Dau Rogoca Dina na Masu na Kalou

Dua e dau masu vakawasoma mai vu sara ga ni lomana o Konilio, ena nona qara tiko na veivakadonui ni Kalou. E vakayagataka vinaka tale ga na nona itutu vakavetani ni ivalu. E kaya na iVolatabu ni “dau soli ka ni loloma vakalevu vei ira” era leqa dina.​—Cakacaka 10:​1, 2, VV.

ENA gauna oya era se lewe ga ni ivavakoso vakarisito na Jiu, o ira na tavuki mera Jiu, kei ira na kai Samaria. E kai Matanitu Tani tawacili o Konilio, e sega ni lewe ni ivavakoso vakarisito. Sa kena ibalebale oya ni na sega ni rogoci nona masu? E sega, e dau raica na Kalou o Jiova na nona cakacaka, kei na nona dau masu.​—Cakacaka 10:4.

Ena nona veidusimaki e dua na agilosi, e mai veikilai kina o Konilio kei na ivavakoso vakarisito. (Cakacaka 10:​30-​33) Yaco kina me imatai o koya kei na nona matavuvale kai Matanitu Tani tawacili me ratou vakadonui me lewe ni ivavakoso vakarisito. Ni sa oti e vica na yabaki, e raica na Kalou o Jiova ni veiganiti me volatukutukutaki tale ga ena iVolatabu na ka e sotava o Konilio. E sega ni vakatitiqataki ni a veisautaka sara vakalevu nona bula me rawa ni salavata kei na ivakatagedegede ni Kalou. (Aisea 2:​2-4; Joni 17:16) Na ka e sotava o Konilio e dodonu me vakayaloqaqataki ira na leweniveivanua kece ga era qara tiko na veivakadonui ni Kalou edaidai. Oqo e so na kena ivakaraitaki.

iVakaraitaki Ena Gauna Oqo

Sa dua na ka nona vakasaqara na vakacegu e dua na marama gone mai Idia. E vakamau ni se qai yabaki 21, mani rua kina na luvena. A mate o watina ni se sega ni dede na nona sucu na ikarua ni luvena. Sa mai yada tale ni se qai yabaki 24 wale ga, sa vula rua tiko na luvena yalewa, e vula 22 na luvena tagane. Sa rauta me vakasaqara na vakacegu! I vei beka me gole kina? Ni lomabibi tu ena dua na bogi, sa qai kaya ena nona masu, “Tamaqu vakalomalagi, yalovinaka vakacegui au ena nomuni Vosa.”

Na kena mataka ga sa basika sara e dua na vulagi. E dua na tagane iVakadinadina i Jiova. E sega ni toso vinaka nona cakacaka vakaitalatala ena veivale ena siga oya, ni lailai wale ga era dolava vua nodra katuba. Ni lako vata nona oca kei na yalolailai, sa vinakata sara ga me lesu tale i vale, oti sa qai nanuma me sikova mada e dua tale na vale. I keri sara ga erau a sota kina kei na yada gone oqo. A sureti koya i lomanivale na yada, e taura tale ga e dua na ivola e vakamacalataki kina na iVolatabu. E lomavakacegu sara ga na marama oqo ena ka e wilika ena ivola oya, kei na nodrau veitalanoa kei na tagane iVakadinadina. E vulica rawa ni yalataka tu na Kalou ni na vakaturi ira na mate, ena veisautaka tale ga na Matanitu ni Kalou na vuravura me dua na parataisi. O koya e bibi duadua, na nona mai kilai Jiova na Kalou dina duadua ga, sa mai lomani koya tale ga ni a rogoca nona masu.

O Nora e vakaitikotiko ena koro o George, mai Sauca Aferika, e biuta vakatikitiki e dua na vula me vakaitavi kina ena cakacaka vakaitalatala vakatabakidua. Ni se bera ga ni tekivu, a masuti Jiova vagumatua me vukei koya me bau sotava mada ga e dua e taleitaka dina me vulica na iVolatabu. Na yalava e lesi me cakacakataka, e tiko kina e dua na itaukeinivale e dau ca sara na nona ivakarau vei Nora ena nona dau cakacakataka na yalava oya e liu. Sega ni lomalomarua o Nora, baci lako tale ina vale oya. E kurabui ni raica ni sa dua tani tale e mai tawana na vale, na yacana o Noleen. Erau a masu tiko o Noleen kei tinana me vukei rau na Kalou me rau kila na iVolatabu. Kaya o Nora, “Ena gauna au sureti rau kina me rau vulica na iVolatabu, sa dua na ka nodrau marau.” Totolo sara nodrau toso vakayalo o Noleen kei tinana. Yaco na gauna me rau sa mai tomani Nora ena nodrau cakava na cakacaka ni veivakabulai vakayalo.

