Vukei na Yada nira Sotava na Bula Dredre
E DUA vei ira na italanoa kilai levu duadua me baleti ira na yada e volatukutukutaki ena iVolatabu me baleti Ruci kei na vugona o Neomai. Erau yada ruarua na marama oqo. Ia o Neomai e sega ni mate wale ga o watina, erau mate tale ga na luvena tagane, e dua gona vei rau a wati Ruci. Ni rau bula ena vanua ni teitei era dau vakararavi vakalevu vei ira na tagane, e dredre sara kina na ituvaki erau sotava.—Ruci 1:1-5, 20, 21.
Ia, e dua tiko na itokani vinaka i Neomai e dau vakacegui koya, oya na vugona o Ruci, na vugona a sega ni via biuti koya. Yaco na gauna, me vakadinadinataka o Ruci ni ‘yaga cake vei Neomai, ka yaga vakalailai ke le vitu na luvena tagane’—sega wale ga ni titobu nona lomani Neomai, ia e baleta tale ga na nona lomana na Kalou. (Ruci 4:15) Ni vakatura o Neomai me lesu o Ruci vei ira na wekana kei na nona itokani mai Moapi, me ivakaraitaki ni nona yalodina a sauma lesu kina o Ruci ena dua na vosa e veilauti dina e se bau volatukutukutaki: “Ni’u na lako ki na vanua ko sa lako kina; ia na vanua ko tiko kina ka’u na tiko talega kina: ia na kai nomu era na kai noqu, na nomu Kalou talega ena noqu Kalou: e na vanua ko mate kina, ka’u na mate kina, ka’u na bulu talega kina: me cakacaka vakaoqo vei au ko Jiova, ka vakaikuritaka talega, kevaka sa tawasei kedaru e dua na ka tani, na mate duaduaga.”—Ruci 1:16, 17.
A kauaitaka na ituvaki ni rai i Ruci na Kalou o Jiova. A vakalougatataka na vuvale lailai i Neomai kei Ruci, qai yaco na gauna me rau vakawati o Poasa na Isireli kei Ruci. Na luvedrau, a qai yaco me tubu i Jisu Karisito, a susugi koya o Neomai me vaka sara ga e luvena. Na itukutuku makawa oqo e vakaraitaka ni o Jiova e dau vakamareqeti ira na yada era dau volekati koya, era nuitaki koya tale ga. Kuria oya, na iVolatabu e tukuna vei keda ni dau kauaitaki ira tale ga era dau vukei ira vakayalololoma na yada nira sotava na bula dredre. Eda na vukei ira rawa vakacava na yada era maliwai keda nikua?—Ruci 4:13, 16-22; Same 68:5.
Tukuna Vakadodonu, ia Kua ga ni o Viavia Lewa
Ni o via vukea e dua na yada, ena uasivi me matata qai dodonu na ka o cakava, ia kua ga ni via lewai koya sara. Kua ni wereubiubi na ka o tukuna vua, me vaka beka oqo: “Kevaka o gadreva e dua na ka qai mai tukuna ga vei au.” Oqori e tautauvata vinaka sara ga ena nomu kaya, lai “tatalai ka vakamamautaki” vua e dua e liliwa qai via kana tu, o qai sega ni vukei koya. (Jemesa 2:16) E vuqa era na sega ni kere veivuke nira gadreva e dua na ka, era na kubuta lo voli ga. Me rawa nida vukei ira vaka oqo ena gadrevi gona kina vei keda na lomavuku, meda kila vinaka kina na veika era gadreva. Ena yasana kadua, ke sa sivia tale na noda dau vakaliuliu ni cakava na ka—noda sa via lai lewa na nona bula na yada—e rawa ni vakavurarawa se yaco kina na veileqaleqati. O koya gona, na iVolatabu e vakabibitaka na kena gadrevi meda yalomatua nida veitaratara kei na so tale. Dina ga nida dau vakauqeti meda dau nanumi ira na tamata tani, e tukuna tale ga vei keda meda kua ni via lai lewa nodra ka na tani.—Filipai 2:4; 1 Pita 4:15, VV.
A vakaraitaka o Ruci na rai vakayalomatua vei Neomai. Nona yalodina ena nona kabiti vugona voli, a sega ni togoraki koya o Ruci se via lewai koya. E vukutaka na nona dau vakaliuliu, me vaka na nona lai kauta mai na kedrau kakana, qai muria tale ga na ivakasala i Neomai.—Ruci 2:2, 22, 23; 3:1-6.
