“Sa Dina Sa Tu Cake Tale na Turaga”!

Vakasamataka mada nodra rarawa na tisaipeli i Jisu ni sa vakamatei na nodra Turaga. Na nodra vakanuinui sa lai vaka na yagonimate e vakotora o Josefa na kai Arimacea ena ibulubulu. E seavu tale ga na nanamaki ni na vagalalataki ira na Jiu o Jisu mai na nodra lewai tiko vei Roma.

KE MAI cava e kea na ka kece, era na rairai yali beka na tisaipeli i Jisu me vakataki ira ga na nodra imuri era viavia Mesaia. Ia e sa bula tale o Jisu! E kaya na iVolatabu ni rairai vakavuqa vei ira nona imuri ni oti ga vakalailai nona mate. Oya na vuna era uqeti kina e so nona tisaipeli mera kaya vakadomoilevu: “Sa dina sa tu cake tale na Turaga”!​—⁠Luke 24:⁠34.

E gadrevi vei ira na tisaipeli mera taqomaka nodra vakabauta ni Mesaia dina ga o Jisu. Nira vakayacora oqo, era na vakaraitaka tiko kina vakadodonu ni nona vakaturi mai na mate o Jisu e ivakadei ni o koya na Mesaia dina. Na kena dina ni ratou “tukuna e na kaukauwa levu na i apositolo na tucake tale mai na mate ni Turaga ko Jisu.”​—⁠Cakacaka 4:​33, VV.

Ke via vakadinadinataka e dua ni veivakaturi oqo e lasutaki​—⁠ni kaciva beka mai e dua na tisaipeli i Jisu me kaya vakadodonu ni lasutaki na itukutuku ni veivakaturi se me vakaraitaka ni a tu ga ena ibulubulu na yago i Jisu​—⁠ke a yala sara ga e kea na lotu Vakarisito. Ia e sega. Nira kila ni bula tiko o Karisito, era lako kina ina veivanua kece na imuri i Jisu mera kacivaka nona vakaturi, ra mani vakabauti koya kina na Karisito vakaturi oti e lewevuqa.

Na cava o rawa ni vakabauta tale ga kina na nona vakaturi o Jisu? Na ivakadinadina cava e tu e vakaraitaka ni ka oqo e yaco dina?

Na Cava me Dikevi Kina na iVakadinadina?

Eratou volaitukutukutaka kece na va na Kosipeli na nona vakaturi o Jisu. (Maciu 28:​1-​10; Marika 16:​1-8; Luke 24:​1-​12; Joni 20:​1-​29)a E so tale na iwase ni iVolatabu Vakirisi Vakarisito era tokona dina ni a vakaturi mai na mate na Karisito.

Sa rauta mera kacivaka na vakaturi i Jisu na nona imuri! Ke vakaturi koya dina na Kalou, sa na dua na itukutuku matanidavui me qai bau rogoca o vuravura. E vakaraitaka ni bula dina tiko na Kalou. E vakadeitaka tale ga ni bula sara tiko ga ena gauna oqo o Jisu.

E vakayacoka vakacava oqo vei keda? E masuta o Jisu: “Ia sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.” (Joni 17:⁠3) Io, e rawa nida taukena na kila dausoli bula me baleti Jisu kei Tamana. Nida vakayagataka na kila oqo, e rawa nida vakaturi kevaka eda na mani mate, me vaka e yaco vei Jisu. (Joni 5:​28, 29) E rawa nida nuitaka na bula tawamudu ena vuravura parataisi ena ruku ni nona Matanitu vakalomalagi na Kalou, ena veiliutaki ni Luvena vakalagilagi o Jisu Karisito na nodra Tui na tui.​—⁠Aisea 9:​6, 7; Luke 23:43; Vakatakila 17:⁠14.

O koya gona na taro se a tucake dina mai na mate o Jisu e rui ka bibi. Ena tara na noda bula nikua vaka kina na noda gauna mai muri. Oya na vuna o sureti kina mo dikeva e va na ivakadinadina matata ni a mate o Jisu qai vakaturi.

Mate Dina Ena Kaunirarawa o Jisu

Era kaya e so na dauvakatitiqa ni a vakoti o Jisu, ia e sega ga ni mate ena kaunirarawa. Era kaya ni a voleka sara ni mate, ia a qai vakilai yalona tale ena batabata ni ibulubulu. Na ivakadinadina kece e tu e vakadeitaka ni kotori o Jisu ena ibulubulu ni mate.

Ni vakamatei e matanalevu o Jisu, era tu gona o ira era vakadinadinataka ni mate dina ena kaunirarawa o koya. E vakadeitaka na mate i Jisu na turaganivalu e liutaka na veivakamatei. E nona itavi sara ga na turaganivalu oqo me raica ni sa mate dina o Jisu. Ni vakadeitaka na kovana ni Roma o Ponitio Pailato ni sa mate o Jisu, sa qai solia na yagona vei Josefa na kai Arimacea me lai buluta.​—⁠Marika15:​39-​46.

