamata vou.—Efeso 4:22-24.

SAVASAVA VAKAYALO, SAVASAVA NODA ITOVO

⁴ E sega ni rawarawa meda muria tiko ga na ivakatagedegede savasava i Jiova. Na keda meca o Setani na Tevoro, e dau saga me vakamuai keda tani mai na dina. Kena ikuri nida bula tu ena vuravura ca qai dau malele na lomada ina ivalavala ca. Ena vinakati meda vala vakayalo. E tukuna na iVolatabu meda kua ni kurabui nida tusaqati se vakacacani. Eda vakacacani ena vuku ni ka dodonu. (2 Tim. 3:12) Ia meda marau nida vakacacani, qo e ivakadinadina nida sa cakava tiko na loma ni Kalou.—1 Pita 3:14-16; 4:12, 14-16.

⁵ E uasivi o Jisu, ia e vulica na talairawarawa ena veika dredre e sotava. E sega vakadua ni vakamalumalumu ena veitemaki i Setani se me via vaqara itutu. (Maciu 4:1-11; Joni 6:15) E sega ni bau vakasamataka vakalailai me soro. E cati koya o vuravura ena vuku ni nona yalodina, ia e tokona tu ga na ivakatagedegede savasava i Jiova. Ni bera ni mate, e vakasalataki ratou nona tisaipeli ni na cati ratou tale ga o vuravura. Tekivu mai na gauna oya na nodra vakacacani na imuri i Karisito. Ia eratou yaloqaqa ni ratou kila ni sa vakamalumalumutaki vuravura na Luve ni Kalou.—Joni 15:19; 16:33; 17:16.

⁶ Nida sega ni vakavuravura, e dodonu meda tokona na ivakatagedegede savasava i Jiova me vaka ga e cakava na noda Turaga. Eda na sega ni vakaitavi ena veika vakapolitiki kei na sasaga vakatamata, e dodonu meda cata na itovo torosobu ni vuravura qo. Meda raica vakabibi na ivakasala e volai ena Jemesa 1:21 e kaya: “Ni biuta tani na ka kece e dukadukali kei na ka ca kece qai ciqoma ena yalomalua na kena teivaki vei kemuni na vosa ni Kalou moni vakabulai kina.” Nida vuli vakataki keda da qai tiko ena soqoni, ena ‘teivaki na vosa ni Kalou’ ena noda vakasama kei na lomada, eda na sega ni galeleta kina na veika vakavuravura. E vola o Jemesa: “Oni sega ni kila ni veimecaki kei na Kalou na veitokani kei vuravura? O koya e via veitokani kei vuravura e vakavuna ga me meca ni Kalou.” (Jeme. 4:4) Oya na vuna e vakasalataki keda kina na iVolatabu meda muria tiko ga na ivakatagedegede savasava i Jiova da qai tawasei keda mai vuravura.

⁷ E vakasalataki keda na Vosa ni Kalou meda qarauna na ivalavala vakamadua qai dukadukali. E tukuna vei keda: “Me vaka ni oni dauveiqaravi ni Kalou, me kua mada ga ni cavuti ena kemuni maliwa na veiyacovi tawadodonu, na ka dukadukali kece se kocokoco.” (Efeso 5:3) O koya gona, meda kua sara ni vakasamataka na veika e vakasisila, e vakamadua, se lolovira, meda kua tale ga ni veivosakitaka. Qo e vakaraitaka nida via muria na ivakatagedegede savasava i Jiova.

SAVASAVA VAKAYAGO

⁸ E bibi tale ga meda savasava vakayago. E Isireli makawa, e vinakata na Kalou savasava me savasava na keba. E dodonu tale ga meda savasava, “me kua ni raica kina [o Jiova] e dua na ka ca” vei keda.—Vkru. 23:14.

⁹ Ena iVolatabu, e veisemati na savasava vakayalo kei na savasava vakayago. E vola o Paula: “Kemuni na wekaqu lomani, ena vuku ni vosa ni yalayala qo, meda vakasavasavataki keda mai na dukadukali kece vakayago kei na dukadukali vakayalo, da qai cakava tiko ga qori ena noda rerevaka na Kalou.” (2 Kor. 7:1) Era na saga gona na lotu vaKarisito dina mera savasava tiko ga nira savata nodra isulu ra qai sili wasoma. E duidui na vanua eda bula kina, ia eda rawa ni savasava tiko ga wili kina o ira na luveda, nida vakayagataka na wai kei na sovu.