E dina ni duidui vakalevu na veika erau gadreva e le rua. O Sandra, sa cavuti oti mai, e kaya: “E tu voleka ga na iwali ni noqu rarawa—era maliwai au o ira na noqu itokani voleka, ra qai dau loloma.” Ena yasana kadua, o Elaine, a sa cavuti oti tale ga, a gadreva me kua ni vakasosataki. O koya gona, ni o via veivuke e kena ibalebale mo lomavuku qai rawa tale ga ni o kila na gauna mo kua ni veivakasosataki kina kei na gauna e gadrevi kina na nomu veivuke.
Veitokoni na Vuvale
Ke tiko e dua na vuvale dauveikauaitaki qai veilomani, ena veivuke sara vakalevu vua na yada ena nodratou dau vakayaloqaqataki koya me vosota tiko ga na veika dredre ena sotava. Dina ga ni na levu cake sara beka na veivuke era na cakava rawa e so na lewenivuvale mai vei ira na kena vo, e se rawa ga nira veivuke kece. “Ke dua na yada e sa vakaluveni se so na makubuna, e dodonu me ra vulica mada e liu na luvena kei na makubuna me ra cakava na nodra i tavi vakalotu ki na nodra vuvale ka sauma lesu na nodra dinau vei ira era susugi ira. Ni sa ka vinaka vua na Kalou.”—1 Timoci 5:4, VV.
Ena vuqa na ituvaki, ena sega ni gadrevi na veivuke e vauca na saumi lesu ni “dinau” ena ilavo qaqa. E so na yada era rawati ira vinaka, e rawa nira qaravi ira ga vakailavo, qai so tale era taura tiko na ilavo musuki ni matanitu o koya e dau tauri ena vuqa na vanua. Ia nira gadreva na yada na veivuke, ena dodonu gona vei ira na lewenivuvale mera veivuke kina. Kevaka e dua na yada e sega na wekana voleka me veivuke se sega ni rawa mera veivuke o ira na wekana, na iVolatabu e uqeti ira na itokani vakabauta mera veivuke: “Na lotu savasava ka sega ni cala e mata ni Kalou ko Tamada sa vakaoqo, Me sa dauraici ira na luveniyali kei ira na yada, ni ra sa rarawa.”—Jemesa 1:27.
O ira era bulataka na ivakavuvuli vakaivolatabu oqo era “dokai ira na yada.” (1 Timoci 5:3, NW) Ni o doka e dua na tamata e kena ibalebale, mo vakaraitaka vua na nomu rokovi koya. Nira dokai na tamata, era kila nira kauaitaki, lomani, ra qai rokovi. Era sega ni raica ni nodra veivuke mai na tani e sa dodonu ga baleta ni nodra itavi. O Ruci, dina ga ni a yada ena dua na gauna lekaleka, a dokai Neomai dina ena nona tu vakarau qai raica tale ga vakayalololoma me vakacegui koya ena veika e gadreva vakayago, me vakaceguya tale ga na lomana. Na rai totoka gona e vakaraitaka o Ruci e kilai tani kina, e rawa tale ga kina vua na tagane a qai mai watina me tukuna vua: “Ra sa kila ko ira kecega na kai noqu mai na koro, ni ko sa yalewa yalododonu.” (Ruci 3:11) Ena gauna vata oqori, na nona lomana na Kalou o Neomai, nona sega ni namaka vakasivia na ka me caka vua, kei na nona vakavinavinakataka vakalevu na veika e cakava vua o Ruci e sega ni vakabekataki ni marautaka kina o Ruci me vukei koya. Sa dua dina na ivakaraitaki vinaka o Neomai vei ira na yada edaidai!
Toro Volekata na Kalou
E dina ni na sega ni dua vei ira na nomu lewenivuvale se nomu itokani ena rawa ni sosomitaki kemu isa ena nona sa mai mate. Oya na vuna e bibi kina vua e lolosi tiko me toro voleka vua na “Tama ni loloma, kei na Kalou ni veivakacegui kecega; o koya sa vakacegui keitou e na neitou rarawa kecega.” (2 Korinica 1:3, 4) Dikeva na ivakaraitaki i Ana, e dua na yada yalodina e yabaki 84 ena gauna a sucu kina o Jisu.
Ena gauna a mate kina na wati Ana ni oti ga e vitu na yabaki na nodrau bula vakawati, a vakararavi vei Jiova me vakacegui koya. “A sa sega ni lako tani e na vale ni soro, a sa daulotu ka lolo ka masu e na siga kei na bogi.” (Luke 2:36, 37) A vakalougatataka beka o Jiova na nona sokalou yalodina o Ana? Io! A vakaraitaka vua na nona loloma ena sala uasivi duadua ena nona a vakavuna me raica o Ana na gone ena qai tubu me nodra iVakabula na kai vuravura. Dua na ka na marau kei na vakacegu i Ana! E matata vinaka ni a vakila o koya na dina ni Same 37:4: “Mo rekitaki Jiova; ena solia vei iko ko koya na ka sa gadreva na yalomu.”
