O na Kunea e Vei na Lomavakacegu?
E levu na ka e duidui kina na noda gauna kei na gauna i Thoreau, e cavuti ena ulutaga sa oti. E dua na duidui levu na kena sa qai levu ga nikua na ivakasala me baleta na kena kunei na lomavakacegu. Era vakasala na daudikeva na vakasama, na dauvolaivola ni vulika, kei ira na dauvakamacala ena niusiveva. E rawa beka ni yaga ena dua na gauna lekaleka na veika era vakatura; ia me wali dina na leqa ena vinakati na ivakasala e titobu cake. Oya na ka eratou vakadinadinataka na lewe vica eratou cavuti ena ulutaga sa oti.
O ANTÔNIO, o Marcos, o Gerson, o Vania, kei Marcelo e duidui na ituvaki eratou susu kina qai duidui na leqa eratou dui sotava. Ia e tolu na ka eratou sotava kece. Kena imatai, ena dua na gauna ‘a sega na nodratou inuinui, ratou sega tale ga ni vakabauta na Kalou dina.’ (Efeso 2:12, VV) Kena ikarua, eratou vinakata sara ga me ratou lomavakacegu. Kena ikatolu, eratou lomavakacegu kece ni ratou sa vulica na iVolatabu kei ira na iVakadinadina i Jiova. Ni toso tiko na nodratou vuli, eratou vakila ni kauaitaki iratou na Kalou. Me vaka ga e tukuna o Paula vei ira na kai Aceni ena nona gauna: “E sega tale ga ni yawa mai vei keda yadudua na Kalou.” (Cakacaka 17:27, VV) Oqori e dua sara ga na ka bibi ena kena rawati na lomavakacegu.
Na Cava sa Sega Soti Kina na Vakacegu?
E vakaraitaka na iVolatabu e rua na vuna sa sega soti kina na vakacegu e vuravura—na noda lomavakacegu se noda veivakacegui vakataki keda. E vakamacalataki na kena imatai ena Jeremaia 10:23: “Sa sega ni vu mai vua na tamata na nona sala: sa sega ni vu mai vua na tamata sa lako tu me lewa na nonai lakolako.” E sega ni tiko vua na tamata na kila kei na yalomatua me lewai koya vinaka ke sega ni vukei, ia na veivuke yaga duadua e solia na Kalou. Ena sega ni vakacegu o koya e sega ni qara na veidusimaki ni Kalou. E laurai na ikarua ni vuna sa sega soti kina na vakacegu ena vosa ni yapositolo o Joni: “Sa tu na vuravura taucoko e na kaukauwa ni Vunica.” (1 Joni 5:19, VV) Ke sega ni dusimaki keda na Kalou, ena vakaseva tiko ga na “Vunica” kaukaua qai tawarairai o Setani na noda sasaga kece meda veivakacegui.
Oqo e rua na vuna e vakaloloma kina na kawatamata—na nodra sega ni qara e levu na veidusimaki ni Kalou, kei na nona soli isele tiko o Setani e vuravura. E vakamacalataka vinaka na ituvaki oqo na yapositolo o Paula: “Sa vutugu vata ko vuravura taucoko, ka sa yaluma e na rarawa, ka yacova na siga oqo.” (Roma 8:22) O cei e rawa ni vakacala na itukutuku oya? Se ra tiko ena matanitu vutuniyau se dravudravua, le levu era na sega ni lomavakacegu baleta nira vakila tiko na leqa vakavuvale, basulawa, veitovaki, veicati, leqa vakailavo, veicati vakamatatamata, veivakalolomataki, tauvimate, kei na levu tale na leqa.
Vanua e Kunei Kina na Lomavakacegu
Ni ratou vulica na Vosa ni Kalou, na iVolatabu, o Antônio, o Marcos, o Gerson, o Vania, kei Marcelo, eratou vulica kina na veika e veisautaka na nodratou bula. Eratou vulica ni na veisau na ituvaki kei vuravura. Na kena veisautaki me vinaka na veika kece, e sega ni vaka na vakanuinui ina bilo cicila. Eratou kila deivaki ni na yaco dina baleta ni oya sara ga na ka e nakita na Kalou me baleta na kawatamata. E rawa sara mada ga me yaga vei keda ena gauna oqo kevaka eda cakava na lomana. Ni ratou bulataka na veika eratou vulica ena iVolatabu, sa veisau me vinaka na nodratou bula. Eratou sa mai vakila na vakacegu kei na marau eratou a sega ni vakabauta ni na yacovi iratou.
