Vakabulai Ira na Kainona o Esiteri

E tiko e dua na goneyalewa Jiu e Susani ena korolevu o Perisia, na yacana o Esiteri. E kauti koya mai Jerusalemi kei na nona vuvale o Nepukanesa ena vica na yabaki e liu. E susugi koya na wekana o Motekai, na dauveiqaravi nei Esuerosi na Tui Perisia.

E vinakata o Tui Esuerosi me dua na ranadi vou. Era lako nona dauveiqaravi mera kauti ira mai na goneyalewa rairai totoka ena vanua, wili kina o Esiteri. E qai digitaki Esiteri o Esuerosi me ranadi. A tukuna vua o Motekai me kua ni vakatakila ni Jiu.

E vinakata o Emani na nodra iliuliu na turaga mera cuva kece vua na lewenivanua. A bese ni cakava qori o Motekai, e cudru sara ga o Emani qai via vakamatei koya. Ni kila ni Jiu o Motekai, e nakita sara mera vakamatei kece na Jiu ena vanua. E kaya vei Tui Esuerosi: ‘Era rerevaki na Jiu, mo vakamatei ira.’ E kaya na tui: ‘Cakava na ka o vinakata.’ E vakadonuya tale ga me bulia o Emani e dua na lawa. Era vakaroti kina na lewenivanua mera vakamatei ira kece na Jiu ena ika13 ni siga ni vula o Eta. A raica tu qori o Jiova.

A sega ni kila o Esiteri na lawa qori, mani vakauta vua o Motekai e dua na ilavelave qai tukuna: ‘Mo lai vosa vua na tui.’ E sauma o Esiteri: ‘O koya e lako vua na tui ni sega ni sureti ena vakamatei. Au se sega ni lako vua na tui me 30 na siga! Ia au na lako. Ke dodoka mai nona ititoko, au na bula. Ke sega, au na mate.’

E lako sara ina rara ni valenitui o Esiteri. Ni raici koya na tui, e dodoka yani nona ititoko mani lako vua o Esiteri. E taroga na tui: ‘Na cava o vinakata?’ E sauma o Esiteri: ‘Au sureti kemuni kei Emani ina dua na kanavata.’ E sureti rau tale ena bogi qori o Esiteri ena dua tale na kanavata. A tarogi koya tale na tui ena kanavata qori: ‘Na cava o vinakata?’ E sauma: ‘E dua e via vakamatei au kei ira na kainoqu. Yalovinaka, vakabulai keimami.’ E taroga na tui: ‘O cei e via vakamatei kemuni?’ E sauma: ‘Na tagane ca qo o Emani.’ Na levu ni nona cudru o Esuerosi e vakarota me vakamatei totolo o Emani.

Ia e sega ni dua e bokoca rawa na lawa e vola o Emani, e sega ni rawa mada ga vua na tui. E lesi Motekai sara me nodra iliuliu na turaga qai vakadonuya me bulia e dua tale na lawa. E vakatarai ena lawa qori mera taqomaka na Jiu na nodra bula. Ena ika13 ni siga ni vula o Eta, era vakadruka kina na kedra meca. Tekivu ena gauna qori, era dau marautaka e veiyabaki na nodra qaqa.