Vaqaqai Nona Vakaturi O Jisu

“Au rawa ni kaya sara ga vakadodonu nida vakadinata ni a bula dina o Jisu . . . , ia ena sega ga ni rawa nida vakadeitaka ni a vakaturi Koya mai na mate na Kalou.” Oqo na ka e kaya na iliuliu ni lotu Jaji, na ajibisovi ni Canterbury.

E SEGA ni bau vakatitiqataka vakadua na yapositolo lotu Vakarisito o Paula na veivakaturi. Ena wase e 15 ni imatai ni nona ivola vu vakalou vei ira nona itokani lotu Vakarisito e Korinica makawa, e vola kina o Paula: “Ni’u a tukuna taumada vei kemudou na ka ka’u a rawata, ni sa mate na Karisito e na vuku ni nodai valavala ca me vaka nai Vola Tabu: ni sa bulu talega, ka ni sa tu cake talega e nai katolu ni siga me vaka nai Vola Tabu.”​—⁠1 Korinica 15:​3, 4.

Na nodra vakabauta na nona vakaturi o Jisu Karisito e uqeti ira nona tisaipeli mera vunautaka na kosipeli ena vanua vakaroma kei na vanua vakirisi​—⁠“vei ira na tamata kecega sa tiko e ruku i lomalagi.” (Kolosa 1:​23) Io, na vakaturi i Jisu e yavu sara ga ni vakabauta vakarisito.

Mai liu sara, e levu era vakatitiqataka tu ga qai dredre mera vakabauta nona vakaturi o Jisu. De ra na kaya na imuri i Jisu ni o koya e vakoti oqo e Mesaia, ia vei ira e dua na iwase levu ni Jiu, oqo e dua na ka e sa bau vosa vakacacataki dina kina na Kalou. Vei ira tale ga na kai Kirisi vuli vinaka, nira vakabauta na tawamate rawa ni yalo, e lai votivoti kina vei ira na vakasama ni veivakaturi.​—Cakacaka 17:​32-​34.

Dauvakatitiqa Nikua

Ena vica na yabaki wale tiko ga oqo, era tabaka e so na vuku era kaya voli nira lotu Vakarisito, na ivola kei na ulutaga mera vakalasuya kina nona vakaturi o Jisu, era kaya ni itukuni wale ga ra qai veiletitaka sara vakabibi na ulutaga oqo. Nira vakadikeva na “itukutuku kei Jisu,” era kaya kina e so na vuku ni itukutuku ena Kosipeli me baleta na lala ni ibulubulu i Jisu kei na nona vakaraitaki koya ni sa vakaturi oti era italanoa buli, ni oqo e qai buli ga ni sa mate makawa me rawa ni tokona nona itutu vakalomalagi.

Me kena ivakaraitaki, dikeva mada nona nanuma na vuku ni Jamani o Gerd Lüdemann, e parofesa ni Veiyalayalati Vou qai vola tale ga na ivola What Really Happened to Jesus​—⁠A Historical Approach to the Resurrection (Na Cava e Yaco Dina Vei Jisu​—⁠Na iTukutuku ni Nona Vakaturi). E kaya ni nona vakaturi o Jisu e “ivakavuvuli sega ni yavutaki vinaka” e dodonu me cata e dua e tiko vua na “rai vakasaenisi.”

E kaya o Parofesa Lüdemann ni nona rairai o Karisito sa vakaturi oti vua na yapositolo o Pita e raivotu wale ga, e vu oqo mai na rarawa kei na ora ni loma i Pita ni cakitaki Jisu. E kaya tale o Lüdemann, ni nona rairai ena dua na gauna o Jisu vei ira e sivia na lewe 500 era vakabauti koya, e vu oqo mai na nodra “curumi” tu, era sega ni raici koya dina. (1 Korinica 15:​5, 6) Vakalekaleka sara, e levu na vuku era vakalailaina na itukutuku ena iVolatabu ni nona vakaturi o Jisu me dua na itukutuku e vakasamataki wale tu ga, era lai kauaitaka sara kina na tisaipeli nodra veika vakayalo, ra qai gumatuataka tale ga na cakacaka vakaulotu.

E levu era sega ni bau galeleta mera veiletitaka na vakasama vakavuku. Ia e dodonu meda kauaitaka kece na veivosakitaki ni nona vakaturi o Jisu. Na vuna? Baleta ke sega ni vakaturi o koya, ena yavutaki ena ivakavuvuli lasu na vakabauta vakarisito. Ena yasana kadua, kevaka e itukutuku dina na nona vakaturi o Jisu, ena yavutaki na lotu Vakarisito ena ka dina. Ena tikina oqo, ena vakadinadinataki kina na nona dodonu na Karisito, vakatale ga kina na dina ni nona vosa ni yalayala. Me kena ikuri, kevaka ena yaco na veivakaturi, ena sega ni lewai keda tale tiko o mate, ia ena vaka e dua na meca me vakavuai.​—1 Korinica 15:55.

[iTaba ni Credit Line ena tabana e 3]

Mai na Self-Pronouncing Edition of the Holy Bible, containing the King James and the Revised versions