Meda Kua ni Soro ni Vakararawataki Keda e “Dua na Votonikau”

“Sa rauti iko na noqu loloma.”​—2 KORINICA 12:9.

1, 2. (a) Na cava meda kua ni kidroa kina ke da sotava na veivakatovolei kei na leqa? (b) Na cava eda nuidei kina nida sotava na veika dredre?

“KO IRA yadua era vinakata me ra bula e na bula va-Karisito era na vakacacani.” (2 Timoci 3:​12, VV) Baleta na cava? Baleta ga ni kaya voli o Setani ni o keda na tamata eda qarava na Kalou ena inaki tani, qai dau nona sasaga me dina na ka e kaya. Dua na gauna a kaya o Jisu vei iratou na nona yapositolo yalodina ni o ‘Setani e sagai iratou me tauvuloni iratou me vaka na witi.’ (Luke 22:​31, VV) A kila vinaka tu o Jisu ni dau vakatarai Setani na Kalou me vakatovolei keda ena so na leqa mosimosi. E sega ni kena ibalebale oqo ni ka dredre kece ga eda sotava e vakavuna o Setani kei ira na nona timoni. (Dauvunau 9:​11, NW) Ia, ena sega ni cegu o Setani ni vaqara na sala me vakacalai keda kina.

² E kaya na iVolatabu ni sega ni dodonu meda kidroataka na veika dredre eda dau sotava. Se mani leqa cava e tarai keda, oqori e sega ni ka vou se ka meda kidacalataka. (1 Pita 4:​12, VV) Ia, ‘sa yaco tale tiko ga na veivakararawataki vaka oqo vei ira na wekada era veituyaki tu e vuravura.’ (1 Pita 5:​9, VV) O Setani e sagai ira tiko vakaukaua na tamata kece ni Kalou nikua. E marau o koya ke da vakararawataki ena levu sara na leqa e vaka na votonikau. E vakayagataka kina na nona vuravura nikua me vakuria se vakalevutaka na mosimosi ni ‘votonikau e lauta tiko na leweda.’ (2 Korinica 12:7) Ia e se rawa tiko ga nida tudei se mani vakacava na sasaga i Setani. Ni dau vakarautaka o Jiova “na sala” meda tudei kina kevaka eda temaki, ena vakarautaka tale ga oqori o koya ke da mani vakararawataki ena so na ka mosimosi e vaka na votonikau.​—1 Korinica 10:13.

Ka me Caka Meda Kua Kina ni Soro

3. Na cava e kaya o Jiova ena kerekere i Paula me kauta tani na votonikau e coba tu ena lewena?

³ A masuta na Kalou na yapositolo o Paula me kauta tani na votonikau a vakararawataki koya tiko. “E na vuku ni ka oqo, ka’u a masu vakatolu vua na Turaga, me kau tani vei au.” Na cava e qai kaya o Jiova ena vakamamasu i Paula? “Sa rauti iko na noqu loloma: ni sa vakalevui na noqu kaukauwa, ni sa malumalumu e dua.” (2 Korinica 12:​8, 9) Meda dikeva mada na ka e kaya oqo o Jiova, meda raica kina se na yaga vakacava vei keda meda na kua ni soro se mani mosimosi vakacava na votonikau e lauti keda.

4. A vakila vakacava o Paula na loloma i Jiova?

⁴ Eda raica e ke ni a uqeti Paula na Kalou me bau marautaka mada ga na loloma levu sa vakaraitaki oti vua ena vuku i Karisito. Levu sara na ka sa vakalougatataki oti kina o Paula. Kena imatai ni vakadonuya o Jiova me soli vua na ilesilesi bibi me dua na tisaipeli, dina ga ni a vakacacani ira vakaca na imuri i Jisu. (Cakacaka 7:​58; 8:3; 9:​1-4) Emuri sa qai vakila o Paula na loloma levu i Jiova ni lesi koya ina so na ilesilesi totoka sara. E matata vinaka na ka eda vulica e ke. Ke da mani sotava na leqa, e se levu ga na ka ni veivakalougatataki eda marautaka tiko meda vakavinavinaka kina. Nida sotava na veika dredre, meda kua sara ni guilecava na levu ni nona dau vinaka vei keda o Jiova.​—Same 31:19.

5, 6. (a) A vakavulici Paula vakacava o Jiova me kila ni ‘vakalevui na nona kaukaua, ni sa malumalumu e dua’? (b) Ena ka a cakava o Paula, e vakavotui kina vakacava ni dau lasulasu o Setani?

