Marau Tawamudu​—E Lomalagi se e Vuravura?

E VAKATAU li na nomu marau ena vanua o vakaitikotiko kina? E levu na tamata era duavata ni vakatau vakalevu na noda marau ena noda bulabula vinaka, ni vakainaki na noda bula, qai vinaka tale ga na noda veiwekani kei ira na tani. E kaya vaka oqo na vosa vakaibalebale ena iVolatabu: “Sa vinaka me da kana rourou ka veilomani ga, ka ca me da kana pulumokau uro ka veicati tiko.”​—Vosa Vakaibalebale 15:17.

E ka ni rarawa ni sa dede sara na kena yaco tiko na veicati, na itovo voravora, kei na so tale na veika ca ena noda vuravura. Ia e vakacava tu mada o lomalagi, na vanua era nuitaka e levu mera lai bula kina nira sa mate? E dau vanua tu beka ga ni vakacegu kei na sautu qai sega kina na tiko yavavala me vaka e kilai levu kina?

E vakavuvulitaka na iVolatabu ni tiko mai lomalagi na Kalou kei ira e vica vata na milioni na kabula vakayalo era vakatokai na agilosi. (Maciu 18:10; Vakatakila 5:11) Era vakatokai tale ga mera “luve ni Kalou” vakayalo. (Jope 38:​4, 7) Me vakataki keda ga na tamata, e tu tale ga vei ira na agilosi na galala ni vakatulewa. Era sega ni vaka tu e dua na misini e lewai na ka me cakava. O koya gona, e rawa nira vakatulewataka mera caka dodonu se cakacala. Era na vakatulewataka rawa beka na agilosi mera cakacala? Ena ka ni kurabui vei ira e levu mera kila nira ivalavala ca vua na Kalou e dua na iwiliwili levu ni agilosi ena vica na udolu na yabaki sa sivi ra qai talaidredre vua!​—Juta 6.

O Ira na Talaidredre Mai Lomalagi

E yaco na ivalavala ca mai lomalagi ni talaidredre e dua na agilosi sa qai vakatokai e muri me o Setani (Dauveivorati) na Tevoro (Daukakase). E vakatulewataka na agilosi oqo me cakacala. Me tekivu mai na gauna oya e dau ivakaraitaki ca o koya vei ira na kabula vakayalo tale e so mani yaco kina mera tomani koya ena nodra talaidredre vua na Kalou ena gauna i Noa ni bera na Waluvu levu.​—Vakatekivu 6:​2, raica na ivakamacala e ra ni NW; 2 Pita 2:4.

Era sega ni biu tani mai lomalagi ena gauna vata oya na agilosi talaidredre oqo. Era a vakatarai mera tiko tale mada me vica na udolu na yabaki, ia sa sega ga ni soli vei ira na galala me vaka e liu.a Ia ni sa mai cava na nona vosoti ira tiko na dau caka ca oqo na Kalou sa ra qai “viritaki” tani mai lomalagi, ena qai yaco na gauna mera na vakarusai vakadua kina. E kaya na domo mai lomalagi: “Mo reki gona kina ko iko lomalagi kei kemuni ka vakaitikotiko kina!” (Vakatakila 12:​7-12, VV) E sega ni vakabekataki nira marau na agilosi yalodina, nira sa vagalalataki mai lomalagi o ira na dau vakatubu ca!

Nida raica na ivakamacala sega ni kilai raraba oqo, e rawa ni vakadeitaki ni na sega na vakacegu dina ena gauna cava ga era tusaqata kina na lawa se ivakavuvuli ni Kalou o ira na kabula oqo. (Aisea 57:​20, 21; Jeremaia 14:​19, 20) Ena yasana adua, nida muria kece na lawa ni Kalou eda na sotava na bula sautu kei na vakacegu. (Same 119:165; Aisea 48:​17, 18) Ena sega beka ni vanua ni marau kei na reki na vuravura kevaka era lomana na Kalou, ra talairawarawa vua, ra qai veilomani na tamata? Oqo sara ga na ka e kaya na iVolatabu!

Ia vakaevei o ira era bese ni veisautaka na nodra ivakarau ca? Era na vakacacana tu beka ga na nodra tiko vakacegu na via vakayacora dina na loma ni Kalou? Sega, kevaka sa cakava rawa e dua na ka na Kalou vei ira na agilosi ca mai lomalagi, ena rawa ni cakava tale e dua na ka me baleti ira na tamata ca e vuravura.

