Marautaka na Vua ni Nomu Yalodina

“Na veivakalougatataki maivei Jiova sa ia na veivakavutuniyautaki, ka sa sega ni kuria ko koya e na ka rarawa.”​—VOSA VAKAIBALEBLE 10:22.

1, 2. Na cava meda qarauna kina meda kua ni kauaitaka vakasivia na veika e se bera mai?

“NIDA kauaitaka vakalevu na veika e se bera mai . . . eda sega ni lai marautaka wale kina na veika eda raica tiko ena gauna oqo,” e kaya e dua na vuku ni Mereke. E vakadinadinataki oqo vei ira na gone era diva vakalevu tu na gauna ni uabula ra qai sega ni kauaitaka na yaga ni gauna ni nodra gone era sa veikalikali kaya.

² E rawa ni tarai keda tale ga na qaravi Jiova tiko na ivakarau ni rai oqori. Vakasamataka mada na ka e rawa ni yaco. Eda sa namaka tiko me parataisi o vuravura me vaka e yalataka na Kalou. Eda sa waraka tu oqo na gauna sa na sega kina na tauvimate, na qase, na momosi, kei na rarawa. E totoka na noda namaka tiko na veika oqori, ia vakacava kevaka eda kauaitaka vakalevu tiko ga na veivakalougatataki vakayago e se bera mai da qai sega ni raica se kauaitaka na veivakalougatataki vakayalo eda vakila tiko ena gauna oqo? E ka ni rarawa ke vaka oqori na noda rai! E rawa ni vakavuna meda yalolailai qai ‘oca na yaloda baleta ni bera na ka eda nuitaka tiko.’ E sega ni vaka na ka eda namaka. (Vosa Vakaibalebale 13:12) Nida sotava na leqa kei na veika dredre e rawa sara ga nida rarawa da qai yalolailai. Eda na sega ni vosota na veika dredre, ia e rawa ni vakavuna ga meda vosakudrukudru. Ia e rawa ni levei kece oqori kevaka eda marautaka na noda vakalougatataki tiko ena gauna oqo.

3. Na cava ena vakabibitaki ena ulutaga oqo?

³ E kaya na Vosa Vakaibalebale 10:22: “Na veivakalougatataki maivei Jiova sa ia na veivakavutuniyautaki, ka sa sega ni kuria ko koya e na ka rarawa.” E sega li ni marautaki na sautu vakayalo era vakila tiko na tamata i Jiova ena gauna oqo? Meda dikeva mada e so na tiki ni sautu vakayalo oqo kei na sala eda vakila kina. Nida dikeva na nona vakalougatataki ira tiko o Jiova na ‘yalododonu era yalodina’ tiko, oqo ena uqeti keda meda qarava tiko ga ena mamarau na Tamada vakalomalagi.​—Vosa Vakaibalebale 20:7.

‘Veivakalougatataki e Veivakavutuniyautaki’ ena Gauna Oqo

4, 5. Na ivakavuvuli cava mai na iVolatabu o marautaka, ena vuku ni cava?

⁴ Noda kila na ivakavuvuli dina ena iVolatabu. Era kaya na veilotu ni Veivanua Vakarisito nira vakabauta na iVolatabu. Ia, era sega ni duavata kei na ka e vakavuvulitaka na iVolatabu. O ira mada ga na lewe i dua na lotu e rawa ni duidui na ka era nanuma me baleta na ka e kaya na iVolatabu. Era duidui sara mai vei keda na tamata i Jiova! Dina ga nida duidui matatamata, qai duidui na noda itovo vakavanua, ia eda qarava tiko na Kalou eda kila na yacana. E sega ni tiki ni letoluvakalou o koya. (Vakarua 6:4; Same 83:18; Marika 12:29) Eda kila tale ga ni sa vakarau macala na kena veiletitaki na dodonu i Jiova me liutaki lomalagi kei vuravura, kei na noda okati tale ga kina baleta ni okati kina na noda yalodina vua. Eda kila na veika dina me baleti ira na sa mate da qai sega ni rerevaka vakalialia e dua na Kalou e kainaki ni dau vakararawataki ira na tamata ena bukawaqa se biuti ira i puregatorio.​—Dauvunau 9:5, 10.