⁵ Na loloma levu i Jiova e veirauti ena dua tale na sala. Oqo ena kaukaua vakaitamera e tu vua me vukei keda nida sotava na veika dredre. (Efeso 3:​20) A vakavulici Paula o Jiova me kila ni nona kaukaua “e vakalevui . . . ni sa malumalumu e dua.” Ena sala cava? A vakarautaka vakayalololoma vei Paula na kaukaua e ganiti koya me kua kina ni soro ena veika dredre a sotava. Kuria oya, na vosota i Paula kei na nona nuitaki Jiova vakaoti, a vakadinadinataki kina e matadra na lotu Vakarisito kece ni sa cakacaka tiko na kaukaua ni Kalou vua na tamata malumalumu ivalavala ca oqo. Ena yasana adua, e dau nona ile na Tevoro ni o keda na tamata eda qarava ga na Kalou kevaka e toso vinaka tu na bula qai sega na leqa. Na yalodina gona i Paula e vakavelavelataki koya sara ga na dau kakase oya!

⁶ Io, a dau ito tu i Setani o Paula ena nona saqati na Kalou. E dua o koya a kedra meca qaciqacia na lotu Vakarisito, a dua na Farisi yalodina, qai kena irairai ni bula ena nodra bula na vetaicake ni a susu ena vuvale vutuniyau. Ia, oqo sa mai veiqaravi tiko vei Jiova kei Karisito me ‘imurimuri duadua vei iratou na yapositolo.’ (1 Korinica 15:​9, VV) Ena nona itutu oya, a vakamalumalumu kina ina nodratou lewa na ilawalawa dauvakatulewa vakarisito ena imatai ni senitiuri. Qai yalodina tiko ga o koya e dina ni vakararawataki voli ena dua na votonikau. A sega ni datuvu vakadua o Paula ena veika dredre a sotava, qai bau ca dina vei Setani oya. A dei tu ga na vakanuinui i Paula ni na tiko na nona ivotavota ena Matanitu i Karisito mai lomalagi. (2 Timoci 2:​12; 4:​18) Se mani votonikau mosimosi cava e sotava, a dua dua tu ga na nona yalodina. Me dau vaka tale mada ga oya na noda yalodina! Ni vakaukauataki keda o Jiova ena gauna eda sotava kina na dredre, sa vota tiko vei keda e keri na itavi dokai meda bau cau tale tu ga ena nona vakavotui o Setani ni dau lasulasu.​—Vosa Vakaibalebale 27:11.

Bibi na iSolisoli i Jiova

7, 8. (a) E vakayagataka na cava o Jiova me vakaukauataki ira kina na nona tamata edaidai? (b) Na cava e rui bibi kina na wili iVolatabu e veisiga kei na vuli me kua kina ni vakasoroi keda na votonikau e vakararawataki keda tiko?

⁷ E vakaukauataki keda na lotu Vakarisito yalodina nikua o Jiova ni vakayagataka na yalona tabu, na nona Vosa, kei ira na tacida vakarisito. Me vakataki Paula ga, meda biuta vei Jiova ena masu na noda icolacola bibi. (Same 55:22) Ena sega beka ni kauta tani o Jiova na veika dredre eda sotava tiko, ia de dua ena solia vei keda na vuku meda na kua kina ni soro, ena veileqa mada ga era sa bau vosovosoti dredre. E rawa tale ga ni vakataudeitaka na yaloda o Jiova​—me vakaukauataki keda ena “kaukauwa mana levu”​—meda na kua kina ni soro.​—2 Korinica 4:7.

⁸ Ke da vinakata na veivuke oya, na cava meda cakava? Meda vulica vagumatua na Vosa ni Kalou, nida na kunea kina na nona vosa ni veivakacegui. (Same 94:19) Eda wilika ena iVolatabu na vosa veivakauqeti era tauca na tamata ni Kalou nira masuta tiko na nona veivuke. E yaga dina meda vakasamataka vakatitobu na veika e qai tukuna o Jiova me sauma kina na nodra masu, ni wili tale ga kina e so na vosa ni veivakacegui a tauca o koya. Na noda vulica na Vosa ni Kalou ena vakaukauataki keda ena ‘kaukauwa mana levu, e taka mai vua na Kalou, segai vei keda ga.’ Me vaka ga ni yaga na noda kana e veisiga meda bulabula da qai kaukaua tiko kina, e bibi tale ga meda kania wasoma na vosa ni Kalou. Eda sa cakava tiko beka oqo? Ke vaka kina, eda na qai raica na yaga ni “kaukauwa mana levu” vei keda meda vosota rawa kina na votonikau cava ga e vakararawataki keda tiko edaidai.

