“Duidui Nodra Vosa, ia Era Duavata ena Loloma”

Veivakabulai. Veisereki. Sa vica vata na senitiuri na noda vinakata tu na lewe i vuravura meda galala mai na icolacola kei na nuiqawaqawa. Eda na walia vakacava na noda nuiqawaqawa? Rawa beka nida vakabulai? Ke vaka kina, ena sala cava?

OQORI na ulutaga veitaravi ni soqo ni tikina siga tolu era a vakarautaka na iVakadinadina i Jiova, a tekivu ena Me 2006. Na kena usutu “Voleka Noda Vakabulai!”

E ciwa vei ira na soqo ni tikina oqo era tiko kina e vica vata na udolu na mata mai na veimatanitu. A vakayacori ena vula o Julai kei na Okosita 2006, mai Prague, na koroturaga kei Czech Republic; mai Bratislava, na koroturaga kei Slovakia; mai Chorzow kei Poznan, e Poladi; a kei na lima tale na siti e Jamani, oya mai Dortmund, Frankfurt, Hamburg, Leipzig, kei Munich. Na kedra iwiliwili kece na tiko ena soqo ni tikina oqo e sivia na 313,000.

Na yalo cava e vakilai ena soqo ni tikina? Na itukutuku cava era na vakarogoya na tabana ni itukutuku? Ni sa cava na soqo, na cava era vakila na vakaitavi kina?

Vakavakarau

Era nanamaki vakalevu ina soqo ni tikina na vulagi era sureti kei ira na iVakadinadina itaukei nira kila ni soqo vakayalo vaka oqo e dau guiguilecavi dredre. E cakacaka levu toka na kena tuvanaki na nodra icili na mata ni soqo ni tikina. Me kena ivakaraitaki na soqo e Chorzow, o ira na iVakadinadina mai Poladi era vakaicilitaki ira e rauta ni 13,000 na vulagi mai na tokalau kei Urope. O ira oqo era cavutu mai Armenia, Belarus, Estonia, Georgia, Kazakhstan, Kyrgyzstan, Latvia, Lithuania, Mereke, Moldova, Rusia, Tajikistan, Turkmenistan, Ukraine, kei Uzbekistan.

Levu vei ira na sureti era sa vakavakarau tu me vica vata na vula. O Tatiana, e cakacaka vakaitalatala vakatabakidua mai Kamchatka na iyarabale kei Rusia ena vuaicake kei Japani, e dua taucoko na yabaki nona maroroi ilavo me baleta na nona ilakolako ina soqo. Ena lakova e 10,500 na kilomita. Taumada, a vodo waqavuka me 5 na aua, vodo sitimanivanua voleka ni tolu na siga, qai 30 tale na aua e vodo basi kina me yaco i Chorzow.

Era vica vata na udolu era bolecakacaka ena soqo ni tikina, oya mera samaka vinaka na vanua ni soqo me ganita na sokalou. (Vakarua 23:14) Dua na kena ivakaraitaki, mai Leipzig era samaka vinaka na rara na iVakadinadina e kea, ra qai yalataka nira na sasamaki tale ni oti na soqo ni tikina. Kena itinitini, ratou bokoca na vakailesilesi ni raraniqito na ilavo e lavaki me saumi kina na kena samaki.

Veisureti

Era vakaitavi na ivavakoso e veiyasa i vuravura ena kena vakarogoi na Soqo ni Tikina “Voleka Noda Vakabulai!” O ira tale ga na tiko ena soqo ni tikina lavotaki era gumatua ena sasaga oqo. Era tomana tiko ga me yacova sara ni sa karobo, ni bera na siga ni soqo. E vakavatukana beka na nodra lomakatakata?