¹⁰ Nida vunau vakalevu e veivale, era sa kilai keda o ira eda tiko veivolekati. Ni maqosa qai savasava na noda lomanivale kei na tautuba, eda sa vunau tiko vei ira. Qo e rawa ni vakaitavi kina na lewenivuvale yadua. E dodonu mera kauaitaka vakalevu na tacida tagane na irairai ni vale kei na lomanibai, nida na vakacaucautaki kina. Era kila na ulunivuvale ni salavata qo kei na nodra kauaitaka na veika vakayalo, ena kilai kina nira lewa vinaka na nodra vuvale. (1 Tim. 3:4, 12) E tiko tale ga nodra itavi na tacida yalewa, vakabibi e lomanivale. (Taito 2:4, 5) O ira na gone era vakavulici vinaka era na qarauna mera dau savasava, me savasava tale ga qai maqosa na nodra rumu. Ena sala qo era tokona tiko kina na lewenivuvale kece na ivakarau ni bula savasava ena vuravura vou ni sa veiliutaki na Matanitu ni Kalou.

¹¹ Levu era vakayagataka nodra motoka ena soqoni. Ena so na vanua, e sala sara ga ni veilakoyaki ena cakacaka vakavunau na motoka. E dodonu gona me savasava, me tu vinaka tale ga. Me laurai ena noda vale kei na noda motoka nida lewe ni isoqosoqo savasava i Jiova. E dodonu tale ga me savasava noda kato ni vunau kei na noda iVolatabu.

¹² Na noda isulusulu kei na sasauni e dodonu me salavata kei na ka e vinakata na Kalou. Eda dau kauaitaka noda isulusulu nida sikova e dua e vakaitutu. E dodonu me bibi sara nida matataki Jiova ena cakacaka vakaitalatala se vosa ena buturara! Na noda isulusulu kei na sasauni e rawa ni taleitaki se cati kina na sokalou savasava. Ena sega gona ni ka vakayalomatua me sakuca se tawaveinanumi na keda irairai. (Maika 6:8; 1 Kor. 10:31-33; 1 Tim. 2:9, 10) Nida vakavakarau gona ena cakacaka vakavunau, soqoni vakaivavakoso, soqo ni tabacakacaka, se soqo ni veiwasewase, meda nanuma na ka e kaya na iVolatabu me baleta na savasava vakayago kei na keda irairai. Eda vinakata me dokai qai vakalagilagi tiko ga o Jiova.

¹³ Meda nanuma tale ga qori nida sikova na valenivolavola ni tabana ni iVakadinadina i Jiova. Kua ni guilecava na yaca Peceli, e kena ibalebale “Vale ni Kalou.” Koya gona, na noda isulusulu kei na noda itovo me tautauvata ga nida dau tiko ena soqoni.

¹⁴ Ena noda gauna galala, e dodonu meda kauaitaka na noda isulusulu kei na sasauni. Meda taroga, ‘Vakacava au na doudou ni vunau tawalokuci?’

VAKACEGU KEI NA KA NI VEIVAKAMARAUTAKI

¹⁵ E bibi me tiko na gauna ni vakacegu. O Jisu mada ga e sureti ratou nona tisaipeli me ratou lai “vakacegu mada vakalailai” ena dua na vanua lala. (Mari. 6:31) E vinaka me tiko na gauna ni vakacegu se ka ni veivakamarautaki e veiganiti. E rawa ni vakabulabulataki keda meda tomana tiko ga kina na cakacaka bibi meda qarava.

¹⁶ E levu sara na ka ni veivakamarautaki nikua, e bibi kina meda vakatulewa vinaka nida vakaraitaka na vuku vakalou ena ka eda cakava. E vinaka me tiko na gauna ni marau, meda kua ga ni vakaliuca. Eda vakasalataki ena “iotioti ni veisiga,” ni levu era na “lomana ga na marau era sega ni lomana na Kalou.” (2 Tim. 3:1, 4) Mera qarauna gona o ira na vinakata mera muria dei na ivakatagedegede savasava i Jiova na ka e okati me ka ni veivakamarautaki, se ivakawele ena gauna qo.

