Vakaturi o Jisu—Kena Yaga Vei Keda

1, 2. (a) Na cava era via kila na iliuliu ni lotu, e sauma vakacava o Pita? (Raica na imatai ni iyaloyalo.) (b) Na cava e doudou kina o Pita ena gauna qori?

NI OTI ga e vica na siga na mate i Jisu, e sotava na yapositolo o Pita e dua na ilawalawa tagane rerevaki qai voravora. Qo o ira na iliuliu ni lotu Jiu era navuca me vakamatei o Jisu. Era via kila na ka e cakava o Pita. A vakabula o koya e dua na tagane sucu lokiloki ra qai via kila na kaukaua i cei se yaca i cei e veivakabulai kina o Pita. E sauma ena doudou na yapositolo: “Ni tucake tu e matamuni na tagane qo ena bula vinaka ena yaca ga i Jisu Karisito na kai Nasareci, o koya oni vakota ia a vakatura mai na mate na Kalou.”—Caka. 4:5-10.

² Ni bera qori a cakitaki Jisu vakatolu o Pita baleta ni a rere. (Mari. 14:66-72) Na cava e doudou kina ena gauna qo ni tu e matadra na iliuliu ni lotu? E sobuti koya na yalo tabu, e vakadeitaka tale ga ni sa vakaturi o Jisu. E vakadeitaka vakacava na yapositolo ni sa vakaturi o Jisu? Na cava tale ga meda vakabauta kina?

3, 4. (a) Na veivakaturi cava e yaco ni bera ni ratou sucu na yapositolo i Jisu? (b) Na veivakaturi cava e cakava o Jisu?

³ Sega ni ka vou vei ratou na yapositolo i Jisu nodra vakaturi na mate, ni dau yaco qori ni bera ni ratou sucu. Eratou kila ni Kalou a vakaukauataki rau na parofita o Ilaija kei Ilaisa me rau cakava qori. (1 Tui 17:17-24; 2 Tui 4:32-37) Bau bula mada ga na tamata e kolotaki na yagona ena ibulubulu ni tara na sui nei Ilaisa. (2 Tui 13:20, 21) Era vakabauta na itukutuku qo na lotu vaKarisito taumada, me vaka ga na noda vakabauta na dina ni Vosa ni Kalou.

⁴ E uqeti keda sara ga nida wilika na itukutuku ni veivakaturi i Jisu. Kena ivakaraitaki, a rairai kurabuitaka na yada na nona vakabula o Jisu na luvena tagane e duabau ga. (Luke 7:11-15) Dua tale na gauna, a vakabula o Jisu na goneyalewa yabaki 12. Vakasamataka na levu ni nodrau marau na itubutubu, rau qai kurabui ni sa vakabulai! (Luke 8:49-56) Dua na ka nodra marau na vakararai tu ni sa tucake mai na ibulubulu o Lasarusa ni sa bula tale!—Joni 11:38-44.

VUNA E DUATANI KINA NA VAKATURI I JISU

5. E duatani vakacava na vakaturi nei Jisu mai na veivakaturi ena gauna sa oti?

⁵ Eratou kila na yapositolo ni duatani na vakaturi nei Jisu mai na veivakaturi sa yaco oti. O ira na vakaturi qori era vakaturi ena yago vakayago ra qai mate tale. Ia o Jisu e vakaturi ena yago vakayalo e sega ni rusa rawa. (Wilika Cakacaka 13:34.) E vola o Pita ni o Jisu e “vakamatei ena yago vakayago, ia e qai vakabulai ena yago vakayalo.” Kena ikuri, “sa tiko o koya ena ligaimatau ni Kalou, ni gole i lomalagi; era sa vakamalumalumutaki kece vua na agilosi, na veiliutaki, kei na lewa.” (1 Pita 3:18-22) E vakatubuqoroqoro qai veivakurabuitaki na veivakaturi ena gauna sa oti, ia e sega ni tautauvata kei na veivakaturi lagilagi qo.

6. E uqeti ratou vakacava na tisaipeli na vakaturi nei Jisu?

⁶ Na vakaturi nei Jisu e uqeti ratou sara ga nona tisaipeli. E sega tale ni mate me vaka era nanuma na kena meca. Sa dua na kabula kaukaua vakayalo qai sega ni dua me vakaleqai koya rawa. Nona vakaturi e vakadinadinataka ni Luve ni Kalou, qori e vakavuna me ratou marau vakalevu na nona tisaipeli, eratou sega ni rarawa tiko ga. Sa sega tale ga ni ratou rere, eratou sa doudou. E yaga na vakaturi nei Jisu ena vakayacori ni inaki i Jiova kei na itukutuku vinaka eratou kacivaka ena doudou ena veivanua.

