Marautaka Nomu Bula Vakaitabagone

ERA kerei na lewe ni dua na vanua mai Urope mera digidigi mai na tolu na ka oqo: na rairai vinaka, iyau, se mera itabagone. Era a digitaka e le levu mera itabagone. Io, era raica kece e levu mai na duidui yabaki ni bula ni duatani duadua ga na gauna ni itabagone kei na itekitekivu ni nona yabaki 20. Eda vinakata kece tale ga mera marautaka na itabagone na nodra kalawaca na bula vagone ina uabula. Ena rawa vakacava?

Ena rawa beka ni veivuke kina na iVolatabu? Io. Meda dikeva sara mada e rua na vanua e yaga kina na Vosa ni Kalou vei ira na itabagone, rairai ena sega ni yaga vakalevu sara vua e sa qase me vakatauvatani kei ira na itabagone.

Veimaliwai Vinaka

E volatukutukutaka na Jugend 2000 e dua na vakatataro rabailevu ena vukudra e sivia na 5,000 na itabagone e Jamani me baleta na nodra ituvaki ni rai, veika era vakabibitaka, kei na nodra itovo. E laurai ena vakatataro oqo ni gauna era vaqara kina na itabagone e so na ka ni veivakamarautaki​—me vaka na rogo ivakatagi, qito, se gade wale ga​—levu na gauna era na sega ni cakava taudua. Rairai e sega tale ni dua na yabaki ni bula e levu cake sara na nodra veimaliwai vakaitaba vata me vakatauvatani kei ira na itabagone. E vakadinadinataki gona e ke ni veimaliwai vinaka e dua na sala ena marautaki kina na bula vakaitabagone.

Ia, e sega ni rawarawa na veimaliwai vinaka. Era vakadinadinataka gona o ira na cauravou kei na goneyalewa ni oqori e dua na basoga ni bula era dau sotava kina vakalevu na leqa. E yaga sara ga e ke na iVolatabu. E koto ena Vosa ni Kalou na idusidusi yaga vei ira na itabagone mera bucina na lewamatau ena nodra dau veimaliwai. Na cava e tukuna na iVolatabu?

Na ivakavuvuli bibi taudua ena noda dau veimaliwai e vakatokai na iVunau Koula: “Na ka ga dou vinakata me ra cakava vei kemudou na tamata, dou cakava tale ga vei ira.” Nida veidokai, veirokovi, da qai veikauaitaki era na uqeti mera cakava tale ga vei keda na tani. Na noda itovo vinaka ena vakaseavutaka na yalo ni veicati kei na veileqaleqati. Kevaka gona e kilai na nomu dau veinanumi, era na dau taleitaki iko vakalevu, ra qai ciqomi iko tale ga. Sega li ni o marautaka na nodra veiciqomi?​—Maciu 7:​12, VV.

E veivakasalataki gona kina na iVolatabu mo “lomana na kai nomu me vaka ko lomani iko.” Nomu lomani iko e kena ibalebale mo qaravi iko vinaka, kua ni o beci iko, ia mo kua tale ga ni dokai iko sara vakasivia. Na cava e yaga kina? Baleta kevaka o dau beci iko tu ga, o na sega tale ga ni lomavinakataki ira na tani, ena sivia na nomu vakalewai ira, ena vakacaraka kina na veimaliwai vinaka. Ia, ni vakarauta ga na nomu dokai iko ena rawa sara ga ni yavu ni veikilai e qaqaco vinaka.​—Maciu 22:39.

Ni toso tiko na nodrau veikilai e rua, erau na saga me rau na vaqaqacotaka. O na marau ni o vakayagataka na gauna ena nomu veikilai kei na dua, ni “ka ni veivakalougatataki vakalevu me soli ka, ka vakalailai ga me taura na ka.” E dua na basoga ni soli ka oya na dauveivosoti, e vauci kina na nomu raibaleta na nodra cala lalai na tani qai kua ni namaka mera bula uasivi. E tukuna vei keda na iVolatabu: “Me kilai na nomudou yalomalumalumu vei ira na tamata kecega.” Io, “mo dou vakatovolea me veilomani kei ira na tamata kecega.” Vakacava ke dusia e dua na itokani na nomu malumalumu? Na cava o na cakava? Dikeva mada na ivakasala yaga oqo mai na iVolatabu: “Me kakua ni kusarawa na yalomu me cudru,” ni “sa cakava na ka dina na weka ni tamata ni sa ia na veivuetaki.” Sega li ni dau cakayaco ina noda vakasama, ivosavosa, kei na noda itovo na nodra ivalavala na noda itokani? O koya gona, e vakarota na iVolatabu: “Sa vakacala nai valavala vinaka na dautiko vata kei ira era sa ca.” Ia, ena yasana kadua, “ena vuku mai ko koya sa malele vata kei ira na vuku.”​—Cakacaka 20:35; Filipai 4:5; Roma 12:​17, 18; Dauvunau 7:9; Vosa Vakaibalebale 13:20; 27:6; 1 Korinica 15:33.

