Me Lewa Vakacava na Lomada na Vakacegu i Karisito?

“Me lewa sara e na lomamudou na vakacegu i Karisito, ni dou sa kacivi ki na ka oqo, ni dou sa yago e dua bauga.”​—⁠KOLOSA 3:​15.

1, 2. E lewa vakacava na lomana na lotu Vakarisito “na vakacegu i Karisito?”

E SEGA ni dau taleitaki na vosa na lewai, ni tiko kina na vakasama ni veivakasaurarataki. E rawa kina mera nanuma e so ni sega ni dodonu na ivakasala i Paula vei ira na nona itokani lotu Vakarisito mai Kolosa, “Me lewa sara e na lomamudou na vakacegu i Karisito.” (Kolosa 3:​15) Eda sega li ni dui lewai keda? Na cava me lewa kina na lomada e dua na ka se dua na tamata?

² A sega ni tukuna o Paula vei ira mai Kolosa mera sa kua ni lewai ira. Na vosa vakirisi e vakadewataki me “lewa” ena Kolosa 3:​15 e via tautauvata kei na vosa e vakayagataki vua na refari ni qito ena gauna oya ni lewa se o cei me soli vua na icocovi. Na lawa ni qito e vakatara mera cakava na dauqito e so na ka, ia e vakatau ena nona lewa na refari se o cei e muria vinaka na lawa, kei koya e qaqa. Eda galala tale ga meda lewa na ka eda vinakata, ia ena vaka tiko na “refari” na vakacegu i Karisito​—⁠se, me vaka e vakadewataka o Edgar J. Goodspeed, “na ka e lewa” na lomada.

3. Na cava “na vakacegu i Karisito”?

³ Na cava “na vakacegu i Karisito”? Oqo na lomavakacegu eda vakila nida yaco meda tisaipeli i Jisu kei na noda qai kila ni rau lomani keda rau qai vakadonui keda na Kalou o Jiova kei Luvena. Ni voleka ni biuti iratou na nona tisaipeli, a tukuna vei iratou o Jisu: “A noqu vakacegu ga au sa solia vei kemudou: . . . Dou kakua ni lomaleqa, ka kakua ni taqaya.” (Joni 14:​27, VV) Sa voleka ni 2,000 na yabaki na nodra vakila na vakacegu oya na lewe ni yago i Karisito era yalodina tiko, ena gauna oqo era bau vakila tale ga na nodra itokani na ‘so tani tale na sipi.’ (Joni 10:16) Na vakacegu oya e dodonu me lewa tiko na lomada. Ni kaukaua na veivakatovolei eda sotava, ena vukei keda na vakacegu oya meda kua ni rere se lomaleqa vakalevu. Meda raica mada se dina vakacava oqo ni caka vei keda na veika tawadodonu, nida lomaocaoca, kei na gauna eda dau beci keda kina.

Ni Caka Vei Keda na Veika Tawadodonu

4. (a) E vakila vakacava o Jisu na veika tawadodonu? (b) Na cava era cakava na lotu Vakarisito ni caka vei ira na veika tawadodonu?

⁴ E kaya o Tui Solomoni: “Sa lewa . . . na tamata vua na tamata tani ka sa mani ca kina.” (Dauvunau 8:⁠9) E vakadinata o Jisu na vosa oya. Ni se tu mai lomalagi, e raica na veika tawadodonu e cakava na tamata vua na tamata. E caka sara ga vua e vuravura e dua na ka tawadodonu sa vavaku, ni a beitaki me dauvosavakacaca qai vakamatei ni a beitaki me daubasulawa, dina ga ni sega ni kune vua na ivalavala ca. (Maciu 26:​63-​66; Marika 15:⁠27) E vakilai levu tale ga nikua na veika tawadodonu, era vakila tale ga na lotu Vakarisito dina baleta nira “cati vei ira na lewe ni veivanua kecega.” (Maciu 24:⁠9) Dina ga nira vakalolomataki ena nodra keba ni veivakararawataki na Nazi kei na keba ni cakacaka ni matanitu o Rusia, ra qai dau buturaki, ra beitaki vakailasu, ra qai vakacacani, ia e vakaukauataki ira tiko ga na vakacegu i Karisito. Era vakadamurimuri Jisu tiko, ni tukuni me baleti koya: “Ni a vakasewasewani ko koya, e a sega ni veivakasewasewani lesu tale; ni a vakararawataki, e a sega ni yalataka me na sauma; ia e a laivi koya ga vei koya sa dau lewa vakadodonu.”​—⁠1 Pita 2:​23, VV.