⁵ Eda marau tale ga ena noda kila nida sega ni bula vakaidewadewa mai! Ia e buli keda ga na Kalou meda ucui koya. (Vakatekivu 1:26; Malakai 2:10) E lagata na daunisame vua na nona Kalou: “Au na vakavinavinaka vei kemuni; ni sa ka rerevaki ka vakurabui na noqui bulibuli: a ka veivakurabuitaki na nomuni cakacaka: a ka oqo sa kila vakavinaka na yaloqu.”​—Same 139:14.

6, 7. Na veisau cava o cakava ena nomu bula se na nodra bula e so tale e yaga vakalevu?

⁶ Galala mai na itovo kei na ivakarau e veivakaleqai. E dau kacivaki vakalevu ena sala ni vakauitukutuku na ca ni vakatavako, gunu yaqona vakasivia, kei na veiyacovi vakaveitalia. Ia e sega ni dau kauaitaki vakalevu na ivakasala oya. Ia, vakacava ni sa kila e dua na tamata lomadina ni cata na Kalou na itovo vaka oya qai rarawataki ira tale ga na vakayacora na itovo oqori? Ena sega ni vakayacora na tamata oya na itovo vaka oqori! (Aisea 63:10; 1 Korinica 6:9, 10; 2 Korinica 7:1; Efeso 4:30) E sega ni baleta ni via vakamarautaki Jiova ga, ia e yaga tale ga vua ni na bulabula vinaka kina qai lomavakacegu tale ga.

⁷ E dau dredre na kena biu tani na itovo ca. Ia ena veiyabaki, era sa biuta tani tiko na itovo ca e vicasagavulu na udolu na tamata. Era yalataki ira vei Jiova ra qai papitaiso mera vakaraitaka raraba kina nira sa sega ni cakava na itovo e sega ni marautaka na Kalou. E uqeti keda dina oya! E vakadeitaka na noda saga tiko meda kua ni bobula ina ivalavala ca e vakaleqai keda.

8. Na ivakasala cava mai na iVolatabu e vukea me mamarau na vuvale?

⁸ Marautaki ni bula vakavuvale. Sa qai torosobu tiko ga na bula vakavuvale ena levu na vanua e vuravura. E levu na vakawati e tini ena veisere, ra qi mai vakaloloma tu yani na gone. Ena so na vanua e Urope, sa rauta ni 20 na pasede ni vuvale era itubutubu ledua. E vukei keda vakacava o Jiova meda muria tiko na sala ni yalododonu nira vaka tu oqo na ituvaki ni levu na vuvale? Yalovinaka wilika na Efeso 5:22–6:4, mo raica kina na ivakasala momona ni Vosa ni Kalou vei ira na tama, tina, kei na gone. Ni bulataki na veika e tukuni e keri kei na veitikinivolatabu tale e so, ena qaqaco vinaka na ivau ni vakawati, ena vukei ira na itubutubu mera susugi ira vinaka na gone, qai vukea tale ga me mamarau na vuvale. Eda sega li ni marautaka na veivakalougatataki oya?

9, 10. E duidui vakacava na noda raica na gauna e se bera mai ni vakatauvatani kei ira e vuravura?

⁹ Vakadeitaki vei keda ni vakarau wali na veileqa e vuravura. Dina ga ni sa levu sara na ka era kila na saenitisi kei ira na vuku ra qai sasaga vakaukaua tiko e so na iliuliu, ia e sega ni wali rawa e so na leqa lelevu eda sotava e veisiga. O Klaus Schwab, o koya e tauyavutaka na World Economic Forum e vakaraitaka ni sa qai “balavu ga na itui ni veileqa e sotavi tiko e vuravura, ia na gauna me wali kina sa lekaleka sara.” E cavuta na “veileqa e e tara na veiyasa i vuravura me vaka na nodra vakacaca na batikadi, vakaleqai ni iyaubula, kei na kena sega ni dei na bula vakailavo.” E tinia o Schwab: “E vinakati vakalevu sara ena gauna oqo mera vakatulewa ra qai walia vata na veiyasa ivuravura na leqa e sotavi tiko.” Sa mai tadodo oqo na ika21 ni senitiuri, ia e vakaloloma sara na veika e tu mai liu.

