Marau ni O Soli Ka!
“E marautaki cake na soli ka mai na taura na ka.”—CAKACAKA 20:35, NW.
1. E vakaraitaka vakacava o Jiova nona marautaka na soli ka?
E ISOLISOLI uasivi ni Kalou na noda marautaka na noda kila na ka dina kei na veika vinaka eda rawata kina. E levu na ka era marautaka o ira na mai kilai Jiova. Eda marau nida taura e dua na iloloma, ia eda marau tale ga nida soli iloloma. E dau solia o Jiova “na i loloma vinaka kei na i solisoli uasivi kece ga,” baleta ni “Kalou mamarau.” (Jemesa 1:17, VV; 1 Timoci 1:11, NW) E dau solia na nona ivakavuvuli yaga vei ira na via rogoca, e marau tale ga nira talairawarawa vua o ira e vakavulici ira, me vaka nodrau dau marau na itubutubu nira ciqoma na gone na nodrau ivakasala e tau ena loloma.—Vosa Vakaibalebale 27:11.
2. (a) Na cava e kaya o Jisu me baleta na soli ka? (b) Na marau cava eda vakila nida veivakavulici ena veika dina mai na iVolatabu?
2 Ni tiko e vuravura, e marau tale ga o Jisu nira ciqoma na tamata na nona ivakavuvuli. E cavuta na vosa i Jisu na yapositolo o Paula ena nona kaya: “E marautaki cake na soli ka mai na taura na ka.” (Cakacaka 20:35, NW) Eda sega ni marau ga ni vakadinata na noda ivakavuvuli ni lotu e dua eda vakavulica ena ka dina ena iVolatabu. Eda marautaka ga vakalevu na noda solia vua na ka e tawamudu na kena yaga. Nida solia na veika vakayalo, eda sa vukei ira tiko na tamata ena veika e yaga vei ira ena gauna oqo kei na gauna e se bera mai.—1 Timoci 4:8, VV.
O Marau ni O Soli Ka
3. (a) Rau vakaraitaka vakacava na nodrau marau na yapositolo o Paula kei Joni ena nodrau vukei ira vakayalo e so tale? (b) Eda vakaraitaka vakacava na loloma nida tuberi ira na luveda ena ka dina mai na iVolatabu?
3 Me vaka ga ni rau marau o Jiova kei Jisu ni rau soli ka vakayalo, eda marau tale ga na lotu Vakarisito nida soli ka vakayalo. E marautaka na yapositolo o Paula nona kila ni sa vukei ira tale e so mera vulica na ka dina mai na Vosa ni Kalou. E vola ina ivavakoso e Cesalonaika: “Ka cava na neitoui nuinui se marau, se neitoui sala ni reki? sa sega li ni koi kemudou e na mata ni noda Turaga ko Jisu e na nona lako tale mai? Ni sai kemudou na vu ni neitoui ukuuku kei na vu ni neitou reki.” (1 Cesalonaika 2:19, 20) E marau vaka kina na yapositolo o Joni. A vola vei ira na luvena vakayalo: “Sa ka levu na noqu reki e na vuku ni ka e dua bauga oqo, ni’u sa rogoca era muria na dina ko ira na luvequ.” (3 Joni 4) Vakasamataka tale ga na noda marau nida vukei ira na luveda mera luveda vakayalo! Eda vakaraitaka na loloma na itubutubu nida vakavulici ira na luveda “ena ivakavuvuli kei na ivakarau ni vakasama i Jiova.” (Efeso 6:4, NW) Eda vakaraitaka kina na itubutubu nida vinakata mera bula tawamudu na luveda. Nira ciqoma na luveda sa duatani na noda marau kei na noda lomavakacegu na itubutubu.
