Ra iTabagone, Ni Vakacaucautaki Jiova!

“Dou vakacaucautaki Jiova mai vuravura, . . . na cauravou, kei na goneyalewa.”​—⁠SAME 148:​7, 12, NW.

1, 2. (a) Na vakatatabu cava soti era kila vinaka tu e levu na itabagone? (b) Cava mera kua kina ni cata na itabagone na vakatatabu era kotora na itubutubu vei ira?

ERA kila vinaka tu na itabagone na veika e se sega ni vakatarai mera cakava. Levu vei ira sara mada ga na gone era na rawa ni tukuna vei iko na yabaki ni bula mera yacova me qai vakatarai vei ira na takoso taudua e gaunisala, draivataka e dua na motoka, se lewa ga na gauna ni nodra moce. Rairai ena so na gauna, e sa na kila tu ga o itabagone na isau ni levu na ka e kerea me cakava, “Sega, o se gone.”

² Oni kila na itabagone nira raica na nomuni itubutubu ni ka vakavuku me kotori e so na vakatatabu vaka oqori, e sega ni vakabekataki mo ni taqomaki ga kina. E macala ni marautaka o Jiova na nomuni talairawarawa vei ira na nomuni itubutubu. (Kolosa 3:​20) Ia, ni levu na vakatatabu e kotori, o nanuma beka ni vaka e vesuki tu na nomu bula, o sega ni galala mo cakava na lomamu? Ena tabu tu beka na veika kece e bibi me yacova sara ni o sa tamatabula? Sega! Sa vakayacori tiko nikua e dua na cakacaka e bibi sara mai na kena o se rairai waraka tiko. Oni vakatarai beka na itabagone mo ni vakaitavi ena cakacaka oqo? E sega wale ga ni tara vei kemuni​—⁠e sureti kemuni sara ga na Kalou Cecere Duadua mo ni vakaitavi kina!

3. Na itavi dokai cava e sureti ira tiko kina na itabagone o Jiova? Na taro cava soti eda na vakarau dikeva?

³ Na cakacaka cava eda veivosakitaka tiko e ke? Dikeva mada na veivosa ni tikinivolatabu e yavutaki kina na ulutaga oqo: “Dou vakacaucautaki Jiova mai vuravura, . . . na cauravou, kei na goneyalewa, na tamata qase, kei na gone.” (Same 148:​7, 12, NW) Oqori sara ga na itavi dokai mo cakava, mo vakacaucautaki Jiova. Ni o itabagone, o marautaka beka mo vakaitavi ena cakacaka oqo? Levu era marautaka. Me kilai na vuna e vinaka cake kina mo marautaka na itavi oqo, da dikeva mada e tolu na taro. Kena imatai, na cava mo vakacaucautaki Jiova kina? iKarua, na sala vinaka duadua cava o rawa ni vakacaucautaki koya kina? iKatolu, na gauna vinaka cava mo tekivu vakacaucautaki Jiova kina?

Cava Mo Vakacaucautaki Jiova Kina?

4, 5. (a) Me vaka e tukuna na ika148 ni Same, na ituvaki totoka cava eda tu kina? (b) Ena sala cava era se vakacaucautaki Jiova tiko ga kina na veika buli era galu ra sega tale ga ni vakasama?

⁴ Dua na vuna levu me vakacaucautaki kina o Jiova oya ni Dauveibuli. E uqeti keda na ika148 ni Same meda taura vakabibi na ka dina oqo. Vakasamataka mada: Ena tarai iko vakacava ke o donuya yani e dua na ilawalawa levu era lagata tiko ena domovata e dua na sere totoka qai veiuqeti? Vakacava ke o kila ni dina kece na qaqana, qai vakavotuya na vakasama o kila ni bibi, e marautaki qai veitaraicake? Sega li ni o na vinakata mo vulica na qaqana mo qai veitomani ena kena lagati? Levu vei keda eda na cakava oqori. Na ika148 ni Same e vakaraitaka nida tu ena dua na ituvaki e via tautauvata kei na ilawalawa era lagasere tiko oya ena domovata, ia na kena oqo e totoka cake sara. Na same oqori e vakamacalataka e dua na ilawalawa vakaitamera era vakacaucautaki Jiova kece tiko ena domovata. Ni o wilika o na rairai raica e dua na ka e duatani sara. Na cava beka oya?