¹⁰ E veivakacegui dina na noda kila ni sa vakarautaka o Jiova na nona Matanitu ena veiliutaki kina na Mesaia me walia kece na leqa e sotava tiko na kawatamata! Ena vakayagataka na Kalou dina na Matanitu oqori me ‘vakaotia na ivalu’ me rawati kina na “sautu levu.” (Same 46:9; 72:7) Na Tui lumuti o Jisu Karisito ena qai ‘vakabulai ira na dravudravua, o ira na vakararawataki, kei ira na tamata malumalumu mai na ivalavala kaukaua.’ (Same 72:12-14) Ena sega ni leqa na kakana ena gauna e veiliutaki kina na Matanitu ni Kalou. (Same 72:16) O Jiova ‘ena tavoya tani na wainimata kece ga mai na matada, sa na sega tale na mate; sa na sega tale ga na rarawa se na tagi se na vutugu, nira sa takali tani na veika makawa.’ (Vakatakila 21:4, VV) Ni sa tauyavu oti na Matanitu ni Kalou mai lomalagi, sa voleka sara oqo na gauna me vakacolasau kina e vuravura.​—Taniela 2:44; Vakatakila 11:15.

11, 12. (a) E rawa beka ni dei na noda marau kevaka eda qara na marau vakavuravura? Vakamacalataka. (b) Na cava ga e kauta mai na marau dina?

¹¹ Noda kila na ka e vakavuna na marau dina. Na cava e vakavuna na maru dina? E kaya e dua na vuniwai ni vakasama ni tolu na ka e vakavuna na marau: na marau vakavuravura, na vakaitavi (ena cakacaka se qaravi ni vuvale), kei na vakayacori ni cakacaka e vakainaki (na cakacakataki ni dua na inaki levu se noda cakava na cakacaka e yaga vei ira na tani). Vei iratou na tolu oqo, e tukuna o koya ni sega soti ni bibi na marau vakavuravura qai kaya tale ga: “E taleitaki sara oqo baleta ni levu ga na tamata era vakaliuca tu na marau vakavuravura.” Na cava na rai ni iVolatabu ena tikina oqo?

¹² A kaya o Tui Solomoni e Isireli makawa: “Au a kaya e lomaqu, Oqo mada, ka’u na vakatovolei iko e na reki, o koya mo ia mada kina na marau: ka raica, oqo talega sa ka wale. Au a kaya e na vuku ni dredre, Sa ka lialia: e na vuku ni reki talega, A cava na betena?” (Dauvunau 2:1, 2) E vakaraitaka na iVolatabu ni sega ni dei na marau e vu mai na marau vakavuravura. Vakacava na vakaitavi ena cakacaka? Na cakacaka eda cakava tiko ni kena vunautaki na Matanitu ni Kalou kei na cakacaka ni veivakatisaipelitaki e cakacaka yaga duadua. (Maciu 24:14; 28:19, 20, VV) Nida wasea vei ira tale e so na itukutuku ni veivakabulai e tukuni ena iVolatabu, oqo ena vakarawarawataka na noda vakabulai kei na nodra vakabulai tale ga o ira na rogoci keda. (1 Timoci 4:16) Nida “matacakacaka vata kei na Kalou,” eda vakila nida “kalougata vakalevu cake me da solia na ka, ka sega soti na noda dau ciqoma na ka.” (1 Korinica 3:9, VV; Cakacaka 20:35, VV) Na cakacaka oqo e vukea na kena vakainaki noda bula qai rawa tale ga kina vua na Dauveibuli me tauca e dua na vosa vei koya e beitaki koya tiko, o Setani na Tevoro. (Vosa Vakaibalebale 27:11) Io, e vakaraitaka vei keda o Jiova ni na qai rawa ga ni dei na noda marau kevaka eda qaravi Kalou.​—1 Timoci 4:8, NW.