5. Nida rogoca e dua na ka e vaka e tawadodonu ena ivavakoso, na cava meda vakasamataka taumada?

⁵ Eda na sega sara ni vakataki Jisu, ia eda na rairai nanuma ni a caka na ka e tawadodonu vua e dua na lewe ni ivavakoso vakarisito. Ni yaco oqori, de eda vakataki Paula, ni a kaya: “Ko cei sa vakacalai, ka’u sa sega ni lomakatakata?” (2 Korinica 11:⁠29) Na cava e dodonu meda cakava? E dodonu meda tarogi keda, ‘E tawadodonu beka na ka e yaco?’ Ena levu na gauna eda sega ni kila na ka e yaco dina. Eda yalokatakata beka baleta nida rogoca vua e dua e kaya ni kila na ka e yaco. Ia e kaya na iVolatabu: “O koya sa yalowai sa vakabauta na vosa kecega.” (Vosa Vakaibalebale 14:15) E dodonu kina meda qaqarauni.

6. Na cava eda na cakava ke da nanuma ni yaco na ka e tawadodonu ena loma ni ivavakoso?

⁶ Kaya mada ke da nanuma ni caka vei keda e dua na ka e tawadodonu. Na cava ena cakava o koya e tiko e lomana na vakacegu i Karisito? Eda na via vosa vua eda nanuma ni cakava vei keda na ka e tawadodonu. Me isosomi ni noda talanoataka yarayara, vakacava meda vakaraitaka ga vei Jiova ena noda masu da qai nuitaki koya me qai vakavotuya ga na ka dina? (Same 9:​10; Vosa Vakaibalebale 3:⁠5) De dua, na noda cakava oya eda sa na lomavakacegu kina “ka tiko lo.” (Same 4:⁠4) Levu na gauna eda na muria na ivakasala i Paula: “Dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua: me vaka sa sega ni cudruvi kemudou na Karisito, mo dou vaka talega kina.”​—⁠Kolosa 3:​13.

7. Na cava meda kua ni guilecava nida veimaliwai kei ira na tacida?

⁷ Se mani cava eda na cakava, meda nanuma tiko nida sa sega ni cakava rawa e dua na ka ina ka sa yaco, ia e rawa ga nida lewai keda vinaka. Ena ca cake sara ke da kauaitaka vakasivia na ka tawadodonu eda nanuma ni caka vei keda, baleta ena mai vakacacana na noda lomavakacegu. (Vosa Vakaibalebale 18:14) E rawa ni vakavuna meda tarabe da qai sega ni veimaliwai kei na ivavakoso me yacova na gauna e qai caka kina e dua na ka. E vola na daunisame ni “sa sega na ka me ra bale kina” o ira na lomana na ivunau i Jiova. (Same 119:165) E dau yaco kece vei keda na veika tawadodonu. Kua gona ni vakalaiva na leqa oqori me vakaleqa na nomu qaravi Jiova. Vakatara ga na vakacegu i Karisito me lewa na lomamu.