¹⁷ Era qarauna vinaka sara na lotu vaKarisito taumada na qarai ni marau ena gauna ya. Ena nodra raraniqito na kai Roma, e dau okati me ka ni veivakamarautaki na kena saravi na veivakalolomataki. E dau vakaraitaki kina na ivalavala kaukaua, vakadavedra, kei na veiyacovi tawadodonu, ia era sega ni dau lakova na lotu vaKarisito taumada. E tautauvata sara ga qori kei na ka ni veivakamarautaki ena gauna qo me vakacegui kina na gagadre ni tamata. E dodonu meda “qarauna matua” na noda ilakolako, nida cata na ka ni veivakamarautaki torosobu. (Efeso 5:15, 16; Same 11:5) Ke sega mada ga ni ca na ka ni veivakamarautaki, e rawa ga ni curumi keda na yalo ni vuravura ke da maliwai ira e sega ni vinaka nodra itovo.—1 Pita 4:1-4.

¹⁸ E tu na ka ni veivakamarautaki veiganiti meda marautaka na lotu vaKarisito. Levu era raica na yaga ni ivakasala vakaivolatabu kei na ka e dau vakaturi ena noda ivola.

¹⁹ So na gauna eda dau veisureti. De dua eda sureti ena soqo ni vakamau se so tale. (Joni 2:2) E macala ni o ira na itaukeinisoqo era na qarauna na ka kece e vakayacori. E dau dredre me lewai na soqo se kanavata era tiko kina e levu. Eda dau wele ena soqo va qo, rawa nida beca kina eso na ivalavala vaKarisito, eda kana sivia kina, gunu sivia, tini sara ena cala bibi. Era vakatulewataka kina na lotu vaKarisito yalomatua me kua ni levu era sureti, me kua tale ga ni balavu na soqo. Ke vakayagataki na gunu, me vakayagataki vakayalomatua. (Fpai. 4:5) Ke vinakati me marautaki qai veiuqeti na soqo se kanavata, ena sega ni bibi na kakana kei na gunu.

²⁰ E vinaka na veikauaitaki. (1 Pita 4:9) Nida sureta eso meda kanavata, veitalanoa, se veimaliwai, e vinaka meda nanumi ira tale ga na vakaloloma. (Luke 14:12-14) Ke da sureti, na noda ivalavala e dodonu me salavata kei na ivakasala ena Marika 12:31. Meda dau vakavinavinakataka gona na nodra yalovinaka.

²¹ Eda marautaka e levu na isolisoli ni Kalou, oya meda ‘kana meda gunu, meda marautaka na noda cakacaka kece.’ (Dauv. 3:12, 13) Nida “cakava na ka kece me vakalagilagi kina na Kalou,” ena sega ni ca noda lewaeloma nida nanuma lesu na soqo ya, eda marautaka nida vakabulabulataki kina vakayalo.

VEIKA E DAU VAKAYACORI E KORONIVULI

²² E yaga vei ira na luveda na vuli nira vulica kina na wilivola kei na volavola. Na lesoni era vulica ena yaga sara mera sauva na isausau vakayalo. Mera saga gona na gone mera “nanuma na Dauveibuli Cecere” ena gauna ni vuli nira vakaliuca tiko ga na veika vakayalo.—Dauv. 12:1.

²³ Ke o itabagone lotu vaKarisito se vuli tiko, mo qarauna mo kua ni vakailala kei ira na gone ni vuravura. (2 Tim. 3:1, 2) E vakarautaka o Jiova na ka meda taqomaki kina. (Same 23:4; 91:1, 2) Koya gona, vakayagataka vinaka na isolisoli e vakarautaka mo taqomaki kina.—Same 23:5.

²⁴ Nira sega ni via vakavuravura, era vakatulewataka e levu na luveda mera kua ni vakaitavi ena so na ka e dau caka ni suka na vuli. Era na sega ni taura rawa nomu icaba kei ira na qasenivuli na vuna o sega ni vakaitavi kina. Ia e bibi ga mo vakamarautaka na Kalou. Ena vinakati kina mo vakayagataka nomu lewaeloma vakavulici ena iVolatabu mo vakatulewataka mo kua ni vakaitavi ena veisisivi se boletaki vanua. (Kala. 5:19, 26) Ni o rogoca nodrau ivakasala vakaivolatabu na nomu itubutubu lotu vaKarisito kei na nomu dau veimaliwai ena ivavakoso, o na rawa ni muria tiko ga na ivakatagedegede savasava i Jiova.