9. Era na veitokoni vakacava na qase vei ira na vosota tiko e so na leqa?

⁹ O ira na qase ni ivavakoso era dau rerevaka na Kalou e rawa nira “vaka nai vunivuni mai na cagi” ni rarawa levu, kei “nai vakaruru mai na cava” ni bula leqaleqa. Ena rawa ga ni ganiti ira na qase na ivakamacala uqeti vakalou oqo ke ra masuti Jiova ena yalomalumalumu mai vu ni yalodra me solia vei ira “na yame sa vakavulici rawa,” mera kila kina se vosa veiganiti cava mera tauca vei ira na vakararawataki tu. Na nodra vosa na qase e rawa ni vaka na malumu ni uca mirimiri e vakamalumutaka qai vakaceguya na yalo e vusolo tu ena levu ni rarawa. Nira “vakayaloqaqataki ira era yalo lailai” na qase, era sa na tokoni ira tiko kina na tacidra vakayalo era sa rairai oca mai se lomabibi baleta ni vakararawataki ira tiko e dua na votonikau.​—Aisea 32:2; 50:4; 1 Cesalonaika 5:​14, VV.

10, 11. Era na veivakayaloqaqataki vakacava na tamata ni Kalou vei ira na sotava tiko na veika dredre sara?

¹⁰ O ira kece na tamata i Jiova era lewe tiko ni nona vuvale duavata vakarisito. Io o keda kece eda sa “veitiki ni yago yadua e na dua ga na yago,” oqori na vuna “sa dodonu sara tale ga me da veilomani.” (Roma 12:​5, VV; 1 Joni 4:​11, VV) Eda na vakayacora vakacava na ka bibi oqo? Na 1 Pita 3:8 (VV) e kaya nida na cakava oqori ena noda ‘dau veinanumi, veilomani me vaka na veitacini, da qai dau yalovinaka’ vei ira kece eda vakabauta vata. Io, o keda kece e rawa nida kauaitaki ira vakayalololoma na gone se qase era vosota tiko e dua na votonikau mosimosi. Ena sala cava?

¹¹ Meda dau nanumi ira ena nodra leqa. Ke da sega ni kauai, se nanumi ira, o cei e kila, de dua, sa ra na qai yalolailai ga vakalevu. Ke da kila vinaka na veika dredre era sotava tiko, eda na qarauna na ka eda tukuna, na kena itukutukuni, kei na noda ivalavala vei ira. Ke da dau veivakauqeti da qai dau veivakayaloqaqataki, oqori ena vakamalumutaka na mosi ni votonikau cava ga e vakararawataki ira voli. De dua, eda sa na vakacegui ira sara tiko ga e keri.​—Kolosa 4:​11.

Nodra Sega ni Soro eso

12-14. (a) Na cava e cakava e dua na lotu Vakarisito me bau malumu tu kina vua na mosimosi ni kenisa e tauvi koya tiko? (b) Na cava era cakava na tacina vakayalo na marama oqo mera vakaraitaka kina vua na nodra veitokoni kei na veivakayaloqaqataki?

¹² Nida sa volekata yani na icavacava ni iotioti ni veisiga oqo, sa qai levu ga e veisiga na “ka rarawa.” (Maciu 24:8) O koya gona, kena irairai ni sega ni dua e vuravura ena drotaka rawa na veika dredre, vakabibi o ira na tamata yalodina i Jiova era saga tiko mera cakava na lomana. Vakasamataka mada oqo e dua na lotu Vakarisito a cakacaka voli vakaitalatala vakatabakidua. A laurai vakavuniwai qai raici ni tauvi kenisa, mani vinakati me sele. Ni rau sa kila vakaveiwatini ni tiko vua na mate oqo, sega ni bera ni rau sa tabalaka na masu vei Jiova. A qai kaya e muri o koya ni dua na vakacegu vakaitamera e sobuti rau. So na gauna, a vakila ni vinaka na nona bula, so tale na gauna e ca, ia a vosota voli ga ena veigauna oqori, vakabibi ni sa tatara vakaca na wainimate ni kenisa a soli tiko vua.

¹³ A saga na tacida yalewa oqo me vulica e levu tale na ka me baleta na kenisa a tauvi koya tiko. A lai vakatarogi iratou na nona vuniwai. E kunea ena Vale ni Vakatawa, Yadra!, kei na so tale na ivolatabaki vakarisito na kedra italanoa e so era vosota na kedra mate. A wilika tale ga e so na tikina veiganiti mai na iVolatabu e dusia na veivakaukauataki i Jiova vei ira na nona tamata mera vosota kina na veika dredre, kei na so tale na ivakamacala yaga.