Nida Lomaocaoca

8. Na cava e so na ka e vakavuna na lomaocaoca, na cava e rawa ni yaco nida lomaocaoca?

⁸ Eda na dau lomaocaoca na bula tiko ena “iotioti ni veisiga.” (2 Timoci 3:​1, NW) Dina ni kaya o Jisu: “Dou kakua ni lomaocaoca e na vuku ni nomudou bula, e na ka mo dou kania; se na vuku ni yagomudou, e na ka mo dou vakaisulu kina.” (Luke 12:22) Ia eda sega ni lomaocaocataka ga na veika vakayago. E ‘rarawa na loma’ i Loti ni raica na veika torosobu e yaco tiko e Sotoma. (2 Pita 2:⁠7) O Paula e “lomaleqataka na vei i soqosoqo lewe ni lotu.” (2 Korinica 11:​28, VV) Ena levu ni rarawa i Jisu ena bogi ni bera na siga e mate kina, e “vaka na titiri ni dra na nona buno ni sa titiri ki na qele.” (Luke 22:​44, VV) O koya gona, e sega ni ivakaraitaki ni malumalumu ni vakabauta na lomaocaoca kece. Ia ke sega ni wali na vu ni lomaocaoca, eda na sega ni vakacegu. Nira lomaocaoca e so era sega ni tomana rawa kina na nodra itavi ena nodra qaravi Jiova. E kaya na iVolatabu: “Ni sa bibi na loma ni tamata sa vakacuva.” (Vosa Vakaibalebale 12:25) Na cava gona meda cakava nida lomaocaoca?

9. Na cava e rawa nida cakava me vakaotia na lomaocaoca, ia na mataqali lomaocaoca vakacava ena sega ni rawa ni vakaoti?

⁹ E rawa ni tarovi e so na ka eda lomaocaocataka. Ke vu ni noda lomaocaoca e dua na mate e tauvi keda tiko, ena vinaka meda cakava kina e dua na ka, dina ga ni dui vakatau vei keda na veiqaravi cava eda digitaka.a (Maciu 9:​12) Ke rui levu na noda itavi, de vinaka meda wasea. (Lako Yani 18:​13-​23) Vakacava vei ira tale e so, me vakataki ira na itubutubu, e sega ni rawa ni wasei na nodra itavi? Vakacava o ira na lotu Vakarisito era veitusaqati na watidra? Vakacava na vuvale e leqa sara tu ga vakailavo, se ra bula tiko ena vanua e yaco tiko kina na veivaluvaluti? Ena sega ni rawa meda vakaotia kece na veika e vakavuna tiko na lomaocaoca ena vuravura oqo. Ia e se rawa me tiko ga e lomada na vakacegu i Karisito. E rawa vakacava?

10. Na cava e rua na sala e rawa ni lomavakacegu kina na lotu Vakarisito?

¹⁰ Qara na vakacegu mai na Vosa ni Kalou. E vola o Tui Tevita: “Ni sa rui levu na noqu nanuma sa leqa kina na lomaqu, sa vakamarautaka na yaloqu na nomuni dauveivakacegui.” (Same 94:19) E kunei ena iVolatabu na ‘veivakacegui’ i Jiova. Ena vukea me tiko ga e lomada na vakacegu i Karisito ke da wilika wasoma na iVolatabu. E kaya na iVolatabu:“Mo biuta vei Jiova na nomui colacola bibi, ena tokoni iko ko koya: ena sega ni laivi ira na yalododonu me ra vakayavalataki e na dua na gauna.” (Same 55:22) E vola tale ga o Paula: “Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na dau cikecike kei na vakavinavinaka. Ia na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou e na vuku i Karisito Jisu.” (Filipai 4:​6, 7) Eda na lomavakacegu ke da dau masu wasoma.

11. (a) E ivakaraitaki vinaka vakacava o Jisu ena dau masu? (b) Meda raica vakacava na masu?