Na Vuravura Savasava

“Sa noqui tikotiko vakaturaga, ko lomalagi, ia ko vuravura, sai tutu-ni-yavaqu,” e kaya na Kalou. (Aisea 66:1) Me vaka ni ivakaraitaki levu duadua ni savasava na Kalou, ena sega ni vakatara o koya me vakadukadukalitaki na ‘itutu ni yavana’ ena veika ca me tawamudu. (Aisea 6:​1-3; Vakatakila 4:8) Me vaka ga na nodra vagalalataki mai lomalagi na agilosi ca, era na vagalalataki tale ga na tamata ca ena vuravura me vaka era vakaraitaka na veitikinivolatabu oqo e ra:

“Ni na muduki tani na daucaka ca; ia ko ira sa dauwaraki Jiova, era na taukena na vanua.”​—Same 37:9.

“Ni ra na tiko ga e na vanua na yalododonu, ka ra na tiko dei kina na yalodina. Ia ko ira na tamata ca era na muduki tani e vuravura, kei ira na dautalaidredre era na cavu laivi maikina.”​—Vosa Vakaibalebale 2:​21, 22.

“Sa dodonu vua na Kalou me saumi ira vakararawa era sa vakararawataki kemudou; ia vei kemudou talega sa vakararawataki, me vakacegui vata kei keitou, ni na vakaraitaki mai lomalagi na Turaga ko Jisu kei ira vata kaya na nona agilose kaukauwa, e na yameyame-ni-buka waqa, me cudruvi ira era sa sega ni kila na Kalou, a sa sega ni vakabauta nai tukutuku-vinaka ni noda Turaga ko Jisu Karisito: sa nodra cudruvi na veivakarusai tawa mudu mai na mata ni Turaga, mai na nona kaukauwa vakaidina talega.”​—2 Cesalonaika 1:​6-9.

“Ko vuravura [o ira na tamata ca] sa lako tani yani, kei na kena gagadre talega; ia ko koya sa cakava na ka sa vinakata na Kalou, sa tu dei ga ka sega ni mudu.”​—1 Joni 2:17.

Ena Vakilai Tiko Beka ga e Vuravura na Vakacegu?

E dina ni kaya na iVolatabu ni vakaiyalayala ga na gauna ni nona vakatara na Kalou mera se bula tiko na tamata ca, ia eda rawa ni vakabauta vakacava ni na sega ni vakaruataki tale na veika ca ni sa na vakarusai oti? Ni oqo sara ga na ka a yaco ni oti toka ga na Waluvu ena siga i Noa, lai tini vakasesea na nodra vosa na Kalou me vakaseva kina na nodra inaki ca na tamata.​—Vakatekivu 11:​1-8.

Meda nuidei ni na sega ni vakaruataki na veika ca, baleta ni sa na sega tale ni liutaki vuravura na tamata me vaka na gauna e oti kina na Waluvu. Sa na lewa na vuravura na Matanitu ni Kalou. Ena lewa tiko mai lomalagi na Matanitu oqo, ena Matanitu duadua ga e vuravura. (Taniela 2:44; 7:​13, 14) Ena yavala totolo sara kevaka e saga e dua me vakavu ca. (Aisea 65:20) Na Matanitu oya ena qai vakawabokotaki koya na vu ni veika ca, o Setani na Tevoro, vata kei ira na timoni se o ira na agilosi ca era muri koya.​—Roma 16:20.

Kena ikuri, sa na sega ni lomaocaocataki na kakana, na isulu, na vale, kei na cakacaka. E dau vakavuna sara ga na nodra lai basulawa e so ena kena sega ni taukeni na veika oqo. Io, ena veisautaki na vuravura taucoko me dua na parataisi sautu qai levu na ka me na taukeni.​—Aisea 65:​21-23; Luke 23:43.

Koya e bibi duadua, oya ni sa na vakavulica na Matanitu oqo vei ira na lewena na sala ni bula vakacegu, ena gauna vata oqori ena tuberi ira mera yacova yani na bula uasivi. (Joni 17:3; Roma 8:21) Sa na sega tale ni veimulomulo na kawatamata kei na malumalumu, vaka kina na ivalavala ca eda sucukaya mai. Sa na ka marautaki, ena rawarawa tale ga vei keda me taucoko noda talairawarawa vua na Kalou me vakataki Jisu ga ena nona bula taucoko. (Aisea 11:3) E yalodina tiko ga o Jisu vua na Kalou dina ga ni sotava na veitemaki lelevu kei na nona vakararawataki vakaca​—na veika oqo sa na sega tale ni kune ena Parataisi.​—Iperiu 7:​26.

Na Vuna Era Lako Kina i Lomalagi e So

Levu vei ira na dauwili iVolatabu era kila vinaka na vosa i Jisu oqo: “Sa vuqa na tikina e na vale nei Tamaqu: . . . ka’u sa lako me’u vakarautaka na tikina me nomudou.” (Joni 14:​2, 3) E sega li ni veisaqasaqa oqo kei na vakasama ni bula tawamudu ena vuravura parataisi?

