Vakacaucautaki Jiova ena Vuku ni Nona Cakacaka Lelevu!

“Sa vakalagilagia na Turaga na yaloqu, . . . ni sa cakava vei au na veika lelevu ko koya sa qaqa.”​—⁠LUKE 1:​46-​49, VV.

1. Na cakacaka lelevu cava sa dodonu ga kina meda vakacaucautaki Jiova?

SA DODONU ga me vakacaucautaki o Jiova ena vuku ni nona cakacaka lelevu. E kaya na parofita o Mosese ni taleva na nodra vakabulai mai Ijipita na Isireli: “Na matamuni sa raica na cakacaka levu kecega i Jiova.” (Vakarua 11:​1-7) Na vosa oqo e via vaka ga na vosa e cavuta na goneyalewa savasava o Meri, ni sa vakarogoya vua na sucu i Jisu na agilosi o Keperieli: “Sa vakalagilagia na Turaga na yaloqu, . . . ni sa cakava vei au na veika lelevu ko koya sa qaqa.” (Luke 1:​46-​49, VV) Nida iVakadinadina i Jiova, eda vakalagilagi koya ena veika lelevu e vakayacora me vaka na nona sereki ira na Isireli mai Ijipita kei na nona vakavuna na sucu veivakurabuitaki i koya na Luvena lomani.

2. (a) Na cava e vauci ena “i naki tawa mudu” ni Kalou me baleti ira na tamata talairawarawa? (b) Na cava e sotava o Joni ena yanuyanu o Patimo?

² Vuqa na cakacaka lelevu i Jiova e vauci vata kei na nona “i naki tawa mudu” me vakalougatataki ira na tamata talairawarawa, oqo ena nona vakayagataki koya na Mesaia kei na nona Matanitu. (Efeso 3:​8-​13, VV) Sa bucini tiko na inaki oya ena gauna a vakatarai kina vua na yapositolo sa kena turaga o Joni me iro yani i lomalagi ena katuba vakaivakatayaloyalo e dolavi tu. A rogoca na domo e vaka na rorogo ni davui ni kaya vua: “Lako cake mai kike, au na vakatakila vei iko na ka ena yaco e na gauna maimuri.” (Vakatakila 4:⁠1) Ni mai vesuki Joni toka ena yanuyanu o Patimo na matanitu o Roma, ni a vunautaka na “vosa ni Kalou, kei nai tukutuku i Jisu,” sa qai soli vua na “Vakatakila kei Jisu Karisito.” Levu sara na ka e vakavotui me baleta na inaki tawamudu ni Kalou mai na ka e raica kei na ka e rogoca na yapositolo, ena sala oqo, era vakararamataki kina vakayalo o ira kece na lotu Vakarisito dina, ra vakayaloqaqataki tale ga ena kena gauna donu.​—⁠Vakatakila 1:​1, 9, 10.

3. Eratou vakatakarakarataki cei na le 24 na qase e raivotutaki iratou o Joni?

³ Ena katuba kei lomalagi e tadola tu oya, e raica kina o Joni e 24 na qase ni ratou vakatikori vakatui ratou qai vakaisalataki ena isala vakatui. Eratou cuva sobu e mata ni Kalou ratou qai kaya: “Kemuni na neitou Turaga kei na neitou Kalou, sa dodonu me ia vei kemuni na vakarokoroko kei na veidokadokai, kei na kaukauwa: ni sai kemuni ka bulia na ka kecega, era sa buli ga ka tu dei talega e na nomuni lewa.” (Vakatakila 4:​11) O iratou na qase oya eratou vakatakarakarataki ira kece na lotu Vakarisito lumuti era sa vakaturi oti ina itutu cecere e yalataka vei ira na Kalou. Era via vakacaucautaki Jiova baleta na veika lelevu e bulia. O keda tale ga eda qoroya na ivakadinadina ni “nona kaukauwa tawamudu kei na nona tu Vakalou” o Jiova. (Roma 1:​20) Na levu ga ni noda vulica na veika e baleti Jiova, na levu tale ga ni noda via vakalagilagi koya ena vuku ni nona cakacaka lelevu.

