Na Cava e Yaga Dina?

Eda dau marautaka nida taukena e dua na ka e yaga dina. Na cava beka oya? E dua na uma ilavo levu? Na vatutalei saulevu qai rairai vinaka? Na rogo kei na vakaitutu? Era dau vinakata vakalevu e vuqa na tamata na veika vaka oya. Nida taukena, e rawati kina na veika e gadrevi ena noda bula, e vakainaki kina na noda bula, se vakacegui kina na noda gagadre ni via rogo kei na noda rawaka. Eda sasagataka tiko beka meda taukena na veika vaka oya, noda nuitaka nida na sauva kina na noda isausau kei na veika eda gadreva ena bula e se bera mai?

VAKAVUQA, e dau yaga ga e dua na ka vei ira e so ke na vukei ira se vakaceguya na nodra gagadre. Eda karona na ka e dau vakavuna na tiko vinaka qai solia tale ga vei keda na inuinui e dei. Eda dau vakamareqeta na ka ena walia vakatotolo na noda leqa, na ka e vakacegui keda, se na noda kauaitaki. Ia ni dau veiveisau na noda gagadre se na ka eda dau taleitaka, ke da vakataudeitaka kina na yaga ni dua na ka,e vakaraitaka nida taura tu ga vakamamada na ka qai qiqo noda rai. Na kena dina, e vakataudeitaki na ka e yaga dina mai na noda vakila na ka eda gadreva vakalevu.

Na cava eda dau gadreva vakalevu? E tawayaga na ka kece ke sega na ka bibi taudua​​—⁠na bula. Ke sega na bula ena sega ni rawa e dua na ka. A vola na tui makawa ni Isireli o Solomoni: “Ko ira na mate era sa sega ni kila e dua na ka, . . . ni sa sega na cakacaka, se na vakasama, se na kila ka, se na vuku, e nai bulubulu.” (Dauvunau 9:​5, 10) Ke da mate, eda vakayalia ena voraki na ka kece eda taukena. Eda gadreva gona kina vakalevu na ka ena vakabulai keda. Na cava beka oya?

Na Cava Ena Vakabulai Keda?

E kaya o Tui Solomoni: “Sai vakaruru nai lavo.” (Dauvunau 7:​12) Eda rawa ni voli kakana qai dua noda vale vinaka ke veirauti na noda ilavo. Eda na marautaka na lako ina veivanua tani nida vakailavo. Eda na volia kina na veika eda gadreva nida cegu mai na cakacaka, nida sa qase, se tautauvimate. E yaga vakalevu na vakailavo. Ia, ena sega ga ni vakatau kina na noda bula. A vakasalataki Timoci kina na yapositolo o Paula: “Vakarota vei ira era sa vutuniyau e na gauna oqo, me ra kakua ni dokadokai ira se vakararavi e nai yau sa sega ni tu dei, vua ga na Kalou bula.” (1 Timoci 6:​17) Ke mani noda kece na ilavo ena vuravura, ena sega ga ni volia rawa na noda bula.

Dikeva na ivakaraitaki ni dua na turaga na yacana o Hitoshi. A susugi cake mai ena bula dravudravua, oya na vuna a gadreva kina vakalevu me vutuniyau. E nuitaka vakalevu o Hitoshi na ilavo, ni rawa ni veivaqumi kina. A sikovi koya i nona vale e dua na turaga qai tarogi koya se kila tu beka ni a mate o Jisu Karisito ena vukuna. A lomatarotarotaka o Hitoshi ni sega ni vakabauta ni bau dua e makutu me mate ena vukuna. A lai rogo ivunau vakaivolatabu qai kurabui ni rogoca kina na ivakasala ‘me vinaka tu ga na matamu.’ E vakamacalataka o koya e vunau na mata e “vinaka” e dau raiyawa qai raica ga na ka vakayalo. (Luke 11:34) Sa sega tale ni qai vakaogai koya ena vaqara ilavo ni sa tekivu vakaliuca ga na ka vakayalo ena nona bula.