O Bogdan e dua na iVakadinadina mai Poladi, a sotava e dua na kena turaga e vinakata tale ga me tiko ena soqo ni tikina, ia e leka na nona iqila me lakova kina e 120 na kilomita me qai yaco i Chorzow. Qai macala mai ni se galala tiko e dua na idabedabe ni basi e sauma na ivavakoso e kea. E kaya o Bogdan: “Keimami tukuna vua na turaga oya ni rawa ni tomani keimami ke yaco totolo yani ena vanua ni vakavodo ena 5:​30 ena mataka, ena sega tale ga ni sauma e dua na ka.” A ciqoma na veisureti na turaga oya qai tiko sara ena soqo ni tikina. E muri a qai vola vei ira na tacida: “Noqu mai tiko ena soqo ni tikina oqo, au vakadeitaka sara ga meu dua na lewenivanua vinaka.”

Mai Prague, e dua na turaga a vakaicili tiko ena otela vata ga era tiko kina na mata ni soqo ni tikina mai Peritania, a kaya vei ira ena dua na yakavi ni a tiko tale ga ena porokaramu ni siga oya. Na cava e uqeti koya? E kaya ni a taura e tini na ivola ni veisureti vei ira na tacida e salatu ena korolevu, e kila ni dodonu me tiko kina! Dua na ka nona qoroqoro qai gu na lomana me vulica e levu tale na ka.​—1 Timoci 2:​3, 4.

Porokaramu e Veivakabulabulataki Vakayalo

E veivosakitaki ena porokaramu na sala meda walia kina na veimataqali leqa. Na ivakasala vakaivolatabu tau vakadodonu e vakamacalataki kina na sala me wali se vosoti kina na leqa.

O ira na sa qase, tautauvimate, mate na wekadra voleka, se so tale na leqa vakaitaukei era vakayaloqaqataki mai na iVolatabu me rawa ni donu tiko ga nodra rai. (Same 72:​12-​14) O ira na vakawati kei ira na itubutubu era rogoca na ivakasala me marau kina nodra bula vakawati kei na nodra tuberi vinaka na luvedra. (Dauvunau 4:​12; Efeso 5:​22, 25; Kolosa 3:​21) O ira na lotu Vakarisito gone​—era sotava na idre ni veimurimuri e koronivuli, ia, nira rogoca na ivakasala yaga mai vale vaka kina ena ivavakoso e yavutaki ena Vosa ni Kalou​—ena yaga dina vei ira mera digia vinaka kina na nodra ilala kei na sala mera “dro tani mai na gagadre ca vakacauravou.”​—2 Timoci 2:​22.

Mataveitacini e Vuravura Raraba

Era dau tuberi vinaka ena iVolatabu na iVakadindina i Jiova ena gauna ni nodra soqoni. (2 Timoci 3:​16) Na vuna e lavotaki kina na soqo ni tikina baleta nira cavutu mai na duidui vanua. Na soqo ni tikina lavotaki kece e vakarautaki kina na kakana vakayalo ena levu na vosa. Era vunau ena tolu na siga oya na lewe ni iLawalawa Dauvakatulewa ni iVakadinadina i Jiova, vaka kina na kena vakarogoi na irogo mai na so tale na vanua. Na ivunau kece oqo kei na irogo era vakadewataki me yaga vei ira na duikaikai era tiko.

Era gu na sureti mai mera sotavi ira na tacidra mai na veivanua. “E sega ni vakalatilati na duidui ni nodra vosa,” e kaya e dua na tacida tagane. “E kena veibasai ga, ni vakamarautaki ira. O ira na vulagi oqo era cavutu mai na duidui vanua, ia era duavata ena vakabauta.” O ira na tiko ena Soqo ni Tikina e Munich era kaya vaka oqo: “Duidui nodra vosa ia era duavata ena loloma.” Se mani vanua cava era cavutu mai kina kei na duidui ni nodra vosa, era kila ga nira maliwai ira tiko na nodra itokani dina​—oya o ira na tacidra vakayalo.​—Sakaraia 8:​23.