¹¹ E ivakaraitaki vinaka o Jisu ena nona dau masu. So na gauna e vosa vei Tamana vakalomalagi me vica na aua. (Maciu 14:23; Luke 6:​12) E vukei koya na masu me vosota na veivakatovolei lelevu. E rui rarawa vakalevu ena bogi ni bera na siga e mate kina. Na cava e qai cakava? E “masu vagumatua.” (Luke 22:​44, VV) Io, e kilai na Luve ni Kalou uasivi ena nona dau masu. E vinakati vakalevu sara vei ira na nona imuri ivalavala ca mera dau masu! O Jisu e vakavulici ira na nona tisaipeli mera “daumasu tiko ka kakua ni ceguoca.” (Luke 18:⁠1) Na masu e sala bibi ni veitaratara kei koya e kilai keda vinaka cake mai na noda dui kilai keda. (Same 103:14) Eda na “masu tikoga” ke da vinakata me tiko ga e lomada na vakacegu i Karisito.​—⁠1 Cesalonaika 5:​17.

Kua Nida Beci Keda

12. Na cava era kaya kina e so ni sega soti ni yaga na nodra veiqaravi?

¹² O Jiova e raici ira na nona dauveiqaravi mera ka domoni. (Akeai 2:​7) Ia e so e dredre mera vakabauta oqo. So era yalolailai baleta nira sa qase, ni tarabi nodra itavi e vale, se nira tauvimate bibi. So e baleta nira a sega ni susugi vakavinaka. So e vakararawataki ira tiko na nodra ivalavala ca makawa, nira nanuma ni sega ni vosoti ira o Jiova. (Same 51:⁠3) Na cava e rawa ni caka ena mataqali rai vaka oya?

13. E veivakacegui vakacava na iVolatabu vei ira na beci ira?

¹³ Na vakacegu i Karisito e vakadeitaka vei keda ni lomani keda o Jiova. Ena vakacegu na lomada nida vakasamataka ni sega ni bau tukuna o Jisu ni vakatau na keda yaga ena noda vakatauvatani keda kei ira na tani. (Maciu 25:​14, 15; Marika 12:​41-​44) E vakabibitaka ga na yalodina. A tukuna vei ira nona tisaipeli: “O koya e na vosota me yacova na i vakataotioti, e na vakabulai.” (Maciu 24:​13, VV) Era “beci” Jisu na tamata, ia e sega ni vakabekataka ni lomani koya o Tamana. (Aisea 53:3; Joni 10:17) E tukuna vei ira na nona tisaipeli nira lomani tale ga. (Joni 14:21) E vakadeitaka o Jisu ni kaya: “E sega li ni volitaki e rua na siparo e na dua na sede? Ia, e na sega ga ni lutu ki na qele e dua vei rau me sega ni kila na Tamamudou. Ia, ko i kemudou, e wiliki yadua sara ga na drau ni ulumudou. O koya gona mo dou kakua ni rere; ni dou sa talei cake sara mai vei ira na siparo e vuqa.” (Maciu 10:​29-​31, VV) Oqo e ivakadei ni loloma i Jiova!

14. Eda vakadeitaka vakacava ni kauaitaki keda yadudua o Jiova?

¹⁴ Tukuna tale ga o Jisu: “E sega ni lako rawa mai vei au e dua na tamata, kevaka sa sega ni vakayarayarataki koya ko Tamaqu sa talai au mai.” (Joni 6:​44) Ni vakayarayarataki keda o Jiova meda muri Jisu, e macala ni vinakata o koya meda bula. E tukuna o Jisu vei ira na nona tisaipeli: “Sa vaka talega oqo na Tamamudou sa tiko mai lomalagi, ni sa sega ni vinakata me yali e dua vei ira na lalai oqo.” (Maciu 18:14) O koya gona, ke o sa veiqaravi tiko ena yalomu taucoko, mo marautaka na cakacaka vinaka o sa cakava tiko. (Kalatia 6:⁠4) Ke vakararawataki iko tiko na nomu ivalavala ca makawa, nanuma ni o Jiova e dauvosoti ira “vakalevu” na veivutuni dina. (Aisea 43:25; 55:​7, NW) Ke dua tale na ka e vakavuna na nomu yalolailai, nanuma ni “voleka ko Jiova vei ira sa ramusu na yalodra; ka sa vakabulai ira sa dasila na lomadra.”​—⁠Same 34:⁠18.

