O Repeka​—Na Yalewa Dau Cakacaka e Rerevaka na Kalou

KAYA mada mo digia na yalewa me wati luvemu tagane. Na yalewa vakacava o na digia? Na ivakatagedegede cava ena gadrevi vua? O na vaqara beka e dua e matavinaka, e vuku, dau veikauaitaki, qai dau cakacaka? Se o na raica e dua tale na ka?

Oqori sara ga na ituvaki a tu kina o Eparama. A yalataka o Jiova ni na vakalougatataka nona kawa ena vuku i luvena o Aisake. Nida vakamuria tiko mai me yacova na gauna oya, e sa qase sara o Eparama, ia se dawai voli ga o Aisake. (Vakatekivu 12:​1-3, 7; 17:19; 22:​17, 18; 24:⁠1) E tuvanaka o Eparama me vaqarai e dua na wati Aisake vinaka baleta ni na vakalougatataki o koya, na yalewa ena mai watina, kei ira na luvedrau. O koya e bibi, me qaravi Jiova na yalewa oya. Me vaka ni sega ni kune i Kenani, na vanua e tiko kina o Eparama, na yalewa vaka oya, sa dodonu ga me lai vaqaqara ena dua tale na vanua. E qai digitaki o Repeka. A kune vakacava? E kaukaua tu beka vakayalo? Na cava eda rawa ni vulica vua?

Vaqarai na Yalewa Vinaka

E tala o Eparama e dua nona dauveiqaravi e qase duadua, o Eliesa, ena vanua yawa o Mesopotemia vei ira ga na wekana me lai kauta mai kina na wati Aisake, era qaravi Jiova tale ga. Ena bibi ni vaqaqara oqori, e bubului sara ga kina o Eliesa ni na sega ni digia e dua na yalewa ni Kenani me wati Aisake. Sa bau raica dina vakabibi na tikina oqo o Eparama. E yaga meda vuli kina.​​—⁠Vakatekivu 24:​2-​10.

Ni sa yaco yani ena nodra koro na weka i Eparama, a kauti ira sara nona kameli o Eliesa ina dua na ikeliwai. Raitayaloyalotaka mada na ka e yaco! Sa yakavi mai, qai masu o koya: “Raica, au sa wavu tu mai nai keli wai; a ra na lako mai na nodra goneyalewa na lewe ni koro me taki wai: ia me yaco, na goneyalewa ka’u na kaya vua, Mo tauca sobu mada na nomu saqa, me’u gunu; ka sa na kaya ko koya, Mo gunu, ka’u na vagunuvi ira talega na nomu kameli: me sai koya mada ko ni sa lesia me nona na nomuni tamata ko Aisake; ia ka’u na kila kina ni kemuni sa caka vakayalololoma vua na noqu turaga.”​​—⁠Vakatekivu 24:​11-​14.

Era kila kece tu na yalewa e kea nira dau gunu wai vakalevu (rauta ni 25 na qaloni) na kameli. O koya gona na yalewa e bolea me vagunuva e tini na kameli ena tu vakarau tale ga me cakava na cakacaka levu. Na nona cakava na ka oqori ena matadra na tamata qai sega ni dua e veivuke, e vakadinadinataka sara ga na kaukaua, vosota, kei na yalomalumalumu e tu vua vaka kina na nona dau yalovinaka vei ira na tamata kei na manumanu.

Na cava e qai yaco? “Ni sa vosa tiko ko koya, raica, sa lako mai, a sa colata tu na nona saqa, ko Repeka, na luve i Pecueli, o koya na luve i Milika, na wati i Neori, na tuaka i Eparaama. A sa matavinaka sara na goneyalewa oqo, a goneyalewa dina, . . . a sa lako sobu ki nai keli-wai, ka vakasinaita na nona saqa, ka cabe tale mai. A sa cici na tamata me la’ki tavaki koya, a sa kaya, Mo vagunuvi au mada vakalailai e na wai mai na nomu saqa ne? A sa kaya ko koya, Ni gunu saka ga, noqu turaga: a sa vakusarawa ni tauca sobu ki na ligana na nona saqa, ka vagunuvi koya.”​​—⁠Vakatekivu 24:​15-​18.