Vakavinavinaka

Na draki ni Soqo ni Tikina e Poladi e vakatovolei kina na nodra rai kei na nodra vosota na tiko kina. Sega wale ga ni tau na uca ena levu na gauna ia na batabata e rauta ni 14 na dikiri celcius. Kaya e dua na tacida tagane mai Mereke: “E dua na draki batabata au se qai bau sotava ena dua na soqo ni tikina, e lailai ga na ka au vulica mai na porokaramu. Ia e vakatubuqoroqoro na raici ira na tacida mai na veivanua ena nodra veikauaitaki kei na nodra mamarau. Ena guiguilecavi dredre na soqo ni tikina oqo!”

Dua na ka era na sega ni guilecava o ira na vosa vakaPoladi era tiko ena soqo, oya na kena soli na ivola na Insight on the Scriptures ena vosa oya​—e vakalougatataki dina na nodra vosota na batabata kei na uca. Na kena soli na ivola vou na Live With Jehovah’s Day in Mind e vakavu marau tale ga ena Soqo ni Tikina “Voleka Noda Vakabulai!”

Levu era tiko ena soqo e tu tale ga na ka era na guilecava dredre. E nanuma lesu o Kristina, e dua na tacida yalewa mai Czech Republic a bole me vodo basi kei ira na ilawalawa era gole mai vanuatani: “Ni keimami sa veitalatala sa qai kauti au vakatikitiki e dua na tacida yalewa, mokoti au, qai kaya: ‘Au kila niu sa bau qaravi vinaka! O kauta sara ga yani na keimami kei na meimami wai ena vanua keimami dabe tiko kina. Vinaka vakalevu na loloma kei na veikauaitaki.’” E vakaibalebaletaka na marama oqo na vakarautaki ni kedra ivakasigalevu na gole mai vanuatani. “E dua na cakacaka keimami se sega ni vakayacora vakadua,” e vakamacalataka e dua na tacida tagane. “Okati kina na kena kau e rauta ni 6,500 na ivakasigalevu ena dua na siga. E veiuqeti nida raica na kedra lewe levu, bau kina o ira na gone era bole mera veivuke.”

Kaya e dua na tacida yalewa mai Ukraine a lako ena soqo ni tikina i Chorzow: “E tarai keimami dina na nodra loloma, kauai, kei na nodra yalovinaka na tacida. Keimami sega ni vakamacalataka rawa na neimami vakavinavinaka.” O Annika e dua na goneyalewa yabaki walu mai Finiladi, e vola ina valenivolavola ni tabana ni iVakadinadina i Jiova e Poladi: “E totoka dina na soqo ni tikina mai na kena au a nanuma taumada. Sa dua na ka talei noda lewena na isoqosoqo i Jiova, baleta nira tu na noda itokani ena veiyasai vuravura!”​—Same 133:1.

Ka Era Tukuna na Vakararai Tu

Ni bera na soqo ni tikina, a tuvanaki na nodra sarasara na sureti mai. Ena lomanivanua kei Bavaria, era mai cegu na vulagi ena Kingdom Hall, ra qai veitavaki na iVakadinadina e kea. E qoroqoro e dua na dau veivakasarasarataki sega ni iVakadinadina ni raica nodra veimositi na mataveitacini. “Ni keimami vodo basi lesu ina otela,” e kaya e dua na tacida tagane a sureti, “e kaya o koya a vakasarasarataki keimami ni keimami duidui mai vei ira na vo ni ilawalawa era dau mai sarasara. Keimami vakaisulu vinaka, keimami tokoni ira tale ga na liutaki keimami tiko. Sega na vosa ca se ue. E vakadrukai koya dina ni rawa sara ga nira itokani vinaka na vulagi eda se sega sara mada ga ni kilai ira.”