Lala na iBulubulu

Na lala ni ibulubulu e imatai ni ivakadinadina vei ira na tisaipeli ni sa vakaturi o Jisu. E sega tale ni qai veiletitaki na ivakadinadina oqo. E bulu o Jisu ena ibulubulu vou, e se bera ni bau vakayagataki. E voleka ga ena vanua e vakoti kina ena kaunirarawa, ena rawarawa sara me kunei ena gauna oya. (Joni 19:​41, 42) Era duavata kece na itukutuku ena Kosipeli ni gauna era yaco yani kina na weka i Jisu ena ibulubulu ena ikarua ni mataka ni oti nona mate, sa yali na yagona.​—⁠Maciu 28:​1-7; Marika 16:​1-7; Luke 24:​1-3; Joni 20:​1-​10.

Era kidroa tale ga na meca i Jisu ni sa lala na ibulubulu me vaka ga na nodra kidroa na wekana. Era saga tiko mai vakadede na kena meca mera raica nona mate kei na nona bulu. Nira raica na vua ni nodra sasaga, sa ra qai qarauna me tiko e dua na yadra me taqomaki kina na ibulubulu. Ia ena mataka ni imatai ni siga ni macawa, sa lala tu na ibulubulu.

Era kauta laivi beka na yago i Jisu mai na ibulubulu na wekana? Kena irairai ni sega, ni vakaraitaka na Kosipeli ni ratou rarawataka dina na nona vakamatei. Me kena ikuri, era na sega ni vinakata mera vakacacani se ra lai mate sara na nona tisaipeli ena vuku ni dua na ka era kila ni lasutaki.

O cei ga e vakalala na ibulubulu? Era na sega sara ga ni via kauta na yago i Jisu na kena meca. Ia kevaka mada ga era kauta, era na vakasuka mai mera vakacalai kina na tisaipeli era kaya tiko ni sa vakaturi o Jisu, e sa bula tale. Ia e sega ni dua na ka vaka oya e yaco, baleta ni oya e cakacaka ni Kalou.

Ni oti e vica na macawa, era sega ni bau saga na meca i Jisu mera saqata nona kaya ena doudou o Pita: “O i kemuni na Isireli, ni rogoca mada na veika oqo! Ko Jisu na kai Nasareci, e dua ka sa vakadinadinataki koya oti na Kalou vei kemuni e na cakacaka mana, na veika veivakurabuitaki, kei na i vakatakilakila e so, ka a solia na Kalou vei koya me cakava e na kemuni maliwa, me vaka ko ni sa kila. E a soli yani ko Jisu vei kemuni me vaka ga sa nakita ka kila e liu na Kalou. Ko ni a qai tauri koya ka vakota ki na kauveilatai [se, “kaunirarawa,” NW], ka vakamatea e na ligadra na tamata ca. Ia sa qai vakaturi koya cake tale na Kalou ni sa sereki koya mai na i vau ni mate, ni sega ni rawa me vauci tiko ga kina. Ni a sa kaya tu ko Tevita me baleti koya, ‘Au a sa raica rawa tiko ni na dau tiko vata ga kei au na Turaga [o Jiova] . . . ka na vakacegu tale ga na yagoqu e na vuku ni veika sa nuitaki tiko. Ni ko ni na sega ni biuta tu na yaloqu mai Etesi, se laiva na nomuni Le Dua Yalo Savasava me luca mai.’”​—⁠Cakacaka 2:22-27, VV.

Lewe Levu Era Raici Jisu ni sa Vakaturi Oti

Ena ivola na Cakacaka, e kaya kina na dauvola Kosipeli o Luke: “Ka sa vakarairaitaki koya [o Jisu] talega vei ira [na yapositolo], ka sa levu na kenai vakadinadina, ni sa bula tale mai na nona mate, ka ni sa daurairai vei ira ka bogi vasagavulu, ka vosataka na veika ni matanitu ni Kalou.” (Cakacaka 1:​2, 3) Ena so tale na gauna eratou raici Jisu sa vakaturi oti e levu vei iratou na tisaipeli​—⁠ena were, e gaunisala, ena gauna ni kana, vaka kina ena Wasawasa o Taiperia.​—⁠Maciu 28:​8-​10; Luke 24:​13-​43; Joni 21:1-23.

Era vaqaqa na dauveivakadiloi na dina ni nona rairai o Jisu ena veivanua oqo. Era kaya nira bulia ga na dauvolaivola na kena itukutuku se veicalati na ivakamacala e koto kina. Na duidui lalai gona ni itukutuku ena Kosipeli e vakaraitaka ni sega kina na veidabui. E vakarabailevutaka noda kilai Jisu nona vakarautaka mai e dua na dauvolaivola na itukutuku matailalai e tokona e so tale na itukutuku ni veika a yaco ena nona bula e vuravura na Karisito.