CAKACAKA SAUMI KEI NA NOMU ILALA

²⁵ E volai ena iVolatabu ni nodra itavi na ulunivuvale mera qarava nodra vuvale. (1 Tim. 5:8) Ia nira italatala, era kila ni nodra cakacaka saumi e sega ni dodonu me vakaliuci, e dodonu me vakaliuci ga na Matanitu ni Kalou. (Maciu 6:33; Roma 11:13) Nira qarava na Kalou ra qai lomavakacegu ena ka sa tu vei ira, era sega kina ni lomaocaoca se coriti ena bula ni domodomoiyau ni vuravura qo.—1 Tim. 6:6-10.

²⁶ O keda kece na lotu vaKarisito eda cakacaka saumi, e dodonu meda vakasamataka vakabibi na ivakavuvuli vakaivolatabu. Nida qara na cakacaka meda bula kina, eda na sega ni vakaitavi ena cakacaka e beci kina na lawa ni Kalou se lawa ni matanitu. (Roma 13:1, 2; 1 Kor. 6:9, 10) Meda kua ni guilecava na rerevaki ni vakailala. Nida sotia i Karisito, eda na sega ni vakaitavi ena sasaga vakabisinisi e beci kina na ivakatagedegede vakalou, ena vakaleqa noda tawaveitovaki kei na noda bula vakayalo. (Aisea 2:4; 2 Tim. 2:4) Eda na sega ni tokona na isoqosoqo e meca ni Kalou, o “Papiloni na Ka Levu.”—Vkta. 18:2, 4; 2 Kor. 6:14-17.

²⁷ Nida muria na ivakatagedegede savasava ni Kalou, eda na sega ni vakayagataka noda veiwekani vakayalo meda rawaka kina, se meda vakatetea kina na noda sasaga vakabisinisi. Nida soqoni vata kei ira na tacida ena soqoni vakaivavakoso, soqo ni tabacakacaka kei na soqo ni veiwasewase e kena inaki meda qaravi Jiova vakatabakidua. Eda kana ena nona teveli da qai marautaka na “veivakayaloqaqataki.” (Roma 1:11, 12; Iper. 10:24, 25) E gauna vinaka meda veivosakitaka kina na veika vakayalo, sega ni veika vakabisinisi.

DUAVATA VAKARISITO

²⁸ E okati tale ga ena ivakatagedegede savasava i Jiova na noda “maroroya na duavata e vakavuna na yalo tabu.” (Efeso 4:1-3) Eda na sega ni kauaitaka na veika e baleti keda ga, eda na kauaitaka tale ga na ka e baleti ira na tacida. (1 Ces. 5:15) Macala ga ni o vakadinadinataka qori ena nomu ivavakoso. Se mani vanua cava eda lako mai kina, noda ivakarau ni bula, noda ivakatagedegede ni vuli, eda vutuniyau se dravudravua, eda muria ga e dua na ivakatagedegede savasava. Qo na ka eda kilai kina na dauveiqaravi i Jiova.—1 Pita 2:12.

²⁹ E vola na yapositolo o Paula na vu ni duavata: “E dua ga na yago, e dua tale ga na yalo tabu me vaka ni dua ga na inuinui oni kacivi kina, e dua na Turaga, e dua na vakabauta, e dua na papitaiso, e dua na Kalou na Tamada kece, o koya e lewa na ka kece, e dusimaki keda kece, e cakacaka e lomada kece.” (Efeso 4:4-6) Qo ena vinakati kina me tautauvata na ka eda vakabauta me baleta na ivakavuvuli rawarawa vakaivolatabu, kei na ivakavuvuli titobu e vauca na veiliutaki cecere i Jiova. Io, e solia o Jiova vei ira na nona tamata na vosa savasava ni ka dina mera qaravi koya kina ena duavata.—Sefa. 3:9.

³⁰ E vakayaloqaqataki keda nikua na duavata kei na veiyaloni ena ivavakoso vaKarisito. Eda vakadinadinataka na vakayacori ni vosa ni yalayala i Jiova: “Au na vakatikori ira ena duavata, me vaka na sipi ena kedra bai.” (Maika 2:12) Eda vinakata meda duavata tiko ga nida muria na nona ivakatagedegede savasava.

³¹ Eda marau nida lewena na ivavakoso savasava i Jiova! Sega tale ni dua na ka e tautauvata kei na noda vakatokai ena yacana. Nida vakamareqeta noda veiwekani kei koya, eda na saga meda muria dei na nona ivakatagedegede savasava da qai uqeta eso tale mera muria qori.—2 Kor. 3:18.