¹⁴ E dua na ulutaga e sereka na valuti ni yalolailai e volai kina na vosa vakayalomatua oqo: “Ni sa tawasei koya tani na tamata, sa qara na ka e domona.” (Vosa Vakaibalebale 18:1) Mani tau kina na ivakasala oqo ena ulutaga oya: “Kakua ni dau tawasei iko.”a E talanoataka na tacida yalewa oya: “Levu era kaya vei au nira dau masulaki au; e so era dau qiri au mai ena talevoni. Rau dau sikovi au e rua na qase me rau raica ga seu sa vakacava tiko. Levu era dau vakau senikau yani vei au, qai ka levu na noqu ivola ni vakanuinui vinaka. Era bau vakabutara sara mai na qau e so. E levu tale era bole mera dau mai kauti au ina valeniwai me lai qaravi kina na kequ mate.”

15-17. (a) Na cava e cakava e dua na lotu Vakarisito ena vuku ni veika dredre e sotava mai na nona coqa? (b) Era veitokoni vakacava na lewe ni ivavakoso?

¹⁵ A coqa vakarua na nona motoka e dua na marama mai New Mexico, Mereke, sa dede na nona qaravi Jiova voli. Mavoa kina na domona kei na tabana, qai vakaleqa ga vakalevu oya na mate ni sasala sa yabaki 25 vakacaca na nona vosota voli mai. Oqo na ka e tukuna: “Au sa dau lolou tu ga, qai dredre meu laveta e dua na ka e rua na kilo lako cake na kena bibi. Ia au kila ni tauri au dei na noqu dau masu vei Jiova mai vu ni yaloqu, vaka kina e so na ulutaga ni Vale ni Vakatawa eda sa dau vulica. E dua na ulutaga oya a vakamacalataki kina na Maika 6:​8, e kaya ni noda yalomalumalumu nida lako vata kei na Kalou e kena ibalebale nida vakadinata ni vakaiyalayala ga na noda kaukaua. Au taura rawa e ke ni sega ni dodonu meu yalolailaitaka na gauna lailai sara au rawata ena cakacaka vakaitalatala ena vuku ni kequ mate. Na ka ga e bibi me vu mai lomada na noda qaravi koya.”

¹⁶ A kaya tale ga oqo: “Eratou dau vakacaucautaki au na qase ena noqu sasaga meu dau tiko ena soqoni, meu lakova tale ga na cakacaka vakavunau. O ira na itabagone era na mai mokoti au nira kidavaki au. Era dau nanumi au vakalevu na painia, ra dau veiveisautaka na ituvatuva ni nodra cakacaka me ganiti au keu sega ni lako rawa i vunau ena vuku ni kequ mate. Ke mani draki ca, era na sureti au meu tomani ira ena nodra veisikovi lesu se vuli iVolatabu. Ia ni dredre vei au meu cauvena na noqu kato ni ivola, e so na dautukutuku era na tawana na noqu ivola ena nodra kato niu tomani ira ena cakacaka vakavunau.”

¹⁷ Vakaevei, eda raica rawa se ra veivuke vakacava na qase kei ira na lewe ni ivavakoso vei rau na tacida yalewa oqo me rau vosota kina na kedrau mate e vaka na votonikau mosimosi? Io, na veivuke yaga era vakarautaka e sota sara ga kei na veika erau gadreva, wili kina na veika me ganiti rau vakayago, vakayalo tale ga. Me uqeti keda mada ga oqori meda dau vukei ira na tacida era sotava tiko na leqa. O kemuni tale ga na itabagone oni rawa ni veivuke vei ira na lewe ni ivavakoso era vakararawataki tiko ena so na votonikau.​—Vosa Vakaibalebale 20:29.

18. Eda na vakayaloqaqataki vakacava mai na italanoa ni nodra bula e so e dau taba ena Yadra! kei Na Vale ni Vakatawa?

¹⁸ Sa tabaki ena Vale ni Vakatawa kei na Yadra! na kedra italanoa e levu na iVakadinadina era sa vosota oti mai, se ra se vosota tiko ga edaidai e levu na ka dredre. Ni o wilika e veigauna na italanoa vaka oya, o na raica ni levu na tacimu vakayalo e veiyasa i vuravura era vosota tu na dredre ni bula vakailavo, na mate ni wekadra voleka ena so na leqa lelevu, kei na ituvaki rerevaki era donuya tu ena vuku ni ivalu. E so tale e tauvi ira na mate e vakadredretaka na nodra veilakoyaki. E levu era sega ni cakava rawa mada ga na veika rawarawa era sega ni okata tu me dua na ka o ira na bulabula. Na nodra tauvimate e dau vakatovolei kina na nodra yalovosovoso, vakabibi ke se gu tiko ga na yalodra ena cakacaka vakarisito ia sa sega ni vaka e liu na ka era rawata kina. Sa dua na ka na nodra marautaka na nodra veivuke kei na veitokoni na tacidra vakarisito itabaqase kei ira na gone!

