Eda Vutuniyau ena Veivakalougatataki i Jiova

“Na veivakalougatataki maivei Jiova sa ia na veivakavutuniyautaki, ka sa sega ni kuria ko koya e na ka rarawa.”​—VOSA VAKAIBALEBALE 10:22.

1, 2. Na cava e sega ni vakatau kina na marau ena levu ni iyau e taukeni?

ERA ogataka e vica vata na milioni na qara iyau vakayago. Ia e bau vakamarautaki ira beka na veika vakayago? “Au sega ni vakasamataka rawa e dua na gauna mera lomaleqataka kina vaka oqo na nodra bula na tamata,” e kaya na Australian Women’s Weekly. E kuria: “E veicalati dina. E tukuni vei keda ni toka ena dua na ivakatagedegede vinaka na bula vakailavo e Ositerelia, ni sa qai totoka ga na bula. . . . Ia e vakilai levu na nodra yalolailai na lewenivanua. Era vakila na tagane kei na yalewa ni yali tiko e dua na ka ena nodra bula, ia era sega ni kila rawa se cava oya.” E dina gona na kena tukuni ena iVolatabu ni sega ni vakatau na noda marau se bula ena veika vakayago eda taukena!​—Dauvunau 5:10; Luke 12:15.

² E vakaraitaka na iVolatabu nida na marau vakalevu ga ke vakalougatataki keda na Kalou. Oqo na vuna e tukuna kina na Vosa Vakaibalebale 10:22: “Na veivakalougatataki maivei Jiova sa ia na veivakavutuniyautaki, ka sa sega ni kuria ko koya e na ka rarawa.” Ena dau rarawa o koya e kocova me vutuniyau vakayago. Sa rauta me kaya na yapositolo o Paula: “Ko ira era gadreva me ra vutuniyau era sa bale e na veitemaki ka tacori e na gagadre ca ka lialia e vuqa sa kuitaki ira na tamata ki na leqa kei na rusa. Na dau lomana na i lavo sa i koya na vu ni ka ca kecega, ia e so era sa gole tani mai kina mai na vakabauta ka voroka vaka i ira na yalodra e na yaluma.”​—1 Timoci 6:9, 10, VV.

3. Na cava era vakatovolei kina na dauveiqaravi ni Kalou?

³ Ena yasana adua, ena tauca na veivakalougatataki e sega ni bau vakilai kina na rarawa o koya e “vakarorogo ki na vosa i Jiova.” (Vakarua 28:2) Ia, era na taroga beka e so, ‘Ke sega ni rarawa o koya e vakalougatataka o Jiova, na cava era dau rarawa kina e levu na dauveiqaravi ni Kalou?’ E vakaraitaka na iVolatabu ni vakatara na Kalou na veivakatovolei, ia e vakavuna tiko o Setani, na nona vuravura ca oqo, kei na keda ituvaki valavala ca. (Vakatekivu 6:5; Vakarua 32:4, 5; Joni 15:19; Jemesa 1:14, 15) E dau solia ga o Jiova “nai solisoli vinaka kecega kei nai solisoli kecega e yaga sara.” (Jemesa 1:17) Oya na vuna eda na sega kina ni rarawa ni vakalougatataki keda o koya. Meda raica mada e so na isolisoli vinaka ni Kalou.

Vosa ni Kalou—Na iSolisoli Uasivi

4. Na veivakalougatataki kei na isolisoli uasivi cava era marautaka na tamata i Jiova ena gauna ni “[i]vakataotioti” oqo?

⁴ Me baleta na gauna ni “[i]vakataotioti,” e kaya na parofisai i Taniela: “Ka na vakalevutaki talega na vuku.” Ia, na ibalebale ni vosa oya e qai vakamacalataki tale ena vosa oqo: “Ka ra na sega sara ni kila rawa ko ira na tamata ca; ia ko ira sa vuku era na kila rawa.” (Taniela 12:4, 10) Vakasamataka mada oya! Na ivalavala ni volai ni parofisai ena Vosa ni Kalou e vakadredretaka vei ira na tamata ivalavala ca mera kila na kena ibalebale, ia era kila ga na tamata i Jiova. “Au sa vakavinavinaka vei kemuni Tamaqu, na Turaga ni lomalagi kei vuravura,” e masuta na Luve ni Kalou, “ni ko ni sa vunia na veika oqo vei ira na vuku kei ira na kilaka, ka vakatakila ga vei ira na gone lalai.” (Luke 10:21, VV) Eda kalougata ni rawa meda taukena na isolisoli uasivi, na Vosa volai ni Kalou, na iVolatabu, da qai okati kei ira e vakatara o Jiova mera vuku ena veika vakayalo.​—1 Korinica 1:21, 27, 28; 2:14, 15.