7. Na cava e cakava tiko nikua o Jisu, na taro cava e basika?

⁷ Nida dauveiqaravi i Jiova eda kila vinaka ni sega ni tamata rogo ga o Jisu. E bula tiko nikua qai dusimaka na cakacaka e vauci keda kece e vuravura. Ni Tui ni Matanitu ni Kalou o Jisu Karisito, sa vakarau vakasavasavataka na vuravura ca qo qai veisautaka me parataisi era na bula tawamudu kina na lewenivanua. (Luke 23:43) E rawa ga qori baleta ni sa vakaturi o Jisu. Eda vakadeitaka vakacava ni sa vakaturi mai na mate? E yaga vakacava vei keda nona vakaturi?

VAKARAITAKA O JIOVA NI KAUKAUA VEI MATE

8, 9. (a) Na cava era kerea kina na iliuliu ni lotu me yadravi vinaka na ibulubulu nei Jisu? (b) Na cava e yaco ni rau lako na yalewa ina ibulubulu?

⁸ Ni sa vakamatei o Jisu, era lako vei Pailato na iliuliu ni bete kei ira na Farisi, era kaya: “Turaga, ni se bula na dauveidabui ya, a kaya, ‘Au na vakaturi ni oti e tolu na siga.’ Ni vakarota mada me yadravi vinaka sara na ibulubulu me yacova na ikatolu ni siga, de ra lako mai na nona tisaipeli ra qai butakoca na yagona, ra qai kaya vei ira na lewenivanua, ‘Sa vakaturi mai na mate!’ sa na qai ca sara na veidabui qo, se bau vinaka cake e liu.” E kaya vei ira o Pailato: “Sa tu ga nomudou yadra. Dou lai raica me yadravi sara ena kena levu dou vinakata.” Qori na ka era qai cakava.—Maciu 27:62-66.

⁹ E vakotori na yago i Jisu ena ibulubulu e ta ena babanivatu qai sogo ena dua na vatu levu. Era vinakata na iliuliu ni lotu Jiu me tiko ga e keri o Jisu, oya me mate tu ga ena ibulubulu. Ia e duatani sara na rai i Jiova. Ni lako yani ena ibulubulu o Meri Makitala kei Meri adua, rau raica ni sa vaqiqici tani na vatu, sa dabe toka kina na agilosi. E uqeti rau na yalewa na agilosi me rau rai ena loma ni ibulubulu, rau qai raica ni sa lala tu. E kaya na agilosi, “Sa yali o koya ni sa vakaturi.” (Maciu 28:1-6) Sa bula o Jisu!

10. Na ivakadinadina cava e vola o Paula me baleta na vakaturi nei Jisu?

¹⁰ Na ka e yaco ena 40 na siga e tarava e dusia ni sa vakaturi o Jisu. E vakamacalataka vakalekaleka na yapositolo o Paula na kena ivakadinadina, ni vola vei ira mai Korinica: “Dua vei ira na ka bibi au vakadewataka vei kemuni, au a ciqoma tale ga, oya ni mate na Karisito ena vuku ni noda ivalavala ca me vaka e kaya na iVolatabu; e bulu qai vakaturi ena ikatolu ni siga me vaka e kaya na iVolatabu; e rairai vei Kifa qai tarava vei iratou na le tinikarua. Oti ya sa qai rairai vei ira na limanadrau vakacaca na veitacini ena dua ga na gauna, e levu vei ira ya era se bula tiko qo, ia eso era sa mate. Oti ya sa qai rairai vei Jemesa, tarava sara vei iratou kece na yapositolo. Kena iotioti, nona rairai tale ga vei au me vaka vua e dua e sucudole.”—1 Kor. 15:3-8.