⁵ Levu vei ira na veivakacaucautaki e vakamacalataki ena Same 148 era galu, ra sega tale ga ni vakasama. Kena ivakaraitaki, eda wilika ni vakacaucautaki Jiova na matanisiga, na vula, na kalokalo, na ucacevata, na cagi, na ulunivanua, kei na veidelana. E rawa vakacava mera vakacaucautaki Jiova na veika buli era galu? (Tikina e 3, 8, 9) Ra vakacaucautaki koya tale ga na kau, na veika bula ena wai titobu, kei na manumanu. (Tikina e 7, 9, 10) O sa bau sarava na totoka ni dromunisiga, se dagava cake na vula serau e ciri malua tu ena maliwa ni veikalokalo e lomalagi, se nomu dredrevaka ni lasa vei iko na nodra veiqitori na manumanu, se na kena vakatubuqoroqoro vei iko na irairai totoka ni so na vanua? O sa “rogoca” sara tiko ga na nodra sere ni veivakacaucautaki na veika buli. Eda kila mai na veika kece e bulia o Jiova ni o koya ga na Dauveibuli kaukaua, e sega tale ni dua e lomalagi se e vuravura me vakatauvatani kei koya ena kaukaua, vuku, se yalololoma.​—⁠Roma 1:​20; Vakatakila 4:​11.

6, 7. (a) Na ibulibuli cecere cava e vakamacalataka na ika148 ni Same nira vakacaucautaki Jiova? (b) Na cava e rawa ni na uqeti keda meda vakacaucautaki Jiova? Vakamacalataka.

⁶ E vakamacalataka tale ga na ika148 ni Same na nodra vakacaucautaki Jiova na veika buli cecere. E tukuni gona ena tikina e 2 nira vakacaucautaka tiko na Kalou na ‘mataivalu’ i Jiova, oya o ira na agilosi. Ena tikina e  11, era sureti na tamata rogo qai kaukaua kei vuravura, me vakataki ira na tui kei ira na turaganilewa mera mai vakacaucautaki Jiova tale ga. Ke ra sa marautaka na agilosi cecere mera vakacaucautaki Jiova, o cei o keda meda nanuma ni sega ni ganiti keda meda cakava oqori? Koya gona, ena tikina e 12 kei na 13, oni sureti na itabagone mo ni mai veitomani, mo ni vakacaucautaki Jiova tale ga. O sega beka ni uqeti mo via cakava oya?

⁷ Vakasamataka mada e dua na kena ivakaraitaki oqo. Ke dua na nomu itokani voleka e kenadau ena dua na ka​—⁠rairai ena qito, cakacakaniliga, se ivakatagi​—⁠o na sega li ni dau tukuna vei iratou nomu vuvale kei ira na nomu itokani tale e so? Macala ni o na dau tukuna. O keda tale ga nida sa mai vulica na veika e cakava ena vukuda o Jiova, ena uqeti keda oqori meda dau tukuni koya. Kena ivakaraitaki, na Same 19:​1, 2 e kaya, ni veikalokalo e lomalagi ena vakavuna meda “dautukuna na vosa.” Eda na sega gona ni kinoca rawa na noda tukuna yani na veika vakatubuqoroqoro sa cakava oti o Jiova.

8, 9. Cava soti na vuna e vinakata kina o Jiova meda vakacaucautaki koya?

⁸ Dua tale na vuna vinaka me vakacaucautaki kina o Jiova, oya ni vinakata sara ga o koya meda cakava oqori. Baleta? E gadreva beka o koya na noda veivakacaucautaki? Sega. Rairai o keda ga na tamata eda na gadreva na veivakacaucautaki ena so na gauna, ia e sega ni gadreva o Jiova ni cecere sara na nona vakanananu. (Aisea 55:⁠8) E sega ni dua na ka e lekata o koya, qai kila vinaka tale ga na nona itutu. (Aisea 45:⁠5) Ia, e vinakata meda vakacaucautaki koya, qai marau nida cakava oya. Cava na vuna? Meda dikeva mada e rua na vuna. Kena imatai, e kila o Jiova ni na vinakati meda vakacaucautaki koya. A buli keda ga meda gadreva na veika vakayalo, na gagadre ni qaravi Kalou. (Maciu 5:​3, NW) E marau gona o Jiova ni raica nida vakaceguya na gagadre vakayalo oya, e vaka sara ga na nodrau marau na nomu itubutubu ni rau raica nomu kania na kakana bulabula erau kila ni vinaka vei iko.​—⁠Joni 4:​34.

