Taro na Dauwiliwili

E vakaraitaka beka na masu a cavuta o Jisu ni sa caka tiko mai lomalagi na loma ni Kalou dina ga nira se bera ni kolotaki mai vuravura na agilosi ca?

Ena veika e volai ena Maciu 6:​10, a kaya o Jisu: “Me caka na lomamuni e vuravura me vaka sa caka mai lomalagi.” E rua na vakasama e tauri kina na kerekere oqo. Na imatai, e kerei kina na vakayacori ni loma ni Kalou e vuravura me vaka sa caka oti mai lomalagi, na kena ikarua, na kena kerei me vakayacori taucoko na loma ni Kalou e vuravura vaka kina e lomalagi.a Na ibalebale gona ni masu i Jisu, “me yaco na nomuni lewa,” e vakaraitaka ni via tokona na ikarua ni vakasama na ka e kaya na iVolatabu. E vakaraitaka na ka e yaco ena gauna se tiko kina e vuravura o Jisu, kei na gauna balavu ni oti oya. Ena sala cava?

E rua na tikina e dusia na ivola na Vakatakila e yaco vata kei na tauyavu ni Matanitu ni Kalou e lomalagi. Na kena imatai e tarai lomalagi sara ga, na kena ikarua o vuravura. E kaya na Vakatakila 12:​7-9, 12: “A sa tubu nai valu mai lomalagi; o Maikeli kei ira na nona agilose era sa veivala kei na gata levu; a sa ia vata nai valu na gata levu kei ira na nona agilose, a ra sa sega ni gumatua: a sa sega tale ni kune e dua na nodra tikina mai lomalagi. A sa biu tani na gata levu, na gata makawa, a yacana na Tevoro, kei Setani, o koya sa temaki ira kecega na kai vuravura: a sa biu ki vuravura, a ra sa biu vata kaya na nona agilose. O koya oqo mo reki kina na lomalagi, kei kemudou sa tiko kina. Dou na ca koi kemudou sa tiko e vuravura kei na wasawasa: ni sa lako sobu vei kemudou na tevoro, a sa cudru vakalevu, ni sa kila ko koya ena sega ni dede na nona gauna.”

Na nona viritaki mai lomalagi o Setani kei ira na nona timoni ena 1914, era biu laivi mai kina o ira na ibulibuli vakayalo era dau talaidredre, ia era marau na agilosi yalodina i Jiova, okati e ke na ibulibuli vakayalo kece era sega ni biu laivi mai lomalagi. (Jope 1:​6-​12; 2:​1-7; Vakatakila 12:10) Na ka gona e kerea o Jisu me baleti lomalagi, e sa vakayacori oti. O ira kece na vo tiko e lomalagi era yalodina tiko ga vei Jiova ra qai vakamalumalumu ina nona veiliutaki.

Ia me nanumi tiko, ni bera mada ga nira kolotaki mai lomalagi na agilosi ca, era sa sega tu ni dau okati vata kei na vuvale ni Kalou ena vuku ni vakatatabu tawamudu e caka vei ira. Kena ivakaraitaki, e kaya na Juta 6 ena imatai ni senitiuri S.K., nira na ‘vesu tu ena sinucodo, ena butobuto [vakayalo] me yacova na siga ni lewa.’ E kaya tale ga na 2 Pita 2:4: “Sa sega ni lomani ira na agilose kai valavala ca na Kalou, ka sa biuti ira sobu ki eli [“Tatarusi,” NW, na vanua lolovira], a sa vesuki ira e na sinucodo ni butobuto [vakayalo], me ra tauri tiko me yaco mada na siga ni lewa.”b

E lolovira nodra itutu mai lomalagi na agilosi ca, ia na kena veibasai e vuravura nira veiliutaki sara tiko ga. E tukuna kina na Vosa ni Kalou ni o Setani e “turaga ni vuravura oqo,” era vakatokai tale ga na timoni mera “veitaliataka na butobuto kei vuravura.” (Joni 12:31; Efeso 6:​11, 12; 1 Joni 5:​19) Ni tu vua na Tevoro na kaukaua, e rawa kina ni solia vei Jisu na “matanitu kecega e vuravura, kei na kedrai ukuuku,” kevaka wale ga e sokaloutaki koya. (Maciu 4:​8, 9) O koya gona ni sa na ‘yaco’ mai na Matanitu ni Kalou e vuravura me vaka a masuti, oqo ena kauta mai na veisau levu e vuravura.

Ena veisau me ituvaki vou na vuravura ena gauna sa na ‘vakayacori’ kina na Matanitu ni Kalou. Ena kauta laivi na veiliutaki vakavuravura, ena qai veiliutaki duadua ga e vuravura. Ena gauna vata oqori, era okati mera “vuravura vou” o ira na tamata era qarava na Kalou. (2 Pita 3:​13; Taniela 2:​44) O ira na vakamalumalumutaki ira ena Matanitu ni Kalou ena bokoci na nodra ivalavala ca, ena qai veisau na vuravura me parataisi, sa na sega tale ni qai kune kina vakadua na veika ca kece i Setani.​—Roma 8:​20, 21; Vakatakila 19:17-​21.

Ena icavacava ni Duanaudolu na yabaki, ni sa vakayacora oti na Matanitu nei koya na Mesaia na loma ni Kalou, “sa na qai vakamalumalumutaki koya tale ga na Karisito vua na Kalou o koya sa vakamalumalumutaka na ka kece ga vei koya ga me lewa tiko kina na Kalou na veika kece ga.” (1 Korinica 15:​28, VV) Ena vakayacori na iotioti ni veivakatovolei, oti oya sa ra na qai rusa tawamudu e “nai karua ni mate” o Setani kei ira nona timoni, kei ira tale ga na tamata e vakamua cala ena gauna oya. (Vakatakila 20:​7-​15) Era na qai vakamalumalumu na ibulibuli vuku e lomalagi kei vuravura ina nona veiliutaki vakayalololoma o Jiova. Sa na qai vakayacori vinaka sara ga e keri na masu i Jisu.​—1 Joni 4:​8.

[iVakamacala e ra]