Kacivaka na Cakacaka Lagilagi i Jiova!

4, 5. Cavuta e so na ivakaraitaki ni veivakacaucautaki i Tevita vei Jiova.

⁴ E vakacaucautaka na Kalou na daunisame o Tevita me baleta na nona cakacaka lelevu. Me kena ivakaraitaki, e seretaka o Tevita: “Dou sere vei Jiova, vei koya sa tiko mai Saioni: tukuna vei ira na tamata na nona cakacaka. I Jiova, mo ni yalololoma mai vei au; mo ni raica na ka rarawa sa yaco vei au maivei ira era sa cati au, oi kemuni ka kauti au cake mai na matamata-ni-koro ni mate: me’u tukuna kina na ka kecega ko ni sa vakacaucautaki kina e na matamata-ni-koro ni goneyalewa ni Saioni.” (Same 9:​11, 13, 14) Ni sa vakamacalataka oti o Tevita vua na luvena o Solomoni na peleni ni valenisoro, sa qai tauca vua na Kalou na vosa ni veivakalagilagi kei na veivakacaucautaki e vaka: “I Jiova, ko ni sa cecere, sa nomuni ga na kaukauwa, kei na lagilagi, kei na gumatua, kei na ka vakaturaga . . . sa nomuni na matanitu, kemuni Jiova, ia ko ni sa cecere cake me ulu ni ka kecega. . . . Ia oqo, na neimami Kalou, keimami sa vakavinavinaka vei kemuni, ka seretaka na yacamuni sa vakarokorokotaki.”​—⁠1 Veigauna 29:​10-​13.

⁵ E sureti keda vakavuqa na iVolatabu​—⁠io e uqeti keda​—⁠meda vakacaucautaka na Kalou me vakataki Tevita ga. E levu na Same era sere ni veivakacaucautaki vua na Kalou qai veimama vei ira oqori e bulia o Tevita. Sega ni cegu o koya ni tauca vei Jiova na veivakacaucautaki kei na vakavinavinaka. (Same 69:30) Mai liu sara, sa dau taurivaki tale ga na sere uqeti vakalou i Tevita kei na so tale me vakacaucautaki kina o Jiova.

6. E yaga vakacava vei keda na Same uqeti vakalou?

⁶ Sa yaga dina na ivola ni Same vei ira na sokaloutaki Jiova! Nida via vakavinavinakataka na Kalou me baleta na nona cakacaka lelevu ena vukuda, de vinaka meda vakasamataka na vosa rogo vinaka dina era kune ena Same. De dua, nida yadra cake mai ena dua na siga vou, eda na via tauca na vakavinavinaka e vaka oqo: “A ka vinaka me ia na vakamolimoli vei Jiova, ka me serevaka na vakavinavinaka ki na yacamuni, oi kemuni sa Cecere sara: me dautukuna na nomuni yalololoma e na mataka, kei na nomuni lomadina e na veibogi, . . . ni kemuni sa vakamarautaki au, Jiova, e na nomuni cakacaka: au na rekitaka na cakacaka ni ligamuni.” (Same 92:​1-4) Nida walia e dua na ka dredre e vaka me vakataotaka na noda toso vakayalo, de dua, eda na via vakaraitaka ena masu na noda reki kei na noda vakavinavinaka, me vakataki koya ga na daunisame ni a seretaka: “Tou mai sere vei Jiova; tou mai ia na meke vua na uluvatu ni noda bula. Tou lako mada vua ni da vakavinavinaka, ka reki ni da mai ia vua na same.”​—⁠Same 95:​1, 2.

7. (a) Na cava e laurai me baleta e levu na sere era lagata na lotu Vakarisito? (b) Na cava e dua na vuna vinaka meda dau totolo yani kina ina soqoni da qai tiko tale ga ni cava?