Sa sega tale ni cuqena o Antônio na vakaduiduile kei na nodra kudru na tamata cakacaka. E kila ni sega ni tudei na veika e rawati ena sasaga vaka oya. O la na iliuliu ni tamata cakacaka oqo sa mai vulica na veika e baleta na Matanitu ni Kalou. Oqo na Matanitu era masuta tiko na vica vata na milioni nira cavuqaqataka na Masu ni Turaga (se, na Tamai Keimami) nira kaya: “Me yaco mai na nomuni matanitu.” (Maciu 6:10a, VV) E vulica o Antônio ni Matanitu ni Kalou e matanitu dina vakalomalagi ena vakaceguya dina na kawatamata.
E vulica o Marcos me bulataka na ivakasala vuku vakaivolatabu me baleta na vakawati. Sa vakavuna me rau veilesuvi kei watina na daunipolitiki e liu oqo. E vakanamata tale tiko ga o koya ina gauna ena veisautaka kina na Matanitu ni Kalou na vuravura kocokoco oqo qai daunanumi koya ga, me vuravura vinaka cake. Sa mai kila vinaka cake o Marcos na ibalebale ni malanivosa oqo ena Masu ni Turaga: “Me caka na lomamuni e vuravura me vaka sa caka mai lomalagi.” (Maciu 6:10b) Ni sa caka na loma ni Kalou e vuravura, ena vakila na kawatamata na ivakarau ni bula e se sega ni bau sotava.
Vakacava o Gerson? Sa sega tale ni qai wavoki wale tu ga, se daubutako. Na bula ni gone dauwavoki e liu oya sa vakainaki ena gauna oqo baleta ni sa ogaoga tiko ni vukei ira na tani mera lomavakacegu. E macala mai na vica na italanoa oqo ni kena vulici na iVolatabu qai bulataki na ka e tukuna ena rawa ni veisautaki keda meda vinaka.
Lomavakacegu Ena Vuravura ni Leqa
O Jisu Karisito e uto sara ga ni kena vakayacori na loma ni Kalou, ke dua e vulica na iVolatabu kei ira na iVakadinadina i Jiova ena levu na ka e vulica me baleti Jisu. Ena bogi a sucu kina o Jisu, era vakacaucautaka na Kalou na agilosi nira lagata: “Sa nona na Kalou na vakarokoroko e na veiyasana ecake sara! A sa veivinakati rawa ko ira e vuravura: sa lomani ko ira na tamata.” (Luke 2:14) Ni sa tamatabula o Jisu, e vinakata me vakavinakataka na ituvaki ni bula ni tamata. E kila na ka e tu e lomadra, e lomani ira vakalevu na rarawa tu kei na tauvimate. E vakacegui ira tale ga na yalomalumalumu, me vaka era kaya na agilosi. Ni mai cava nona cakacaka vakaitalatala, e kaya vei iratou nona tisaipeli: “Au sa laiva vei kemudou na vakacegu, au sa solia vei kemudou na noqu vakacegu; au sa sega ni solia vei kemudou, me vaka sa solia ko vuravura. Me kakua ni rarawa na yalomudou, se rere.”—Joni 14:27.
E sega ni dauveivukei wale ga o Jisu. E vakatauvatani koya kei na ivakatawa ni sipi, kei ira na nona imuri yalomalumalumu mera vaka na sipi ni kaya: “Au sa lako mai me rawa vei ira na bula, ia me rawa vakalevu sara. Oi au nai vakatawa vinaka: sa solia na nona bula nai vakatawa vinaka e na vukudra na sipi.” (Joni 10:10, 11) Io, e sega ni vakataki ira e levu na iliuliu nikua era dau nanumi ira ga vakailiu, o Jisu e solia nona bula ena vukudra nona sipi.
E yaga vakacava vei keda na ka a cakava o Jisu? Eda kila levu na veivosa oqo: “Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu.” (Joni 3:16) Meda vakabauti Jisu ena vinakati taumada meda kilai koya kei Tamana, o Jiova. Nida kilai rau na Kalou kei Jisu Karisito eda na veiwekani vakavoleka sara kei na Kalou o Jiova, ena vukei keda tale ga meda lomavakacegu.
E kaya o Jisu: “Sa rogoca na noqu vosa ko ira na noqu sipi, ia ka’u sa kilai ira, ka ra sa muri au: ia ka’u sa solia vei ira na bula tawa mudu, ia era na sega sara ni rusa, se dua e kaliraki ira mai na ligaqu.” (Joni 10:27, 28) E veivakacegui dina na vosa oya! Dina ga ni a cavuta na veivosa oqori o Jisu ena volekata na ruanaudolu na yabaki sa oti, ia e se mana tiko ga ena gauna oqo. Kua ni guilecava ni bula tiko o Jisu Karisito ena gauna oqo, e sa veiliutaki tiko vakatui ena Matanitu ni Kalou vakalomalagi. Me vaka ga na nona a bula voli e vuravura ena vica vata na yabaki sa oti, e se kauaitaki ira tiko ga na yalomalumalumu era vinakata na lomavakacegu. E se iVakatawa tiko ga ni nona sipi. Ke da muri koya, ena vukei keda meda lomavakacegu, eda na vakanamata tale ga ena nuidei ena gauna sa na qai vakilai kina na vakacegu dina—ni sa na sega tale na ivalavala kaukaua, ivalu, kei na basulawa.