Rau ivakaraitaki vinaka tale ga e dua na veiwatini erau vakaitikotiko ena koro o Johannesburg, e Sauca Aferika, me baleta na yaga ni masu. Ena 1996, ena dua na bogi ni siga Vakarauwai, sa voleka sara tu ga ni kasura nodrau bula vakawati o Dennis kei Carol. Rau lomavata me rau sa masu mada me rawa ni rau vukei, erau masumasu tiko me yacova sara na bogilevu. Ena 11 na kaloko ena mataka e tarava, rau sa tukituki tu e katuba e rua na iVakadinadina i Jiova. Dolava sara na katuba o Dennis, e kaya sara vei rau me rau wawa mada, me lai kaciva mada mai na watina. E kaya o Dennis vei Carol, ni kevaka e kacivi rau mai lomanivale, ena via dredre me vakasukai rau tale. Kaya sara o Carol vei Dennis, me nanuma tiko ni rau a masulaka me rau vukei, de oqo na sala e rogoca kina na Kalou na nodrau masu. Rau mani vakacurumi sara e vale na iVakadinadina, tekivu sara na vuli iVolatabu ena ivola, Na Ka Mo Kila Mo Bula Tawamudu Kina. Rau marautaka o Dennis kei Carol na ka erau vulica. Rau lako sara ena soqoni ena Kingdom Hall ena yakavi tiko ga ni siga oya, e kena imatai tale ga me rau tiko kina. Nodrau bulataka na ka erau vulica ena iVolatabu, rau sa walia rawa o Dennis kei Carol na nodrau leqa ni bula vakawati. Rau sa papitaiso, rau vakacaucautaki Jiova tiko ena mamarau, rau vakaitavi tale ga vakawasoma ena nodrau wasea na nodrau vakabauta yavutaki ena iVolatabu vei ira era vakaitikotiko vata.

Vakacava ke O Nanuma ni Sega ni Yaga Mo Masu​—Ni O Tamata Ca?

So era dau vinakata dina sara ga mera masu, ia era mani sega ni cakava nira nanuma ni sega ni yaga baleta nira tamata ca. Oqori e mataqali vata sara ga na tamata ca daukumuna na ivakacavacava a talanoataka o Jisu Karisito. Ni curuma yani na rara ni valenisoro, e sega mada ga ni doudou me lako ena vanua e dau caka kina na masu. “A sa tu vakayawa ko koya . . . sa tavia na lomaserena, ka kaya, Kemuni na Kalou, lomani au mai, koi au na tamatai valavala ca.” (Luke 18:13) E kaya o Jisu ni a rogoci nona masu na tamata oqo. Oqo e vakadinadinataka ni Kalou o Jiova e dau yalovinaka, e vinakata tale ga me vukei ira na tamata ca era veivutuni dina.

Vakasamataka tale ga na cauravou ni Sauca Aferika na yacana o Paul. Ni se gonelailai o Paul erau dau salavata kei tinana ina soqoni vakarisito. Ena gauna e vuli tiko kina ena koronivuli torocake, sa tekivu me dau vakailala kei ira na gone era sega ni muria na sala ni Kalou. Ni biu vuli mai, e lai curu sara ena mataivalu ni matanitu makawa e dau veivakaduiduitaki e Sauca Aferika. E biuti koya tale ga vakasakasaka na nona itau goneyalewa. E vakalomabibitaki Paul sara ga na bula sa mai sotava tu oqo. E kaya: “Dua na bogi au qai masuti Jiova me vukei au, dina ga niu a sega tu ni torovi koya dina na Kalou ena loma ni vica vata na yabaki.”

Ni oti ga e dua na gauna lekaleka nona masu, sa sureti Paul sara o tinana me lai tiko ena iVakananumi ni nona mate o Karisito e dau caka ena veiyabaki. (Luke 22:19) E liaca o Paul se cava na vuna e cakava kina o tinana na ka oqo, ni kila vinaka o koya ni dau duatani tu na yalona na luvena, e sega tale ga ni taleitaka sara na iVolatabu. “Ia, au qai vakasamataka ni oqo na sala e rogoca kina o Jiova na noqu masu, au nanuma kina meu ciqoma na veisureti oqo.” Tekivu sara ga e kea, sa sega ni qai calata o Paul na soqoni kece vakarisito. Ni oti ga e va na vula nona vulica tiko na iVolatabu, sa vakadonui sara me papitaiso. Sa tinia koso tale ga nona vuli idinia, me rawa kina ni cakacaka vakaitalatala vakatabakidua. Sa dua na ka nona marau o Paul edaidai, sa sega tale ni qai vakasamataka vakabibi na nona bula e liu. Sa 11 oqo na yabaki nona veiqaravi tiko ena valenitabana ni Watch Tower Society mai Sauca Aferika.

Io, ena levu ni nona yalololoma na Kalou o Jiova e dau rogoca o koya na masu, e dau “saumi ira talega era sa dauvakasaqarai koya.” (Iperiu 11:6) Sa voleka sara na siga namaki i Jiova me na vakawabokotaka kina vakadua na ca kece ga. Ia ena gauna mada ga oqo, sa rogoca tiko o Jiova na nodra masu na nona tamata mera vakaukauataki, mera dusimaki tale ga ena nodra vakayacora tiko na cakacaka bibi ni vakadinadina. Ena sala oqo sa vica vata na milioni mai na veivanua kece ga era sa vagolei ina ivavakoso vakarisito, era sa vakalougatataki tale ga ena nodra mai kila na iVolatabu, me kena itinitini na bula tawamudu.​—Joni 17:3.

[iYaloyalo ena tabana e 5]

Nona masu mai vu sara ga ni lomana o Konilio e vakavuna me sikovi koya kina na yapositolo o Pita

[iYaloyalo ena tabana e 6]

E dau vukei ira sara ga e lewe vuqa ena gauna ni leqa na nodra dau masu

[iYaloyalo ena tabana e 7]

Kevaka eda via kila na iVolatabu, ena vinakati meda dau masu

E rawa ni rau masulaka na veiwatini me vaqaqacotaki na nodrau ivau ni vakawati