Na Sala Me So Kina Nomu iTokani

“E WANANAVU DINA KE DUA DRAU VEITOKANI TU GA ENA NOMUDRAU BULA KECE; SA BAU VA TOKA YA KEVAKA ME QAI RUA; IA ME TOLU LI, SA BAU WADREGA.”​—Henry Brooks Adams.

E VAKARAITAKA na vosa e tukuni mai cake ni tu tu yadua me qai dua na nomu itokani dina. Eda dau rogoca vakalevu vei ira na galili era vaqara tu me dua nodra itokani na vosa oqo, “E sega ni dua meu gole kina,” “Au sega ni nuitaka e dua,” se “Noqu itokani vinaka ga na noqu koli.”

E ka toka ni bolebole meda saga me dei noda veitokani kei na dua tale. E dua na vakadidike e vakaraitaka ni “25 na pasede vei ira na lewenivanua qase e Mereke era ‘dau galili,’. . . e veimama na lewenivanua mai Varanise era tu duadua voli ga.” Ni levu na isoqosoqo ni veibuku, sala ni veivosaki ena kompiuta, kei na kena binikasauru na itukutuku ena niusipepa mai vei ira era vaqara tiko e dua na kedra isa, e vakaraitaka nira gadreva na tamata na veivosaki kei ira tale na so.

Na galili e sega wale ga ni vakaleqa na vakasama, e vakaleqa tale ga na yago, e kaya o Dr. David Weeks, e dua na vuniwai ni mona. “Dua na ka na levu ni tauvimate au qarava era nuiqawaqawa vakalevu ra qai yalolailai, e rawa ni tukuni nira galili. Erau lako vata na yalolailai kei na galili.”

Na veisere kei na kavoro ni vuvale e vakavuna mera bula duadua voli ga kina e levu. E tukuni ena dua na vakadidike mai Peritania ni 30 na pasede ni lewenivanua e kea sa ra na bula duadua voli ga ena itekivu ni ika21 ni senitiuri.

Sa tukuni oti tu ena iVolatabu ni na levu sara na yalo ni dui nanumi koya ga ena “iotioti ni veisiga.” (2 Timoci 3:​1-5, NW) Kena irairai ni levu era kauaitaka ga na nodra iyau vakayago, me vaka na vale, motoka, se na nodra cakacaka, mai na nodra saga mera veikilai kei ira tale na so. E dikeva na dauvolaivola o Anthony Storr: “E bibi vei ira na nodra cakacaka mai na nodra vuvale.”

KUNEKUNEI DREDRE NA ITOKANI DINA

E dau tara na nomu bula na nodra ivakarau na nomu itokani. So na gauna era sega ni marau o ira era nanumi ira ga ni sega nodra itokani mera wasea kina na ka era taukena se na nodra nanuma. E dina kina na vosa i Jisu Karisito: “E levu cake na noda marau nida dau solika mai na noda taura na ka.” (Cakacaka 20:​35, NW) E duavata kei na itukutuku dina oqo o George Byron na dauniserekali ni Peritania ni a vola: “O ira kece era marau, mera vakamarautaki ira tale ga na tani.”

Na cava na itokani? E vakamacalataka e dua na ivolavosa ni itokani oya na “nodrau veivolekati dina e rua ni rau veitaleitaki se veivakamareqeti.” Na itokani dina ena vukei iko me donu tiko ga nomu rai. Ena vakayaloqaqataki iko qai vakacaucautaki iko ena gauna ni rarawa. Drau na duavata ni o lolosi. E kaya o tui Solomoni: “Sa loloma tiko e na veigauna kece na wekana na tamata, ka sa vaka na tacina e na gauna ni rarawa.” (Vosa Vakaibalebale 17:17) Ena madra mai na iyau, ia na veitokani dina ena kaukaua qai tubu tiko ga ena toso ni gauna.

E uqeti keda na lotu Vakarisito na iVolatabu meda ‘dolava vakalevu na yaloda.’ (2 Korinica 6:​13) E ka vakayalomatua meda vukei ira tale na so. Eda wilika ena Dauvunau 11:​1, 2: “Mo kaburaka na nomu sila ki na dela ni wai: ka ni sa bogi vuqa mada ko na qai kunea tale. Mo vota vei ira na lewe vitu, io vei ira na lewe walu; ni ko sa sega ni kila na ca ena tubu e vuravura.” E yaga vakacava na ivakavuvuli oqo ena veitokani? Ke levu nomu itokani, era na vukei iko ni o leqa.

Era na taqomaki iko na itokani dina ena dua tale na sala. “Sa cakava na ka dina na weka ni tamata ni sa ia na veivuetaki,” e kaya na Vosa Vakaibalebale 27:6. E dina nira le levu era na vakacaucautaki iko, na itokani dina ena nanumi iko ni na vakaraitaka vakadodonu vei iko na nomu cala bibi qai vakasalataki iko vakayalololoma.​​—Vosa Vakaibalebale 28:23.

