Na iTukutuku Lavotaki

NI MAI cava na bose vakayabaki ni Watch Tower Bible and Tract Society of Pennsylvania ena 7 Okotova, 2000, e kacivaka kina e dua na itukutuku lavotaki o John E. Barr na jeameni, e lewe tale ga ni iLawalawa Dauvakatulewa. Na itukutuku oqo e vakacavari vinaka kina na nodrau ivunau o Theodore Jaracz kei Daniel Sydlik.​—Raica na taqana e 12-​16 kei na taqana e 28-​31 ni ivoladraudrau oqo.

E kaya o Brother Barr ni vakabibitaka na tikina e yaga vakalevu: “E qarava ‘na dauveiqaravi yalo dina ka vuku’ kei na kena iLawalawa Dauvakatulewa na itavi cecere qai rabailevu cake sara mai na kena e soli vei ira na isoqosoqo kilai vakalawa. E vakaivolataki vinaka tu ena ivola ni cakacaka ni veisoqosoqo vakalawa oqori ni vakaiyalayala ga na ka era rawa ni cakava. O Jisu Karisito, na noda Turaga, e sa digitaka na ilawalawa e vaka e le dua na dauveiqaravi yalodina ka vuku me raica nona ‘veika’ kece, se veika ni Matanitu ni Kalou e vuravura.”​—Maciu 24:​45-​47, VV.

Ena vuku ni isoqosoqo kilai vakalawa e Pennsylvania, e kuria o Brother Barr: “Me tekivu sara mai ena kena vakalawataki ena 1884, e dua na itavi bibi me baleta na noda cakacaka ena gauna oqo sa colata tiko mai na Watch Tower Bible and Tract Society of Pennsylvania. Ia, se isoqosoqo vakalawa tiko ga e rawa ni vakayagataka na ‘dauveiqaravi yalo dina ka vuku’ kevaka e gadreva vaka kina.”

Ena nodrau ivunau, erau vakamacalataka kina o Brother Sydlik kei Brother Jaracz ni sa soli tu na veika kece ni Turaga e vuravura vua “na dauveiqaravi yalo dina ka vuku,” ia na ka oqo e sega ni tarova na ilawalawa e vaka e le dua na dauveiqaravi yalodina ka vuku me digitaki ira na tagane era rawata na ivakatagedegede vakayalo mai na ‘so tani tale na sipi’ mera qarava e so na itavi. (Joni 10:16) E sega tale ga ni dua na tikinivolatabu e kaya ni dodonu ga mera lotu Vakarisito lumuti na dairekita kece se dua mada ga na dairekita ni isoqosoqo kilai vakalawa era vakayagataka na iVakadinadina i Jiova.

E kaya vei ira na vakarorogo o Brother Barr, ni so na lewe ni iLawalawa Dauvakatulewa ni iVakadinadina i Jiova era a dauveiqaravi tu vakadairekita kei na so tale na itavi ni isoqosoqo, era kerea mera vakacegui mai na itavi vakadairekita ni isoqosoqo kilai vakalawa kece e dau vakayagataka “na dauveiqaravi yalo dina ka vuku” e Mereke. Era sa qai digitaki e so na tagane nuitaki mai na ilawalawa ni so tani tale na sipi me kedra isosomi.

E yaga vakalevu dina na nodratou vakatulewa oqo. E solia vei ira na lewe ni iLawalawa Dauvakatulewa e levu na gauna mera vakarautaka kina na kakana vakayalo se na nodra qaravi vakayalo na mataveitacini e vuravura raraba.

Me kena itinitini, sa qai kaya na jeameni vei ira na vakarorogo: “E dina ni lesi vei ira na ivakatawa matua mera veiqaravi ena veika vakalawa kei na so tale na itavi, . . . era veiqaravi kece o ira oqori ena ruku ni veidusimaki vakayalo ni iLawalawa Dauvakatulewa. . . . Eda vakanamata kece vei Jiova ena noda masuti koya me vakalougatataka noda saga ena duavata meda vakayacora nona inaki, me vakarokorokotaki qai vakalagilagi kina na yacana tabu.”