Na Vosota e dau Tini ena Marau

19. Na cava a rawa kina vei Paula me reki, e dina ni vakararawataki tu ena veika dredre kei na malumalumu era vaka na votonikau mosimosi?

¹⁹ A reki o Paula ni vakila sara ga na veivakaukauataki ni Kalou. E kaya kina: “Sa yaloqu sara . . . me’u rekitaka na noqu malumalumu, me tiko kina vei au na kaukauwa i Karisito. O koya oqo ka’u sa vinakata kina na malumalumu, na vakasewasewani, na vakadravudravuataki, na veivakacacani, na veivakararawataki, e na vuku i Karisito: ia ni’u sa malumalumu, au sa qai kaukauwa.” (2 Korinica 12:​9, 10) Mai na veika sara ga e sotava, a rawa kina vei Paula me kaya ena nuidei: “Au sa sega ni vosa ni’u sa dravudravua: ni’u sa vakatavulici, me’u vakacegu tiko, e na ka kecega sa yaco vei au. Au sa kila na vakadravudravuataki, ka’u sa kila talega na vakavutuniyautaki: e na veiyasana kei na ka kecega ka’u sa vakatavulici kina me’u mamau, me’u viakana talega, ka me’u vutuniyau, me’u dravudravua talega. Au sa rawata na ka kecega e na vuku i Karisito o koya sa vakaukauwataki au.”​—Filipai 4:​11-​13.

20, 21. (a) Ena vu ni marau vakacava vei keda na noda dau vakasamataka na “veika sa sega ni rairai”? (b) Na cava e so na ka “sa sega ni rairai” o vakanuinui tu mo raica ena vuravura parataisi?

²⁰ O koya gona, mai na noda vosota na votonikau cava ga e vakararawataki keda voli, eda na marautaka dina meda vakaraitaka vei ira na tamata kece ga ni mai vakalevui na kaukaua i Jiova ena vuku ni noda malumalumu. A vola o Paula: “Keitou sa sega ni datuvu . . . sa vakavoui na tamata eloma e na veisiga kecega. Ia na noda rarawa mamada, sa dede vakalailai sara ga, sa vakayacora vei keda na serau levu sa uasivi cake vakalevu sara, ka tawa mudu, ni da sa . . . [vakananuma] na veika ga sa sega ni rairai. . . . ia sa sega ni mudu na veika sa sega ni rairai.”​—2 Korinica 4:​16-​18.

²¹ Levu sara vei ira na tamata i Jiova nikua era nuitaka tu na bula ena nona vuravura parataisi, mera marautaka kina na veika sa yalataka oti. Vei keda edaidai, na veivakalougatataki vaka oya e se “sega ni rairai.” Ia, sa toso totolo tiko mai na gauna meda na qai raica kina e matada sara ga na veika oya, da qai marautaki ira me tawamudu. E dua vei ira na ka eda na vakalougatataki kina oya ni sa na sega tale na leqa me vaka na votonikau mosimosi me dau vakararawataki keda! Na Luve ni Kalou ena “vaqeavutaka na cakacaka ni tevoro,” qai “vakamalumalumutaki koya kina sa lewa na mate.”​—1 Joni 3:8; Iperiu 2:​14.

22. Na cava meda nuidei kina, ia na cava meda kua ni cakava?

²² O koya gona, se mani votonikau vakacava e vakararawataki keda tiko nikua, meda kua mada ga ni soro kina. Me vaka ga a cakava vei Paula o Jiova, ena vakaukauataki keda tale ga edaidai meda na vosota tiko ga. Ni sa yaco mai na vuravura parataisi, eda na qai vakavinavinakataka na Kalou o Jiova e veisiga ena vuku ni nona cakacaka loloma kece ga ena vukuda.​—Same 103:2.

[iVakamacala e ra]

O na Sauma Vakacava?

• Na cava e dau saga kina na Tevoro mera kua ni yalodina na lotu Vakarisito dina, ia e dau saga vakacava oqori?

• E vakalevui vakacava na kaukaua i Jiova ni ‘sa malumalumu e dua’?

• Era na veivakauqeti vakacava na qase kei na so tale vei ira na vakararawataki tu ena so na leqa?

[iYaloyalo ena tabana e 18]

A masuta vakatolu o Paula vua na Kalou me kauta tani na votonikau a vakararawataki koya voli