TEKIVUTAKI NA VEIVOSAKI
LESONI 5
Mo Veidokai
iVakavuvuli Vakaivolatabu: “Moni vosa ena yalovinaka ena gauna kece.”—Kolo. 4:6.
Ka e Cakava o Paula
1. Sarava na VIDIO, se wilika Cakacaka 17:22, 23, qai sauma na taro qo:
E raica vakacava o Paula na sokalou lasu e Aceni? —Raica na Cakacaka 17:16.
E sega ni vakalewai ira na kai Aceni o Paula, ia e veidokai vakacava nona vakayagataka na ka era vakabauta me vunautaka kina na itukutuku vinaka?
Na Cava Eda Vulica Vei Paula?
2. De dua era na makutu ni rogoci keda na tamata ke da digia vinaka na ka eda dau tukuna, na kena itautau kei na gauna meda tukuna kina.
Vakatotomuri Paula
3. Digitaka vinaka nomu vosa. Kena ivakaraitaki, ni o veitalanoa tiko kei na dua e sega ni lotu vaKarisito, de dua mo veisautaka na sala mo tukuna kina e dua na tikinivolatabu, se nomu vakamacalataki Jisu.
4. Kua ni totolo ni vakadodonutaki koya. Laivi koya me talaucaka na lomana. Ke tukuna e dua na ka e veisaqasaqa kei na ivakavuvuli vakaivolatabu, kua ni veiba. (Jeme. 1:19) Ni o rogoci koya, o sa na kila na nona rai.—Vkai. 20:5.
5. Duavata kei na ka e tukuna qai vakavinavinakataki koya ke veiganiti. Ena rairai nanuma ni dina na ka e vakabauta. Mo tukuna e dua na ka drau duavata kina, qai vukei koya tiko vakalalai me kila na ka e tukuna na iVolatabu.