Ena rawa ni dei da qai tiko vinaka ke da taukena na iyau vakayago. Ke levu sara eda na sega ni nuiqawaqawataka na veika eda gadreva e veisiga. Eda na nanuma beka ni sa bau yaga na noda bula ke da vakavale vinaka ena dua na vanua era vakaitikotiko kina o ira era rawati ira. Na isulu vovou kei na motoka vinaka ena vakavuna na nodra qoroi keda na tani.

E veivakalougatataki nida ‘kunea na kena vinaka ni noda cakacaka kece ga.’ (Dauvunau 3:​13) Ni levu na ka eda taukena ‘era na vakacegu, kana, gunu, ka marau tiko’ o ira na wekada lomani. Ia, e yaga ga vakalekaleka na iyau vakayago. Ena vuku ni dau kocokoco, a veivakasalataki kina o Jisu Karisito ena nona kaya: “Sa sega ni kalougata na tamata e na vuku ni sa levu na ka sa tu vua.” (Luke 12:​15-​21) Veitalia ga na levu ni kena isau se na yaga ni ka eda taukena, ena sega ga ni vakadeitaka na noda bula.

Me kena ivakaraitaki o Liz, a vakamautaka e dua na turaga vakavatu. A tukuna: “A dua na neirau vale rairai totoka qai rua na neirau motoka. Ni keirau rawati keirau vinaka e rawa kina me keirau volia na iyau vakayago cava ga e dulaka tu o vuravura . . . Ia, au se lomaleqataka ga na ilavo.” E vakamacalataka: “Ni levu na ka keirau taukena, ena levu tale ga na ka keirau vakayalia ke yaco e dua na leqa. Kena irairai, na levu ga ni ka o taukena, na levu tale ga ni nomu lomaleqa.”

Le levu era okata me sa dua tu na ka na rogo kei na vakaitutu baleta nira na vakacaucautaki ra qai dokai tale ga kina. Ena rai ni vuravura, ke o rawata e dua na cakacaka vinaka ena raici me sa dua na ka. Eda na rogo beka ke da vakayagataka vinaka na noda taledi, se na noda kila na cakacaka ni liga e so. E so era na vakacaucautaki keda, era na vakacerecerea na noda nanuma, ra qai dau vinakata mera vakalomavinakataki keda. E rawa ni vakamarautaki keda qai vakacegui keda na veika kece oqo. Ia, na kena itinitini, era na oti yani. A taukena o Solomoni na lagilagi kei na kaukaua kece e rawa ni nona e dua na tui, ia a qai yasovaka: “Rau na sega ni nanumi ruarua na vuku kei na lialia . . . ka ni na guileca[vi] . . . na ka kecega sa tu.” (Dauvunau 2:​16) Ena sega ni vakabulai keda na rogo se vakaitutu.

Na dauceuceu o Celo, e raica rawa ni tiko na ka e vinaka cake mai na rogo. Ni matai sara ena cakacaka oya, mani vakadonui me lai vulica na ceuceu me dua kina na kenadau. Sega ni dede sa ra vakacaucautaki koya na dauvolaitukutuku kei ira na kenadau ena cakacaka ni liga. E saravi e vuqa na ka e ceuta ena veikorolelevu mai Urope. E tukuna o Celo: “Ena dua na gauna a bibi duadua ena noqu bula na cakacaka ni liga. Ia, yaco meu vakila ni kevaka au na tomana tiko ga na cakacaka oqo au na vaka e dua e qarava tiko e rua na turaga. (Maciu 6:​24) Au vakadeitaka na ka bibi duadua au rawa ni cakava oya na kena vunautaki na Matanitu ni Kalou. Au mani vakatulewataka kina meu sa biuta noqu cakacaka ni dauceuceu.”

Na Cava e Bibi Taudua?

Ke sega na bula ena sega ni vakaibalebale se yaga e dua na ka, na cava meda rawata me vakadeitaka nida na bula tiko ga? Na Kalou o Jiova e vu ni bula kece. (Same 36:⁠9) Io, “sa i koya ga eda sa cegu tiko ka yavala, ka bula voli kina.” (Cakacaka 17:​28, VV) E nona isolisoli vei ira e lomana na bula tawamudu. (Roma 6:​23) Eda na rawata vakacava na isolisoli oya?