4. Na vakasavuirogorogo cava e vakaraitaka na marautaki ni soli ka vakayalo?
4 E cakacaka vakaitalatala vakatabakidua, se painia o Dell, qai lima na luvena. E kaya o koya: “Au vakila na dina ni vosa i Joni na yapositolo niu vakavinavinaka tale ga ni ratou le va na luvequ eratou sa ‘muria na dina.’ Au kila ni dokai qai lagilagi kina o Jiova nira duavata na lewenivuvale ena sokalou dina, o koya gona au sa bau lomavakacegu dina niu raica votu na nona vakalougatataka na noqu saga voli meu vakavulici iratou na luvequ ena ka dina. Noqu nuitaka meu bula tawamudu e Parataisi kei iratou na noqu vuvale e uqeti au meu vosota tiko ga na veika dredre au sotava.” Ka ni rarawa ni a vakasivoi mai na ivavakoso e dua na luve i Dell yalewa ni a cakava na ka e tawavakarisito. Ia e saga o Dell me kua ni yalolailai. “Au nuitaka ni na yalomalumalumu me suka tale mai vei Jiova o luvequ ena dua na siga,” e kaya o koya. “Ia au vakavinavinakataka ga na Kalou ni ratou le levu na luvequ eratou yalodina tiko ena qaravi koya. Na noqu marau oqo e vakaukauataki yau dina.”—Niemaia 8:10.
Qara na iTokani e Tawamudu
5. Na cava e vakavuna meda lomavakacegu nida vakarabailevutaka noda vukei ira e so tale mera tisaipeli?
5 A vakaroti ira na nona imuri o Jisu mera qisi ira tale e so mera tisaipeli lotu Vakarisito, ra qai vakavulici ira tale ga ena veika e baleti Jiova kei na nona ivakatagedegede. (Maciu 28:19, 20, VV) Rau lomasoli o Jiova kei Jisu me rau vukei keda meda vulica na ka dina. Eda lomavakacegu nida vakarabailevutaka noda vukei ira e so tale mera tisaipeli baleta nida sa vakadamurimuri Jiova kei Jisu tiko, me vakataki ira na lotu Vakarisito taumada. (1 Korinica 11:1) Nida cakacaka vata kei na Kalou Kaukaua Duadua kei na Luvena e dau lomana, ena vakainaki na noda bula. Eda na marau dina ke da okati meda “daucakacaka vata kei koya na Kalou”! (1 Korinica 3:9) Eda sega beka ni marautaka nira bau vakaitavi tale ga na agilosi ena kena vunautaki na itukutuku vinaka?—Vakatakila 14:6, 7.
6. O cei erau noda itokani nida soli ka vakayalo?
6 Nida soli ka vakayalo, eda na sega wale ga ni cakacaka vata tiko kei na Kalou, e rawa tale ga me noda itokani tawamudu o koya. Ena vuku ni nona vakabauta, e vakatokai o Eparama me itokani ni Kalou. (Jemesa 2:23, VV) E rawa tale ga me noda itokani na Kalou kevaka eda gumatua ena noda cakava na lomana. Nida cakava oya, eda sa itokani tale ga i Jisu. E kaya vei ira nona tisaipeli: “Au sa vakatokai kemuni mo ni noqu itokani, baleta ni veika kece au rogoca vei Tamaqu au sa vakatakila vei kemuni.” (Joni 15:15, NW) E levu era marautaka ni rawa nira veitokani kei ira na tamata rogo se vakailesilesi, ia o keda eda okati me nodrau itokani na kabula cecere duadua ena lomalagi kei na vuravura!
7. (a) E kunea vakacava e dua na marama na nona itokani dina? (b) O bau sotava tale ga e dua na ka vaka oya?
7 Kuria, nida vukei ira na tamata mera kila na Kalou, era yaco tale ga mera noda itokani voleka sara, eda marau vakalevu tale ga kina. O Joan, na marama ni Mereke, e vakavulici Thelma ena iVolatabu. Eratou tusaqati Thelma na nona vuvale, ia e tomana tiko ga nona vuli me yacova ni papitaiso ni oti e dua na yabaki. E vola o Joan: “E sega ni tini ga e kea na neirau veikilai; ia sa 35 na yabaki na neirau veitokani voli mai. E wasoma na neirau dau vunau vata kei na neirau dau lako vata ina veisoqo ni tikina. Au sa toki ina dua na vanua e 800 na kilomita na kena yawa mai na nona itikotiko. Ia, e uqeti au dina na nona ivola o Thelma ni dau volavola mai, e vakaraitaka mai kina na nona se nanumi au tiko ga, e dau vakavinavinakataka na neirau veitokani, na noqu ivakaraitaki, kei na noqu a vakavulici koya ena ka dina mai na iVolatabu. Na noqu itokani voleka dau loloma oqo e icovi totoka ni noqu sasaga niu vukei koya me kilai Jiova.”
