Na Yaga ni Masu
Sa dromu toka na siga ena koro o Neori ena Tokalau e Loma. Tadu yani o Eliesa na turaga ni Siria kei na tini na kameli ena ibili ni koro, donuya na toevu. Dina ni oca qai karamaca sara tu ga o Eliesa, ia e kauaitaka ga vakalevu na ka e baleti ira na tani. E lako sara mai ena dua na vanua yawa me mai vaqara e dua na goneyalewa me lai wati koya na luve i nona turaga. Ia me qara ga e dua na goneyalewa vei ira na weka i nona turaga. Ena rawata vakacava na itavi dredre oqo?
E VAKABAUTA o Eliesa na yaga ni masu. Ena totoka ni vakabauta e tu vua, me vaka e dua na gonelailai, e kerea kina ena yalomalumalumu: “Kemuni Jiova, na Kalou i Eparaama na noqu turaga, au masuti kemuni, mo ni vakayacora, na ka ka’u sa talai kina e na siga oqo, ka caka vakayalololoma vei Eparaama na noqu turaga: raica, au sa wavu tu mai nai keli wai; a ra na lako mai na nodra goneyalewa na lewe ni koro me taki wai: ia me yaco, na goneyalewa ka’u na kaya vua, Mo tauca sobu mada na nomu saqa, me’u gunu; ka sa na kaya ko koya, Mo gunu, ka’u na vagunuvi ira talega na nomu kameli: me sai koya mada ko ni sa lesia me nona na nomuni tamata ko Aisake; ia ka’u na kila kina ni kemuni sa caka vakayalololoma vua na noqu turaga.”—Vakatekivu 24:12-14.
E vakalougatataki na nona sega ni vakatitiqataka o Eliesa na yaga ni masu. Na cava tale, ni imatai sara ga ni goneyalewa e lako mai ina toevu na makubui tuakai Eparama! O Repeka na yacana, e se goneyalewa, e itovo vinaka, qai rairai vinaka tale ga. E sega wale ga ni vagunuvi Eliesa, e vinakata tale ga me vakaceguya nodra karamaca na nona kameli. Ni oti nodratou veitalanoa vakamatavuvale, sa makutu sara o Repeka me rau salavata kei Eliesa ena vanua yawa e lako mai kina, me lai wati Aisake na luve i Eparama. E veivakurabuitaki qai totolo na kena saumi na masu i Eliesa, ni gauna oya e dau takosova vakacakamana na Kalou e so na ka e dau yaco!
Levu sara na ka eda vulica ena masu i Eliesa. E vakaraitaka ni duatani sara na vakabauta e tu vua, e yalomalumalumu, e vakaliuci ira tale ga na tani. E vakaraitaka tale ga o Eliesa ena nona masu na nona vakamalumalumutaki koya ena sala e dau veitaratara kina na Kalou kei na kawatamata. Sega tale ga ni vakatitiqataki ni kila vinaka tu o koya na talei ni nodrau veiwekani na Kalou kei Eparama, kei na vosa ni yalayala nira na vakalougatataki na kawatamata ena vuku i Eparama. (Vakatekivu 12:3) E vaka gona oqo na itekitekivu ni masu i Eliesa: “Kemuni Jiova, na Kalou i Eparaama na noqu turaga.”
O Jisu Karisito na kawa i Eparama, ena vakalougatataki kina na kawatamata kece dautalairawarawa. (Vakatekivu 22:18) Kevaka eda vinakata me saumi na noda masu edaidai, ena vinakati meda vakamalumalumu ina sala ni nona veitaratara na Kalou kei na kawatamata, ena vuku i Luvena. E kaya o Jisu Karisito: “Kevaka dou sa tu vei au, ka sa tu vei kemudou na noqu vosa, dou na kerea na ka dou sa vinakata, ia ena yaco vei kemudou.”—Joni 15:7.
E vakadinadinataka na yapositolo o Paula e dua na imuri i Karisito, na veivosa i Jisu. E sega ni vakatitiqataka na yaga ni masu. A vakadreti ira na nona itokani lotu Vakarisito mera biuta vua na Kalou na nodra lomaocaoca kece ga ena nodra masu vua, qai kaya: “Au sa rawata na ka kecega e na vuku i Karisito o koya sa vakaukauwataki au.” (Filipai 4:6, 7, 13) Kena ibalebale oqo ni dau sauma na Kalou na masu kece ga ni kerekere i Paula? Meda raica mada.