VUNA EDA KILA KINA NI VAKATURI O JISU

11. Eda kila vakacava ni “kaya na iVolatabu” na vakaturi nei Jisu?

¹¹ Dua na vuna eda kila kina ni bula mai na mate o Jisu ni “kaya na iVolatabu.” E parofisaitaki ena Vosa ni Kalou na veivakaturi. Kena ivakaraitaki, e vola o Tevita ni na sega ni tu ga ena iBulubulu na ‘Le Dua Yalosavasava’ ni Kalou. (Wilika Same 16:10.) Ena siga ni Penitiko 33 G.V., e vakaibalebaletaka na yapositolo o Pita na parofisai qori vei Jisu, e kaya: “Sa raica rawa tu yani o koya [Tevita] na nona vakaturi na Karisito, e dau tukuna tale ga ni na sega ni biu tu mai Etesi, se me vuca mai na yagona.”—Caka. 2:23-27, 31.

12. O cei e raica ni sa vakaturi o Jisu?

¹² Na ikarua ni vuna eda kila kina ni vakaturi o Jisu, oya nira vakadinadinataka e levu. Ni sa vakaturi o Jisu, e rairai ena loma ni 40 na siga vei ratou nona tisaipeli ena iteitei e tiko kina na ibulubulu, na gaunisala i Emeo, kei na so tale na vanua. (Luke 24:13-15) E vosa yadua vei ira ena gauna qori, wili kina o Pita, kei ira vakailawalawa. Bau rairai mada ga vei ira na le 500 vakacaca! Sega ni vakalasui rawa na ka era vakadinadinataka e levu.

13. E laurai vakacava ena nodratou yalogu na tisaipeli ni sa vakaturi o Jisu?

¹³ Na ikatolu ni vuna eda kila kina ni a vakaturi o Jisu, oya ni ratou tukuna ena yalogu nona tisaipeli. Ni ratou gumatua ni tukuna ni sa vakaturi o Karisito eratou vakacacani kina, vakararawataki, ratou vakamatei. Ke sega ni vakaturi o Jisu, se lasutaki, na cava me bolemate kina o Pita ni tukuna ni sa vakaturi o Karisito vei ira na iliuliu ni lotu era cati koya ra qai nakita me mate? E vakadeitaka o Pita kei ratou na vo ni tisaipeli ni sa bula tale qai dusimaka tiko na cakacaka e vinakata na Kalou me vakayacori. Na vakaturi tale ga i Jisu e vakadeitaka vei ratou nona imuri ni ratou na vakaturi. Kena ivakaraitaki, ni mate o Sitiveni e vakabauta nira na vakaturi tale na mate.—Caka. 7:55-60.

14. Na cava o vakabauta kina ni bula tiko o Jisu?

¹⁴ Na ikava ni vuna eda kila kina ni sa vakaturi o Jisu, oya ni tiko na ivakadinadina ni sa Tui tiko ena gauna qo, e Ulu tale ga ni ivavakoso vaKarisito. E laurai ni tubu tiko na lotu vaKarisito dina. Vakacava, rawa ni yaco qori ke sega ni vakaturi o Jisu? Sega. Eda na sega mada ga ni kilai koya. Io e tiko na ivakadinadina meda vakabauta ni bula tiko o Jisu, e lewa qai dusimaka tiko na kacivaki ni itukutuku vinaka ena veivanua.

YAGA VEI KEDA NONA VAKATURI O JISU

15. E vakadoudoutaki keda vakacava na vakaturi nei Jisu meda vunau?

¹⁵ Nona vakaturi o Karisito eda doudou kina ni vunau. Sa 2,000 na yabaki nodra vakayagataka tiko na meca ni Kalou na veimataqali iyaragi me tarova na kacivaki ni itukutuku vinaka, oya na vukitani, veivakasewasewani, ilala dauvakacaca, vakatatabu, veivakararawataki, kei na veivakamatei. Ia na ‘iyaragi kece ga sa caka me keda’ e sega ni tarova noda kacivaka na Matanitu ni Kalou kei na noda veivakatisaipelitaki. (Aisea 54:17) Eda sega ni rerevaki ira na imuri nei Setani, se o ira nona ito. E tiko vata kei keda o Jisu, e tokoni keda me vaka e yalataka. (Maciu 28:20) Meda kua ni rere, nira na sega ni vagalui keda na keda meca, se mani cava era saga!

16, 17. (a) E vakadeitaka vakacava na veivakaturi na ka e vakavulica o Jisu? (b) Na kaukaua cava e solia na Kalou vei Jisu me vaka e tukuni ena Joni 11:25?