8. Na rai dodonu cava ena vukei keda ena cakacaka vakavunau?
8 E vukei keda meda vunau tiko ga nida kunei ira na via vulica na ka dina, ke ra mani le levu era sega sara ga ni taleitaka na Vosa i Jiova. Na sega ni tataleitaki vaka oya e vakatovolei kina na noda vakabauta kei na vosovoso. Ia ena vukei keda ke dodonu noda rai. E kaya o Fausto, mai Guatemala: “Niu vunau tiko, au dau diva me yaco mada ga o koya keirau veivosaki tiko me dua na tacida vakayalo. Au dau vakasamataka me bau dua mada ga na tamata keirau veitalanoa me yaco me vakabauta na ka dina ni Vosa ni Kalou. Na rai oya e vukei au meu vunau tiko ga, meu marau tale tiko ga.”
Kumuna na iYau Mai Lomalagi
9. Na cava e kaya o Jisu me baleta na iyau mai lomalagi, na cava eda vulica kina?
9 E sega ni cakacaka rawarawa na noda vukei luveda se so tale mera tisaipeli. Ena rairai taura e dua na gauna balavu qai vinakati tale ga meda vosovoso. Ia, nanuma ni levu era cakacaka vakaukaua mera kumuna na veika vakayago e sega ni tudei qai sega ni vakamarautaki ira. E kaya o Jisu vei ira na vakarogoci koya tiko ni yaga cake mera cakacakataka ga na veika vakayalo. E kaya: “Dou kakua ni kumuna vata vei kemudou nai yau e vuravura, e dauvakacacana kina na sarasara kei na veveka, a sa ravabasuka kina na daubutako ka butakoca: ia mo dou kumuna vata na nomudoui yau mai lomalagi, sa sega ni vakacacana kina na sarasara se na veveka, a sa sega ni ravabasuka kina na daubutako me butakoca.” (Maciu 6:19, 20) Nida tadolova na isausau vakayalo e okati kina noda vakaitavi ena cakacaka bibi ni noda vukei ira e so mera tisaipeli, sa rawa meda vakadeitaka nida sa cakava tiko na loma ni Kalou, ena saumi keda tale ga o koya. E vola na yapositolo o Paula: “Sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana.”—Iperiu 6:10.
10. (a) Na cava e vakaiyau vakayalo kina o Jisu? (b) E soli koya vakacava o Jisu, e yaga vakalevu vakacava vei ira tale e so?
10 Ke da cakacaka vakaukaua ena noda vukei ira tale e so mera tisaipeli, eda sa kumuna tiko na “[i]yau mai lomalagi,” me vaka e kaya o Jisu. Oqo e vakavuna meda marautaka na taura na ka. Eda na kalougata nida soli ka kevaka eda sega ni vakaliuca na veika eda vinakata. O Jisu e qaravi Jiova voli ena vica vata na bilioni na yabaki. Vakasamataka na iyau e sa kumuna rawa mai lomalagi! Ia e sega ni vakaliuca na veika e baleti koya. E vola na yapositolo o Paula: “O . . . [Jisu e] . . . soli koya e na vuku ni nodai valavala ca, me vakabulai keda kina mai na vuravura ca oqo, me vaka na loma ni Kalou ko Tamada.” (Kalatia 1:4, neitou na matanivola kala.) E sega wale ga ni soli koya o Jisu ena cakacaka vakavunau, ia e solia sara ga na nona bula me ivoli me rawa kina vei ira tale e so mera kumuna na nodra iyau mai lomalagi.
11. Na cava e vinaka cake kina na iloloma vakayalo mai na iloloma vakayago?
11 Nida vakavulici ira e so mera kila na Kalou, eda sa vukei ira tiko mera kumuna tale ga na iyau vakayalo e sega ni rusa rawa. Na iloloma cava tale e rawa ni uasivia oya? Ke da lolomataka vua na noda itokani e dua na kalokoniliga saulevu, dua na motoka, se mani dua sara na vale, ena vakavinavinaka qai marau na noda itokani oya, eda na marau tale ga baleta nida solia na iloloma. Ia ena vakacava na ituvaki ni iloloma oqori ni oti e 20 na yabaki? Se 200 na yabaki? Se 2,000 na yabaki? Ia kevaka eda soli keda meda vukea e dua me qaravi Jiova, ena tawamudu na kena yaga vua na iloloma oqori.