E Tiko Beka Vei Repeka na iVakatagedegede e Gadrevi?

E vugoi Eparama vakarua o Repeka, e yalewa matavinaka, qai itovo rakorako. E doudou na vosa vei ira na vulagi, ia e sega ni vakatautaukeni koya sara vei ira. E solia vei Eliesa na wai me gunu ena gauna e kerea kina. E namaki ga ni na cakava oqori baleta ni ivakarau ga ni veikauaitaki. Ia, vakacava ga na ikarua ni ka a kerea o Eliesa?

E kaya o Repeka: “Ni gunu saka ga, noqu turaga.” E sega ni yala ga e kea. E tomana tale: “Au na taki vei ira talega na nomu kameli, ka me ra mamau mada.” E sega ni cakava ga o koya na ka e namaki vua. Ena nona lomasoli e ‘sova maca na nona saqa ina loma ni gunugunu ni manumanu, e cici tale ina ikeli wai me yacova sara nira sa gunu kece na kameli.’ E yalewa dau cakacaka dina. E tukuni ena tikina oya ni ‘kurabuitaki koya’ o Eliesa.​​—⁠Vakatekivu 24:​19-​21.

Na nona kila ni rau veiwekani kei Eparama na goneyalewa oya, a cuva qai vakavinavinaka vei Jiova. Sa qai taroga ke dua na rumu e tu ena vale i tamana me moce kina ena bogi oya. E vakaio o Repeka qai cici totolo sara i vale me lai tukutuku.​​—⁠Vakatekivu 24:​22-​28.

Ni rau sa rogoca oti na italanoa i Eliesa, erau dikeva rawa na ganei Repeka, o Lepani, kei na tamana, o Pecueli ni veidusimaki sara tiko ga kina na Kalou. Sega ni vakabekataki ni sa dodonu ga me wati Aisake o Repeka. “Kauta, ka lako,” erau kaya, “me watina na luve ni nomu turaga, me vaka sa kaya ko Jiova.” Na cava beka na rai nei Repeka? Ni tarogi ke makutu me sa lako sara ga ena gauna ga oya, e sauma ena dua ga na vosa vakaiperiu e kena ibalebale: “Au na lako.” E sega ni vakasaurarataki o Repeka me ciqoma na nona mai vosaki oqori. E vakamatatataka sara oqori o Eparama ena nona kaya “kevaka sa na sega ni via muri iko mai na yalewa” me galala ena nona bubului o Eliesa. Ia, e raica tale ga o Repeka na nona veidusimaki na Kalou ena tikina oqo. Sega ni bera nona sa biuti iratou na nona vuvale me lai vakamautaka e dua na tagane e se bera mada ga ni bau sotava. Na nona vakatulewa ena doudou oqori e ivakaraitaki vakasakiti ni nona vakabauta. Sa ganiti koya ga kina me wati Aisake!​​—⁠Vakatekivu 24:​29-​59.

Ni rau sa sota kei Aisake, e ubia na uluna o Repeka me ivakaraitaki ni nona vakamalumalumu. E vakawatitaki koya o Aisake, qai tini domoni koya baleta sara beka ga na nona itovo talei.​​—⁠Vakatekivu 24:​62-​67.

Drua Tagane na Luvena

A sega tu ni vakaluveni o Repeka me rauta ni 19 na yabaki. Sa qai kunekunetaki rau na drua, ia e dredre na nona buketetaki rau tiko ni rau dau veivala e ketena, e vakavuna me tagi vua na Kalou o Repeka. Eda rairai cakava tale ga vaka kina ena gauna eda sotava kina na veika rarawataki. E rogoci Repeka o Jiova qai vakaukauataki koya. Ni na yaco o koya me tina ni rua na matanitu, ia “ko koya sa qase ena qaravi koya sa gone.”​​—⁠Vakatekivu 25:​20-​26.

