Taqomaki Esekaia na Agilosi

Sa vakamalumalumutaka o Asiria na tini na yavusa ni matanitu o Isireli. E vinakata tale ga o Senakaripi na tui Asiria me vakamalumalumutaki Juta, na matanitu e rua na kena yavusa. E valuta yadudua mai na kena koro, ia dua na ka nona vinakata me vakamalumalumutaki Jerusalemi. E sega ni kila ni taqomaka tiko na koro qori o Jiova.

E solia o Esekaia na tui Juta e dua na ilavo levu vei Senakaripi me kua ni cakava e dua na ka e Jerusalemi. E taura na ilavo o Senakaripi, ia e tala ga nona mataivalu qaqa me valuti Jerusalemi. Era rere na lewenikoro nira voleka yani na kai Asiria. E kaya vei ira o Esekaia: ‘Ni kua ni rere. Era kaukaua na kai Asiria, ia ena vukei keda o Jiova meda qaqa.’

E tala na Rapisake o Senakaripi me vakalialiai ira na lewe i Jerusalemi. E lai duri ena taudaku ni koro qai kailavaka: ‘Ena sega ni vukei kemuni rawa o Jiova. Me kua ni lawakitaki kemuni o Esekaia. Ena sega ni vakabulai kemuni e dua na kalou ni keimami valuti kemuni.’

E tarogi Jiova o Esekaia se cava me cakava. E sauma o Jiova: ‘Kua ni rerevaka na vosa ni Rapisake. Ena sega ni valuti Jerusalemi rawa o Senakaripi.’ E qai vakauta o Senakaripi eso na ivola vei Esekaia, e tukuni kina: ‘Ni vakamalumalumu. Ena sega ni vakabulai kemuni rawa o Jiova.’ E masu o Esekaia: ‘Yalovinaka Jiova, ni vakabulai keimami. Mera kila kece ni o kemuni ga na Kalou dina.’ E kaya vua o Jiova: ‘Ena sega ni curu e Jerusalemi na tui Asiria. Au na taqomaka noqu koro.’

E nuidei o Senakaripi ni na vakamalumalumutaki Jerusalemi. Ia dua na bogi, e tala o Jiova e dua na agilosi ina nodra keba na sotia ena taudaku ni koro. E vakamatea na agilosi qori e 185 na udolu na sotia! Era mate na sotia qaqa nei Tui Senakaripi. E sega ni cakava rawa e dua na ka ni sa vakadrukai, mani lesu i nona vanua. O Jiova e taqomaki Esekaia kei na vanua o Jerusalemi me vaka ga e yalataka. Ke o tu tale ga e Jerusalemi ena gauna ya, vakacava o na nuitaki Jiova?