A vosa tiko o Marco ena vukudra e vuqa na cauravou kei na goneyalewa ena nona kaya: “E yaga sara ga vakalevu na ivakavuvuli vakaivolatabu ena veimaliwai vinaka. E so au kila era dau nanumi ira ga ra qai sasagataka ga na ka mera rawaka kina vakalevu. E vakavulici keda na iVolatabu meda kua ni dau nanumi keda ga, ia meda dau nanumi ira tale ga na tani. Mai na ka au raica rawa, oya na sala uasivi duadua ni bula veimaliwai vinaka.”

Me vakataki Marco, na veika era vulica mai na iVolatabu na itabagone ena sega wale ga ni yaga ena nodra bula vakaitabagone, ia ena vukei ira tale ga ena veiyabaki sa tu mai liu. Me baleta na bula e se tu oqo e liu, e dua tale na sala e yaga sara kina na iVolatabu vei ira na itabagone.

Nuiqawaqawataka na Bula e se Tu Oqo e Liu

Era dau vakatataro e vuqa na itabagone. Rairai ena levu cake sara na nodra via kila na itabagone na cava e yaco tiko kei na vuna e yaco tiko kina me vakatauvatani kei ira tale na so. Ia na iVolatabu, e sega ni dua na ivola e tautauvata kaya, ni vakamacalataka na veituvaki e sotava tu na vuravura qai tukuna tale ga vei keda na ka meda namaka ena bula e se tu oqo e liu. Oqo na ka era via kila na itabagone. Eda vakadeitaka vakacava?

E dau vakabauti nira kauaitaka ga na itabagone na nodra bula ena gauna oqo, ia ena so na vakatataro e kunei ni duidui vakalailai. E laurai nira dau dikeva vakavinaka sara na itabagone na ka e yaco wavoliti ira tiko, era qai lewa ga na ka era nanuma me baleta na bula e se tu oqo e liu. E vakadinadinataki oqo ni 3 mai na le 4 na cauravou kei na goneyalewa era dau vakasamataka “vakalevu” se “vakawasoma” na nodra bula e se tu oqo e liu. E dau kena ivakarau vei ira na itabagone mera nuidei ni na vinaka na ka ena sotavi, ia e dua na iwiliwili levu ni itabagone era nuiqawaqawataka tu na bula e se tu oqo e liu.

Na cava e nuiqawaqawataki? E vuqa na itabagone era sa basulawa sara tu ga, itovo voravora, ra qai vakayagataki wainimate gaga. Era lomaleqataka na itabagone me na dua na nodra cakacaka dei ena vuravura ni veiqati oqo. Era saga ena voraki mera rawata vinaka nodra veitarogi e koronivuli se mera dau sasaga e valenicakacaka. E kaya ena yalorarawa e dua na itabagone e yabaki 17: “Eda bula tu oqo ena vuravura ni dui nanumi koya ga. Era vakaunodra. Ena vinakati e veigauna mo vakadinadinataka na ka o rawa ni cakava, e dau vakacudrui au.” E kaya e dua tale na itabagone, e yabaki 22: “Era rawaka ena nodra bula o ira na dau sasaga ra qai tiko vinaka. Ia, o ira era kalouca, e levu na vuna era sega ni rawaka kina, era na sega ni rawata e dua na ka.” Na cava e dau veiqatitaki kina na bula? Ena vaka tu ga oya na bula?

Na iVakamacala Dodonu

Era yalolailai ra qai kidroa na itabagone nira raica na vuravura, era sa duavata sara tiko ga kina​—era kila se sega​—kei na iVolatabu. E vakaraitaka na Vosa ni Kalou ni “vuravura ni dui nanumi koya ga” oqo sa ivakatakilakila ni gauna. Ena nona ivola na yapositolo o Paula, a vakamacalataka kina na noda gauna vei Timoci, e dua na cauravou: “Ni na yaco eso na gauna ni veivakararawataki e na veisiga maimuri.” Na cava e gauna ni veivakararawataki kina? A tomana o Paula ena nona vola, ni tamata era na “daulomani ira walega . . . , era na dauvinakata nai lavo, era na daubole, era na viavialevu, . . . era na sega ni vakavinavinaka, era na sega ni yalosavasava, . . . era na daucudrucudru.” Sega li ni cavuta sara ga vakadodonu na nodra itovo e vuqa edaidai?​—2 Timoci 3:​1-3.

