Ni Kabukaburaki ena iNaki Vakayalo na Tagane Moni Veiqaravi!

“O koya e kabukaburaki ena inaki vakayalo ena tamusuka na bula tawamudu.”​—KALA. 6:8.

1, 2. E vakayacori tiko vakacava na Maciu 9:37, 38? Na cava e vinakati ena ivavakoso?

O SA raica votu sara tiko ga na kena vakayacori na cakacaka vakasakiti ena sega ni guilecavi rawa! Qori na cakacaka a tukuna taumada o Jisu: “E levu sara na ka me tamusuki, ia era lewe lailai ga na tamata cakacaka. O koya gona, dou kerea na Turaga ni tatamusuki me tala mai eso tale na tamata cakacaka ina nona tatamusuki.” (Maciu 9:37, 38) Na sala e sauma tiko kina o Jiova nikua na masu qori a sega ni se bau yaco eliu. Ena yabaki vakacakacaka ni 2009, e tubu na iwiliwili ni ivavakoso ni iVakadinadina i Jiova e vuravura raraba ena 2,031, kena levu taucoko e 105,298. Kena ivakatautauvata, e 757 era papitaiso e veisiga!

² Ena vuku ni tubu qori, e vinakati kina mera liutaka na veivakavulici kei na veivakatawani ena ivavakoso na tacida tagane ra rawata na kena ivakatagedegede. (Efeso 4:11) Ena veigauna sa sivi, e vakavulici ira na tagane matua o Jiova mera qarava na nona sipi, eda nuidei ni na tomani tiko ga qori. Na parofisai ena Maika 5:5 e vakadeitaka ni donuya na iotioti ni veisiga, ena ‘lewe vitu na nodra ivakatawa’ na dauveiqaravi ni Kalou qai ‘walu nodra tamata turaga.’ Kena ibalebale ni levu na tagane matua era na veiqaravi.

3. Vakamacalataka na ibalebale ni “kabukaburaki ena inaki vakayalo.”

³ Ke o dua na iVakadinadina tagane yalayala i Jiova, o na tadolova vakacava na itavi ena ivavakoso? E bibi duadua mo “kabukaburaki ena inaki vakayalo.” (Kala. 6:8) Qori e okati kina nomu cakava na ka ena vakarawarawataka na nomu dusimaki ena yalo tabu ni Kalou. Me nomu inakinaki dei mo kua ni “kabukaburaki ena inaki vakayago.” Mo kua ni galeleta na ka e rawa ni vakaseavutaka nomu via veiqaravi, me vaka na nomu via tiko vinaka, nomu cakava na ka o dau taleitaka, kei na ka ni veivakamarautaki. E dodonu meda “kabukaburaki ena inaki vakayalo” na lotu vaKarisito kece, ni toso na gauna, o ira na tagane era cakava qori era na lesi ena so na itavi ena ivavakoso. E gadrevi sara vakalevu nikua na dauveiqaravi kei na qase ni ivavakoso. Koya gona, e vakatabakidua na ulutaga qo vei ira na tagane lotu vaKarisito. Oni uqeti na tagane moni vakasamataka vakayalomatua na ulutaga qo qai masulaka.

Tadolova na Cakacaka Vinaka

4, 5. (a) Na itavi cava era uqeti kina na tagane yalayala oti mera tadolova ena ivavakoso? (b) Ena tadolova vakacava e dua na itavi qori?

⁴ E sega ni vakasauri ga nona lesi e dua na tagane lotu vaKarisito me ivakatawa. Ena vinakati me tadolova na “cakacaka vinaka” qo. (1 Tim. 3:1) E okati kina nona qaravi ira na tacina vakayalo ena nona kauaitaka dina na ka era gadreva. (Wilika Aisea 32:1, 2.) Ni dua e tadolova na itavi ena inaki vinaka, ena sega ni cakava na ka me rawaka kina. Ia e sega ni nanumi koya ga, qai dau cakava na ka e yaga vei ira na tacina vakayalo.

⁵ O koya e via tadolova na itavi me dauveiqaravi se qase ni ivavakoso, me saga me rawata na kena ivakatagedegede vakaivolatabu. (1 Tim. 3:1-10, 12, 13; Taito 1:5-9) Ke o dua na tagane yalayala oti, tarogi iko: ‘Au dau vakaitavi ena cakacaka vakavunau, au dau vukei ira tale ga na taciqu mera cakava qo? Au dau uqeti ira na taciqu ena noqu kauaitaki ira dina? Au kilai niu dua na gonevuli gugumatua ni Vosa ni Kalou? Au dau vakavinakataka noqu ivakarau ni saumitaro? Au dau qarava vinaka na itavi era lesi au kina na qase ni ivavakoso?’ (2 Tim. 4:5) E bibi dina me vakasamataki vakavinaka na taro kece qori.