Vakasaqarai Ira na Vinakata na Ka Dina
12. Era soli ira vakacava e so me rawa kina nira veivuke vakayalo?
12 Era marau nira lako ina veiyasa i vuravura na tamata i Jiova mera lai soli ka vakayalo. E vica vata na udolu era sa biuta na nodra vuvale mera kaulotu ina veivanua e duidui na kena itovo kei na kena vosa. E so era toki ina veiyasa ni nodra vanua e vinakati vakalevu kina na daukacivaka na Matanitu ni Kalou. E so era vulica e dua tale na vosa me rawa kina nira vunau vei ira era toki mai ina nodra vanua era vosataka na vosa oya. Me kena ivakaraitaki, ni oti nodrau susugi rau na luvedrau erau sa veiqaravi tiko oqo ena itikotiko liu ni iVakadinadina i Jiova, rau tekivu painia e dua na veiwatini e New Jersey, Mereke, rau vulica sara na vosa vakajaina. Ena loma ni tolu na yabaki, rau vuli iVolatabu kei ira na lewe 74 era vosa vakajaina era vuli tiko ena koliji e volekati rau. O rawa beka ni vakarabailevutaka na nomu cakacaka vakavunau me rawa kina ni o marautaka na vukei ira tale e so mera tisaipeli?
13. Na cava o rawa ni cakava ke o vinakata me vuavuaivinaka nomu cakacaka vakavunau?
13 De o diva voli mo vakavulica e dua ena iVolatabu, ia o sega ni tekivu rawa tiko. Ena so na vanua e dredre nodra kunei na tataleitaki. De ra sega ni taleitaka na iVolatabu o ira o vosa vei ira. Ke vaka kina, masuta wasoma na veivuke, ni o kila ni rau kauaitaka vakalevu na cakacaka oqo o Jiova kei Jisu Karisito, e rawa ni rau vakamuai iko vua e dua e vaka na sipi. Kere ivakasala vei ira era kenadau ena ivavakoso se o ira e vuavuaivinaka na nodra cakacaka vakavunau. Vakayagataka na ivakasala o dau rogoca ena soqoni vakarisito. Vakayagataka na nodra ivakasala na ivakatawa dauveilakoyaki kei na watidra. Me kena ilutua, kua ni soro koso. A kaya na vuku: “E na mataka mo kaburaka na nomu sila, ia e na yakavi me kakua ni cegu na ligamu: ni ko sa sega ni kila se cava vei rau ena yaco.” (Dauvunau 11:6) Nanumi rau tale ga na tamata yalodina o Noa kei Jeremaia. Dina ga nira lewe vica ga era vakabauta na veika erau vunautaka, ia e yaga na nodrau vunau. Qai kena ilutua, e marautaka o Jiova.
Solia Nomu Maqosa Kece
14. E raici ira vakacava o Jiova na sa qase era cakava na nona cakacaka?
14 De kemu ituvaki e vakadredretaka mo vakaitavi vakalevu ena cakacaka vakavunau. Me kena ivakaraitaki, e rawa ni yalana na veika o via cakava ena cakacaka i Jiova na nomu sa qase. Ia, nanuma na ka e vola na vuku: “Ai sala vakaiukuuku na ulu sika, ni sa kune e na sala ni valavala dodonu.” (Vosa Vakaibalebale 16:31) E marautaka o Jiova na noda vakayagataki keda ina nona cakacaka. E kaya tale na iVolatabu: “Ia ka’u sai koyakoya tikoga [o Jiova] ka yacova na gauna dou na qase kina; ka’u na keveti kemudou mo dou sa sika mada ga: ka’u a bulia, ia ka’u na ia tikoga na veikeveti, kei na veiroqoti, ka’u na ia talega na veivakabulai.” (Aisea 46:4) E yalataka na Tamada vakalomalagi dauloloma ni na vakacegui ira qai tokoni ira na yalodina vua.