5. Na cava na vuku, eda na rawata vakacava?

⁵ Eda na sega ni vuku ena veika vakayalo ke sega “na vuku maicake.” (Jemesa 3:17) Na vuku e okati kina na noda vakayagataka na noda kila kei na yalomatua meda walia kina na leqa, vorata na veika rerevaki, rawata na noda isausau, se solia na ivakasala momona. Eda rawata vakacava na vuku vakalou oqo? E kaya na Vosa Vakaibalebale 2:6: “Sa solia na vuku ko Jiova: sa lako mai na gusuna na kila ka kei na yalomatua.” Io, ena vakavukui keda o Jiova ke da masulaka tiko na vuku, me vaka ga na nona solia vei Tui Solomoni “na yalo sa vuku ka daukila rawa na ka.” (1 Tui 3:11, 12; Jemesa 1:5-8) Meda rawata na vuku oya ena vinakati meda vakarorogo tiko ga vei Jiova nida vulica wasoma da qai bulataka na nona Vosa.

6. Na cava e ka vakavuku kina meda bulataka na lawa ni Kalou kei na kena ivakavuvuli?

⁶ Na vuku torocake duadua e kune ga ena lawa kei na ivakavuvuli ni iVolatabu. E yaga ina noda bula vakayago, kei na bula vakayalo, ina noda vakasama, kei na lomada. E veiganiti kina nona lagata na daunisame: “Sa vinaka sara na vunau i Jiova, ka sa saumaka na yalo: sa dina nai tukutuku i Jiova, ka sa vakavukui ira era sa sega ni vuku. Sa dodonu nai lesilesi i Jiova, ka sa vakamarautaka na yalo: sa savasava nai vakaro i Jiova, ka sa vakararamataka na matada: sa savasava na rerevaki Jiova, ka sa tu dei ka tawa mudu: sa dina na lelewa i Jiova, ka sa dodonu kecega. A ka oqo sa daugadrevi vakalevu cake, ka vakalailai na koula, io, na koula vinaka sara e levu.”​—Same 19:7-10; 119:72.

7. Na cava ena yaco ke beci na lawa ni Kalou?

⁷ Ena yasana kadua o ira na beca na lawa ni Kalou era na sega ni kunea na marau kei na bula galala era qara tiko. Era na qai vakila ga ni sega ni rawa mera vakalialia na Kalou, baleta ni ka ga era kaburaka era na tamusuka. (Kalatia 6:7) Era vica vata na milioni era sa tamusuka tiko na nodra beca na ivakavuvuli vakaivolatabu ena nodra bukete e sala, tauvi ira na mate ca rerevaki, kei na bobula ina wainimate gaga. Ke ra sega ni veisautaka na ivakarau ni nodra bula, era na tini mate ga kina se ena vakarusai ira na Kalou.​—Maciu 7:13, 14.

8. Na cava era marau kina o ira na taleitaka na Vosa ni Kalou?

⁸ Ia era na vakalougatataki ena gauna oqo kei na gauna e se bera mai o ira na taleitaka na Vosa ni Kalou ra qai bulataka. Era vakila na yaga ni kena sereki ira na lawa ni Kalou, era marau dina, ra vakanamata tale ga ina gauna era na vagalalataki kina mai na ivalavala ca kei na leqa e kauta mai. (Roma 8:20, 21; Jemesa 1:25) E dei na vakanuinui oqo baleta ni yavutaki ena iloloma levu duadua ni Kalou vua na tamata—⁠na isoro ni veivoli nei Luvena duabau ga e vakatubura, o Jisu Karisito. (Maciu 20:28; Joni 3:16; Roma 6:23) Na isolisoli uasivi oqo e vakaraitaka na levu ni nona lomana na kawatamata na Kalou qai ivakadei tale ga ni nodra vakalougatataki o ira na vakarorogo tiko vei Jiova.​—Roma 8:32.

Vakavinavinakataka na iSolisoli ni Yalo Tabu

9, 10. E yaga vakacava vei keda na isolisoli i Jiova na yalona tabu? Vakamacalataka e dua na kena ivakaraitaki.