6. Na cava ena vinakati mo sauva kina na itavi ena ivavakoso?

⁶ Dua tale na sala ena tadolova kina na itavi ena ivavakoso e dua na tagane, oya ‘me vakayaloqaqataki na lomana ena yalo tabu ni Kalou.’ (Efeso 3:16) Ni dua e lesi me dauveiqaravi se qase ni ivavakoso, e sega ni kena ibalebale ni lesi ena dua na itutu cecere. E tadolova ga na itavi qori ni laurai nona matua vakayalo. E rawati vakacava na matua vakayalo? Dua oya nomu “lako tiko ga ena yalo tabu” qai vakaraitaka na kena itovo. (Kala. 5:16, 22, 23) Ni o vakaraitaka na itovo vakayalo e gadrevi mo qarava rawa kina eso tale na itavi, o qai muria na ivakasala mo vinaka kina, era na qai “raica na tamata kece na nomu toso.”—1 Tim. 4:15.

Bibi Moni Vakuai Kemuni

7. Na cava ena vinakati ena nodra qaravi na tacida?

⁷ E vinakati na sasaga vagumatua nida qaravi ira na tacida, ena gadrevi tale ga meda vakuai keda. Nira ivakatawa vakayalo na qase ni ivavakoso, era na kauaitaka dina na ka era sotava na qelenisipi. Raica mada se uqeti Paula vakacava nona cakacaka ni veivakatawani. A tukuna vei ira na nona itokani lotu vaKarisito e Korinica: “Ena levu ni noqu rarawa kei na vusolo ni lomaqu au a volavola yani ni tovakiwai na mataqu, moni kua ni rarawa kina, moni kila ga niu lomani kemuni dina.” (2 Kor. 2:4) E macala ni solia nona vinaka kece o Paula ena nona cakacaka ni veivakatawani.

8, 9. Tukuna na ivakaraitaki vakaivolatabu ni nodra dauveikauaitaki na tagane.

⁸ Era kilaitani na tagane ra qaravi Jiova nira dau vakuai ira ena vukudra na dauveiqaravi ni Kalou. Kena ivakaraitaki, a sega vakadua ni tukuna o Noa vei ratou nona lewenivuvale: ‘Ni sa ta oti na waqa, dou qai tukuna meu gole yani.’ A sega ni tukuna o Mosese vei ira na Isireli e Ijipita: ‘Tou qai sota ena Wasa Damudamu. Dou qai muria ga na sala vinaka duadua.’ A sega ni tukuna o Josua: ‘Dou qai tukuna mai ni sa kasura na bai kei Jeriko.’ O Aisea tale ga a sega ni dusi dua tale qai kaya: ‘O ka ya! Talai koya.’—Aisea 6:8.

⁹ Noda ivakaraitaki levu duadua o Jisu Karisito, a yalorawarawa me dusimaki koya na yalo tabu ni Kalou. A yalorawarawa ni ciqoma na nona ilesilesi me noda iVakabula. (Joni 3:16) Sega beka ni uqeti keda na loloma vosota i Jisu meda vakuai keda tale ga? Ni vakamacalataka tiko nona rai me baleti ira na qelenisipi, a tukuna e dua na qase ni ivavakoso sa dede nona veiqaravi: “E uqeti au na vosa i Jisu vei Pita—vakatawana noqu sipi. Au vakadinadinataka ena veiyabaki sa sivi, ke vica mada ga na vosa o tauca vakayalololoma vua e dua se dua mada ga na ka vinaka o cakava, ena rawa sara ga ni uqeti koya. Au marautaka sara vakalevu na cakacaka ni veivakatawani.”—Joni 21:16.

10. Na cava ena uqeti ira na tagane lotu vaKarisito mera vakatotomuria na ivakaraitaki i Jisu ena nodra qaravi ira na tacidra?

¹⁰ Me baleta nodra vakatawani na sipi ni Kalou, era na vakatotomuria na itovo i Jisu na tagane ena ivavakoso era yalayala oti, ena nona kaya: “Au na vakacegui kemuni.” (Maciu 11:28) Nodra vakabauta na Kalou kei na nodra lomana na ivavakoso ena uqeti ira na tagane lotu vaKarisito mera tadolova na cakacaka vinaka qo. Ena sega ni tiko vei ira na rai ni levu na ka era na vakuai ira kina se lavaki vei ira. Ia vakacava ke sega ni vinakata e dua me tadolova na cakacaka bibi qori? Ena rawa beka ni taleitaka e dua na tagane me veiqaravi ena ivavakoso?

