iVola Mai na iLawalawa Dauvakatulewa
Kemuni na taci keitou lomani:
Oni kila vinaka ni volatukutukutaki vakalevu ena iVolatabu na nodra bula na lewenivanua. Levu na yalewa kei na tagane yalodina qori era sotava tale ga na veika dredre. Era “vakataki keda” ga. (Jemesa 5:17) Eso era lomaleqa, era nuiqawaqawa. So tale era rarawataka na ka era cakava na lewe ni nodra vuvale se tacidra vakayalo. Levu tale e ora na lomadra ena nodra malumalumu.
Vakacava era biuti Jiova vakadua? Sega. Levu era vakataki koya na daunisame, e masulaka: “Au sa lako sese me vaka na sipi sa yali. Ni vaqara na nomuni dauveiqaravi, niu sega ni guilecava na nomuni ivunau.” (Same 119:176) O duavata kei na rai qori?
O Jiova e sega ni guilecavi ira nona dauveiqaravi era biuta na bai. E vakamasuti ira ga ni dau talai ira na tacidra. Kena ivakaraitaki, a vukei Jope o Jiova ena leqa e sotava, me vaka na leqa vakailavo, mate na wekana voleka, kei na tauvimate bibi. E vosota tale ga na nodra vosa mosimosi o ira na dodonu mera tokoni koya. Ia e sega ni vakanadakui Jiova, dina ni cala nona rai ena dua na gauna. (Jope 1:22; 2:10) E vukei Jope vakacava o Jiova me lewai koya vinaka tale?
E talai Ilaiu e dua na tacina vakayalo. Ni talaucaka na lomana o Jope, a vakarorogo o Ilaiu, oti qai vosa. Na cava ena tukuna? Ena vakalewai Jope se vakauqeti koya ni tukuna nona cala se vakamaduataki koya? Vakacava e vakalevulevui koya o Ilaiu? Sega! E kaya ga ena veiuqeti ni yalo tabu: “Au vakataki iko ga ena mata ni Kalou dina, o yau tale ga au buli mai na tete.” E qai vakadeitaka vei Jope: “Me kua gona ni dua na ka mo domobulataka vei au, me kua tale ga ni tarabi vei iko na noqu vosa.” (Jope 33:6, 7) E sega ni kuria o Ilaiu na rarawa i Jope, ia e vakasalataki koya ga vakayalololoma qai vakayaloqaqataki koya.
Qori tale ga na ivakarau ni yalo keitou vakarautaka kina na ivola qo. Na imatai ni ka keitou cakava keitou vakarorogo, keitou vakasamataka vinaka na kedra ituvaki kei na ka era tukuna o ira na biuta na bai. (Vosa Vakaibalebale 18:13) Oti keitou masu, keitou dikeva eso na ivakaraitaki vakaivolatabu ena ka e cakava o Jiova vei ira nona dauveiqaravi ena veigauna sa oti era sotava tale ga eso na ituvaki va qori. Oti keitou biuta vata na ivakaraitaki ena iVolatabu kei na ivakaraitaki ena gauna qo me tabaki kina na ivola qo. Keitou uqeti kemuni gona moni vulica na ivola qo. Moni kila tale ga ni keitou lomani kemuni vakalevu.
iLawalawa Dauvakatulewa ni iVakadinadina i Jiova