⁹ Meda vakavinavinakataka tale ga na yalona tabu ni oqo e dua tale na isolisoli loloma ni Kalou. Ena siga ni Penitiko ena 33 S.K., e vakauqeti ira na vakarogoci koya tiko e Jerusalemi na yapositolo o Pita: “Dou veivutuni, ka papitaisotaki, koi kemudou yadua, e na yaca i Jisu Karisito, me bokoci kina na nomudoui valavala ca, ka dou na rawata na Yalo Tabu mei solisoli.” (Cakacaka 2:38) Ena gauna oqo e solia tiko o Jiova na yalona tabu vei ira na nona dauveiqaravi yalayala oti era masulaka ra qai vinakata mera cakava na lomana. (Luke 11:9-13) Ena veigauna sa oti, e dau vakaukauataki ira na tagane kei na yalewa vakabauta, okati kina o ira na lotu Vakarisito taumada, na kaukaua e dau vakayacoka oqo, na yalo tabu ni Kalou. (Sakaraia 4:6; Cakacaka 4:31) E rawa tale ga ni vakaukauataki keda, dina ga nida sotava tiko na veika dredre na tamata i Jiova.​—Joeli 2:28, 29.

¹⁰ Vakasamataki Laurel mada, e polio qai davo toka ena misini ni yatevuso me 37 na yabaki.a Dina ga ni sotava na bula dredre na tacida yalewa oqo, e kaukaua tu ga nona qarava na Kalou me yacova ni vakacegu. E vakalougatataki Laurel vakalevu o Jiova. E vakadinadinataki oqo ena nona vukei ira e lewe 17 mera kila na ka dina mai na iVolatabu, dina ga ni davo vakatadraicake tu ga ena lomanimisini ena 24 na aua dua na siga! Eda lai nanuma kina na vosa i Paula: “Ni’u sa malumalumu, au sa qai kaukauwa.” (2 Korinica 12:10) Io, na noda rawaka ena cakacaka vakavunau e sega ni vu mai na noda kaukaua se maqosa, e vukei keda ga kina na Kalou baleta ni dau solia na yalona tabu vei ira na rogoci koya.​—Aisea 40:29-31.

11. Na itovo cava e vuataka na yalo tabu ni Kalou vei ira na vakaitovotaka na “i tovo vou”?

¹¹ Nida talairawarawa vua na Kalou ena vukei keda na yalona tabu meda vuataka na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, kei na ivalavala malua. (Kalatia 5:22, 23) Na “vua ni yalo tabu” oqo e tiki ni “i tovo vou” era sulumaka na lotu Vakarisito me sosomitaka na itovo vakamanumanu a tu vei ira e liu. (Efeso 4:20-24, VV; Aisea 11:6-9) E uasivi duadua vei ira na loloma, “o koya sai vau vinaka sara.”​—Kolosa 3:14.

Veilomani Vakarisito—Na iSolisoli me Vakamareqeti

12. Era vakaraitaka vakacava na nodra loloma o Tapaica kei na so tale na lotu Vakarisito ena imatai ni senitiuri?

¹² Noda veilomani na lotu Vakarisito e isolisoli tale ga ni Kalou e dodonu meda vakamareqeta. Ni lewai vinaka, e rawa ni titobu cake sara na noda veilomani na vakabauta vata mai na veilomani vakaveiwekani vakayago. (Joni 15:12, 13; 1 Pita 1:22) Me kena ivakaraitaki, vakasamataki Tapaica mada, e dua na marama lotu Vakarisito ivakaraitaki vinaka ena imatai ni senitiuri. E “dau vakaogai koya e na veicakacaka vinaka kece ga,” e yaga vei ira na yada ena ivavakoso. (Cakacaka 9:36, VV) Era tu beka na wekadra vakayago na yada, ia e via vukei ira ga o Tapaica me vakayaloqaqataki ira. (1 Joni 3:18) E ivakaraitaki vinaka dina o Tapaica! Rau ‘bolemate’ ena vuku i Paula o Pirisila kei Akuila. Ni ratou lomana na yapositolo o Paula o Epafira, Luke, kei Onesiforo, kei na so tale, era vukei koya ena gauna e vesu tiko kina mai Roma. (Roma 16:3, 4; 2 Timoci 1:16; 4:11; Filimoni 23, 24) Io, o ira na lotu Vakarisito tale ga nikua era ‘veilomani vakataki ira,’ baleta ni oya e isolisoli ni Kalou e vakatakilakilataki ira na tisaipeli dina i Jisu.​—Joni 13:34, 35.