Erau sega ni veicalati na ivakavuvuli oqo. Erau duavata sara ga. E kaya na iVolatabu ni tiko ga na iwiliwili ni lotu Vakarisito yalodina era le 144,000, era na vakaturi ena yago vakayalo mera bula i lomalagi. Na cava na vuna e soli kina vei ira na icovi talei oqo? Baleta nira lewe ni ilawalawa a raica o Joni ena raivotu era “sa bula ka lewa vata kei Karisito ka dua na udolu na yabaki.” (Vakatakila 14:​1, 3; 20:​4-6) Ni vakatauvatani na kedra iwiliwili kei ira na lewe vica vata na bilioni e vuravura, era ‘qelenisipi lailai’ dina o ira na le 144,000. (Luke 12:32) Me vakataki Jisu, era a sotava tale ga na leqa eda sotakaya na kawatamata kece, e rawa kina nira “lomani keda e na noda malumalumu” ena gauna era sa na liutaka kina na vakavinakataki ni bula ni kawatamata kei na vuravura.​—Iperiu 4:​15, VV.

Na Vuravura​—Na iTikotiko Tawamudu ni Kawatamata

Ni vakarautaki Jisu Karisito na Kalou me isoro ni veivoli, sa tekivu kumuni ira vata kina na le 144,000 o koya ena 2,000 na yabaki sa sivi qai kena irairai ni sa taucoko na iwiliwili ni ilawalawa oqo. (Cakacaka 2:​1-4; Kalatia 4:​4-7) E sega ni baleti ira ga na le 144,000 na isoro i Jisu, ia “e na vuku talega ni nodra na kai vuravura kecega.” (1 Joni 2:2) O koya gona, o ira kece era cakacakataka na nodra vakabauti Jisu era na bula tawamudu. (Joni 3:16) O ira e nanumi ira tu na Kalou era moce tu ena ibulubulu, era na vakaturi. Era na sega ni lako i lomalagi ia era na bula ga ena vuravura savasava. (Dauvunau 9:5; Joni 11:​11-13, 25; Cakacaka 24:15) Na cava e waraki ira tu e kea?

E sauma vaka oqo na Vakatakila 21:​1-4: “Raica, a vale ni Kalou sa tu vei ira na tamata, . . . Ia na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.” (Neitou na matanivola kala.) Vakasamataka mada ni sa na sereki na kawatamata mai na ivau ni mate, na rarawa, kei na tagi me tawamudu! Sa na qai vakayacori kina na inaki taumada i Jiova me baleta na vuravura kei na kawatamata.​—Vakatekivu 1:​27, 28.

Bula se Mate​—Noda na Digidigi

A sega ni vakatau vei Atama kei Ivi na lai bula i lomalagi. Na digidigi ga a qai soli vei rau oya, me rau bula tawamudu ena parataisi ke rau talairawarawa vua na Kalou, se rau na mate ke rau talaidredre. E ka ni rarawa ni rau talaidredre mani vakavuna na nodrau suka tale ina “kuvu” ni qele. (Vakatekivu 2:​16, 17; 3:​2-5, 19) E sega ni inaki ni Kalou me nodra sala ni lai vakatawani lomalagi na kawatamata na ibulubulu. Na Kalou e buli ira e udolu vakaudolu na agilosi mera bula mai lomalagi; o ira na kabula vakayalo oqo era sega ni tamata era a mate ra qai vakaturi mera lai bula i lomalagi.​—Same 104:​1, 4; Taniela 7:10.

Na cava meda cakava meda rawata kina na veivakalougatataki ni bula tawamudu ena Parataisi e vuravura? Na imatai ni ikalawa oya me vulici na Vosa ni Kalou, na iVolatabu. E kaya o Jisu ena nona masu: “Ia sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.”​—Joni 17:3.

E dua tale na ikalawa ina marau tawamudu ena Parataisi oya meda bulataka sara ga na kila oqo. (Jemesa 1:​22, 24) O ira era muria na Vosa ni Kalou era na raica na kena vakayacori na parofisai vakatubuqoroqoro oqo e volaitukutukutaki tu ena Aisea 11:​9, ni kaya: “Era na sega ni ia na veivakacaca [na kawatamata] se na veivakamatei e na noqu ulu-ni-vanua tabu kecega: ni na roboti ko vuravura e na veikilai kei Jiova, me vaka sa ubia na wasa titobu na wai.”​—Neitou na matanivola kala.

[iVakamacala e ra]

[iYaloyalo ena tabana e 7]

“Era na taukena na vanua ko ira na yalododonu, ka tiko kina ka sega ni mudu.”​—Same 37:29