E tukuna na iVolatabu ni na yaco na gauna ni veivakararawataki “ena veisiga maimuri,” ni bera ni yaco e dua na veisau levu ina kawatamata kece. Na veisau oqo ena cakayaco vakatautauvata vei keda kece, gone kei na qase. Na veisau cava? Sa na vakarau sosomitaka na veiliutaki vakatamata e dua na matanitu vakalomalagi, ra na qai marautaka na lewena “na veivakacegui vakaidina” ena vanua kece ga. “Era na taukena na vanua ko ira na yalododonu, ka tiko kina ka sega ni mudu.” Ena guilecavi vakadua na yalolailai kei na kidroa.​—Same 37:​11, 29.

E nuitaki duadua ga na veika e tukuna na iVolatabu me baleta na bula e se tu oqo e liu. Ni kila e dua na itabagone na ka ena namaka ena vica vata na yabaki e tarava, ena vakarautaki koya ina veiveisau ena yaco, ena lomavakacegu qai lewa vinaka tale ga kina nona bula. Ena lailai kina na lomaocaoca kei na nuiqawaqawa. Na veika yaga era gadreva na itabagone​—mera kila vinaka na vuravura kei na ituvaki cava ena sotavi ena bula e se tu oqo e liu​—e vakamacalataki tu ena iVolatabu.

Marautaka na Bula Vakaitabagone

Ena kilai vakacava ni marautaka na nona bula e dua na itabagone? Ena nona vuli torocake, ena iyau vakayago e taukena, kei na levu ni nona itokani? E levu era rairai nanuma ni vaka kina. Na yavu me tekivutaka vinaka kina e dua na nona bula mai muri oya na nona gauna ni itabagone kei na itekitekivu ni nona yabaki 20. Se dua tale na kena itukutukuni, na marau e sotava e dua ena bula vakaitabagone e rawa ni boroya e dua na iyaloyalo ni ka ena sotava mai muri.

E laurai gona ni na vukea dina e dua na itabagone na iVolatabu me marautaka nona bula vakaitabagone. Era sa vakadinadinataka e vuqa na itabagone na kena cakayaco ina nodra bula. Era wilika na Vosa ni Kalou ena veisiga ra qai bulataka na ka era vulica. (Raica na “Nona Vakatutu Yaga e Dua na iTabagone e Qaravi Jiova,” ena taqana e 6.) Na iVolatabu e nodra ivola dina tale ga na itabagone edaidai baleta ena vukei ira “me[ra] vakarau tu, ni[ra] sa vakarautaki ki nai valavala vinaka kecega.”​—2 Timoci 3:​16, 17.

[Tikina bibi ena tabana e 5]

Na veimaliwai vinaka e dua na sala ena marautaki kina na bula vakaitabagone

[Tikina bibi ena tabana e 6]

Rairai ena levu cake sara na nodra via kila na itabagone na cava e yaco tiko kei na vuna e yaco tiko kina me vakatauvatani kei ira tale na so

[Kato ena tabana e 6, 7]

Nona Vakatutu Yaga e Dua na iTabagone e Qaravi Jiova

O Alexander e yabaki 19. A susu mai na dua na vuvale iVakadinadina i Jiova, qai dau yalodina ni bulataka na ka e vakabauta. Ia, a sega ni vaka tu ga oqori na kena ituvaki. A vakamacalataka o Alexander:

“Ena kurabuitaki beka, niu dua na itabagone bera ni papitaiso, sa sivia e vitu na yabaki na noqu dau sosoqoni vata kei ira na iVakadinadina i Jiova. Ena gauna kece oya, au dau taura tu ga vakamamada na noqu sokalou, vaka me sa caka tu ga me rawa. Au a sega ga ni doudou meu dikevi au vakavinaka.”

A veisau na rai i Alexander. A tomana:

“Erau dau vakauqeti au na noqu itubutubu kei ira na noqu itokani ena ivavakoso meu wili iVolatabu e veisiga, meu kilai Jiova kina vakavinaka. Au mani cakava sara. Au vakalailaitaka na noqu dau sara retioyaloyalo, au sa qai tuvanaka meu wili iVolatabu ena veimataka lailai. Au tekivu vakila sara ga na yaga ni iVolatabu. Au raica rawa tale ga na sala ena vukei au kina. Ia, na kena e bibi taudua​—au qai mai kila ni o Jiova e vinakata meu kilai koya. Niu cakava oya e vinaka cake sara na neirau veiwekani, qai vinaka cake tale ga na noqu veimaliwai ena ivavakoso. E veisautaka sara ga na noqu bula na iVolatabu! Au vakatura vei ira kece na itabagone era qaravi Jiova mera dau wili iVolatabu e veisiga.”

Era le vica vata na milioni na itabagone ena vuravura raraba era dau soqoni vata kei ira na iVakadinadina i Jiova. O dua beka vei ira? O na vinakata me yaga na nomu wilika wasoma na iVolatabu? Vakacava mo vakadamurimuri Alexander? Vakalailaitaka na veika o cakava e sega soti na kena yaga me qai vakarau ni nomu bula e veisiga na wili iVolatabu. O na vakila na yaga ni nomu sasaga.