¹⁶ Na vakaturi i Jisu e vakadeitaka na ka kece e vakavulica. E vola o Paula ke sega ni vakaturi o Karisito ena tawayaga nodra vakabauta na lotu vaKarisito kei na nodra vunau. E vola e dua na vuku ni iVolatabu: “Ke sega ni vakaturi o Karisito, . . . Era lialia na lotu vaKarisito, era rawai ena veidabui levu.” Ke sega ni vakaturi o Jisu, na itukutuku ena Kosipeli ena dua ga na italanoa vakaciriloloma me baleta e dua na turaga vinaka, e vuku tale ga ra qai vakamatei koya na kena meca. Ia e vakaturi o Karisito me vakadeitaka na dina ni ka kece e vakavulica, wili kina na ka e tukuna me baleta na veigauna se bera mai.—Wilika 1 Korinica 15:14, 15, 20.

¹⁷ E kaya o Jisu: “O yau na tucake tale kei na bula. O koya e vakabauti au, ke mani mate, ena bula tale.” (Joni 11:25) Ena yaco dina ga na itukutuku marautaki qori. Sa solia o Jiova na kaukaua vei Jisu me vakaturi ira na lai bula vakayalo i lomalagi kei ira na vica vata na bilioni era na vakaturi mera bula tawamudu e vuravura. Na isoro ni veivoli i Jisu kei na nona vakaturi, e vakaraitaka ni na sega tale na mate. Vakacava, e uqeti iko qori mo vosota na veivakatovolei qai bolemate?

18. Na cava e vakadeitaka na vakaturi nei Jisu?

¹⁸ Na vakaturi nei Jisu e vakadeitaka nida na lewai na lewe i vuravura ena ivakatagedegede ni loloma i Jiova. E kaya o Paula vei ira na tagane kei na yalewa mai Aceni makawa: “Me lewai vuravura kina [na Kalou] ena yalododonu ena ligai koya e lesia, e vakarautaka tale ga e dua na ivakadei vei ira kece ni sa vakaturi koya mai na mate.” (Caka. 17:31) Io, o Jisu na Turaganilewa e lesia na Kalou, eda vakadeitaka gona ni na dodonu nona lewa qai yavutaki ena loloma.—Wilika Aisea 11:2-4.

19. E uqeti keda vakacava noda vakabauta na vakaturi i Jisu?

¹⁹ Nida vakabauta na vakaturi i Jisu ena uqeti keda meda vakayacora na inaki ni Kalou. Ke sega ni mate vakaisoro o Jisu qai vakaturi, eda na valavala ca tiko ga da qai mate. (Roma 5:12; 6:23) Ke sega ni vakaturi, eda na rawa ni kaya: “Meda kana ga, da gunu, nida na mate nimataka.” (1 Kor. 15:32) Ia eda sega ni vakabibitaka na gagadre ni bula qo. Eda vakamareqeta ga na inuinui ni veivakaturi da qai muria na ka kece e dusimaki keda kina o Jiova.

20. E dusia vakacava na cecere i Jiova na vakaturi nei Jisu?

²⁰ Na vakaturi nei Karisito e dusia vakamatata ni cecere ga o Jiova, e “vakaicovitaki ira tale ga era vakasaqarai koya ena yalogu.” (Iper. 11:6) Dua na ka na kaukaua kei na vuku e tu vei Jiova me vakaturi Jisu kina ina bula tawamate i lomalagi! E vakaraitaka tale ga na Kalou ni rawa ni vakayacora na ka kece e yalataka, wili kina nona parofisaitaka e dua na “kawa” me vakadodonutaka na ile me baleta na veiliutaki cecere. Me vakayacori na vosa ni yalayala qori ena vinakati gona me mate o Jisu qai vakaturi.—Vkte. 3:15.

21. E yaga vakacava vei iko na vakaturi i Jisu?

²¹ Vakacava, o vakavinavinakataki Jiova ni vakarautaka vei keda na inuinui ni veivakaturi? E vakadeitaka vei keda na iVolatabu: “Raica! E sa tiko vei ira na tamata na vale ni Kalou, ena tiko vata kei ira o koya, era na nona tamata. Na Kalou sara ga ena tiko vata kei ira. Ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.” Na inuinui totoka qori a tukuni vua na yapositolo yalodina o Joni: “Vola, e donu na vosa qo, e dina tale ga.” O cei e vakatakila vei Joni na vosa uqeti qori? O Jisu Karisito ni sa vakaturi oti.—Vkta. 1:1; 21:3-5.