⁷ Eda dau vakacaucautaki Jiova ena sere ena soqoni vakaivavakoso, soqo ni tabacakacaka, kei na soqo ni tikina. Levu ga na sere oqori era yavutaki ena vakasama uqeti vakalou era kune ena ivola ni Same. Eda marautaka dina ni levu sara tu vei keda nikua na sere ni veivakacaucautaki vei Jiova e veiuqeti na noda lagata! Dua gona na vuna vinaka meda dau totolo yani kina ina soqoni da qai tiko tale ga ni cava, oya meda vakaitavi kei ira eda sokalou vata ena lagasere kei na masu​—⁠e rua na ka ena vakacaucautaki kina o Jiova.

“Ni Vakacaucautaki Ja!”

8. Na cava na ibalebale ni vosa “Aleluja”?

⁸ Na vosa, “Aleluja,” e kau mai na vosa vakaiperiu e kena ibalebale “Ni vakacaucautaki Ja.” Me kena ivakaraitaki, eda kunea ena Same 135:​1-3 (NW) na veisureti oqo: “Ni vakacaucautaki Ja! Vakacaucautaka na yaca i Jiova, ni vakacaucautaki Jiova o kemuni na nona tamata, oni tucake tu ena vale i Jiova, ena lomanibai ni nona vale na noda Kalou. Vakacaucautaki Ja, ni sa vinaka o Jiova. Ni seretaka na yacana, ni sa ka lagilagi.”

9. Ena vuku ni cava eda na via vakacaucautaki Jiova kina?

⁹ Nida vakananuma na cakacaka lagilagi ni Kalou ena veika e bulia kei na nona cakacaka kece ena vukuda, eda na via vakacaucautaki koya mai vu ni lomada ena levu ni noda vakavinavinaka. Eda na via vakalagilagi Jiova ga nida vakananuma na ka veivakurabuitaki a vakayacora vei ira na nona tamata ena veigauna sa sivi. Nida vakasamataka tale ga na veika uasivi sa yalataka tu o Jiova me na cakava ena gauna se bera mai, eda na qara e so na sala meda vakavinavinaka kina vua da qai vakacaucautaki koya.

10, 11. Nida bula tiko, na cava e so na ka meda vakavinavinaka kina vua na Kalou?

¹⁰ Sa dodonu ga meda vakacaucautaki Ja ena vuku ni bula eda marautaka tu oqo. A seretaka o Tevita: “Au na vakavinavinaka vei kemuni [Jiova]; ni sa ka rerevaki ka vakurabui na noqui bulibuli: a ka veivakurabuitaki na nomuni cakacaka: a ka oqo sa kila vakavinaka na yaloqu.” (Same 139:14) Io, e ‘veivakurabuitaki na noda buli,’ ni rawa vei keda meda rai, rogo, da qai vakasama. Ni vaka tu oqo na ka eda rawata, sa dodonu ga meda muria na ivakarau ni bula ena vakacaucautaki kina o koya e buli keda, se vakaevei? E via vakatale ga oya na ka e kaya o Paula ni a vola: “Se dou kana, se dou gunu, se cava na ka dou sa kitaka, mo dou kitaka kecega me vakarokorokotaki kina na Kalou.”​—⁠1 Korinica 10:⁠31.

¹¹ Kevaka eda lomani Jiova dina, eda na via cakava na ka kece ga me vakarokorokotaki kina o koya. E kaya o Jisu ni imatai ni ivakaro oqo: “Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kece, kei na nomu kaukauwa kece.” (Marika 12:30; Vakarua 6:⁠5) Ni a buli keda o Jiova qai dau solia “nai solisoli vinaka kecega kei nai solisoli kecega e yaga sara,” sa dodonu ga meda lomani koya kina da qai vakacaucautaki koya. (Jemesa 1:​17; Aisea 51:13; Cakacaka 17:28) Me cava tale, ni vu ga mai vei Jiova na noda vakasama, noda bula vakayalo, kei na noda kaukaua vakayago​—⁠na noda ivalavala vinaka kece kei na veika eda rawata. Ni buli keda, sa dodonu ga meda lomani koya da qai vakacaucautaki koya.