E vakamacalataka e dua na tacida tagane e cakacaka ena Tabana ni iTukutuku ena soqo ni tikina mai Prague: “Ena mataka ni Sigatabu, a mai raici keitou na ovisa e lesi me mai yadra. E qoroya ni vakilai na veiyaloni qai kaya ni sega ni dua na ka me cakava. Kaya tale ga nira via kila na tiko voleka e kea se cava e vakayacori ena soqo. Ni kaya ga ni nodra soqo na iVakadinadina i Jiova, era kureulu ga, sa qai kaya vei ira na ovisa: ‘Ke ra bau vakaitovo mada ga na lewenivanua me vakataki ira na iVakadinadina i Jiova, ena sega ni gadrevi na ovisa.’”

Levu Era sa Vakabulai!

Na Vosa ni Kalou e umani ira vata na lotu Vakarisito mera veiyaloni se duavata, dina ga ni duidui nodra itovo vakavanua. (Roma 14:19; Efeso 4:​22-​24; Filipai 4:7) Ena soqo ni tikina lavotaki na “Voleka Noda Vakabulai!” e vakadinadinataki kina na tikina oqo. Era sa vakabulai na iVakadinadina i Jiova ena ituvaki e vaka na mate dau veitauvi e sotavi tu e vuravura. Na veivakalolomataki, itovo kaukaua, kei na veicati vakamatatamata​—oya e vica ga na leqa sa taka levu tu nikua​—sa sega ni laurai oqori ena kedra maliwa, ia era vakanamata ina gauna sa na sega tale kina na leqa kece vaka oqo ena dela i vuravura.

O ira na tiko ena soqo ni tikina oqo era vakila na nodra duavata na iVakadinadina era gole mai na veivanua kei na duidui itovo. E laurai oqo ni sa cava na soqo. Era vakasausau kece, mokoti nodra itokani vou, ra qai veitaba. (1 Korinica 1:​10; 1 Pita 2:​17) Dua na ka na levu ni nodra marau ra qai vakadeitaka ni sa voleka dina na nodra vakabulai mai na leqa kei na nuiqawaqawa, era dui lesu ina nodra vanua kei na nodra ivavakoso ra qai vakadeitaka mera kubeta dei tiko ga na “vosa ni bula.”​—Filipai 2:​15, 16.

[iVakamacala e ra]

[Kato/​iYaloyalo ena tabana e 10]

Ruasagavulukaono na Vosa​—Vaka ga e Dua na Vosa

Ena ciwa na vanua e vakayacori kina na soqo ni tikina, a rogoci na porokaramu ena nodra vosa ga. Na soqo mai Jamani, e soli tale ga na ivunau ena 18 tale na vosa. Mai Dortmund e soli na ivunau ena vosa vakaArapea, vosa vakaPerisia na Farsi, vakaPotukali, vakaSipeni kei na vakaRusia; mai Frankfurt ena vosa vakavalagi, vakaVaranise kei na vaka Serbia/Croatia; mai Hamburg ena vosa vaka Denmark, vakaNecaladi, vakaFiniladi kei na Tamil; mai Leipzig ena vosa vakaJaina, vakaPoladi kei na vakaTaki; vaka kina mai Munich ena vosa vaKirisi, vakaItali kei na vosa vagalu vakaJamani. Na soqo ni tikina mai Prague e soli na ivunau kece ena vosa vaka Czech, vakavalagi kei na vakaRusia. Mai Bratislava e rogoci na porokaramu ena vosa vakavalagi, vaka Hungary, vaka Slovakia, kei na vosa vagalu vaka Slovakia. Mai Chorzow e rogoci ena vosa vakaPoladi, vakaRusia, vaka Ukraine kei na vosa vagalu vakaPoladi. Vaka kina mai Poznan, ena vosa vakaPoladi kei na vakaFiniladi.

E ruasagavulukaono taucoko na vosa! Io, e duidui na nodra vosa na tiko ena soqo ni tikina, ia, era duavata ga ena nodra veilomani.

[iYaloyalo ena tabana e 9]

Era marau na mata mai Croatia nira mai taura e Frankfurt, na “New World Translation” ena nodra vosa