Na Talairawarawa me Vulici Nida se Gone
“ERA Sega ni Vinakata na iTubutubu Mera Talairawarawa ga na Gone, ia Mera Gone Kilai Tani.” Oqori na ulutaga ni dua na niusiveva. E tauri mai oqo ena dua na vakatataro a vakayacori e Niusiladi, e vakaraitaka ni “22 ga na pasede na vakatarogi era nanuma ni dodonu mera vakavulici mai vale na gone mera dau talairawarawa.” E macala tale ga ena vakatataro oya ni o ira na itubutubu edaidai era vakabauta ni bibi cake mera vakavulici na gone ena itovo vinaka, mera lewai ira rawa, kei na cola itavi.
Na gauna ni dui sagai koya kei na nanumi koya ga eda sa donuya tu oqo, e sega ni kurabuitaki ni so era na raica vakamamada na talairawarawa kei na kena vakavulici vei ira na gone. E dodonu beka meda raica ni sa oti na gauna ni talairawarawa, e sa madra? Se meda raica ni oqo e dua vei ira na ka bibi mera vulica na gone ni na yaga vei ira? O koya e bibi duadua, e raica vakacava o Jiova, na Kalou, o koya e vakavuna na bula vakavuvale, na nodra talairawarawa na gone vei ira na itubutubu, kei na yaga ni nodra talairawarawa?—Cakacaka 17:28; Efeso 3:14, 15.
“Sa Ka Dodonu Oqo”
E vola na yapositolo o Paula ena ivavakoso lotu Vakarisito mai Efeso ena imatai ni senitiuri: “Kemuni na gone, mo ni talairawarawa vei ira na nomuni i tubutubu e na ka sa vinaka vua na Turaga, ni sa ka dodonu oqo.” (Efeso 6:1, VV) Na vu ni noda talairawarawa e baleta ni dodonu vua na Kalou, e salavata kei na ivakatagedegede e virikotora. Me vaka ga e tukuna o Paula, “sa ka dodonu oqo.”
Oqo e salavata kei na ka e tukuna na Vosa ni Kalou ena talei ni nodra veivakadodonutaki ena loloma na itubutubu, “ni na dua na usu talei ki na ulumu, kei nai taube ki na domomu,” ena “vinaka sara oqori vua na Turaga.” (Vosa Vakaibalebale 1:8, 9; Kolosa 3:20, VV) Ia na talaidredre vei ira na itubutubu e sega ni vakadonuya na Kalou.—Roma 1:30, 32.
“Mo Vinaka Kina”
E cavuta o Paula e dua tale na yaga ni talairawarawa ena nona vola: “Vakarokorokotaki rau na tamamu kei na tinamu. Sa i koya oqo na i matai ni vunau sa dua kina na vosa ni yalayala: mo vinaka kina, ka bula balavu kina e na dela i vuravura.” (Efeso 6:2, 3, VV; Lako Yani 20:12) Na sala cava soti ena lako vinaka kina vei keda ke da talairawarawa vei ira na noda itubutubu?
Taura mada, o cei e sa dede na nodra bula, sa levu tale ga na ka era sa sotava, sega beka ni o ira na itubutubu? Era sega beka ni kila vakavinaka na kompiuta se so na lesoni e vakavulici mai koronivuli, ia e levu sara na ka era kila me baleta na bula kei na sala mera valuta kina na leqa. Era lekata na tamata gone na vakasama vakayalomatua e kunei vei ira na matua. Dau totolo gona kina na nodra vakatulewa nira rawai ena nodra via vakamuri ira na nodra icaba, vakavuna mera tini vakaca. E tukuna vakadodonu na iVolatabu: “A ka lialia sa vauci e lomana na gone.” Ia na cava na kena iwali? “A kuita ni veivakatavulici ena vakaseva tani vua.”—Vosa Vakaibalebale 22:15.
Na yaga ni talairawarawa e sega ni baleta ga na nodrau veiwekani na gone kei na itubutubu. Me cici malumu qai toso vinaka na bula ni kawatamata ena vinakati kina na duavata, e gadrevi gona na talairawarawa. Me kena ivakaraitaki, e vinakati na veisorosorovi ena bula vakawati, ena yaco kina na sautu, duavata kei na marau, sega ni vinakati me tawakauaitaki na nodra dodonu kei na ka e tarai ira na tani. E ka bibi ena vanua ni cakacaka na vakarorogo vei ira na itaukei ni cakacaka me rawa ni toso vinaka kina na bisinisi se dua na sasaga. Na talairawarawa ina ituvatuva kei na lawa ni matanitu, e sega wale ga ni o levea kina na itotogi, e itataqomaki tale ga.—Roma 13:1-7; Efeso 5:21-25; 6:5-8.
O ira na gone era dau beca na lewa, e baya nodra veimaliwai kei ira na lewenivanua. Ena yasana adua na vulici ni talairawarawa ena gauna ni gone e yaga ena gauna taucoko ni bula. Me vakavulici gona ni se gone!
Na iCocovi Vakaitamera ni Talairawarawa
Na talairawarawa e sega wale ga nida marau kina ena noda veimaliwai vakavuvale, e levu tale na kena yaga ena noda bula taucoko, e yavu tale ga ni veiwekani bibi duadua, na veiwekani ni tamata kei na nona Dauveibuli. E veiganiti meda talairawarawa vakatabakidua vua na Kalou o Jiova ni o koya a “Buli” keda, “na waivure ni bula.”—Dauvunau 12:1; Same 36:9.
Na vosa “talairawarawa” e volai vakavuqa ena iVolatabu, vaka kina na sala era vakayagataki kina. E vakayagataki vakavica vata na drau me baleta na nona lawa na Kalou, na nona ivakaro, na nona ivunau, na nona lelewa, kei na nona ituvatuva, era dusia na vakarorogo. Oqo e vakaraitaka vakasigalevu ni vinakata na Kalou meda talairawarawa vua me rawa ni vakadonui keda. Na noda saga meda veiwekani kei Jiova, ena vinakati kina na talairawarawa. (1 Samuela 15:22) Ka ni rarawa ni dau itovo ni tamata na talaidredre, sega ni talairawarawa. E kaya na iVolatabu: “Sa dina sa ka ca e nanuma na loma ni tamata mai na gauna sa cauravou kina.” (Vakatekivu 8:21) Oqori na vuna me vulici kina na talairawarawa ena gauna ni gone, me qai tomani tiko ena gauna ni noda bula taucoko. Ke vakayacori oqori ena vakaitamera na kena icocovi.
O se nanuma tiko ni a tukuna na yapositolo o Paula ni basogairua na vosa ni yalayala e tiko ena ivakaro ni talairawarawa vei ira na itubutubu, oya, “mo vinaka kina, ka bula balavu kina e na dela i vuravura.” E vakadeitaki na vosa ni yalayala oqo ena Vosa Vakaibalebale 3:1, 2: “Na luvequ, mo kakua ni guilecava na noqu vunau; ia me muria tiko na noqui vakaro na lomamu: ni na vakaikuritaki kina vei iko na siga e vuqa, kei na bula dede, kei na sautu.” Na nodra icovi vakaitamera na dau talairawarawa oya na nodra veiwekani kei Jiova edaidai kei na bula tawamudu ena vuravura vou ni vakacegu.—Vakatakila 21:3, 4.
[iYaloyalo ena tabana e 30, 31]
Na talairawarawa ena marautaki kina na veimaliwai vakavuvale, veimaliwai ena vanua ni cakacaka, kei na veiwekani kei Jiova