Ni o veimaliwai kei ira na itokani vinaka, ena rawai iko na nodra itovo vinaka. Ena Cakacaka wase e 10, eda wilika kina na bula nei Konilio, na turaganivalu ni Roma, qai tukuna vua na agilosi ni sa rogoci nona masu. A namaki Pita na yapositolo o Konilio “kei ira na wekana dina kei ira na nona i tokani voleka.” O ira na itokani voleka oqo i Konilio, e so vei ira na imatai ni kai Matanitu Tani tawacili mera mai ciqoma na itukutuku vinaka ra qai lumuti ena yalo tabu, mera veiliutaki kei Karisito ena Matanitu ni Kalou. Sa ra bau vakalougatataki dina na itokani voleka i Konilio!​​—Cakacaka 10:​24, 44, VV.

O na kunea vakacava e so na nomu itokani? E levu sara na ka e tukuna na iVolatabu me baleta na veitokani, era ivakasala yaga tale ga. (Raica na kato e ra.)

VANUA O NA KUNEI IRA KINA NA ITOKANI DINA

Na vanua vinaka mo kunei ira kina na itokani dina oya ena ivavakoso vakarisito. Taumada, saga mo itokani i Jiova na Dauveibuli kei na Tamada vakalomalagi, kei Jisu Karisito, na nomu iVakabula. “Sa sega na nona loloma e dua na tamata me uasivi cake e na ka oqo, me solia na nona bula e na vukudra na wekana [se, “nona itokani,” NW],” e tukuna o Jisu ena nona sureti iko mo nona itokani. (Joni 15:​13, 15) Ni o itokani i Jiova kei Jisu Karisito, o na nuidei ni rau na ‘kauti iko kei ira na wekamu ina veitikotiko tawamudu.’ Io, eda na bula tawamudu nida itokani i Jiova kei Jisu.​​—Luke 16:​9, VV; Joni 17:3.

Ena yaga vakacava vei iko na veitokani kei rau? Na ivakatagedegede meda dua o keda eda tiko ena vale i Jiova da qai nona itokani e kunei ena Same 15. Wilika mada ena iVolatabu na lima na tiki ni same oqo. Kena ikuri, e kaya o Jisu: “Dou sa wekaqu, [se, “noqu itokani,” NW] kevaka dou sa kitaka na ka kecega ka’u sa vakarota vei kemudou.”​​—Joni 15:14.

Io, na nomu vuli vagumatua o qai bulataka na veidusimaki mai na Vosa ni Kalou na iVolatabu, o sa vakaraitaka tiko ni o vinakata mo nodrau itokani o Jiova kei Jisu. Mo rawata oqo, mo dau tiko wasoma ena soqoni, ni o vakavulici kina mo veikilai kei na Kalou o Jiova. Ni o vakarorogo ena yalodina vei Jiova, o na volekati koya kina kei na Luvena.

Na soqoni e gauna vinaka ni veikilai kei ira tale na so era lomani Jiova ra qai bulataka na vua ni yalo tabu​​—na loloma, reki, vakacegu, vosota vakadede, yalomalua, yalololoma, vakabauta, yalomalumalumu, kei na ivalavala malua​​—ena nodra bula. (Kalatia 5:​22, 23) Ke o vinakata dina me tiko na nomu itokani mo qai kua ni galili, mo tiko ena soqoni vakarisito kece e veimacawa. Ni o cakava oqo, o na tiko ga ena vanua kei na gauna e dodonu mo tiko kina, mo bucina kina na veitokani ena dei kei ira na tamata e vakalougatataka na Kalou.

ITOKANI ME TAWAMUDU

Na veitokani dina e isolisoli talei mai vua na Kalou o Jiova. E tiki ni nona itovo. Ni yalololoma qai lomasoli, e vakatawana kina na vuravura ena ibulibuli vuku eda rawa ni veitokani vinaka. Vakailala kei ira na itokani vakarisito. Vakayaloqaqataki ira. Cakacaka vata kei ira ena cakacaka vakaitalatala. Masu vata kei ira qai masulaki ira tale ga vakawasoma. O na qai vakatotomuri Jiova kina kei na Luvena o Jisu Karisito.

Na veitokani e dua na isolisoli eda rawa ni marautaka kece. Ena dua na gauna ga oqo, sa na levu na nomu itokani. Era na nomu itokani na le vica na milioni era bula tiko ena gauna oqo, vaka kina o ira mai na vica vata na itabatamata sa oti era moce tu ra qai waraka na veivakaturi ena gauna ‘sa na sega tale kina na mate.’ (Vakatakila 21:4; Joni 5:​28, 29) Tovolea mo dau veikauaitaki ena gauna oqo, mera qai nomu itokani o ira era lomani Jiova. Saga me rau nomu itokani o Jiova na Kalou kei Jisu Karisito ena nomu muria na Vosa uqeti ni Kalou. O na qai sega ni galili tale me tawamudu.