Na Kosipeli​—Veibataki Tiko Ga

E dina beka na itukutuku ni Kosipeli me baleta na sucu i Jisu Karisito?

E vunau dina ena Ulunivanua?

E vakaturi dina o Jisu mai na mate?

E kaya beka na vosa oqo: “Oi au na sala, kei na vu-ni-dina, kei na vu-ni-bula”?​—JONI 14:6.

E SO na taro vaka oqo era a veivosakitaka e lewe 80 na vuku ena Matabose kei Jisu (Jesus Seminar), e dau caka vakarua ena dua na yabaki me tekivu mai na yabaki 1985. E duatani sara na iwalewale ni nodra sauma na taro na vuku oqo. E veisoliyaki vei ira yadua na lewe ni matabose na tikinipepa dui roka mera vakaraitaka kina na nodra rai me baleta na vosa i Jisu ena Kosipeli. Na tikinipepa damudamu e vakaraitaka na nanuma ni a cavuta dina o Jisu na vosa oya. Na tikinipepa piqi e kena ibalebale ni a rairai tukuna o Jisu na vosa oya. Na tikinipepa dravudravu e vakaraitaka ni volekata yani na vosa i Jisu, ia a sega ni cavuta dina o koya. Na tikinipepa loaloa e vakaraitaka ni sega sara ga ni cavuta o Jisu, e vakabauti ni vosa oya e qai basika ena so ga na vakasama e muri.

Ni muri na ituvatuva oqo, era vakacala kina na lewe ni Matabose kei Jisu na va na tikina kece e tarogi taumada mai. Sega ni o koya ga oqori, era digitaka tale ga na tikinipepa loaloa mera vakacala kina e 82 na pasede na vosa a tukuni ni cavuta o Jisu ena Kosipeli. Era kaya ni 16 wale ga na pasede era itukutuku dina me baleti Jisu ena Kosipeli kei na so tale na ivola.

Na vakadiloi ni Kosipeli e sega ni ka vou. Na vosa vakacacataki ni Kosipeli a vakaraitaki ena 1774 ena dua na ivola e 1,400 na taqana, a vola o Hermann Reimarus, e dua na parofesa ni vosa vakaesia e Hamburg, Jamani, a qai tabaki ena gauna sa mate kina o koya. E vola kina o Reimarus na levu ni nona vakatitiqataka na dina ni Kosipeli. E yavutaka na nona nanuma oqo ena kena dikevi vakadaunivosa na Kosipeli kei na kena vaka me veicalati e so na itukutuku ni bula i Jisu ena va na Kosipeli. Me tekivu mai na gauna oya, era vakaraitaka na dauveivakadiloi na nodra vakatitiqataka na dina ni Kosipeli, lai tini sara ena kena sa sega ni vakabauti vakalevu nikua na veika era volatukutukutaki kina.

Na ile era dau duavata kina na vuku oqo, oya nira raica na itukutuku ni Kosipeli me italanoa lasu vakalotu era vakadewa e so na tamata. Oqo na taro era dau taroga na vuku dauvakatitiqa: De dua, ena vuku ga ni nodratou vakabauta, eratou a vakatubutaka kina na nodratou itukutuku na le va eratou vola na Kosipeli, se vakacava? E vakavuna beka na politiki vei ira na lotu Vakarisito taumada mera moica se mera kuria na italanoa kei Jisu? Na tiki ni Kosipeli cava e dina na kena volatukutukutaki qai sega ni vaka me buli itukuni wale ga?

O ira era susu ena vanua e sega ni vakabauti kina na Kalou kei na vanua tawalotu, era vakabauta ni iVolatabu​—wili kina na Kosipeli​—e ivola e sinai kina na italanoa makawa kei na itukuni. E so tale era kurabuitaka ni sa kena ivalavala ena lotu ni Veivanua Vakarisito na vakadavedra, na veiliutaki vakatawadodonu, na veisei, kei na itovo tawavakalou. O ira vaka oya era raica rawa ni sega ni dua na betena mera kauai ina nodra ivola ni lotu na Veivanua Vakarisito. Era vakabauta ni ivola vakalotu e cadra mai kina na lotu veivakaisini e ivola tawayaga, vaka ga na tawayaga ni italanoa ucumaiduru.

E vaka tale beka ga oya na nomu nanuma? Na nodra vakatitiqataka na dina ni Kosipeli e so na vuku, e dodonu beka mo lai vakatitiqataka tale ga kina o iko? Ni o rogoca na itukutuku me baleti iratou na vola na Kosipeli ni ratou dau buli itukuni, e dodonu beka me lai vakayacoka ena nomu nuitaka na ka eratou vola? Mo vakatitiqataka beka na dina ni Kosipeli ena ivalavala tawavakalou e dau laurai vei ira na lewenilotu ni Veivanua Vakarisito? Oni sureti mo ni dikeva mada e so na kena itukutuku dina.

[iYaloyalo ena tabana e 4]

E dina beka na Kosipeli, se italanoa ucumaiduru?

[Credit Line]

Jesus Walking on the Sea/The Doré Bible Illustrations/Dover Publications

[iTaba ni Credit Line ena tabana e 3]

Background, pages 3-5 and 8: Courtesy of the Freer Gallery of Art, Smithsonian Institution, Washington, D.C.