Taleitaka o Josaia na Lawa ni Kalou

E tui Juta o Josaia ni sa yabaki walu. Ena gauna qori, era vakatevoro na tamata, era qaravi matakau tale ga. Ni sa yabaki 16, e via vulica na ivakarau dodonu me qaravi Jiova kina. Ni sa yabaki 20, e vakarusa na matakau kei na icabocabonisoro ena vanua. Ni sa yabaki 26, e tuvanaka na vakavinakataki ni valenisoro.

E kunea o Ilikaia na bete levu na ivolavivigi ni Lawa i Jiova ena valenisoro, de dua na ivolavivigi e vola o Mosese. E kauta vei Josaia na ivolavivigi qori o Safani na nona vunivola qai wilika vakadomoilevu na Lawa. Ni vakarorogo o Josaia, e qai kila nira sa talaidredre vei Jiova me vica vata na yabaki. E kaya vei Ilikaia o Tui Josaia: ‘Sa cudruvi keda sara ga o Jiova. Mo tarogi koya mada, ena tukuna vei iko na ka meda cakava.’ E qai tukuna o Jiova nona itukutuku vua na parofita yalewa o Ulita: ‘Era sa biuti au na lewe i Juta. Era na totogitaki. Ia ena sega ni yaco qori ena gauna e veiliutaki kina o Josaia ni a yalomalumalumu.’

Ni rogoca o Tui Josaia na itukutuku, e lako ina valenisoro qai kacivi ira vata na lewe i Juta. E wilika sara vakadomoilevu na Lawa i Jiova ina matanitu taucoko. E yalataka o Josaia kei ira na lewe i Juta nira na talairawarawa vei Jiova ena lomadra taucoko.

Dua na gauna balavu nodra sega tu ni soqova na Lakosivia na matanitu o Juta. Ni wilika ena Lawa o Josaia ni dodonu me vakayacori qori ena veiyabaki, e kaya vei ira nona tamata: ‘Eda na marautaka na Lakosivia vei Jiova.’ E vakarautaka sara na isoro, e tuvanaka tale ga me dua na matasere ena valenisoro. Era mani soqova na Lakosivia. Oti e qai vakayacori na Soqo ni Madrai Sega ni Vakaleveni me vitu na siga. E sega ni dua na Lakosivia me tautauvata kei na kena qo mai na gauna sara i Samuela. E taleitaka vakalevu o Josaia na Lawa ni Kalou. Vakacava o dau taleitaka mo vulica na veika me baleti Jiova?