Sobuti Ira na Tisaipeli na Yalo Tabu

Oti e tini na siga nona lesu i lomalagi o Jisu, e sobuti ira nona tisaipeli na yalo tabu. Qo ena Penitiko 33 G.V., nira lako yani i Jerusalemi o ira mai na veivanua mera tiko ena soqo. Era soqoni ena rumu ni dua na vale e cake e rauta ni 120 na tisaipeli i Jisu. E qai yaco vakasauri e dua na ka vakatubuqoroqoro. E toka yadua e uludra na ka e vaka na yameyame ni buka, ra qai cavuta na veimataqali vosa. E rogo mai na rorogo e vaka na cagi kaukaua, e vakasinaita na lomanivale.

Nira rogoca na vulagi era tiko e Jerusalemi na rorogo qori, era cici yani mera raica na ka e yaco. Era qoroqoro nira cavuta tiko na tisaipeli na nodra vosa. Era kaya: ‘Era kai Kalili qo. Era kila vakacava na noda vosa?’

E qai tucake o Pita kei ratou na vo ni yapositolo e matadra na ilala levu. E vakamacalataka o Pita nona vakamatei o Jisu qai vakaturi koya o Jiova. E kaya: ‘Sa tiko mai lomalagi o Jisu ena ligaimatau ni Kalou, e sovaraka mai na yalo tabu me vaka e yalataka. Oya na vuna oni rogoca, oni raica tale ga kina na cakamana qo.’

E uqeti ira sara ga na vosa i Pita ra qai taroga: “Na cava me keimami cakava?” E kaya vei ira: ‘Moni veivutunitaka nomuni ivalavala ca, moni papitaiso ena yaca i Jisu. Ena soli tale ga vei kemuni na iloloma soli wale, na yalo tabu.’ Era mani papitaiso ena siga qori e rauta ni le 3,000. Tekivu ena siga ya, e tubu totolo na kedra iwiliwili na tisaipeli e Jerusalemi. Ena veitokoni ni yalo tabu eratou tauyavutaka kina na yapositolo e levu na ivavakoso, mera vakavulici kina ena ka kece e vakarota o Jisu.