⁹ Kena ikarua, e kila o Jiova ni dodonu mera rogoci keda na tani nida vakacaucautaki koya tiko. Na yapositolo o Paula e vola na veivosa oqo vua na cauravou o Timoci: “Vakaraici iko vinaka, kei nai vakavuvuli; tu dei kina: ni ko sa kitaka vakaoqo ko na vakabulai iko, kei ira talega era sa rogoci iko.” (1 Timoci 4:​16) Io, ni o vakatavulica na veika e baleta na Kalou o Jiova, o qai vakacaucautaki koya tiko vei ira na tani, de dua era na mai qaravi Jiova tale ga. Ni kilaka oqori era na rawata kina na bula tawamudu!​—⁠Joni 17:⁠3.

10. Na cava eda na via vakacaucautaka kina na noda Kalou?

¹⁰ Ia e tiko e dua tale na vuna me vakacaucautaki kina o Jiova. Vakasamataka tale mada na ivakaraitaki me baleta na nomu itokani e kenadau ena dua na ka. Vakacava ke o rogoca ni so era tukuna na veika lasu me baleti koya, ra vosa vakacacataka na yacana, e sega beka ni sa na qai gu ga na lomamu mo vakacaucautaki koya? Ena vuravura nikua e vosa vakacacataki sara kina vakalevu o Jiova. (Joni 8:​44; Vakatakila 12:⁠9) O ira gona na lomani Jiova, era na via tukuna sara ga na ka dina me baleti koya, mera vakadodonutaka na itukutuku lasu. O na vinakata beka mo vakaraitaka tale ga na nomu loloma kei na nomu vakavinavinaka vei Jiova, vaka kina nomu vinakati koya me nomu iLiuliu, sega ni o Setani na nona meca levu? Rawa ni o cakava oqori ke o vakacaucautaki Jiova. Na taro gona e tarava, na sala vinaka duadua cava o rawa ni vakacaucautaki koya kina?

Sala Era Vakacaucautaki Jiova Kina e So na iTabagone

11. Na ivakaraitaki cava soti ena iVolatabu e dusia ni na rawa ni laulau nodra vakacaucautaki Jiova na gone?

¹¹ E vakaraitaka na iVolatabu ni dau laulau sara na nodra vakacaucautaki Jiova na itabagone. Kena ivakaraitaki na goneyalewa lailai ni Isireli era a kauta vakavesu na kai Siria. Na goneyalewa lailai oqo a doudou ni vunautaka vua na nona marama na veika e baleti Ilaisa, na parofita i Jiova. E lai tini ena cakamana na veika e tukuna na goneyalewa oya, a dua na ivakadinadina vinaka. (2 Tui 5:​1-​17) O Jisu tale ga a vunau ena doudou ni se gone. Na veika kece a yaco ena nona bula ni se gone a rawa sara ga ni volatukutukutaki ena iVolatabu, ia o Jiova a digitaka ga e dua. Oya na ka a cakava o Jisu ni se yabaki 12 ena valenisoro e Jerusalemi. A vakatarogi ira na ivakavuvuli ni lotu, ra qai kurabui ena levu ni ka e kila me baleta na vunau i Jiova.​—⁠Luke 2:​46-​49.

12, 13. (a) Ni bera ni mate o Jisu, na cava a lai cakava ena valenisoro, a tarai ira beka na tu e kea na veika era raica? (b) E raica vakacava o Jisu na nodra veivakacaucautaki na gonelalai?

