O na Kunea Rawa Beka na Lomavakacegu?

Ena 1854, a vola na dauvolaivola ni Mereke o Henry Thoreau: “E levu ga na tamata era lomaocaoca.”

E kena irairai ni levu ga na tamata ena nona gauna era sega ni lomavakacegu. Oya ena rauta na 150 na yabaki sa oti. Sa duatani beka na noda gauna? Se e se dina tiko ga na ka e vola o Thoreau? Vakacava o iko? O yalomarau, o lomavakacegu? Se o nuiqawaqawataka na veika e tu mai liu, o “lomaocaoca” me vaka e kaya o Thoreau?

E KA ni rarawa ni levu na ka e yaco tu e vuravura e vakavuna meda sega ni lomavakacegu. Meda cavuta mada ga e vica. Ena levu na matanitu, na sega ni cakacaka kei na isau ca e vakavuna na bula dravudravua kei na leqa vakailavo. Ena so na vanua e levu era ogataka vakalevu mera taukena na iyau vakayago. Na veisisivitaki ni ivakatagedegede ni bula e kauta ga mai na lomaocaoca, sega ni lomavakacegu. E sega tale ga ni veivakacegui na tauvimate, ivalu, basulawa, ivalavala tawadodonu, kei na veivakasaurarataki.

Era Qara na Lomavakacegu

Levu era sega ni marautaka na ka e yaco tu e vuravura. O Antônioa a nodra iliuliu na tamata cakacaka ena dua na valenibuliyaya levu e São Paulo, mai Brazil. Ni vinakata me toroya cake na ivakatagedegede ni bula raraba, a vakaitavi kina ena kudru kei na vakaduiduile, ia a sega ga ni lomavakacegu rawa.

So era nanuma nira na bula vakacegu nira vakawati, ia e rawa ni matewale nodra vakanuinui. E vakabisinisi levu o Marcos. E curu ena politiki lai yaco sara me turaganikoro ena dua na koro vakavavalagi. Ia e leqa sara vakalevu na nona bula vakavuvale. Nira sa biuta na vale na gone, rau mani veibiu kei watina baleta ni rau sega ni dau lomavata.

O Gerson, e dua na gone dauwavoki ni Salvador, mai Brazil, e dauqara marau. E veidewayaki ena veikorolelevu ni dauvodo lori usa iyaya. Sega ni dede sa vakayagataki wainimate gaga, e lai daubutako sara me volia rawa kina na mena wainimate gaga. Era vesuki koya vakavica na ovisa. Dina ga ni yalokaukaua, ia e bau diva tu o Gerson me lomavakacegu. Ena rawa beka ni lomavakacegu?

Ni se gone o Vania, sa mate o tinana, sa mani qarava o Vania na vuvale, e qarava tale ga na tacina tauvimate. E daulotu o Vania, ia e vaka e vakila ni sega ni kauaitaki koya na Kalou. E sega ni lomavakacegu rawa.

Dauqara marau tale ga o Marcelo. E daulakova na soqo ni marau era tiko kina na itabagone​—e caka kina na danisi, na gunu, qai vakayagataki kina na wainimate gaga. Ena dua na gauna erau veivala qai vakamavoataka sara e dua na itabagone. E rarawataka vakalevu na ka e cakava qai masuta na Kalou me vukei koya. E vinakata tale ga me lomavakacegu.

Na veika e sotavi oya e sega ni kauta mai na lomavakacegu. Ena rawa beka vua na iliuliu ni tamata cakacaka, na daunipolitiki, na gone dauwavoki, na goneyalewa e sivia nona cakacaka, kei koya na dauqara marau me ratou vakila na lomavakacegu eratou qara? E rawa beka nida vuli mai na ka a yacovi iratou? Na isaunitaro ruarua oqori na io, me vaka eda na raica ena ulutaga e tarava.

[iVakamacala e ra]

[iYaloyalo ena tabana e 3]

O diva mo lomavakacegu?