Eda na vakalougatataki ke da kila da qai vakabauta ni na vukei keda o Jiova ena vuku i Jisu. O se nanumi Vania tiko, na goneyalewa a vakacolati ena icolacola bibi qai nanuma ni sa guilecavi koya na Kalou? Sa qai kila o Vania ni kauaitaki koya na Kalou. E kaya o Vania: “Au sa qai kila ni bula dina tiko na Kalou e uasivi na nona itovo. Ena nona loloma e tala mai kina na Luvena i vuravura me vakabulai keda. E rui bibi meda kila oya.”
E vakaraitaka o Marcelo ni sa maucokona nona veiwekani kei na Kalou. E liu e dauqara na marau o koya, ia e kaya oqo: “Levu na gauna era sega tu ni kila na itabagone na ka mera cakava, era tini vakaleqai ira ga. So era vakayagataka na wainimate gaga, me vakataki au. Au nuitaka ni na levu era kalougata me vakataki au, nira vulica na ka dina e baleta na Kalou kei Luvena.”
Ni rau vulica vinaka na iVolatabu o Vania kei Marcelo, sa qai kaukaua ga nodrau vakabauta na Kalou, rau sega ni vakataratututaka ni na vukei rau me rau walia nodrau leqa. Ke da vakataki rau—da vulica na iVolatabu da qai bulataka, eda na lomavakacegu me vakataki rau. Eda na vakila dina na ka e uqeti keda kina na yapositolo o Paula: “Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na dau cikecike kei na vakavinavinaka. Ia na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou e na vuku i Karisito Jisu.”—Filipai 4:6, 7.
Kunea na Vakacegu Dina Nikua
O Jisu Karisito e dusi ira tiko na vakasaqara na ka dina ina sala e basika ina bula tawamudu ena vuravura parataisi. Ni vagolei ira mera sokalou dina vua na Kalou, era na vakila na mataqali vakacegu e vakamacalataki ena iVolatabu: “Ia ko ira na noqu tamata era na tikotiko ga e na vanua sa sautu, kei na veivale sa dei, kei nai vakavakacegu vinaka.” (Aisea 32:18) Oqori e ivakaraitaki lailai ga ni vakacegu era na vakila ena gauna mai muri. Eda wilika: “Ia ko ira na yalomalumalumu era na taukena na vanua; ka na daumarau tiko e na veivakacegui vakaidina. Era na taukena na vanua ko ira na yalododonu, ka tiko kina ka sega ni mudu.”—Same 37:11, 29.
E rawa beka meda lomavakacegu nikua? Io. E rawa tale ga nida vakadeitaka ni na dua na gauna wale ga oqo ena vakalougatataka na Kalou na kawatamata talairawarawa ena bula vakacegu e se sega ni bau vakilai. Bau masuti koya me vakacegui iko. Ke tiko nomu leqa o qai sega ni lomavakacegu, muria na ivalavala ni qaqanimasu i Tui Tevita: “Sa levu mai na rarawa ni yaloqu: mo ni kauti au tani mada mai na noqu rarawa. Ni vakaraica na noqu rarawa kei na noqu yaluma; ka bokoca na noqui valavala ca kecega.” (Same 25:17, 18) E dau rogoca dina na Kalou na mataqali masu vaka oya. E dodoka na ligana me vakacegui ira kece era qara dina na lomavakacegu. E vakadeitaki vei keda: “Sa voleka ko Jiova vei ira kecega era sa masu vua, vei ira kecega era masu vua ena yalodina. Ena vakayacora ko koya na ka era gadreva ko ira era rerevaki koya: ena rogoca talega na nodra tagi, ka na vakabulai ira.”—Same 145:18, 19.
[Tikina bibi ena tabana e 5]
E sega ni tiko vua na tamata na kila kei na yalomatua me lewai koya vinaka ke sega ni vukei . . . na veivuke yaga duadua e solia na Kalou
[Tikina bibi ena tabana e 6]
Nida kilai rau na Kalou kei Jisu Karisito eda na veiwekani vakavoleka sara kei na Kalou o Jiova, ena vukei keda tale ga meda lomavakacegu
[iYaloyalo ena tabana e 7]
Ena vakilai na bula vakacegu ena vuvale ke muri na ivakasala ena iVolatabu