13. Eda vakaraitaka vakacava nida vakavinavinakataka na noda veitacini na lotu Vakarisito?

¹³ O bau vakamareqeta na veilomani e vakaraitaki ena ivavakoso vakarisito? O dau vakavinavinakataka nira tu na tacimu vakayalo ena veiyasa i vuravura? O ira oqori era isolisoli vakayalololoma tale ga mai cake. Eda vakaraitaka vakacava nida vakavinavinakataki ira? Ena noda tomana tiko na veiqaravi tabu, ena noda vakaitavi ena veisoqoni vakarisito, kei na noda veilomani da qai vuataka na vua ni yalo tabu ni Kalou.​—Filipai 1:9; Iperiu 10:24, 25.

‘iSolisoli Tamata’

14. Na cava e vinakati vua na lotu Vakarisito e via veiqaravi me qase se dauveiqaravi vakaitalatala?

¹⁴ Era gadreva na cakacaka vinaka o ira na lotu Vakarisito tagane era saga mera qase se dauveiqaravi vakaitalatala me rawa kina nira qaravi ira na nodra itokani ena vakabauta. (1 Timoci 3:1, 8) Me rawata na itavi oya ena vinakati vua e dua na tacida tagane me matua vakayalo, kila vinaka na lewe ni iVolatabu qai gugumatua ena cakacaka vakavunau. (Cakacaka 18:24; 1 Timoci 4:15; 2 Timoci 4:5) Me yalomalumalumu, rakorako, qai dauvosovoso, ni veivakalougatataki ni Kalou e sega ni vauci ira na viavialevu, dokadoka, kei na dauveiqati. (Vosa Vakaibalebale 11:2; Iperiu 6:15; 3 Joni 9, 10) Ke vakawati, me ulunivuvale dau loloma e lewai ira vinaka nona vuvale kece. (1 Timoci 3:4, 5, 12) Ni bibi cake vua na iyau vakayalo, ena vakalougatataki koya o Jiova.​—Maciu 6:19-21.

15, 16. O cei era ‘isolisoli tamata’? Vakamacalataka na kena ivakaraitaki.

¹⁵ Nira gugumatua na qase ni ivavakoso ena cakacaka vakavunau, veivakatawani, kei na veivakavulici, eda na taleitaki ira dina na ‘isolisoli tamata’ oqori. (Efeso 4:8, 11) De ra sega ni vakavinavinaka ena veigauna kece o ira na qaravi, ia e raica kece tiko o Jiova na nodra cakacaka ena loloma na qase yalodina. Ena sega ni guilecava na nodra lomana na yacana kei na nodra qaravi ira na nona tamata.​—1 Timoci 5:17; Iperiu 6:10.

¹⁶ Vakasamataka mada na sasaga ni dua na qase gugumatua e lai sikova e dua na goneyalewa lotu Vakarisito e vakarau sele nona mona. “E sega ni tukuni rawa na nona yalovinaka, veitokoni, kei na nona veikauaitaki,” e vola e dua na nodratou itokani na vuvale oya. “E kerea me liutaki keitou ena masu vei Jiova. E mamakeukeu o tama i goneyalewa [e sega ni iVakadinadina i Jiova], e tuturu na wainimatadra na tiko ena rumu oya ni valenibula. E tarai keimami dina na nona masu na qase oya. E dau loloma dina o Jiova ni talai koya mai ena gauna donu!” E kaya e dua tale na iVakadinadina tauvimate me baleti iratou na qase eratou sikovi koya: “Ni ratou torova mai noqu loga e valenibula, au sa vakadeitaka sara ga niu na rawa ni vosota na veika ena yacovi au. E vaka au kaukaua cake mai au qai lomavakacegu.” E rawa beka ni voli na veikauaitaki vaka oya? Dravusakulukulu! E isolisoli ni Kalou e kune ga ena ivavakoso vakarisito.​—Aisea 32:1, 2.

iSolisoli ni Cakacaka Vakavunau

17, 18. (a) Na isolisoli cava ni cakacaka e solia o Jiova vei ira na nona tamata? (b) Na veivuke cava e vakarautaka na Kalou me vukei keda ena noda vunau?

¹⁷ E ka dokai duadua ena noda bula na noda qarava na Kalou Cecere Duadua o Jiova. (Aisea 43:10; 2 Korinica 4:7; 1 Pita 2:9) E rawa vei ira kece na qase se gone, tagane se yalewa era vinakata dina mera qarava na Kalou mera vakaitavi ena cakacaka vakavunau. O vakayagataka tiko beka na isolisoli totoka oqo? So era nanuma nira se bera ni yacova na kena ivakatagedegede, ia me nanumi tiko ni o Jiova e dau solia na yalona tabu vei ira na qaravi koya, e veivuke gona ena vanua eda lekata.​—Jeremaia 1:6-8; 20:11.