E sega ni vakavuna na vosa oqori na nona dau marautaki Jekope tiko vakalevu o Repeka, na luvena gone. Erau duidui na gonetagane oqo. O Jekope e “dautiko malua,” ia o Iso e sega ni kauaitaka na veika vakayalo, qai volitaka vei Jekope me isau wale ga ni kena kakana na nona itutu vakaulumatua, o koya ena nona kina na vosa ni yalayala ni Kalou. Na nona vakawatitaka e rua na yalewa ni Itaiti e vakaraitaka nona beca, se sega ni doka na veika vakayalo, e vakavuna kina nodrau rarawa vakalevu na nona itubutubu.​​—⁠Vakatekivu 25:​27-​34; 26:​34, 35.

Sagai me Nei Jekope na Veivakalougatataki

E sega ni kaya na iVolatabu nona sa kila tu se sega o Aisake ni na qaravi Jekope o Iso. Se mani cava ga e yaco erau kila o Repeka kei Jekope ni dodonu me nei Jekope na veivakalougatataki. E yavala totolo o Repeka ni rogoca ni sa na vakalougatataki o Iso ena gauna e sa na vakarautaka kina na kakana kei Aisake. E se tiko ga vua na igu kei na kaukaua e kilai kina ni se goneyalewa. E ‘vakaroti’ Jekope me kauta yani vua e rua na luve ni me. Ena vakasaqara na kakana e dau taleitaka vakalevu o watina. Me veisautaka na kena irairai o Jekope me vakataki Iso me na vakalougatataki kina. E sega ni via cakava o Jekope. Ni na kila o tamana na ilawaki erau cakava ena cudruvi koya kina! E cike ga o Repeka. E kaya: “Me tau vei au na kena cudru ka me kakua vei iko, na luvequ.” Sa qai vakasaqara e dua na kakana o Repeka, e veisautaka na kena irairai o Jekope, sa qai lako vei tamana.​​—⁠Vakatekivu 27:​1-​17.

E sega ni tukuni se cava e cakava kina na ka oqori o Repeka. E levu era sega ni taleitaka, ia e sega ni vaka kina na iVolatabu, se me rai vaka oqori o Aisake nona qai kila ni sa vakalougatataki tu o Jekope. Ia, e qai vakalougatataki Jekope ga vakalevu o koya. (Vakatekivu 27:29; 28:​3, 4) E kila o Repeka na ka a sa tukuna tu mai vakailiu o Jiova me baleti rau na luvena. E yavala gona kina me nei Jekope na veivakalougatataki a dodonu ga me nona. E salavata vinaka kei na inaki i Jiova.​​—⁠Roma 9:​6-​13.

E Talai o Jekope i Karana

E vakaseva na inaki i Iso o Repeka ni uqeti Jekope me dro me yacova ni sa malumu na cudru i tuakana. E kerea na veivakadonui i Aisake o Repeka me lako o Jekope, ia a sega ga ni vakalasikana na nona cudruvi Jekope o Iso. E qaseqasetaka nona tukuna vei Aisake ni rui lomaleqataka de vakawatitaka e dua na yalewa ni Kenani o Jekope. Na vakasama oqori e uqeti Aisake sara ga me vakaroti Jekope me kua ni coko ena dua na vakawati vaka oya qai vakatalai koya vei ira na weka i Repeka me lai raica kina e dua na watina e dau rerevaka na Kalou. E sega ni dua na vanua e volai tu kina ni rau a qai veiraici tale o Jekope kei Repeka, ia na ka ga a cakava o Repeka era vakalougatataki kina vakalevu na matanitu o Isireli mai muri.​​—⁠Vakatekivu 27:⁠43–​28:⁠2.

Eda qoroi Repeka dina nida kila na veika baleti koya. E yalewa rairai vinaka, ia na nona totoka taucoko e laurai ena nona sokalou. A vinakata sara ga o Eparama na yalewa vaka oqori me vugona. Na nona veitovo talei tale e so e uasivita na ka kece a nuitaka tu o Eparama. E dodonu mera vakatotomuria kece na yalewa lotu Vakarisito na nona vakabauta, nona yaloqaqa ni muria na veidusimaki vakalou, nona gugumatua, nona yalomalua, kei na nona dau veikauaitaki. Oqori sara ga na veika e vinakata o Jiova vei ira na yalewa ivakaraitaki vinaka.