12. Na cava o nanuma me baleta na cakacaka lelevu i Jiova kei na veika e cavuti ena Same 40:⁠5?

¹² E levu sara na vuna meda lomani Jiova da qai vakacaucautaki koya ena vuku ni nona cakacaka lelevu! E seretaka o Tevita: “I Jiova na noqu Kalou, sa ka levu na nomuni cakacaka e veivakurabuitaki ko ni sa cakava, kei na nomuni nanuma vei keimami: e dredre me wiliki vakadodonu vei kemuni: kevaka ka’u via vakatusa ka tukuna, e dredre ni wili.” (Same 40:⁠5) E sega ni wilika rawa o Tevita na cakacaka veivakurabuitaki kece i Jiova, o keda tale ga eda sega ni rawata. Ia, de vinaka meda vakacaucautaka na Kalou ena veigauna kece eda vakasamataka kina na nona cakacaka lelevu.

Rau Semai Vata na Cakacaka ni Kalou Kei na Nona iNaki Tawamudu

13. Erau lakolako vata vakacava na noda inuinui kei na cakacaka lelevu ni Kalou?

¹³ Na noda inuinui me baleta na veigauna mai muri e lakolako vata kei na cakacaka lelevu kei na cakacaka lagilagi e semai vata kei na inaki tawamudu ni Kalou. Oti na veivorati mai Iteni, e cavuta o Jiova na imatai ni parofisai e yavu ni vakanuinui vinaka. Ni tauca na Kalou na kena itotogi na gata, sa qai kaya: “Ka’u na vakaveimecakitaki kemudrau kei na yalewa, kei na nomu kawa kei na nona kawa, ena butuqaqia na ulumu ko koya, ia ko na qaqia na bukubukuni-yavana.” (Vakatekivu 3:​15) A dei tiko ga ena lomadra na tamata yalodina na inuinui me baleti koya na Kawa yalataki ni yalewa ni sa oti na cakacaka levu ni Kalou ena nona vakabulai Noa kei iratou nona vuvale ena Waluvu levu era rusa kina na tamata ca. (2 Pita 2:⁠5) Levu tale na ka e qai macala me baleta na ka ena vakayacora o Jiova ni vakayagataki koya na Kawa yalataki ena yalayala vakaparofisai a cavuti vei ira na tamata vakabauta vakataki Eparama kei Tevita.​—⁠Vakatekivu 22:​15-​18; 2 Samuela 7:​12.

14. Na cava na cakacaka levu i Jiova e rui vakasakiti e vakayacori ena vukudra na kawatamata?

¹⁴ Ena sala e rui vakasakiti, e vakaraitaki koya o Jiova ni dau vakayacora na cakacaka lelevu ena vukudra na tamata, ena nona solia mai me isoro ni veivoli na Luvena duabau ga sa vakatubura​—⁠na Kawa yalataki, o Jisu Karisito. (Joni 3:​16; Cakacaka 2:​29-​36) E yavu ni veivinakati tale kei na Kalou na ivoli. (Maciu 20:28; Roma 5:​11) Na imatai ni ilawalawa era veivinakati tale kei Jiova e kauti ira mai ina ivavakoso vakarisito e tauyavu ena Penitiko 33 S.K. Ni tokoni ira na yalo tabu, era vunautaka yani e veivanua kece na itukutuku vinaka, ra qai vakamacalataka ni Matanitu vakalomalagi ni Kalou ena vakalougatataki ira na kawatamata talairawarawa me sega ni mudu, qai rawa ga oqo ena mate kei na vakaturi i Jisu.

15. E veivakurabuitaki vakacava na cakacaka i Jiova ena noda gauna oqo?

¹⁵ E veivakurabuitaki tale ga na yavala i Jiova ena noda gauna oqo me vakasoqoni ira na iotioti ni lotu Vakarisito lumuti. Se tarovi tu na cagi ni veivakarusai mera se tei dregati mada na vo ni 144,000, era na veiliutaki kei Karisito mai lomalagi. (Vakatakila 7:​1-4; 20:⁠6) A vakaitavi sara ga na Kalou ena nodra vakabulai na lotu Vakarisito lumuti mai na nodra vakabobulataki tu vakayalo vei “Papiloni na Ka Levu,” na isoqosoqo ni lotu lasu kece kei vuravura. (Vakatakila 17:​1-5) Nodra vakabulai oya na vo ni lumuti ena 1919 kei na nodra taqomaki tiko ga vakalou mai na gauna oya me yacova mai oqo, e tosoi ira mera vakayacora na cava? Mera cila tiko ga yani ena iotioti ni vakadinadina ni se bera ni vakarusa o Jiova na ivakarau ni veika ca i Setani ena “veivakararawataki levu” sa toro totolo sara tiko mai.​—⁠Maciu 24:21; Taniela 12:3; Vakatakila 7:​14.