¹² Ni sa uabula o Jisu, a vakauqeti ira tale ga na gone mera vakacaucautaki Jiova. Kena ivakaraitaki, ni vo e vica na siga me mate, a vakayagataka o Jisu na vo ni gauna oqori ena valenisoro e Jerusalemi. A cakava e kea na “veika e veivakurabuitaki,” e kaya na iVolatabu. E cemuri ira na vakayagataka na vanua tabu oya me nodra qara na daubutako. E vakabulai ira na mataboko kei na lokiloki. Na veika gona era raica na tu e kea, vakauasivi o ira na iliuliu ni lotu, a dodonu sara ga me tarai ira mera vakacaucautaki Jiova kina kei na Luvena, na Mesaia. Ka ni rarawa ni levu era sega ni cakava oqori. Era rerevaki ira na iliuliu ni lotu, dina nira kila ni a talai Jisu mai na Kalou. Ia, e dua na ilawalawa era vosa ena doudou. O kila se ilawalawa cava oya? Na iVolatabu e kaya: “Ni ra sa raica ko ira na bete levu kei ira na vu-ni-vola na veika e veivakurabuitaki sa cakava ko koya [Jisu], kei ira na gone lalai era sa kaci e na vale ni soro, ka kaya, Osana vua na Luve i Tevita! era sa cudru sara, ka kaya vua [Jisu], O sa rogoca na ka era vosataka ko ira oqo?”​—⁠Maciu 21:​15, 16; Joni 12:⁠42.

¹³ Era nanuma na bete ni na vagalui ira na gonelalai era vakacaucautaki koya tiko o Jisu. A vagalui ira beka? Sega! E kaya o Jisu vei ira na bete: “Io; dou sa sega beka ni wilika, Mai na gusudra na gone lalai kei ira sa sucu tiko, ko sa cakava me vinaka sara na vakarokoroko?” E macala gona, ni nodra veivakacaucautaki na gonelalai e marau kina o Jisu kei Tamana. Era cakava tiko na gone oqori na ka sara ga a dodonu mera cakava na uabula kece era tiko e kea. Ena nodra vakasama vagone, e sega ni vakabekataki ni matata vinaka vei ira na veika kece era a raica ni cakava o Jisu. Na cakacaka veivakurabuitaki, nona vosa ena doudou kei na vakabauta, kei na nona lomana dina na Kalou kei ira nona tamata. Me vaka ga nona dau tukuna tiko, o koya dina ga na Mesaia yalataki, na “Luve i Tevita.” Ena vuku ni nodra vakabauta na gonelalai, era kalougata nira vakayagataki ena kena vakayacori na parofisai.​—⁠Same 8:⁠2.

14. E vukei ira vakacava na itabagone na isolisoli era taukena mera vakacaucautaka na Kalou?

¹⁴ Na cava eda vulica ena ivakaraitaki vaka oya? E rawa ni laulau sara nodra dau vakacaucautaki Jiova na gone. Dau rawarawa sara tale ga vei ira na gone mera raica vakamatata na ka dina, ra qai vakaraitaka nodra vakabauta ena nodra lomakatakata kei na gugumatua. E dua tale ga na isolisoli era taukena e tukuni ena Vosa Vakaibalebale 20:29: “Sa nodra ka ni lagilagi na cauravou ni ra sa kaukauwa.” Io, oni vakalougatataki na itabagone ena kaukaua kei na igu​—⁠e yaga sara vakalevu oqori ena nomuni vakacaucautaki Jiova. O na vakayagataka vakacava na isolisoli vaka oqori?

Sala Cava O na Vakacaucautaki Jiova Kina?

15. Na cava me yavu dodonu ni noda vakacaucautaki Jiova me laulau kina?

¹⁵ Na laulau ni noda vakacaucautaki Jiova e tekivu sara ga mai lomada. Ena sega ni laulau ke o cakava ga baleta nira tukuna vei iko e so tale. Nanuma, na ivunau levu duadua oqo: “Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kecega.” (Maciu 22:37) O sa mai kilai Jiova vinaka beka ena nomu vulica sara ga vakataki iko na nona Vosa? Na vuli vaka oqori e dodonu me vure kina nomu lomani Jiova. E macala gona ni sala ga o na vakaraitaka kina nomu lomani Jiova ena nomu vakacaucautaki koya. Ni sa matata e lomamu na vuna mo vakayacora kina, o sa rawa ni vakacaucautaki Jiova ena yalogu.

16, 17. E yaga vakacava na noda itovo ena noda vakacaucautaki Jiova? Vakamacalataka.

