Tudei ena Yalomatua Kei na Lomadei

Soqo ni Tikina​—Vakadeitaka Nida Mataveitacini

SA YABAKI 50 o Joseph F. Rutherford, e tautauvimate ni voleka ni dua na yabaki nona vesu tu vakatawadodonu, ia e cakacaka voli ga ena marau. E tube kato ga qai vukei ira nona itokani lotu Vakarisito ina nodra rumu ena otela. Rua nona itokani eratou a curu vata e valeniveivesu​—erau Gonevuli ni iVolatabu tale ga​—erau veivuke ni vakaraitaka vei ira na lewe vica vata era wawa tu na vanua mera vakaicili kina. E qai oti ga na cakacaka oqo ni sa sivi na bogilevu tutu. Era marau o ira kece era tiko e kea. Na cava e vakarau caka?

Oqo na yabaki 1919, era se qai bula ga mai ena veivakacacani ca sara na Gonevuli ni iVolatabu (era kilai nikua mera iVakadinadina i Jiova). Me vakabulabulataki ira tale na mataveitacini, e caka kina na soqo ni tikina e Cedar Point, Ohio, mai Mereke, mai na 1 ina 8 Sepiteba, 1919. Ena iotioti ni siga ni soqo, era vakatudaliga matua e le 7,000 vei Brother Rutherford ni vakayaloqaqataki ira yadua na tiko e kea ena veivosa: “Oni matataka na Tui ni veitui kei na Turaga ni veituraga, ni kacivaka tiko vei ira na tamata . . . na matanitu lagilagi ni noda Turaga.”

Vei ira na tamata i Jiova, na soqo vaka oqo se tekivu sara mai vei ira e Isireli makawa. (Lako Yani 23:14-17; Luke 2:41-43) Na soqo vaka oya e gauna marautaki, e vukei ira kece na tiko kina mera vakananuma na Vosa ni Kalou. Vaka tale ga oya na soqo ni tikina ni iVakadinadina i Jiova ena noda itabagauna, e vakabibitaki kina na veika vakayalo. Vei ira na vakararai tu, na soqo marautaki vaka oqo e vakadeitaka nira duavata na iVakadinadina ena ivau kaukaua ni mataveitacini lotu Vakarisito.

Sasaga me Tiko Kina

O ira na lotu Vakarisito nikua era kila ni soqo ni tikina e gauna ni veivakabulabulataki vakayalo kei na veivakavulici ena Vosa ni Kalou. Era raica na soqoni lelevu vaka oqo me dua vei ira na sala bibi era vukei kina mera ‘tudei ena yalomatua kei na lomadei ena nodra muria taucoko na loma ni Kalou.’ (Kolosa 4:​12, VV) Era tokona kina mai vu ni lomadra na iVakadinadina na soqo vaka oqo, ra qai saga vakaukaua mera tiko kina.

Vei ira e so, nodra tiko ena soqo ni tikina e gadrevi kina na vakabauta kei na vorati ni veika dredre. Me kena ivakaraitaki, dikeva mada e dua na iVakadinadina sa kena marama mai Austria. Dina ni matenisuka qai vinakati me cula e veisiga, e saga me tiko ena siga kece ni soqo ni tikina ena nona vanua. Mai Idia, eratou raica e dua na vuvale iVakadinadina eratou le levu qai dravudravua, ni na dredre me ratou tiko ena soqo ni tikina. Ia e qai veivuke e dua ena nodratou vuvale. “Niu sega ni via calata na soqo ni tikina,” e kaya, “au volitaka noqu sau koula me saumi kina na ilakolako. E veiganiti vinaka na ka au cakava, ni vaqaqacotaka neitou vakabauta na veimaliwai kei na veika keitou sotava e kea.”

Mai Papua Niu Kini, e dua na ilala tataleitaki era se bera ni papitaiso era via tiko ena soqo ni tikina e caka ena koroturaga. Eratou mani taroga e dua na turaga e tiko nona lori ena nodratou koro, se na vica beka na kena isau me kauti iratou ina soqo ni tikina. Ni leka na nodratou iqila, eratou mani veivosaki kei na turaga oqo me ratou cakacaka ena nona vale, me ratou veisautaka na itaratara ni nona valenikuro. Na ka oqo eratou lako rawa kina ina soqo ni tikina qai yaga vei iratou nodratou tiko ena porokaramu kece.

Na yawa ni vanua e sega ni dua na ka vei ira na iVakadinadina i Jiova ni lomadra mera tiko ena soqo ni tikina. Ena 1978, e vodo basikeli ena 1,200 na kilomita mai Poladi e dua na cauravou ena loma ni ono na siga me tiko ena soqo ni tikina e Lille, mai Varanise. Ena vulaikatakata ni 1997, e 1,200 na kilomita na yawa ni vanua erau sivia mai e rua na iVakadinadina mai Mongolia me rau tiko ena soqo vakarisito e Irkutsk, mai Rusia.

Votu na Mataveitacini Dina

Era vakadinata na vakararai tu ni kune na duavata kei na mataveitacini dina vei ira na iVakadinadina ena nodra soqo ni tikina. Levu era qoroya ni sega na veivakaduiduitaki ena kedra maliwa na tiko ena soqo kei na veilomani e laurai vei ira mada ga era se qai sota vakadua.

Donuya na soqo ni veimatanitu a caka ena dua na gauna sa oti mai Ositerelia, a via tiko tale vakalailai o dauniveivakasarasarataki kei ira na mataveitacini era tiko ena soqo ni tikina ni taleitaka nona vakasarasarataki ira voli ena loma ni dua na macawa. E druka ena nodra veilomani kei na duavata, e sega ni vakabauta nira na veiyaloni, ni levu mada ga era sega tu ni veikilai. Gauna me sa biuti ira kina, e kerea me dua mada na nona vosa lekaleka. E bau vakatokai ira tale ga na mataveitacini mera “taciqu,” qai vakavinavinakataki ira, ia e sega ni tinia rawa nona vosa ni sa curuoso na lomana ena luluvu.

Ena 1997, e caka kina ena imatai ni gauna e Sri Lanka na soqo ni tikina ena tolu na vosa ena dua na valenisarasara levu. E caka vata ga ena dua na gauna na porokaramu ena vosa vakavalagi, vaka Sinhalese, kei na vaka Tamil. Ena vuravura e sa qai sivia tiko ga kina na veicati vakamatatamata, e kauaitaki sara vakalevu na soqo vaka oqo era tiko vata kina na ilawalawa e duidui nodra vosa. E dua na ovisa a taroga e dua na tacida: “O cei e cicivaka na soqo ni tikina oqo​—o ira na Sinhalese, se na Tamil, se o ira na kai valagi?” E mani sauma na tacida: “Sega, keimami veivuketaka vata.” E kidroa sara ga na ovisa. Era tabaka na vakasausau na tiko ena soqo ni oti nodra duavata ena “vakaemeni” ena iotioti ni masu. Voleka nira luluvu kece na lewenisoqo. Io, na soqo ni tikina e vakadeitaka nida mataveitacini.​—Same 133:1.a

[iVakamacala e ra]