Sega ni Dau Saumi na Masu Kece
E dau vakaleqai Paula tiko ena nona cakacaka vakaitalatala e dua na ka e vakatoka me “voto ni kau sa vakalauti kina na lewequ.” (2 Korinica 12:7) De dua, na ka oya na kena dau vakasosataki na nona vakasama kei na rarawa era vakavuna na dauveitusaqati, kei ira tale ga na “veiwekani vakailasu.” (2 Korinica 11:26; Kalatia 2:4) Ke sega, na mosi beka ni dua na mate e tauva na matana. (Kalatia 4:15) Sega mada ni macala se cava sara mada e vakavuna, ia na ‘votonikau e lauta tiko na lewena,’ e dau vakamalumalumutaki Paula sara ga. E vola: “E na vuku ni ka oqo, ka’u a masu vakatolu vua na Turaga, me kau tani vei au.” Ia a sega ni vakadonui na kerekere i Paula. E vakamatatataki vei Paula ni sa rauti koya vinaka na veika vakayalo sa solia oti vua na Kalou, me vaka na kaukaua me vosota rawa kina na veivakatovolei. E kaya tale ga vua na Kalou: “Sa vakalevui na noqu kaukauwa, ni sa malumalumu e dua.”—2 Korinica 12:8, 9.
Na cava eda vulica ena ivakaraitaki i Eliesa kei Paula? E dau rogoca na Kalou o Jiova na nodra masu na yalomalumalumu era vinakata mera qaravi koya. Sega ni kena ibalebale oqo ni dau solia na ka kece ga era kerea vua, e baleta ni sega ni dau rai vakalekaleka na Kalou, ia e dau rai vakayawa. E kila vinaka cake o koya na ka mai vei keda, e kila tale ga na cava e vinaka vei keda. E bibi cake sara, ni ka e dau cakava, e salavata ga kei na nona inaki sa volai tu ena iVolatabu.
Na Gauna ni Veivakabulai Vakayalo
Sa yalataka tu na Kalou me na vakabula na kawatamata mai na mate kece ga vakayago, na mate tale ga ni vakasama, kei na rarawa ni yalo, ena loma ni Duanaudolu na Yabaki ena liutaka kina na vuravura na Luvena. (Vakatakila 20:1-3; 21:3-5) Ra waraka tiko ena yalodina na lotu Vakarisito na gauna vinaka e yalataki tiko, era vakabauta tale ga ni tu dina vua na Kalou na kaukaua me kauta mai na gauna vinaka oqori. Dina nira sega ni namaka mera vakabulai vakacakamana ena gauna oqo, ia era dau masuta na Kalou me vakacegui ira, me vakaukauataki ira tale ga mera vosota na veika dredre. (Same 55:22) Nira tauvimate, de ra na masulaka vua na Kalou me dusimaki ira ena veiqaravi vakavuniwai e vinaka duadua, e rawa tale ga nira sauma vakailavo.
So na lotu era dau vakayaloqaqataki ira na tauvimate mera masulaka mera vakabulai ena gauna sara ga oqo, era kauta cake mai na veivakabulai vakacakamana a vakayacora o Jisu kei ira na nona yapositolo. Ia e dua tiko na inaki bibi ni veivakabulai vakacakamana oqori. E vakadinadinataka ni o Jisu Karisito na Mesaia dina, e vakaraitaka tale ga ni sa sega ni vakadonuya na Kalou na nodra matanitu na Jiu, sa gole nona veivakadonui ina ivavakoso vakarisito tauyavu vou. E vinakati na cakacaka mana me vakaukauataka na nodra vakabauta na lewe ni ivavakoso vakarisito e se qai tauyavu vou ena gauna oya. Ia ni sa dei na ivavakoso, ni sa matua mai, sa na “mudu” e keri na isolisoli mana.—1 Korinica 13:8, 11.
Ena gauna bibi oqo, sa dusimaki ira tiko na nona dauveiqaravi na Kalou o Jiova ena cakacaka bibi ni veivakabulai vakayalo. Ni se vo na gauna, e vinakati mera kua ni lokuyara na tamata mera rogoca na vakamamasu oqo: “Dou vakasaqarai Jiova ni sa kune rawa; dou masuti koya ni sa voleka tiko: me biuta mada na nonai tovo na tamata ca, kei na nona vakanananu na tamata daucaka cala; ka me lesu mai ko koya vei Jiova, ena yalololoma vua, io vei koya na noda Kalou, ni na gugumatua ni lomana.”—Aisea 55:6, 7.
Na nodra vakabulai vakayalo na ivalavala ca era sa veivutuni, e vakayacori oqo ena kena vunautaki na itukutuku vinaka ni Matanitu ni Kalou. (Maciu 24:14) Nona vakaukauataki ira tiko nona dauveiqaravi mera cakava na cakacaka ni veivakabulai oqo, sa vukei ira tiko na Kalou o Jiova e vica vata na milioni mai na veivanua kece ga mera veivutunitaka nodra ivalavala ca, mera mai veiwekani vinaka kei koya ni se bera ni cava na ivakarau ni veika ca oqo. Sa saumi tale ga na nodra masu ena yalodina o ira kece era vinakata mera vakabulai vakayalo, kei ira era vinakata mera vukei me rawa nira vakayacora na cakacaka ni veivakabulai oqo.
[iTaba ni Credit Line ena tabana e 3]
Eliezer and Rebekah/The Doré Bible Illustrations/Dover Publications