iOtioti ni Nona Vakayakavi o Jisu

Ena veiyabaki, era soqova na Jiu na Lakosivia ena ika14 ni siga ni vula o Naisani. Era dau vakananuma kina nona sereki ira o Jiova mai na veivakabobulataki e Ijipita mera tawana na vanua yalataki. Ena yabaki 33 G.V., e soqova o Jisu kei ratou nona yapositolo na Lakosivia ena dua na tabavale e cake e Jerusalemi. Ni ratou vakayakavi oti, e tukuna sara o Jisu: ‘E dua vei kemudou ena soli au yani.’ Eratou kurabui na yapositolo, ratou tarogi koya: ‘O cei?’ E kaya o Jisu: ‘O koya ga au solia vua na madrai qo.’ E qai solia vei Jutasa Isikarioti. E tucake sara o Jutasa me biubiu.

Oti e masu o Jisu, e tikitikica na madrai qai solia vei ratou na vo ni yapositolo. E kaya: ‘Dou kania na madrai qo, e vakaibalebaletaka na yagoqu au na solia ena vukumudou.’ E masulaka tale ga na waini, e solia sara vei ratou na yapositolo. E kaya: ‘Dou gunuva na waini qo. E vakaibalebaletaka noqu dra au na solia me vosoti kina na ivalavala ca. Au yalataka ni tou na veiliutaki mai lomalagi. Dou dau cakava qo e veiyabaki mo dou vakananumi au kina.’ Era se cakava tiko ga na imuri i Jisu e veiyabaki na ivakananumi ena yakavi ni siga qori. E vakatokai me iVakayakavi ni Turaga.

Ni oti na ivakayakavi qori, eratou veibataka na yapositolo se o cei e levu duadua vei ratou. E mani tukuna o Jisu: ‘E levu o koya e okati koya me gone duadua, e sega ni dau vakalevulevui koya.

‘Dou noqu itokani. Au tukuna vei kemudou na ka kece e vinakata o Tamaqu meu vakaraitaka vei kemudou. Au sa vakarau lesu vei Tamaqu i lomalagi. Dou na tiko mai, era na kila na tamata ni dou noqu tisaipeli ni dou veilomani. Dou veilomani me vaka ga noqu lomani kemudou.’

E qai masuti Jiova o Jisu me taqomaki ratou na nona tisaipeli, me vukei ratou tale ga me ratou cakacaka vata ena veiyaloni. E masulaka me vakarokorokotaki na yaca i Jiova. Oti ratou lagasere, ratou sa qai biubiu. Sa voleka na gauna me vesu kina o Jisu.