E tadrai wale beka ga na nona laurai o Jisu ni sa vakaturi oti? Na itukutuku vaka oqo ena sega ni vakabauti, baleta ni lewe levu era raici Jisu ni sa vakaturi. Era maliwai ira na raici Jisu na dauqoli, o ira na marama, e dua e cakacaka vakamatanitu, vaka kina na yapositolo dauvakatitiqa o Tomasi, o koya e qai vakabauta ga ni sa vakaturi mai na mate o Jisu ni tara sara ga na we ni vako. (Joni 20:​24-​29) Ena levu na gauna eratou sega ni bau siqema rawa na nodratou Turaga ni sa vakaturi oti o iratou na tisaipeli. Ena dua na gauna, era raici koya e sivia e le 500, e levu vei ira era bula tiko ena gauna e vakayagataka kina na yapositolo o Paula na ka e yaco oya me nona ivakadinadina ni taqomaka tiko na ivakavuvuli ni veivakaturi.​—⁠1 Korinica 15:⁠6.

E Vakayacoka Vei Ira na Tamata Nodra Kila ni Bula Tiko o Jisu

Na nona vakaturi o Jisu e sega ni dodonu me lomatarotarotaki se veibataki. E vakayacoka vei ira na tamata e veivanua kece ena sala e veiuqeti ni kilai ni bula tiko o koya. Me tekivu mai ena imatai ni senitiuri, dua na ka na levu ni tamata era vakanadakuya na nodra itovo e liu nira sega ni dauveikauaitaki kei na nodra dauveitusaqati mera mai lotu Vakarisito ra qai vakadinata ni oqo na lotu dina. Na cava e veisautaki ira? Na vulici ni iVolatabu e vakadeitaka vei ira ni vakaturi Jisu na Kalou ina bula lagilagi vakayalo i lomalagi. (Filipai 2:​8-​11) Era cakacakataka nodra vakabauti Jisu kei na isolisoli ni bula e vakarautaka na Kalou o Jiova ena vuku ni isoro ni veivoli i Karisito. (Roma 5:⁠8) E levu era kunea na marau dina nira vakayacora na loma ni Kalou ra qai saga me salavata na nodra bula kei na ivakavuvuli i Jisu.

Dikeva mada se cava na ibalebale ni dua e lotu Vakarisito ena imatai ni senitiuri. E sega ni dau qara me rogo, me vakaitutu, se vutuniyau. Me kena veibasai, e levu na lotu Vakarisito taumada era ‘reki ni kovei na nodra iyau’ ena vuku ni nodra vakabauta. (Iperiu 10:34) Era bolea na lotu Vakarisito mera vakuai ira ena so na ka se ra vakacacani, e dau tini sara ena mate ena levu na gauna.

Ni bera nira yaco mera imuri i Karisito, e so era tamata rogo sara ra qai vutuniyau. E tekivu me dokai ena matadra na Jiu o Saula na kai Tarisu ena veituberi nei koya na ivakavuvuli rogo ni Lawa o Kamalieli. (Cakacaka 9:​1, 2; 22:3; Kalatia 1:​14) Ia, e qai yaco o Saula me o Paula na yapositolo. E vakanadakuya o Paula kei ira e levu tale na via rogo se via vakaitutu e dulaka tu mai o vuravura. Na cava na vuna? Me rawa ni vakatetei kina na itukutuku ni inuinui dina e yavutaki ena vosa ni yalayala ni Kalou vaka kina nona vakaturi mai na mate o Jisu Karisito. (Kolosa 1:​28) Era tu vakarau mera vakararawataki ena vuku ni dua na ka era kila ni yavutaki ena ka dina.

E dina tale ga na ka oqo vei ira e vica vata na milioni nikua. O rawa ni kunei ira ena ivavakoso ni iVakadinadina i Jiova e veiyasa i vuravura. Era sureti iko na iVakadinadina ina soqo ni kena vakananumi e veiyabaki na mate i Karisito, ena vakayacori ni sa dromu na siga ena Sigatabu, 8 Epereli, 2001. Era na marau mera raici iko ena soqo oqo vaka kina ena nodra soqoni kece e vulici kina na iVolatabu ena nodra Kingdom Hall.

Vakacava me levu tale na ka o vulica, sega wale ga ni nona mate kei na nona vakaturi o Jisu ia na veika tale ga e baleta nona bula kei na nona ivakavuvuli? E sureti keda o koya meda toro vua. (Maciu 11:​28-​30) Yavala rawa nikua mo taukena na kila me baleta na Kalou o Jiova kei Jisu Karisito. Ni o vakayacora oqori, ena rawa ni kena ibalebale na bula tawamudu ena ruku ni Matanitu ni Kalou ena veiliutaki i Luvena lomani.

[iVakamacala e ra]

[iYaloyalo ena tabana e 7]

Era kunea na marau dina e lewe vica vata na milioni nira imuri i Jisu Karisito

[iTaba ni Credit Line ena tabana e 6]

Mai na Self-Pronouncing Edition of the Holy Bible, containing the King James and the Revised versions