Taleitaka Mo Veiqaravi

11. Ena taleitaka vakacava e dua me veiqaravi?

¹¹ E ka vakayalomatua mo kerea na veidusimaki ni yalo tabu ke o nanuma ni o sega ni tadolova rawa na itavi baleta o sega ni rawata na ivakatagedegede e gadrevi kei na kena itovo. (Luke 11:13) Ena dusimaki iko na yalo tabu i Jiova mo valuta nomu lomaleqa. E isolisoli vakalou na noda via veiqaravi, ni yalo i Jiova e rawa ni uqeta e dua na tacida tagane me tadolova na itavi qai vakaukauataki koya me veiqaravi tabu. (Fpai. 2:13; 4:13) E veiganiti gona mo kerei Jiova me vukei iko mo taleitaka mo veiqaravi.—Wilika Same 25:4, 5.

12. Ena vakavukui vakacava e dua na lotu vaKarisito me qarava vinaka nona itavi?

¹² Ena rairai nanuma e dua na lotu vaKarisito me kua ni tadolova na itavi ni raica e levu na ka era gadreva na qelenisipi qai namaki e levu na ka ena nodra qaravi. De dua e nanuma ni sega ni vuku me qarava kina na itavi qori. Ena rairai rawata na vuku ena nona vulica vagumatua na iVolatabu kei na ivola vakaivolatabu tale eso. Ena vinaka me taroga, ‘E tiko na gauna meu vulica kina na Vosa ni Kalou, au dau kerea beka na vuku?’ E vola na tisaipeli o Jemesa: “Ke dua vei kemuni e lailai vua na vuku, me kerea tiko ga vua na Kalou, ni na soli vua. Ni lomasavu o koya vei keda kece, e sega ni dau vaqara cala.” (Jeme. 1:5) O vakabauta na vosa uqeti vakalou qo? Ena nona sauma na masu i Solomoni, a solia na Kalou “na yalo sa vuku ka daukila rawa na ka” me vakaduiduitaka na ka vinaka mai na ca. (1 Tui 3:7-14) A vakasakiti dina na ituvaki i Solomoni. Eda nuidei ga ni na vakavukui ira na tagane era veiqaravi ena ivavakoso na Kalou mera qarava vinaka kina nona sipi.—Vkai. 2:6.

13, 14. (a) Vakamacalataka na sala e uqeti Paula kina na “loloma i Karisito.” (b) Me uqeti keda vakacava na “loloma i Karisito”?

¹³ Ena yaga tale ga ena noda via qaravi ira na tacida, noda vakasamataka vakatitobu na ka erau cakava o Jiova kei na Luvena ena vukuda. Kena ivakaraitaki, raica mada na 2 Korinica 5:14, 15. (Wilika.) E ‘uqeti keda vakacava na loloma i Karisito?’ E vakasakiti dina na loloma e vakaraitaka o Karisito ena nona solia nona bula ena vukuda me salavata kei na loma ni Kalou. Na levu ga ni noda kila kei na noda vakavinavinakataka na loloma i Jisu, ena tara sara ga na lomada. A uqeti Paula na loloma i Karisito. A sega kina ni nanumi koya ga, a uqeti koya me vakaliuca na nona qarava na Kalou, nona qaravi ira na lotu vaKarisito kei ira tale ga ena taudaku ni ivavakoso.

¹⁴ Noda vakananuma na loloma i Karisito ena uqeti keda meda vakavinavinakataka. Ena sega gona ni ka vakayalomatua meda “kabukaburaki ena inaki vakayago” ena noda sasagataka na isausau e baleti keda ga kei na noda vakaliuca ga na noda gagadre. Eda na cakava ga na veiveisau e gadrevi ena noda bula meda vakaliuca kina na cakacaka e lesi keda kina na Kalou. Eda uqeti meda “veivukei” vei ira na tacida ena loloma. (Wilika Kalatia 5:13.) Ke da dau yalomalumalumu ni vukei ira na tacida, eda na dokai ira tale ga. Eda na sega ni vakatotomuria na ivakarau ni rai e uqeta o Setani, me vaka na vakalelewa.—Vkta. 12:10.

Sasaga Vakavuvale

15, 16. Ni vinakata na tagane me dauveiqaravi se qase ni ivavakoso, era na veivuke vakacava na lewenivuvale?

¹⁵ Ke vakawati na tacida tagane qai vakaluveni, ena laurai tale ga na ituvaki e vale me dikevi kina ke rawa ni dauveiqaravi se qase ni ivavakoso. Koya gona, nona vakadonui me veiqaravi e vakatau tale ga ena ituvaki vakayalo kei na irogorogo ni nona vuvale. E dusia qo ni bibi na nodratou itavi na lewe ni vuvale ena nona tokoni na tagane vakawati kei tama ena nona sasaga me dauveiqaravi se qase ni ivavakoso.—Wilika 1 Timoci 3:4, 5, 12.