¹⁶ Ia ni se bera mada ga ni o lai vakasamataka tiko na ka mo na tukuna, dikeva mada na nomu itovo. Meda lesu tale mada vua na goneyalewa lailai ni Isireli ena gauna i Ilaisa, kevaka me a veibeci, viavialevu, se veidabui na nona itovo, o nanuma nira na rogoca na kai Siria era a vesuki koya na veika e tukuna me baleta na parofita i Jiova? Ena sega beka. Ena vakasama vata oqori, era na rogoci iko na tani ke o veidokai, dau dina, qai vakaitovo. (Roma 2:​21) Dikeva tale mada e dua na ivakaraitaki.

¹⁷ E dua na goneyalewa ni Potukali, yabaki 11, a vakaukauataki vua mai koronivuli me vakaitavi ena so na solevu ni olodei e veisaqasaqa kei na nona lewaeloma e vakavulici ena iVolatabu. Ena veidokai, a vakamacalataka kina vei nona qasenivuli na vuna ena sega ni vakaitavi kina, ia a vakalialiai koya o qasenivuli. Toso na gauna, e saga tiko ga o qasenivuli me vakamadualaki koya, e lai vakalialia sara mada ga na nona lotu. Ia na goneyalewa oqo e vakaraitaka tiko ga nona veidokai. Ni sivi tale e vica na yabaki, na goneyalewa oqo sa painia tudei, e veiqaravi vakaitalatala vakatabakidua. Ena dua na soqo ni tikina, a saravi ira toka na papitaiso na tacida yalewa oqo, qai dei sara e matana e dua na marama. O cei tale? Na nona qasenivuli sara ga! Ni oti na nodrau veimarautaki kei na veitagicaki, sa qai kaya na kena marama oqo vua na tacida ni sega ni guilecava rawa na nona dau veidokai e koronivuli. A sikovi qasenivuli e dua na iVakadinadina mani tukuna vua o qasenivuli na itovo nei nona gonevuli makawa. Yaco sara me vuli iVolatabu o qasenivuli qai ciqoma na ka dina. Io, na nomu itovo e dua na sala e vakacaucautaki kina vakalevu o Jiova!

18. Na cava ena rawa ni cakava e dua na itabagone ke dredre ni dau tekivuna na veivosakitaki ni Kalou o Jiova se na iVolatabu?

¹⁸ E dau dredre beka ena so na gauna mo tekivuna na veivosakitaki ni veika e baleta na nomu vakabauta e koronivuli? Sega ni o iko duadua ga o sotava oqori. Ia, e rawa ni o tuvanaka na sala me vakarawarawataka nodra tarogi iko na tani me baleta na nomu vakabauta. Kena ivakaraitaki, ke donu vakalawa qai vakatarai e koronivuli, vakacava mo kauta na ivola tabaki vakaivolatabu mo qai wilika ena gauna ni vakasigalevu se ena so tale na gauna e vakatarai kina? De dua era na tarogi iko na nomu icaba me baleta na ka o wilika tiko. Ni o tukuna vei ira na ka o taleitaka me baleta na ulutaga se na ivola o wilika tiko, e rawa ni tekivu sara ga e kea e dua na veivosaki o sega ni a namaka. Nanuma mo dau taro, mo rawa ni kila kina na cava era vakabauta na nomu icaba. Vakatudaliga matua, wasea na veika o sa kila mai na iVolatabu. Me vaka ga na vakasavuirogorogo ena tabana e 29, e vakaraitaka ni levu na itabagone era vakacaucautaka na Kalou e koronivuli. Oqo era rekitaka dina ra qai vukea e levu tale mera mai kilai Jiova.

19. Ena laulau vakacava na nodra cakacaka vakavunau e veivale na itabagone?

¹⁹ E dua na sala vinaka sara mo vakacaucautaki Jiova kina oya na vunau e veivale. Kevaka o se bera ni vakaitavi kina, vakacava mo tekia oqori me nomu isausau? Ke o sa cakava tiko oqori, e tiko beka e so tale na isausau o rawa ni tekia? Kena ivakaraitaki, me kua ni sa dua tu ga na ka o tukuna ena veivale kece o vunau kina. Qara e so na sala e rawa ni vakavinakataki kina na iwalewale ni nomu vunau, tarogi rau na nomu itubutubu kei na so tale era maqosa mera vukei iko ena so na iwalewale yaga. Vulica mo vakayagataka vakalevu na iVolatabu, me laulau nomu veisikovi lesu, kei na nomu tekivuna e dua na vuli iVolatabu. (1 Timoci 4:​15, VV) Na levu ga ni nomu vakacaucautaki Jiova ena sala oqori, ena laulau sara kina na nomu cakacaka vakaitalatala, o qai marautaka tale ga.