Noda rawata na isolisoli ni bula tawamudu ena vakatau ena noda veiwekani voleka kei Jiova. O koya gona, e bibi taudua na nona veivakadonui ni vakatauvatani kei na cava ga eda rawa ni taukena. Nida rawata, eda na sotava kina na marau dina qai tawamudu. Ke sega na veivakadonui ni Kalou, eda na sotava na rusa tawamudu. E matata vinaka, ni bibi taudua ga na ka ena vukei keda meda veiwekani vinaka kina kei Jiova.

Ka Meda na Cakava

Noda rawaka ena vakatau ena noda kilaka. E ivurevure ni kilaka dodonu na Vosa i Jiova, na iVolatabu. Na ivola duadua oqori e tukuna vei keda na ka meda cakava me marau kina na Kalou. Ena gadrevi gona meda vulica vakavinaka na iVolatabu. Na noda vulica vagumatua na ka kece me baleta na Kalou o Jiova kei Jisu Karisito eda na taukena kina na ‘kila e rawati kina na bula tawamudu.’ (Joni 17:⁠3) Na kila oya e dua na iyau me vakamareqeti!​​—⁠Vosa Vakaibalebale 2:​1-5.

E vakarautaki keda na kila eda vulica mai na Vosa ni Kalou ina ikalawa e tarava​​—⁠vakabauti Jisu Karisito. A vakarota o Jiova ni na rawa nira torovi koya kece ena vuku i Jisu wale ga. (Joni 14:⁠6) Io, “sa sega na bula e na vukuna e dua tani.” (Cakacaka 4:​12) O koya gona na noda vakabulai ena sega ni vakatau ena “siliva se na koula . . . , [ia] e na dra talei ga i Karisito.” (1 Pita 1:​18, 19) Eda na vakaraitaka na noda vakabauta ena noda vakadinata na ivakavuvuli i Jisu qai muria na nona ivakaraitaki. (Iperiu 12:​1-3; 1 Pita 2:​21) E bibi dina na nona isoro! Na yaga ni isoro oya ena vakatautaki kina na nodra bula tawamudu mai muri na kawatamata kece. Na gauna ena vakayagataki kina vei keda na kena vinaka taucoko, eda na rawata kina na isolisoli mareqeti dina, na bula tawamudu.​​—⁠Joni 3:​16.

E kaya o Jisu: “Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kecega.” (Maciu 22:37) Nida lomani Jiova e kena ibalebale “me da muria na nona vunau.” (1 Joni 5:⁠3) E vakarota vei keda na nona ivunau meda kua ni vakavuravura, bulataka na ivalavala dodonu, da qai tokona na nona Matanitu ena yalodina. Oya na sala eda “digitaka [kina] . . . na bula” sega ni mate. (Vakarua 30:19) Kevaka gona eda ‘toro voleka yani vua na Kalou, ena toro voleka mai vei keda o koya.’​​—⁠Jemesa 4:⁠8.

E uasivia na iyau kece ni vuravura na veivakadeitaki ni nona veivakadonui na Kalou. Era tamata mamarau taudua ena vuravura o ira sa rawata na nona veivakadonui! Meda sasagataka mada ga meda taukena na iyau e yaga dina​​—⁠na veivakadonui i Jiova. Meda tugana tale mada ga i lomada na vosa ni veivakadreti i Paula: “Mo muria na yalododonu, na lotu, na vakabauta, na loloma, na vosota, na yalomalua. Mo ia ga nai valu vinaka ni vakabauta, taura na bula tawa mudu.”​​—⁠1 Timoci 6:​11, 12.

[iYaloyalo ena tabana e 21]

Na cava o dau vakamareqeta vakalevu? Na ilavo, na veika vakayago o taukena, na rogo, se dua tale na ka?

[iYaloyalo ena tabana e 23]

Ena gadrevi meda vulica vakavinaka na iVolatabu