15. (a) E saga vakacava o Setani meda kua ni lomavakacegu? (b) Eda nuitaki Jiova vakacava?

¹⁵ E saga vakaukaua o Setani meda kua ni lomavakacegu. A vakavuna na ivalavala ca eda sucukaya mai eda valuta tiko oqo. (Roma 7:​21-​24) E vinakata o koya meda vakabauta ni na sega ni vakadonuya na Kalou na noda veiqaravi baleta nida tamata ivalavala ca. Kua ni vakalaiva na Tevoro me vakayalolailaitaki iko! Qarauna na nona ilawaki, qai vakayagataka na nomu qaqarauni oqori mo rawa kina ni vosovoso. (2 Korinica 2:​11; Efeso 6:​11-​13) Nanuma, e “cecere cake na Kalou mai na yaloda, ka sa kila na ka kece ga ko koya.” (1 Joni 3:​20, VV) E sega ni raica ga na noda ivalavala ca o Jiova. E raica tale ga na inaki ni noda cakava na ka. Me vakacegui keda mada ga na vosa e tauca na daunisame: “Ni na sega ni biuta na nona tamata ko Jiova, ka na sega ni laivi ira na nonai votavota.”​—⁠Same 94:⁠14.

Duavata Ena Vakacegu i Karisito

16. Eda sega ni sasaga duadua tiko vakacava meda vosota?

¹⁶ E vola o Paula meda vakatara me lewa na lomada na vakacegu i Karisito baleta nida ‘kacivi ina duabau ga na yago.’ O ira na lotu Vakarisito lumuti a volavola vei ira o Paula era kacivi mera tikiniyago i Karisito, era okati kina na ivovo ni lumuti ena gauna oqo. Era duavata kei ira na ‘so tani tale na sipi’ mera “dua bau na qele ni sipi” me liutaki ira e “dua bau nai vakatawa,” o Jisu Karisito. (Joni 10:16) Na “qele ni sipi” oqo mai na veiyasa i vuravura e vica na milioni na kedra iwiliwili, era vakatara na vakacegu i Karisito me lewa na lomadra. E vukea meda vosota na noda kila nida sega ni sasaga duadua tiko. E vola o Pita: “Dou vorati koya [o Setani] ni dou sa tu dei e na vakabauta, ni dou sa kila sa vakayacori na ka rarawa vakakina vei ira na wekamudou era sa tiko voli e vuravura oqo.”​—⁠1 Pita 5:⁠9.

17. Na cava e uqeti keda meda vakatara na vakacegu i Karisito me lewa na lomada?

¹⁷ Meda vuataka kece tiko mada ga na vua ni yalo tabu ni Kalou na vakacegu. (Kalatia 5:​22, 23) O ira e kunei nira vakacegu, ra sega ni tauviduka, ra qai sega ni cala, ena vakalougatataki ira o Jiova mera na bula tawamudu ena vuravura parataisi ena tiko kina na ivalavala dodonu. (2 Pita 3:​13, 14) E dodonu gona meda vakatara na vakacegu i Karisito me lewa na lomada.

[iVakamacala e ra]

O se Nanuma Tiko?

• Na cava na vakacegu i Karisito?

• E lewa vakacava na lomada na vakacegu i Karisito nida sotava na veika tawadodonu?

• E vukei keda vakacava na vakacegu i Karisito nida lomaocaoca?

• E vakacegui keda vakacava na vakacegu i Karisito nida beci keda?

[iYaloyalo ena tabana e 15]

E vakatautaka nona bula o Jisu vei Jiova e matadra na beitaki koya

[iYaloyalo ena tabana e 16]

E vaka na imoko i tama dau loloma na veivakacegui i Jiova nida lomaocaoca

[iYaloyalo ena tabana e 18]

Marautaka vakalevu na Kalou na noda vosota