Na Volavola ena Lalaga

Toso na gauna e qai Tui Papiloni o Pelisasari. Dua na bogi e sureta e duanaudolu nona tamata vakaitutu ina dua na kanavata. E tukuna vei ira nona dauveiqaravi mera taura mai na bilo koula a kauta mai o Nepukanesa ena valenisoro i Jiova. E mani gunu o Pelisasari kei ira na vulagi ena bilo qori ra qai vakacaucautaka na nodra kalou. E qai basika mai vakasauri e dua na liga ni tamata, e vola ena lalaga ni valenikana eso na vosa e dredre me kilai.

E domobula o Pelisasari, e kacivi ira na daucakaiba qai yalataka vei ira: ‘Ke dua e vakamacalataka rawa na vosa qo, au na lesi koya me ikatolu ena veiliutaki e Papiloni.’ Era saga kece, ia e sega ni dua e vakamacalataka rawa. E lako yani na ranadi qai kaya: ‘Au kila e dua na turaga o Taniela, e dau vakamacala vei Nepukanesa. Ena rawa ni vakamacalataka vei iko na vosa qori.’

E lako sara o Taniela vua na tui. E kaya vua o Pelisasari: ‘Ke o rawa ni wilika qai vakamacalataka na vosa qo, au na solia vei iko e dua na itaube koula, au na lesi iko tale ga mo ikatolu ena veiliutaki e Papiloni.’ E kaya o Taniela: ‘Au na sega ni taura na nomuni iloloma, au na tukuna ga vei kemuni na ibalebale ni vosa qori. A dokadoka na tamamuni o Nepukanesa, e qai vakamaduataki koya o Jiova. Oni kila vinaka na ka e yaco vua, ia oni beci Jiova ni oni gunu waini ena bilo koula ni nona valenisoro. E vola gona na Kalou na vosa qo: Mini, Mini, Tikeli, Pasini. Na kena ibalebale, ni na vakamalumalumutaki Papiloni o Mitia kei Perisia, oni na sega tale ni tui.’

E kena irairai ni na sega ni vakamalumalumutaki rawa o Papiloni. E taqomaki vinaka tu ena bai vavaku kei na uciwai levu. Ia ena bogi qori, era lako yani na kai Mitia kei Perisia mera valuta. E vakadrodroya tani na uciwai o Sairusi na tui Perisia mera takoso nona sotia ina matamata ni koro. Nira yaco i kea, e dola vinaka tu na matamata! Era cici i loma na sotia, era taura vakaukaua na koro, era vakamatea tale ga na tui. Oti e qai Tui Papiloni o Sairusi.

Ena loma ga ni dua na yabaki, e kacivaka o Sairusi: ‘E tukuna vei au o Jiova meu tara tale nona valenisoro mai Jerusalemi. O koya e via veivuke me lako.’ Io me vaka e yalataka o Jiova, levu na Jiu era lesu i Jerusalemi ni oti e 70 na yabaki na kena vakarusai. E vakasuka o Sairusi na bilo koula, na bilo siliva, kei na iyaya a kauta o Nepukanesa mai na valenisoro. Vakacava o raica rawa nona vakayagataki Sairusi o Jiova me tokoni ira nona tamata?