16. Na cava sa yaco tiko ena vuku ni cakacaka vakavunau e vakayacori voli edaidai e vuravura taucoko?

¹⁶ Era liutaka sara ga ena yalogu na iVakadinadina lumuti i Jiova na vunautaki ni Matanitu ni Kalou e vuravura taucoko. Ena vuku ni nodra cakacaka, sa tubu tiko ga na kedra iwiliwili na ‘so tani tale na sipi’ mera mai sokaloutaki Jiova. (Joni 10:16) Eda reki ni se dola tu ga na katuba vei ira kece na yalomalumalumu kei vuravura mera mai tomani keda ena noda vakacaucautaki Jiova. O ira na ciqoma na veisureti “lako mai,” era na vakadonui mera vakabulai ena veivakararawataki levu, qai rawa nira nuitaka mera vakacaucautaki Jiova me sega ni mudu.​—⁠Vakatakila 22:⁠17.

Ra Tabili Ina Sokalou Dina e Vica Vata na Udolu

17. (a) Sa vakayacora tiko vakacava o Jiova na cakacaka lelevu ena ka e baleta na noda cakacaka vakavunau? (b) Sa vakayacori tiko vakacava na Sakaraia 8:​23?

¹⁷ Ena ka e baleta na noda cakacaka vakavunau, sa vakayacora tiko kina nikua o Jiova na cakacaka e levu qai lagilagi. (Marika 13:10) Ena veiyabaki se qai sivi toka ga oqo, sa ‘dolava o koya na katuba levu ni cakacaka.’ (1 Korinica 16:⁠9) Mai rawa ni vunautaki kina na itukutuku vinaka ena veivanua era dau veitusaqati kina e liu o ira na meca ni ka dina. Era sa ciqoma tiko na veisureti mera mai sokaloutaki Jiova e levu era tu e liu ena butobuto vakayalo. E laurai ni sa dina tiko vei ira na parofisai oqo: “Sa kaya vakaoqo ko Jiova ni lewe vuqa; E na gauna ko ya, era na mai taura na tutu ni nonai sulu e dua na Jiu, e lewe tini na tamata era duivosavosa mai na veivanua kecega, ka kaya, Keitou na lako vata kei kemudou: ni keitou sa rogoca sa tiko vata kei kemudou na Kalou.” (Sakaraia 8:​23) O iratou na “lewe tini na tamata” eratou vosa tiko vei ira na Jiu vakayalo, se o ira na vo ni lumuti lotu Vakarisito edaidai. Na iwiliwili na tini e dau vakatakarakarataka na taucoko ni ka e vuravura, o koya gona, “na lewe tini na tamata” e dusi ira “nai soqosoqo levu” era mai vakaduavatataki kei ira “na Isireli ni Kalou,” mera ‘duabau ga kina na qelenisipi.’ (Vakatakila 7:​9, 10; Kalatia 6:​16) Sa dua na ka rekitaki nida raica e levu nikua era duavata ena nodra mai sokaloutaka na Kalou o Jiova!

18, 19. E laurai vakacava ni vakalougatataka tiko o Jiova na cakacaka vakavunau?

¹⁸ Eda marau vakalevu nida raica nira sa mai sokalou dina e vica vata na udolu​—⁠io, e drau vakaudolu​—⁠ena veivanua a nanumi tu ni na sega ni ciqomi rawa kina na itukutuku vinaka ena vuku ni lotu lasu. Raica mada na Yearbook of Jehovah’s Witnesses ni yabaki oqo, raica kina na vanua sa yacova na 100,000 se volekata na 1,000,000 na kedra iwiliwili na dautukutuku. Na ivakadinadina levu oqori ni vakalougatataka tiko o Jiova na cakacaka vakavunau.​—⁠Vosa Vakaibalebale 10:⁠22.