13. (a) E vakamarautaki keda vakacava na Koronivuli ni Vuli Vunau? (b) Sa yaga vakacava vei iko na Koronivuli ni Vuli Vunau?

¹³ Porokaramu ni veivakavulici e yaga qai bibi. O Gerhard e qase ni ivavakoso ni iVakadinadina i Jiova. Ni vakasamataka lesu na gauna e se gone kina, e kaya: “Ni’u se gone, a dau dredre sara meu vosa. E dau dredre meu vosa vakamatata, au dau lai tini kaka sara. Oqo e vakavuna meu beci au, au qai dau yalolailai tale ga. Rau kauti au na noqu itubutubu ina vanua ni vuli vosa, ia e tawayaga na nodrau sasaga. Na noqu leqa oqo e tiko ga ena noqu vakasama. E qai vukei au e dua na isolisli totoka i Jiova, oya na Koronivuli ni Vuli Vunau. E uqeti au sara na noqu curu ena koronivuli oqo. Au saga sara vakaukaua meu muria na ka au vulica tiko. E mani yaga sara! Sa matata sara mai na noqu vosa, au sa sega tale ni yalolailai, au sa doudou tale ga ni lako ena cakacaka vakavunau. Ena gauna oqo au sa dau vunau tale ena vunau soqovi levu. Au vakavinavinakataki Jiov dina baleta e vaka e solia vei au e dua na bula vou na nona vakarautaka na koronivuli oqo.” Eda sega li ni marautaka na nona vakavulici keda tiko o Jiova?

14, 15. Na veivuke cava e tu vakarawarawa vei keda ena gauna ni leqa? Tukuna e dua na kena ivakaraitaki.

¹⁴ Noda veiwekani voleka kei Jiova kei na nodra veitokoni na tacida ena veiyasa ivuravura. E vakaitikotiko mai Jamani o Katrin. Dua na ka na nona nuiqawaqawa ni rogoca e dua na uneune vakaitamera e vakavuna e dua na ualoka levu ena cevaicake kei Esia. E gade voli mai Thailand o luvena yalewa ena gauna e yaco kina na leqa oqo. Ena loma ni 32 na aua a sega ni vakadeitaka na tina oqo se e se bula tiko o luvena se sa dua vei ira na iwiliwili e tubu tiko ga e veiaua era sa vakayalia na nodra bula. E lomavakacegu dina o Katrin ena kena tukuni yani vua ena talevoni ni bula vinaka tiko o luvena!

¹⁵ Na cava e vukei Katrin ena gauna ni nona nuiqawaqawa oya? E vola mai: “Au voleka ni vakayagataka kece na gauna oqori ena noqu masu vei Jiova. Au vakila votu na kaukaua e soli vei au kei na noqu lomavakacegu tale ga. Era sikovi au na taciqu vakayalo mera mai vakacegui au.” (Filipai 4:6, 7, VV) Sa na wacava na nona rarawa ke a sega ni vakayagataka na gauna oya me masu tiko kina vei Jiova ra qai vakacegui koya tiko na mataveitacini! E duatani duadua na veivakalougatataki eda vakila ena noda veiwekani voleka kei Jiova kei Luvena kei na noda veimaliwai vakamataveitacini lotu Vakarisito. Meda kua sara ni vakawalena.

