Cakamana ena Wasa Damudamu

Ni rogoca ga o Fero nira sa biuti Ijipita na Isireli, e veisau tale na lomana. E vakaroti ira na sotia: ‘Ni vakarautaka kece noqu qiqinivalu, meda cicimuri ira! Meda a kua ga ni sereki ira.’ Era mani cicimuri ira na Isireli.

E dusimaki ira nona tamata o Jiova ni vakayagataka na o ena siga, na bukawaqa ena bogi. E liutaka nodra ilakolako ina Wasa Damudamu qai tukuna mera keba voleka kina.

Era qai raica na Isireli ni cicimuri ira tiko yani o Fero kei na nona mataivalu. Era sega ni dro rawa nira tu ena tadrua ni wasawasa kei na mataivalu ni Ijipita. Era tagi vei Mosese: ‘Keimami na mate! Mo a laivi keimami tu ga yani i Ijipita.’ Ia e kaya vei ira o koya: ‘Ni kua ni rere. Ni vakarau raica nona veivakabulai o Jiova.’ E nuitaki Jiova dina o Mosese, se vakacava?

E tukuna o Jiova vei ira na Isireli mera tokitaka nodra keba. Ena bogi ya e biuta o Jiova na o ena kedra maliwa na kai Ijipita kei ira na Isireli. E butobuto na nodra yasana na kai Ijipita, ia e rarama vei ira na Isireli.

E tukuna vei Mosese o Jiova me dodoka na ligana i wasawasa. E qai vakavuna e dua na cagi kaukaua ena bogi taucoko. E tawase kina na wai me rawa nira takoso i tai e milioni vakacaca na Isireli. Era taubale ena qele mamaca ena maliwa ni lalaga wai.

E muri ira na Isireli na mataivalu i Fero ena botonisauloa mamaca. E qai vakavuna o Jiova mera veilecayaki na kai Ijipita. E tataluvaluva ga mai na yava ni nodra qiqinivalu. Era kailavaka: ‘Meda dro! E vala tiko ena vukudra o Jiova.’

E tukuna vei Mosese o Jiova: ‘Dodoka yani na ligamu i wasawasa.’ E suka na wai qai luvuca na mataivalu ni Ijipita. E mate kina o Fero kei na nona mataivalu. Sega ni vo e dua.

Ena tai ni wasawasa, era vakacaucautaki Jiova na ilala levu nira lagata: “Sere vei Jiova, ni sa vakacerecerei vakalevu o koya. Na ose kei koya e vodoka sa kolotaka i wasawasa.” Nira lagasere tiko, era meke na yalewa ra qai qiri tibereli. Dua na ka na nodra marau nira sa qai galala vakadua.