15. O vakabauta ni kila o Jiova na kemu ituvaki? Baleta?
15 O rairai tautauvimate beka, e saqati iko tiko beka na watimu e tawavakabauta, e levu beka nomu icolacola ni vuvale, se o sotava tiko e so tale na leqa e dredre nomu taqea. E kila o Jiova ni vakaiyalayala ga na ka eda rawa ni cakava, e kila tale ga na keda ituvaki, e marautaka na noda saga tiko meda qaravi koya. Ke mani lailai mada ga na ka eda cakava ni vakatauvatani kei ira e so. (Kalatia 6:4) E kila o Jiova nida tamata ivalavala ca, e veiraurau na veika e namaka meda cakava. (Same 147:11) Ke da solia na noda vinaka taucoko, e rawa nida nuitaka nida talei vua na Kalou, ena sega tale ga ni guilecava na noda cakacaka e yavutaki ena noda vakabauta.—Luke 21:1-4.
16. Era vakaitavi kece vakacava na lewe ni ivavakoso mera vukea e dua me tisaipeli?
16 Nanuma tale ga meda cakacaka vata me dua na timi ena noda vukei ira e so mera tisaipeli. E sega ni dua ga vei keda ena vukea e dua me tisaipeli, me vaka ni sega ni vakabula e dua na kau e dua bulu na mataniuca. E rawa me dua na iVakadinadina e kunea e dua e tataleitaki rau qai vuli iVolatabu. Ia ni sa mai soqoni ena Kingdom Hall, era vukei koya kece na lewe ni ivavakoso me raica na ka dina. E vakilai na yalo tabu ni Kalou ena nodra loloma katakata na mataveitacini. (1 Korinica 14:24, 25) E veiuqeti na nodra ivakamacala na gonelalai kei ira na itabagone, me vakaraitaka vua na tataleitaki nira duatani na luveda vei ira na gone ni vuravura oqo. O ira na tautauvimate kei ira na malumalumu vakayago ena ivavakoso era vakaraitaka vei ira na ka vou na ibalebale ni vosovoso. Se da qase se gone se vakaiyalayala ga na ka eda rawa ni cakava, eda vukei ira kece era tataleitaki mera lomana na ka dina ena iVolatabu kei na nodra saga mera papitaiso. Ena rairai lailai beka na gauna eda vakayagataka ena cakacaka vakavunau, veisikovi lesu, kei na noda vosa vua e tataleitaki ena Kingdom Hall, ia oqori e tiki tiko ni cakacaka vakaitamera e vakayacora tiko o Jiova.
17, 18. (a) Me ikuri ni noda vakaitavi ena cakacaka ni noda vukei ira tale e so mera tisaipeli, e rawa nida marau vakacava nida soli ka? (b) Eda vakadamurimuri cei nida soli ka ena marau?
17 Me ikuri ni noda vakaitavi ena cakacaka bibi ni noda vukei ira tale e so mera tisaipeli, eda marau tale ga na soli ka na lotu Vakarisito ena so tale na sala. E rawa meda cautaka na ilavo me tokona na sokalou savasava kei na nodra vukei na tu leqa. (Luke 16:9; 1 Korinica 16:1, 2) Meda saga meda vakacegui ira na vulagi. (Roma 12:13) Meda “caka vinaka vei ira na tamata kecega, ka vakalevu vei ira era veitokani e na vaka bauta.” (Kalatia 6:10) Eda rawa ni soli ka ena veisala lalai qai yaga me vaka na noda volavola, talevoni, soli iloloma, veivuke ena cakacaka, kei na noda veivakauqeti nida veitalanoa.
18 Nida soli ka, eda vakaraitaka nida vakadamurimuria na Tamada vakalomalagi. Eda vakaraitaka tale ga nida veilomani vakamataveitacini, na ivakatakilakila ni lotu Vakarisito dina. (Joni 13:35) Nida nanuma na veika oqo eda na marau nida soli ka.
Rawa Mo Vakamacalataka?
• Rau ivakaraitaki vakacava o Jiova kei Jisu ena soli ka vakayalo?
• Eda rawata vakacava na itokani e tawamudu?
• Na cava soti meda cakava me rawa kina ni yaga na noda cakacaka vakavunau?
• Era na marautaka vakacava na soli ka na lewe ni dua na ivavakoso?
[iYaloyalo ena tabana e 13]
Nira ciqoma na veivakavulici na gone, era marau ra qai lomavakacegu na itubutubu
[iYaloyalo ena tabana e 15]
Eda rawata na itokani dina nida vukea e dua me tisaipeli
[iYaloyalo ena tabana e 16]
E vukei keda o Jiova ena gauna ni qase
[iYaloyalo ena tabana e 17]
Eda marau ni soli ka ena veisala lalai e yaga