¹⁸ O Jiova e vakacolati ira na nona dauveiqaravi yalomalumalumu mera vunautaka na nona Matanitu, e sega ni solia vei ira na qaciqacia era nuitaki ira ga. (1 Korinica 1:20, 26-29) O ira na yalomalumalumu era kila ni vakaiyalayala ga na nodra kila, era vakararavi kina vua na Kalou me vukei ira ena cakacaka vakavunau. Era marautaka tale ga na nona veivuke vakayalo na “dauniyau yalo dina.”​—Luke 12:42-44, VV; Vosa Vakaibalebale 22:4.

Vuvale Mamarau—Na iSolisoli Totoka

19. Na cava e veivuke ena nodra vakavulici vinaka na gone?

¹⁹ Na vakawati kei na vuvale mamarau e isolisoli ni Kalou. (Ruci 1:9; Efeso 3:14, 15) Era ‘isolisoli tale ga i Jiova na gone,’ nira vakamarautaki ira na itubutubu era vakavulici ira vinaka na gone ena itovo vakalou. (Same 127:3) Ke o itubutubu, rogoca tiko ga na vosa i Jiova qai vakavulici ira na luvemu ena nona Vosa. O ira na muria na ivakasala oya ena vakalougatataki ira dina o Jiova.​—Vosa Vakaibalebale 3:5, 6; 22:6; Efeso 6:1-4.

20. Na cava ena vukei ira na itubutubu era vakanadakuya na sokalou dina na luvedra?

²⁰ Dina ga nira veituberi vinaka na itubutubu era qarava na Kalou, de ra na vakanadakuya beka na sokalou dina e so na luvedra nira sa qase cake. (Vakatekivu 26:34, 35) Oqo e rawa ni vakavuna mera rarawa na itubutubu. (Vosa Vakaibalebale 17:21, 25) Ia mera nuitaka tiko ni rawa mera lesu mai na luvedra ni vukei ira na vosa vakatautauvata i Jisu me baleta na gone cidroi. Dina ga ni biuta na nodratou vale na gone oya qai vakasabusabutaka na nona iyau kei na nona bula, ia ni lesu tale i vale, e ciqomi koya ena marau o tamana baleta ni lomani koya. (Luke 15:11-32) Se cava e yaco, mera kila tiko na itubutubu lotu Vakarisito yalodina ni o Jiova e kila na ka e yaco, e dau loloma, qai dau veitokoni tu ga.​—Same 145:⁠14.

21. Meda vakarorogo vei cei, ena vuku ni cava?

²¹ Meda vakadeitaka se cava e bibi dina ena noda bula. Eda saga vakaukaua tiko beka na iyau vakayago e rawa ni vakararawataki keda kei na noda vuvale? Se eda saga tiko na ‘isolisoli vinaka e yaga’ e solia na “Tama ni Rarama.” (Jemesa 1:17, VV) O Setani, e “vu mai vua na lasu kece ga,” e vinakata meda vakaogai keda vakalevu ena qara iyau meda kua kina ni rawata na marau kei na bula. (Joni 8:44; Luke 12:15) Ia o Jiova e kauaitaki keda ni vinakata me solia vei keda na veika vinaka kece. (Aisea 48:17, 18) O koya gona, meda vakarorogo tiko ga vua na Tamada vakalomalagi dau loloma da qai “rekitaki” koya. (Same 37:4) Ke da cakava oqori, ena vakavutuniyautaki keda na isolisoli uasivi kei na veivakalougatataki i Jiova, eda na sega vakadua ni rarawa.

[iVakamacala era]

O se Nanuma Tiko?

• E vei eda na marau vakalevu kina?

• Na cava e so na isolisoli i Jiova vei ira na nona tamata?

• Na cava e isolisoli kina na cakacaka vakavunau?

• Na cava mera cakava na itubutubu me vakalougatataki ira kina na Kalou nira tuberi luvedra?

[iYaloyalo ena tabana e 16]

O bau vakavinavinakataka na isolisoli ni Kalou, na nona Vosa volai?

[iYaloyalo ena tabana e 17]

Dina ga ni sotava na bula dredre o Laurel Nisbet, e kaukaua tiko ga nona qarava na Kalou

[iYaloyalo ena tabana e 18]

Me vakataki Tapaica, era kilai tani na lotu Vakarisito nikua ena nodra veilomani

[iYaloyalo ena tabana e 19]

Era kauaitaki ira na nodra itokani ena vakabauta o ira na qase ni ivavakoso lotu Vakarisito