Gauna Cava Mo Tekivu Vakacaucautaki Jiova Kina?

20. Na cava mera kua ni nanuma kina na itabagone nira se gone e sega ni rawa nira vakacaucautaki Jiova?

²⁰ Mai na tolu na taro eda veivosakitaka tiko oqo, e rawarawa na sauma na kena iotioti. Dikeva ni sauma vakadodonu na iVolatabu: “Mo nanumi koya ka Buli iko ni ko sa cauravou tiko.” (Dauvunau 12:⁠1) Io, ni o se cauravou, oqo sara ga na gauna vinaka mo tekivu vakacaucautaki Jiova kina. Dau rawarawa ga nida kaya: “Au se gone e sega ni rawa meu vakacaucautaki Jiova, niu se yalowai. Au na wawa me yacova niu sa uabula.” Sega ni o iko ga e vaka oqori na nomu rai. Na cauravou o Jeremaia me kena ivakaraitaki, e kaya vei Jiova: “Isa, noqu Turaga Jiova! raica, ka’u sa sega ni kila vosa: ni’u sa gone ga koi au.” A vakadeitaka vua o Jiova me kua ni rere. (Jeremaia 1:​6, 7) O keda tale ga, meda kua ni rere ni vakacaucautaki Jiova. Se mani ituvaki cava eda na sotava, eda nuidei ni o Jiova ena totaki keda.​—⁠Same 118:⁠6.

21, 22. Na cava era vakatauvatani kina kei na tegu na itabagone era vakacaucautaki Jiova? Na cava e veivakayaloqaqataki kina na ivakatautauvata oqori?

²¹ Oni uqeti na itabagone: Ni kua ni lomalomarua na vakacaucautaki Jiova! Oqo e gauna vinaka mo ni veitomani kina ena cakacaka bibi duadua e vakayacori tiko e vuravura nikua. Ni o cakava oqori, o sa na lewena e dua na vuvale totoka era vakacaucautaki Jiova tiko e lomalagi kei vuravura. E marau o Jiova ni o lewenivuvale oqo. Dikeva na veivosa uqeti vakalou e cavuta tiko vei Jiova na daunisame: “O ira na nomuni tamata era na via vakacabori ira mei madrali e nai ukuuku ni yalosavasava e na siga ni nomuni kaukauwa; era na lewe vuqa na nomuni cauravou ka lailai na mata ni tegu mai na kete ni mataka.”​—⁠Same 110:⁠3.

²² Na taliva ni tegu ena kaca ni mataka e boroya e dua na iyaloyalo totoka, se sega beka? E veivakabulabulataki, e serau, qai sega ni wiliki rawa na matanitegu. E vaka oqori na nona raici kemuni na itabagone o Jiova ena nomuni yalodina ni vakacaucautaki koya ena gauna lewalewai dredre oqo. Macala ni marau o Jiova ena nomuni digia mo ni vakacaucautaki koya. (Vosa Vakaibalebale 27:11) O koya gona, kemuni na itabagone, ni vakacaucautaki Jiova!

O na Sauma Vakacava?

• Na cava e so na vuna bibi me vakacaucautaki kina o Jiova?

• Na ivakaraitaki cava soti ena iVolatabu e dusia ni rawa ni laulau nodra vakacaucautaki Jiova na itabagone?

• Era na vakacaucautaki Jiova vakacava nikua na itabagone?

• Ena gauna cava e dodonu mera tekivu vakacaucautaki Jiova kina na itabagone, kei na cava na vuna?

[iYaloyalo ena tabana e 25]

Ke kenadau ena dua na ka na nomu itokani, o na sega li ni dau sakitaki koya?

[iYaloyalo ena tabana e 27]

De dua era na taleitaka na nomu icaba na nomu vakabauta

[iYaloyalo ena tabana e 28]

Ke o via vakavinakataka nomu cakacaka vakavunau, kerea e dua na iVakadinadina matua me vukei iko ena so na iwalewale yaga