¹⁹ Nida tamata i Jiova, eda vakacaucautaka da vakavinavinakataka na Tamada vakalomalagi ni sa mai vakainaki na noda bula, ni vakarautaka vei keda na cakacaka e yaga dina, kei na veika totoka meda vakanuinui kina. Me gu mada ga na yaloda meda via raica ni sa vakayacori na ka kece e yalataka na Kalou, meda vakadeitaka tale ga e lomada meda ‘maroroi keda meda tu ga e na loloma ni Kalou kei na noda nuitaka na bula tawamudu.’ (Juta 20, 21) Eda reki dina nida raica ni sa rauta na 6,000,000 na kedra iwiliwili na isoqosoqo levu era vakacaucautaka tiko na Kalou! Kena irairai ni o Jiova e vakalougatataki ira na vo ni lumuti kei na nodra itokani so tani tale na sipi, era tuvai vinaka tu ena rauta na 91,000 na ivavakoso ena 235 na vanua. Eda vakani vinaka vakayalo ena sasaga levu i koya na “dauveiqaravi yalo dina ka vuku.” (Maciu 24:​45, VV) E cicivaka tiko na cakacaka e vauca na Matanitu ni Kalou ena 110 na valenitabana ni iVakadinadina i Jiova e dua na isoqosoqo liutaki vakalou e toso tiko ga i liu, era liutaka o ira na ivakatawa dau loloma. Eda vakavinavinaka ni o Jiova e uqeta na lomadra na nona tamata mera ‘dokai koya ena nodra iyau.’ (Vosa Vakaibalebale 3:​9, 10) Ena vuku ni tikina oqo, e toso tiko kina e veiyasa i vuravura na noda cakacaka vakavunau, ra qai taravaki, me salavata kei na ka e vinakati, na valenitabaivola, na Peceli kei na nodra itikotiko na kaulotu, na Kingdom Hall kei na Assembly Hall.

20. Nida vakananuma na cakacaka lelevu lagilagi i Jiova, me tarai keda vakacava oqori?

²⁰ Ena sega ni rawa meda cavuta kece na veicakacaka lelevu lagilagi i koya na Tamada vakalomalagi. Ia sa macala tu ga ni tamata yalododonu kece era na via veitomani kei ira na ilawalawa levu era vakacaucautaki Jiova tiko, se vakaevei? O koya gona mera kailavaka ena reki o ira kece era lomana na Kalou na vosa oqo: “Dou ia vei Jiova na vakavinavinaka. Dou vakavinavinaka vei Jiova mai lomalagi: dou vakavinavinaka vua mai na vanua cecere. Dou vakavinavinaka vua, na nona agilosi kece . . . , na cauravou, kei na goneyalewa; na tamata qase, kei na gone: me ra ia na vakavinavinaka ki na yaca i Jiova: ni sa ka talei duaduaga na yacana; sa sivia na vuravura kei na lomalagi na nona lagilagi.” (Same 148:​1, 2, 12, 13) Io, ena gauna oqo me tawamudu, meda vakacaucautaki Jiova ena vuku ni nona cakacaka lelevu!

O na Sauma Vakacava?

• Na cava e so na cakacaka lagilagi i Jiova?

• Na cava o via vakacaucautaki Jiova kina?

• Erau lakolako vata vakacava na noda inuinui kei na cakacaka lelevu ni Kalou?

• Sa vakayacora tiko vakacava o Jiova na cakacaka lagilagi ena ka e baleta na vunautaki ni nona Matanitu?

[iYaloyalo ena tabana e 10]

O dau lagasere mai vu ni lomamu mo vakacaucautaki Jiova kina?

[iYaloyalo ena tabana e 13]

Eda reki ni se dola tu ga na katuba vei ira na yalomalumalumu mera mai tomani keda ena noda vakacaucautaki Jiova