iVola Mai na iLawalawa Dauvakatulewa

Vei Kemuni na Neitou iTokani Dautukutuku:

E ka dokai meda duavata ni qarava na Kalou dina duadua ga o Jiova! Nida “cakacaka vata” kei koya, e lesi keda meda vunautaka na itukutuku vinaka ni nona Matanitu da qai veivakavulici. (1 Kor. 3:9; Maciu 28:19, 20) Me rawa nida qarava na itavi qo ena duavata, e vinakati me tuvanaki vakamatau.—1 Kor. 14:40.

Ena yaga na ivola qo mo kila vinaka kina na kena tuvanaki na ivavakoso vaKarisito nikua. E vakamacalataki kina na noda itavi na iVakadinadina i Jiova. Ke o vakamareqeta na nomu itavi, ena ‘vakadeitaki nomu vakabauta.’—Caka. 16:4, 5; Kala. 6:5.

Keitou uqeti iko gona mo vulica vinaka na ivola qo. Saga mo muria na ka o vulica kina. Kaya mada ke o dautukutuku vou bera ni papitaiso, na cava mo cakava mo papitaiso mo iVakadinadina i Jiova? Ke o sa papitaiso, cava mo cakava mo toso kina vakayalo qai vakarabailevutaka nomu veiqaravi? (1 Tim. 4:15) O na uqeta vakacava na veiyaloni ena ivavakoso? (2 Kor. 13:11) Raica na kena isau ena ivola qo.

Ke o tagane papitaiso, cava mo cakava mo dua kina na dauveiqaravi se qase ni ivavakoso? E vinakati sara vakalevu na tacida tagane era rawata na kena ivakatagedegede mera liutaka na cakacaka, nira sa tabili mai ena isoqosoqo e vica vata na udolu. O na raica ena ivola qo na ka mo cakava mo rawata kina na isausau qori.—1 Tim. 3:1.

E neitou masu me yaga vei kemuni na ivola qo moni kila kina nomuni itavi ena isoqosoqo i Jiova qai vakamareqeta. Moni kila ni keitou lomani kemuni dina qai sega ni cegu neitou masulaka moni marau ni qaravi Jiova na Tamada vakalomalagi me tawamudu.—Same 37:10, 11; Aisea 65:21-25.