Vakamacalataki na iVola i Taniela!
ERA guta na tiko ena soqo ni tikina mera taura na nodra ilavelave ni ivola vou e 320 na taqana, Nanuma Matua na Parofisai i Taniela! Na cava na nodra nanuma me baleta na ivola oqo? Dikeva mada na ka era kaya e so:
“Me vakataki ira e vuqa na itabagone, au sega ni dau taleitaka na ivola e vakamacalataka na itukutuku ni gauna makawa. Ena gauna au taura kina na noqu lavelave ni ivola vou, Nanuma Matua na Parofisai i Taniela! au a sega ni galeleta sara meu wilika, ia au mani tovolea ga. Ie, sa bau cala dina na noqu nanuma! Oqo e dua vei ira na ivola totoka duadua au qai bau wilika. Niu sa tekivu wiliwili, e dredre sara ga meu biuta tale! Au sega ni vakasamataka niu wilika tiko e dua na itukutuku ni ka a yaco ena vica na udolu na yabaki sa oti. Sa qai imatai ni gauna meu vakila niu rawa ni biuti au ena ituvaki a tu kina o Taniela. Au rawa ni raitayaloyalotaka na ka e yaco ni o kau tani mai nomu vuvale, mo vakau ina dua na vanua tani, qai vakatovolei vakavuqa na nomu yalodina. Vinaka sara vakalevu na vakarautaka mai na ivola oqo.”—Anya.
“E vukei au vakalevu na itukutuku matata oqo meu vakadeitaka ni tu sara ga ena qeteqete ni liga i Jiova na veika e baleti ira na nona tamata. Ena raivotu kei na tadra i Taniela vaka kina na nodra tadra e so a vakaibalebaletaka o koya, e macala kina ni na yaco dina ga na veika e sa nakita oti. Oqo e vaqaqacotaka noda vakabauta na veika vakaparofisai era kunei ena iVolatabu me baleta na vuravura vou ena vakarautaka.”—Chester.
“Au taleitaka ni oni cakava me vaka sara ga e se bula o Taniela. Au vakila niu mai kilai koya vinaka cake ena sala oni vakabibitaka kina na veika a vakamareqeta kei na ka e kauai kina. Au sa qai kila vinaka oqo na vuna a taleitaki koya kina o Jiova. Ena gauna kece a vakatovolei se vakacacani kina, a sega ni nanumi koya ga. A kauaitaki Jiova ga vakalevu kei na vinaka ni yacana. Vinaka vakalevu na nomuni vakavotuya na veitikina bibi oqo.”—Joy.
“Oqo sara ga na ka keimami a waraka tiko! E se sega mada ni bau vakamacalataki vakadua e liu se vakaibalebaletaki vakacava vei keda yadua na ivola i Taniela. Niu wilika oti ga e dua na iwase levu ni ivola ena yakavi ni siga ga au a taura kina, au cegu mada ga meu vakavinavinaka vei Jiova ena masu.”—Mark.
“Keirau sega ni namaka sara me na cakayaco vei rau na luvei keirau. E dua sa yabaki lima e dua tale e yabaki tolu. . . . Dina ga ni rau dau taleitaka na italanoa kei Taniela, Enanaia, Misaeli, kei Asaraia ena Noqu i Vola ni Talanoa ena i Vola Tabu, keirau sega ga ni namaka me na tarai rau sara vakalevu na ivakamacala ni ivola na Parofisai i Taniela. Eratou se gone sara, ia e sa laurai vei iratou na yalo eratou kilai tani kina na cauravou yalododonu oya ni Iperiu. Eratou sa ivakaraitaki vinaka dina vei ira na luveda! Sa dua na iyaragi totoka dina oni solia mai vei keimami! Vinaka, vinaka sara vakalevu!”—Bethel.
“Au vakila niu tiko vata sara ga kei iratou na cauravou ni Iperiu ena gauna a vakatovolei tiko kina nodratou vakabauta; e uqeti au sara ga meu dikeva vinaka mada na noqu vakabauta. Na kato ni railesuvi e kena ulutaga “What Did You Discern?” (Na Cava O Raica Rawa?) e vukei keda meda biuta kina i lomada na lewe ni wase yadua. Vinaka sara vakalevu ena vakarautaki ni dua tale na ivola totoka.”—Lydia.