Vakayagataki Ira na Tacida Lotu Vakarisito na Kalou
E kaya o Elaine: “Ena dua na gauna balavu ni oti nona mate o David, a yacovi au e dua na mosi e vaka sara ga e sualaka tiko na suinisarisariqu e dua na isele. Au lai nanuma kina ni mulo na ketequ. Ena dua na siga a ca sara vakalevu au mani nanuma meu lai raici vuniwai. E dua na tacida yalewa vakayalo, e noqu itokani tale ga, a vakatura ni rawa ni vu oqo mai na noqu rarawa qai vakauqeti au meu kerea na veivuke kei na veivakacegui i Jiova. Au a ciqoma na nona ivakasala ena gauna vata ga oya, au a masu lo vei Jiova ena noqu talaucaka vua na lomaqu ena noqu kerea me vakacegui au mai na noqu rarawa. A vakacegui au o koya!” A vakila o Elaine ni sa via vinaka cake mai na nona bula, qai sega ni dede sa vakila tale ga o koya ni sa seavu yani vakamalua na mosi oya.
O ira mada ga na qase ni ivavakoso era rawa ni itokani voleka vei ira na yada era sotava voli na rarawa. Ena nodra dau tokoni ira ena veika vakayalo ra qai vakacegui ira ena sala veiganiti qai vukutaki, e rawa kina vei ira na qase mera vukei ira na yada mera kabiti Jiova voleka tiko ga e dina nira na sotava na bula dredre. Kevaka ena gadrevi, ena rawa tale ga vei ira na qase mera tuvanaka na nodra vukei vakayago. O ira na qase yalololoma qai lomavuku vaka oqo era vaka dina “nai vunivuni mai na cagi.”—Aisea 32:2; Cakacaka 6:1-3.
Veivakacegui Tawamudu na Tui Vou ni Vuravura
O koya a raica ena marau na kena marama o Ana ena ruanaudolu vakacaca na yabaki sa oti, e sa Tui Vakamesaia tu ni Matanitu vakalomalagi ni Kalou ena gauna oqo. Na matanitu oqo ena vakawabokotaka vakadua na veika e vakavuna na rarawa, wili kina na mate. Ena tikina oqo, e kaya kina na Vakatakila 21:3, 4: “Raica, a vale ni Kalou sa tu vei ira na tamata . . . Ia na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.” O dikeva rawa beka ni tikina oqo e cavuti ira tiko na “tamata”? Io, era na sereki na kawatamata mai na ivau ni mate kei na rarawa kece kei na tagi e dau vakavurea mai.
Ia e so tale tiko na itukutuku vinaka! Na iVolatabu e yalataka tale ga na nodra vakaturi na mate. “Sa lako mai na gauna era na rogoca kina na domona [domo i Jisu] ko ira kecega e nai bulubulu, a ra na lako maikina.” (Joni 5:28, 29) Me vakataki Lasarusa, a vakaturi koya mai na mate o Jisu, era na tucake mai me vaka ga na tamata, sega nira na vaka na kabula vakayalo. (Joni 11:43, 44) O ira era na ‘ivalavala vinaka’ era na yaco mera tamata bula uasivi ra qai sotava sara ga na nona veikauaitaki vakatama yalololoma o Jiova ena nona na ‘dedeka na ligana ka vakamamautaka na kabula kece ga ena ka era gadreva.’—Same 145:16.
O ira sa mate e dua na wekadra voleka ra qai vakabauta na inuinui dei oqo era kunea dina na veivakacegui. (1 Cesalonaika 4:13) O koya gona ke o yada, mo dau “masu tikoga ka kua ni mudu” ni o kerea na veivakacegui kei na veivuke o na gadreva e veisiga mo vosota rawa kina na veika dredre o dau sotava. (1 Cesalonaika 5:17; 1 Pita 5:7) Tikica na gauna mo wilika kina na Vosa ni Kalou ena veisiga me rawa ni vakacegui iko na vakasama ni Kalou. Kevaka o cakava na veika kece oqo, dina ga ni o na sotava na bula dredre kei na so tale na ka ni bolebole me vaka ni o yada, o na vakila sara ga ni na vukei iko o Jiova mo kunea na vakacegu.
[Tikina bibi ena tabana e 5]
Ni o via veivuke e kena ibalebale mo kila na gauna mo kua ni veivakasosataki kina kei na gauna e gadrevi kina na nomu veivuke
[iYaloyalo ena tabana e 7]
Na Kalou a vakalougatataki Ana, na yada sa kena marama