16. Vakamacalataka e dua na vakasavuirogorogo e vakaraitaka na yaga ni inuinui ni veivakaturi.

¹⁶ Na inuinui ni noda raici ira tale na wekada era sa mate. (Joni 5:28, 29) A susugi me iVakadinadina i Jiova na gonetagane o Matthias. E vakawalena na nona kalougata ena nona biuta na ivavakoso vakarisito ena gauna e se itabagone kina. E qai vola mai ena gauna oqo: “Keirau sega sara ga ni dau veitalanoa vinaka kei tamaqu. Keirau dau veileti ga vakalevu. Ia, e vinakata voli ga o tamaqu meu mai marautaka na bula e vinaka cake. E lomani au dina, na ka au sega ni vakila ena gauna oya. Ena 1996, niu tagi toka au qai taura toka na ligana e yasa ni nona loga, au kerei tamaqu me vosoti au ena vuku ni veika au a cakava, niu lomani koya sara vakalevu. Ia sa sega ni rogoci au rawa o koya. Ni tauvi koya ga vakalekaleka e dua na mate, sa mai vakacegu sara. Kevaka keirau lai sota kei tamaqu ena gauna ni veivakaturi, keirau na lai veimarautaki dina. Ena marau tale ga ni rogoca niu sa qase tiko ni ivavakoso, keirau sa painia ruarua tiko kei watiqu.” E veivakalougatataki dina vei keda na inuinui ni veivakaturi!

“Sa Sega ni Kuria ko Koya e na Ka Rarawa”

17. E vukei keda vakacava na noda vakasamataka na nona vakalougatataki keda o Jiova?

¹⁷ E kaya o Jisu Karisito me baleti Tamana vakalomalagi: “Sa vakacabea ko koya na nona matanisiga vei ira na tamata ca kei ira na tamata vinaka, ka vakatauca na uca vei ira na yalododonu kei ira na tawa yalododonu.” (Maciu 5:45, VV) Kevaka e vakalougatataki ira na tamata ca kei ira na tawa yalododonu na Kalou o Jiova, sa na qai wacava na nona vakalougatataki ira na muria na sala ni yalododonu! “Ena sega ni bureitaka [o Jiova] e dua na ka vinaka vei ira era sa lako vakadodonu,” e kaya na Same 84:11. Nida vakasamataka na levu ni nona kauaitaki keda na lomani koya, eda sega ni tukuna rawa na levu ni noda vakavinavinaka kei na marau!

18. (a) Na cava e kainaki kina ni sega ni kuria ena rarawa o Jiova na nona veivakalougatataki? (b) Na cava era sotava kina na rarawa e levu na tamata yalodina ni Kalou?

¹⁸ “Na veivakalougatataki maivei Jiova,” oqo na ka e vakavutuniyautaki ira vakayalo na nona tamata. E vakadeitaki tale ga vei keda ni “sega ni kuria ko koya e na ka rarawa.” (Vosa Vakaibalebale 10:22) Ia na cava e vakatarai kina mera sotava na tamata yalodina ni Kalou na veivakatovolei e vakararawataki ira? E tolu na ka e vakavuna na noda sotava tiko na veika rarawa. (1) Nida tamata ivalavala ca. (Vakatekivu 6:5; 8:21; Jemesa 1:14, 15) (2) O Setani kei na nona timoni. (Efeso 6:11, 12) (3) Na vuravura ca oqo. (Joni 15:19) E vakatara ga o Jiova me yacovi keda na veika ca, ia e sega ni vakavuna o koya. “Sa lako maicake nai solisoli vinaka kecega kei nai solisoli kecega e yaga sara, a sa lako sobu mai vua na Tama ni rarama.” (Jemesa 1:17) E sega ni veivakararawataki na veivakalougatataki i Jiova.

19. Na cava e waraki ira na lako tiko ena yalodina?

¹⁹ Ena vinakati meda toro volekata na Kalou me rawa kina nida vutuniyau vakayalo. Nida sa veiwekani voleka kei koya, eda na ‘binia tu me noda na yavu ena yaga ena gauna e muri mai meda taura kina na bula, oya na bula dina,’ se bula tawamudu. (1 Timoci 6:12, 17-19) Ena vuravura vou e vakarautaka na Kalou, ena qi kurivi na noda vutuniyau vakayalo ena noda vakalougatataki tale ga vakayago. Ena qai soli na bula dina vei ira kece na “vakarorogo ki na vosa i Jiova.” (Vakarua 28:2) Meda tomana tiko mada ga ena marau na noda lako tiko ena yalodina.

Na Cava o Vulica?

• Na cava e sega ni ka vakavuku kina meda kauaitaka vakasivia na veika e se bera mai?

• Na veivakalougatataki cava eda marautaka tiko ena gauna oqo?

• Na cava era sotava kina na rarawa na tamata yalodina ni Kalou?