Yago Lailai, Yaloqaqa

O NA vakamacalataka rawa vakacava vei ira o sega ni kilai ira na Matanitu ni Kalou ke 76 ga na senitimita na kemu balavu? Ena rawa ni sauma na taro oqori o Laura. E sa yabaki 33, ia oqori na kena balavu, 76 ga na senitimita. Erau vakaitikotiko e Quito, Equador kei tacina o María, e sa yabaki 24, e 86 na senitimita na kena balavu. Me rau vakamacalataka mada na veika dredre erau sotava ena nodrau cakacaka vakaitalatala vakarisito.

“Keirau dau taubaletaka e veimama na kilomita me keirau lai vodo basi ina neirau yalava ni cakacaka vakavunau kei na tikovi ni soqoni vakaivavakoso. Keirau sobu, qai taubaletaka tale e veimama na kilomita me keirau donuya na ikarua ni basi. Ia e dau vakaleqai keirau e lima na koli cudrucudru ena taubale oya. Keirau rerevaki ira sara na koli baleta nira vaka na ose lelevu vei keirau. E dau neirau itataqomaki mai na koli e dua na tabanikau, keirau dau vunia toka ena tutu ni sala ni se bera ni keirau vodo ena basi me keirau vakayagataka tale ena neirau lesu.

“Sa bau ikalawa dredre dina vei keirau na vodo ina basi. Keirau dau kaba toka ena dua na ibulibuli qele donuya na ikelekele ni basi me vakarawarawataka na neirau vodo. Era dau kele volekata mai na ibulibuli qele e so na draiva ni basi, ia e so e sega. Ni kele vakayawa na basi, o koya e balavu vei keirau ena vukei koya e lekaleka. Keirau dau kosova e dua na sala ni lori osooso me keirau lai donuya na ikarua ni basi​—e sa bau sasaga levu dina baleta ni leleka na yavai keirau. Me vaka ni keirau ka leleka, e ikuri ni ka ni bolebole vei keirau ke rui bi na neirau kato ni ivola. Keirau dau kauta ga na iVolatabu lailai qai vakarauta ga na ivola keirau tawana me mamada kina neirau kato.

“Keirau dau mamadua sara mai na gauna keirau a se gone kina. Era kila vinaka o ira na bula tikivi keirau ni bau dua dina na ka ni bolebole me keirau vosa vei ira keimami sega ni veikilai. Oqo na vuna era kurabui kina, era doka tale ga ni keirau dau tukituki e nodra katuba, qai vakalevu ga mera dau vakarorogo. Ena veivanua keirau vulagi kina, era raici keirau sobu na tamata ni keirau leka ga, e vakavuna mera sega ni dau kauaitaka na itukutuku bibi keirau kauta voli. Ia, e vukei keirau na neirau dau vakananuma na loloma i Jiova ni solia vei keirau na igu me keirau tomana tiko ga kina na cakacaka vakaitalatala. E veivakayaloqaqataki tale ga ni keirau dau vakasamataka vakatitobu na Vosa Vakaibalebale 3:​5, 6.”

E vakacerecerei na Kalou keda vosota na leqa ni yagoda me vaka erau vakadinadinataka o Laura kei María. A masuta na yapositolo o Paula me vagalalataki mai “na voto ni kau sa vakalauti kina na lewe[na],” e leqa beka na ituvaki ni yagona. E qai sauma vua na Kalou: “Sa rauti iko na noqu loloma: ni sa vakalevui na noqu kaukauwa, ni sa malumalumu e dua.” E sega ni gadrevi sara me vakavinakataki mada na leqa ni yagoda meda qai qarava rawa na Kalou. Ena rawa ni vakayaloqaqataki keda ena ituvaki cava ga eda sotava na noda vakararavi vakatabakidua vua na Kalou. Ni raica vaka oya na yapositolo o Paula “na voto ni kau sa vakalauti kina na lewe[na],” e rawa ni kaya kina: “Ni’u sa malumalumu, au sa qai kaukauwa.” (2 Korinica 12:​7, 9, 10) A qai vola ena vica tale na yabaki e muri o Paula: “Au sa rawata na ka kecega e na vuku i Karisito o koya sa vakaukauwataki au.”​—Filipai 4:​13.

E rawa na cakacaka levu ni Kalou ena noda itabagauna nira veivuke kina na tagane, yalewa, kei na gone era qaravi koya ena yalodina. E so vei ira e vakaleqai tu na yagodra. Dina ga nira vakanuinui kece tu ni na vakavinakataki na ituvaki ni yagodra ena ruku ni veiliutaki ni Matanitu ni Kalou, era sega ni waraka sara na veivakabulai oqori ni Kalou mera qai saga mera vakaitavi ena nona cakacaka.

E vakaleqai tu beka e dua na tikiniyagomu? Kua ni yalolailai! O na rawa ni vakataki iratou o Paula, Laura kei María ena kaukaua ni nomu vakabauta. Ena rawa ni tukuni baleti iratou na veika a tukuni me baleti ira na tagane kei na yalewa vakabauta ena veigauna e liu: “Era sa vakaukauwataki tale ni ra sa malumalumu.”​—Iperiu 11:34.

[iYaloyalo ena tabana e 8]

María

Laura

[iYaloyalo ena tabana e 9]

E vukei Laura o María me vodo ena basi

[iYaloyalo ena tabana e 9]

“Keirau rerevaki ira sara na koli baleta nira vaka na ose lelevu vei keirau”

E ra: O Laura kei María kei rau a vuli iVolatabu vata kei rau