¹⁶ E marautaka o Jiova nodra dau veitokoni na lewenivuvale lotu vaKarisito. (Efeso 3:14, 15) Ena vinakati vua na ulunivuvale me veiraurautaka nona itavi ena ivavakoso kei na nona “lewa vinaka” na nona vuvale. E bibi gona vua na dauveiqaravi se qase ni ivavakoso me vulica na iVolatabu kei ratou nona vuvale me yaga kina vei ratou na Sokalou Vakavuvale e veimacawa. E dodonu me vakaitavi vakawasoma kei na nona vuvale ena cakacaka vakavunau. Nodratou veitokoni na lewenivuvale e bibi tale ga ena nona sasaga na ulunivuvale me tadolova na itavi ena ivavakoso.

O na Veiqaravi Tale?

17, 18. (a) Na cava ena vinakati vua na tacida e sa sega ni veiqaravi ena gauna qo? (b) Na rai cava me tiko vua e dua a qase se dauveiqaravi tu ni ivavakoso ena dua na gauna?

¹⁷ De dua o qase ni ivavakoso se dauveiqaravi ena dua na gauna, ia sa sega ena gauna qo. Ni o lomani Jiova, mo nuidei ni se kauaitaki iko tiko. (1 Pita 5:6, 7) A tukuni beka vei iko mo cakava eso na veiveisau? Mo yalorawarawa ni vakadinata nomu cala qai saga mo vakavinakataka ena veivuke ni Kalou. Mo qarauna mo kua ni yaloca. Mo yalomatua, me donu nomu ivakarau ni rai. E tukuna e dua na qase ni ivavakoso a veiqaravi tu ena dua na gauna qai vakacegu mai na nona itavi: “Au saga me dua tu ga na ivakarau ni noqu tiko ena soqoni, cakacaka vakavunau, kei na noqu wili iVolatabu me vaka ga au dau cakava ena gauna au se qase ni ivavakoso kina, au qai rawata na isausau qori. Au vulica meu vosovoso niu a nanuma au na veiqaravi tale ni oti e dua se rua na yabaki, ia e voleka ni vitu na yabaki noqu sasaga meu qai qase tale ni ivavakoso. A yaga sara ena gauna qori noqu uqeti meu kua ni soro, meu tadolova tiko ga na cakacaka vinaka.”

¹⁸ Ke o dua na tacida tagane o sotava tiko na ituvaki qo, kua ni yalolailai. Vakasamataka na sala e vakalougatataka tiko kina o Jiova nomu cakacaka vakaitalatala kei na nomu vuvale. Saga me kaukaua vakayalo nomu vuvale, sikovi ira na tauvimate, dau vakayaloqaqataki ira na malumalumu. E bibi duadua nomu mareqeta nomu itavi dokai ni o dua na iVakadinadina i Jiova, ena nomu vakacaucautaka na Kalou kei na nomu kacivaka na itukutuku vinaka ni nona Matanitu.a—Same 145:1, 2; Aisea 43:10-12.

Vakalewa Tale na Kemu iTuvaki

19, 20. (a) Na cava era uqeti mera cakava na tagane yalayala kece? (b) Na cava ena veivosakitaki ena ulutaga e tarava?

¹⁹ Ni vakatauvatani kei na gauna eliu, era gadrevi sara vakalevu nikua na ivakatawa kei na dauveiqaravi. Oni uqeti kece na tagane yalayala moni vakalewa tale na kemuni ituvaki, qai taroga, ‘Keu sega ni dua na dauveiqaravi se qase ni ivavakoso, e dodonu beka meu vaqaqa na vuna au sega ni veiqaravi tiko kina?’ Me uqeti iko mada ga na yalo ni Kalou me donu tiko ga nomu rai ena ka e vauca na usutu bibi qo.

²⁰ Ena yaga vei ira kece na lewe ni ivavakoso nodra vakuai ira na tacidra vakayalo. Nida yalololoma, da qai sega ni nanumi keda ga, eda na vakila na marau e vu mai noda veiqaravi kei na noda kabukaburaki ena inaki vakayalo. Ia meda kua ni vakararawataka na yalo tabu ni Kalou me vaka ena vakamacalataki ena ulutaga e tarava. Eda na cakava vakacava qori?

[iVakamacala e ra]

O na Sauma Vakacava?

• Na cava e vakadeitaka na parofisai ena Maika 5:5?

• Vakamacalataka na ka e okati ena noda vakuai keda.

• Ena taleitaka vakacava e dua me veiqaravi?

• E bibi vakacava nodra veitokoni na lewenivuvale me tadolova kina e dua na itavi me dauveiqaravi se qase?

[iYaloyalo ena tabana e 25]

Na cava o na cakava mo tadolova kina na itavi ni veiqaravi?